ਦੀਵਾਲੀ ਤੋਂ ਪਹਿਲਾਂ ਐੱਫ਼.ਡੀ.ਏ. ਦਾ ਐਕਸ਼ਨ, Zepto, Blinkit ਤੇ Biryani By Kilo ਦੇ ਲਾਇਸੈਂਸ ਕੀਤੇ ਰੱਦ

ਡਿਜੀਟਲ ਡੈਸਕ, ਮੁੰਬਈ : ਦੀਵਾਲੀ ਤੋਂ ਪਹਿਲਾਂ ਮਹਾਰਾਸ਼ਟਰ ਦੇ ਖੁਰਾਕ ਅਤੇ ਦਵਾਈ ਪ੍ਰਸ਼ਾਸਨ (FDA) ਨੇ ਪੂਰੇ ਸੂਬੇ ਵਿੱਚ ਖਾਣ-ਪੀਣ ਦੇ ਕਾਰੋਬਾਰ ਨਾਲ ਜੁੜੇ 105 ਲਾਇਸੈਂਸ ਮੁਅੱਤਲ ਕਰ ਦਿੱਤੇ ਹਨ। ਇਹ ਕਾਰਵਾਈ 4 ਅਤੇ 5 ਨਵੰਬਰ ਨੂੰ ਚਲਾਈ ਗਈ ਵਿਸ਼ੇਸ਼ ਦੀਵਾਲੀ ਮੁਹਿੰਮ ਦੌਰਾਨ ਕੀਤੀ ਗਈ, ਜਿਸ ਤਹਿਤ ਮੁੰਬਈ ਵਿੱਚ 28 ਲਾਇਸੈਂਸ ਮੁਅੱਤਲ ਕੀਤੇ ਗਏ।

ਇਸ ਤੋਂ ਇਲਾਵਾ 7 ਅਦਾਰਿਆਂ ਨੂੰ ਬੰਦ ਕਰਨ ਦੇ ਹੁਕਮ ਦਿੱਤੇ ਗਏ ਹਨ। ਇਨ੍ਹਾਂ ਵਿੱਚੋਂ 3 ਪੁਣੇ, 2 ਅਮਰਾਵਤੀ ਅਤੇ ਇੱਕ-ਇੱਕ ਮੁੰਬਈ ਤੇ ਕੋਂਕਣ ਖੇਤਰ ਵਿੱਚ ਸਥਿਤ ਸਨ।

ਇਸ ਮੁਹਿੰਮ ਦੌਰਾਨ ਕਈ ਵੱਡੇ ਕੁਇੱਕ-ਕਾਮਰਸ ਪਲੇਟਫਾਰਮਾਂ ਅਤੇ ਮਸ਼ਹੂਰ ਫੂਡ ਚੇਨਾਂ ਵਿਰੁੱਧ ਵੀ ਕਾਰਵਾਈ ਕੀਤੀ ਗਈ। ਮੁੰਬਈ ਵਿੱਚ ਜ਼ੈਪਟੋ (ਵਰਲੀ) ਅਤੇ ਬਲਿੰਕਿਟ (ਬਲਿੰਕ ਕਾਮਰਸ ਪ੍ਰਾਈਵੇਟ ਲਿਮਟਿਡ) ਦੇ ਲਾਇਸੈਂਸ ਮੁਅੱਤਲ ਕਰ ਦਿੱਤੇ ਗਏ। ਇਸ ਤੋਂ ਇਲਾਵਾ ਬਿਰਯਾਨੀ ਬਾਏ ਕਿਲੋ, ਟੌਸਿਨ ਪੀਜ਼ਾ (ਵਰਲੀ) ਅਤੇ ਜੰਬੋ ਬਰਗਰ ਵਰਗੇ ਫੂਡ ਆਊਟਲੈਟਸ ਵਿਰੁੱਧ ਵੀ ਇਹੀ ਕਾਰਵਾਈ ਕੀਤੀ ਗਈ।

ਰਾਜਧਾਨੀ ਬਿਰਯਾਨੀ ਸੈਂਟਰ ਨੂੰ ਪੂਰੀ ਤਰ੍ਹਾਂ ਬੰਦ ਕਰਨ ਦੇ ਹੁਕਮ

ਬੋਰੀਵਲੀ ਸਥਿਤ ਰਾਜਧਾਨੀ ਬਿਰਯਾਨੀ ਸੈਂਟਰ ਨੂੰ ਫੂਡ ਸੇਫਟੀ ਐਂਡ ਸਟੈਂਡਰਡਜ਼ ਅਥਾਰਟੀ ਆਫ ਇੰਡੀਆ (FSSAI) ਦੇ ਨਿਯਮਾਂ ਦੀ ਉਲੰਘਣਾ ਕਰਨ ਕਾਰਨ ਪੂਰੀ ਤਰ੍ਹਾਂ ਬੰਦ ਕਰਨ ਦੇ ਹੁਕਮ ਦਿੱਤੇ ਗਏ ਹਨ।

