ਮੌਨਸੂਨ ਦੇ ਦੂਜੇ ਪੜਾਅ ’ਚ ਅਲਨੀਨੋ ਦਾ ਵਧਿਆ ਦਬਾਅ, ਸਤੰਬਰ ਤੱਕ IOD ਪਾਜ਼ੇਟਿਵ ਨਾ ਹੋਇਆ ਤਾਂ ਵਧ ਸਕਦਾ ਹੈ ਸੋਕੇ ਦਾ ਖ਼ਤਰਾ

ਜਾਗਰਣ ਬਿਊਰੋ, ਨਵੀਂ ਦਿੱਲੀ। ਮੌਨਸੂਨ ਦੇ ਦੂਜੇ ਪੜਾਅ ’ਤੇ ਸਭ ਤੋਂ ਵੱਡਾ ਦਬਾਅ ਅਲਨੀਨੋ ਦਾ ਹੋਣ ਜਾ ਰਿਹਾ ਹੈ। ਇਸ ਸਿਲਸਿਲੇ ਵਿਚ ਅਗਸਤ-ਸਤੰਬਰ ਨੂੰ ਨਿਰਣਾਇਕ ਮੰਨਿਆ ਜਾ ਰਿਹਾ ਹੈ। ਪ੍ਰਸ਼ਾਂਤ ਮਹਾਸਾਗਰ ਵਿਚ ਅਲਨੀਨੋ ਲਗਾਤਾਰ ਮਜ਼ਬੂਤ ਹੋ ਰਿਹਾ ਹੈ ਜਿਸ ਨਾਲ ਭਾਰਤ ਦੇ ਕਈ ਹਿੱਸਿਆਂ ਵਿਚ ਸੋਕੇ ਦੀ ਸ਼ੰਕਾ ਵਧ ਗਈ ਹੈ।

ਮੌਸਮ ਵਿਗਿਆਨੀਆਂ ਦੀ ਨਿਗ੍ਹਾ ਹੁਣ ਹਿੰਦ ਮਹਾਸਾਗਰ ਵਿਚ ਵਿਕਸਤ ਹੋ ਰਹੇ ਇੰਡੀਅਨ ਓਸ਼ਨ ਡਾਇਪੋਲ (ਆਈਓਡੀ) ’ਤੇ ਟਿਕੀ ਹੈ ਜੋ ਇਸ ਵੇਲੇ ਨਿਊਟਰਲ ਹੈ ਪਰ ਸਤੰਬਰ ਵਿਚ ਇਹ ਪਾਜ਼ੇਟਿਵ ਹੋ ਸਕਦਾ ਹੈ। ਜੇਕਰ ਇਹ ਹੋਇਆ, ਤਾਂ ਅਲਨੀਨੋ ਦੀ ਲਪੇਟ ਵਿਚ ਆਏ ਮੌਨਸੂਨ ਨੂੰ ਨਵੀਂ ਤਾਕਤ ਮਿਲ ਸਕਦੀ ਹੈ। ਮੌਸਮ ਵਿਭਾਗ (ਆਈਐੱਮਡੀ) ਦੇ ਮੌਨਸੂਨ ਮਿਸ਼ਨ ਕਪਲਡ ਫੋਰਕਾਸਟ ਸਿਸਟਮ (ਐੱਮਐੱਮਸੀਐੱਫਐੱਸ) ਅਨੁਸਾਰ ਆਉਣ ਵਾਲੇ ਦਿਨਾਂ ਵਿਚ ਅਲਨੀਨੋ ਹੋਰ ਮਜ਼ਬੂਤ ਹੋ ਸਕਦਾ ਹੈ, ਜੋ ਮੌਨਸੂਨ ਨੂੰ ਕਮਜ਼ੋਰ ਕਰ ਸਕਦਾ ਹੈ।

ਅਲਨੀਨੋ ਨਾਲ ਹਵਾਵਾਂ ਦੀ ਤਾਕਤ ਘਟਦੀ ਹੈ ਅਤੇ ਕਈ ਹਿੱਸਿਆਂ ਵਿਚ ਬਾਰਿਸ਼ ਆਮ ਨਾਲੋਂ ਘੱਟ ਹੁੰਦੀ ਹੈ। ਫਿਰ ਵੀ, ਮੌਸਮ ਵਿਗਿਆਨੀਆਂ ਨੂੰ ਰਾਹਤ ਦੀ ਉਮੀਦ ਹੈ। ਹਿੰਦ ਮਹਾਸਾਗਰ ਵਿਚ ਆਈਓਡੀ ਦੇ ਅਗਲੇ ਮਹੀਨੇ ਪਾਜ਼ੇਟਿਵ ਹੋਣ ਦੇ ਸੰਕੇਤ ਹਨ। ਆਈਓਡੀ ਦੇ ਪਾਜ਼ੇਟਿਵ ਹੋਣ ’ਤੇ ਹਿੰਦ ਮਹਾਸਾਗਰ ਤੋਂ ਭਾਰਤ ਵੱਲ ਵੱਧ ਨਮੀ ਪਹੁੰਚਦੀ ਹੈ ਜਿਸ ਨਾਲ ਮੌਨਸੂਨ ਨੂੰ ਵਾਧੂ ਊਰਜਾ ਮਿਲਦੀ ਹੈ ਅਤੇ ਅਲਨੀਨੋ ਦਾ ਨਕਾਰਾਤਮਕ ਪ੍ਰਭਾਵ ਕਾਫ਼ੀ ਹੱਦ ਤੱਕ ਘਟ ਸਕਦਾ ਹੈ।