ਨਾਗਪੁਰ ਵਿੱਚ ਡੀ-ਮਾਰਟ ਦੇ ਇੱਕ ਆਊਟਲੈੱਟ ਵਿਰੁੱਧ ਵੀ ਕਾਰਵਾਈ ਕੀਤੀ ਗਈ। ਲਾਇਸੈਂਸ ਦੀਆਂ ਸ਼ਰਤਾਂ ਦੀ ਉਲੰਘਣਾ ਕਰਨ ਕਾਰਨ ਉੱਥੋਂ ਰਿਫਾਇੰਡ ਸੋਇਆਬੀਨ ਤੇਲ ਜ਼ਬਤ ਕੀਤਾ ਗਿਆ।

ਦੋ ਗ੍ਰਿਫ਼ਤਾਰ, ਤਿੰਨ ਵਾਹਨ ਜ਼ਬਤ

ਤਿਉਹਾਰੀ ਮੁਹਿੰਮ ਦੌਰਾਨ 69 ਤੋਂ ਵੱਧ ਅਦਾਰਿਆਂ ਤੋਂ 1.35 ਕਰੋੜ ਰੁਪਏ ਤੋਂ ਵੱਧ ਦੀ ਕੀਮਤ ਦਾ ਅਜਿਹਾ ਖਾਣ-ਪੀਣ ਦਾ ਸਾਮਾਨ ਜ਼ਬਤ ਕੀਤਾ ਗਿਆ, ਜਿਸ ਦੇ ਅਸੁਰੱਖਿਅਤ ਜਾਂ ਮਿਲਾਵਟੀ ਹੋਣ ਦਾ ਸ਼ੱਕ ਸੀ।

ਪਾਬੰਦੀਸ਼ੁਦਾ ਖੁਰਾਕੀ ਉਤਪਾਦਾਂ ਵਿਰੁੱਧ ਚਲਾਈ ਗਈ ਇਸ ਮੁਹਿੰਮ ਤਹਿਤ 3 ਐੱਫਆਈਆਰ (FIR) ਦਰਜ ਕੀਤੀਆਂ ਗਈਆਂ। ਇਸ ਦੌਰਾਨ 2 ਲੋਕਾਂ ਨੂੰ ਗ੍ਰਿਫ਼ਤਾਰ ਕੀਤਾ ਗਿਆ ਅਤੇ 2 ਵਾਹਨ ਜ਼ਬਤ ਕੀਤੇ ਗਏ।

FDA ਕਮਿਸ਼ਨਰ ਤੁਕਾਰਾਮ ਮੁੰਡੇ ਦੀ ਸਖ਼ਤ ਚਿਤਾਵਨੀ

FDA ਕਮਿਸ਼ਨਰ ਤੁਕਾਰਾਮ ਮੁੰਡੇ ਨੇ ਚਿਤਾਵਨੀ ਦਿੱਤੀ ਹੈ ਕਿ ਜਿਹੜੇ ਕਾਰੋਬਾਰੀ ਲੋਕਾਂ ਦੀ ਸਿਹਤ ਨੂੰ ਖ਼ਤਰੇ ਵਿੱਚ ਪਾਉਣਗੇ, ਉਨ੍ਹਾਂ ਵਿਰੁੱਧ ਸਖ਼ਤ ਕਾਰਵਾਈ ਕੀਤੀ ਜਾਵੇਗੀ।

ਉਨ੍ਹਾਂ ਕਾਨੂੰਨ ਦੀਆਂ ਉਨ੍ਹਾਂ ਧਾਰਾਵਾਂ ਦਾ ਵੀ ਜ਼ਿਕਰ ਕੀਤਾ, ਜਿਨ੍ਹਾਂ ਤਹਿਤ ਅਸੁਰੱਖਿਅਤ ਖੁਰਾਕੀ ਪਦਾਰਥ ਵੇਚਣ ਦੇ ਮਾਮਲੇ ਵਿੱਚ ਉਮਰ ਕੈਦ ਅਤੇ 10 ਲੱਖ ਰੁਪਏ ਤੱਕ ਦੇ ਜੁਰਮਾਨੇ ਦੀ ਵਿਵਸਥਾ ਹੈ।