- ਸ਼ਹਿਰ ਚੁਣੋ
- ਈ-ਪੇਪਰ
- ਵੈੱਬ ਸਟੋਰੀਜ਼
- ਸ਼ਹਿਰ ਚੁਣੋ
- ਈ-ਪੇਪਰ
- ਵੈੱਬ ਸਟੋਰੀਜ਼
ਖਾਣੇ ’ਚ ਵਰਤੇ ਜਾਣ ਵਾਲੇ ਤੇਲ, ਸ਼ਾਕਾਹਾਰੀ-ਮਾਸਾਹਾਰੀ ਦੇ ਨਿਸ਼ਾਨ, ਕੈਲੋਰੀ ਤੇ ਸਮੱਗਰੀ ਦੀ ਜਾਂਚ ਕਰ ਸਕਣਗੇ ਖਪਤਕਾਰ
ਵਾਰਾਣਸੀ ’ਚ ਖਪਤਕਾਰ ਹੁਣ ਹੋਟਲਾਂ ਤੇ ਰੈਸਟੋਰੈਂਟਾਂ ’ਚ ਖਾਣੇ ਦੀ ਗੁਣਵੱਤਾ, ਸਮੱਗਰੀ ਤੇ ਐਲਰਜੀ ਨਾਲ ਸਬੰਧਤ ਜਾਣਕਾਰੀ ਹਾਸਲ ਕਰ ਸਕਦੇ ਹਨ। ਐੱਫਐੱਸਐੱਸਏਆਈ (FSSAI) ਦੇ ਦਿਸ਼ਾ-ਨਿਰਦੇਸ਼ਾਂ ਤਹਿਤ ਇਹ ਪਹਿਲ ਸੁਰੱਖਿਅਤ ਭੋਜਨ ਯਕੀਨੀ ਬਣਾਉਣ ਤੇ ਮਿਲਾਵਟ ਪ੍ਰਤੀ ਜਾਗਰੂਕਤਾ ਵਧਾਉਣ ਲਈ ਕੀਤੀ ਗਈ ਹੈ।
Posted By Paramjit Kaur
Publish Date: Tue, 13 Oct 2026 03:16 PM (IST)
Updated Date: Tue, 13 Oct 2026 03:18 PM (IST)
ਸ਼ਿਵਮ ਸਿੰਘ, ਜਾਗਰਣ, ਵਾਰਾਣਸੀ : ਕਾਸ਼ੀ ’ਚ ਹੋਟਲਾਂ ਤੇ ਰੈਸਟੋਰੈਂਟਾਂ ’ਚ ਖਾਣਾ ਖਾਣ ਵਾਲੇ ਖਪਤਕਾਰਾਂ ਲਈ ਖਾਣ-ਪੀਣ ਵਾਲੀਆਂ ਵਸਤਾਂ ਦੀ ਗੁਣਵੱਤਾ ਤੇ ਉਨ੍ਹਾਂ ’ਚ ਵਰਤੀ ਜਾਣ ਵਾਲੀ ਸਮੱਗਰੀ ਦੀ ਜਾਣਕਾਰੀ ਮਹੱਤਵਪੂਰਨ ਹੋ ਗਈ ਹੈ। ਫੂਡ ਸੇਫਟੀ ਐਂਡ ਸਟੈਂਡਰਡਜ਼ ਅਥਾਰਟੀ ਆਫ਼ ਇੰਡੀਆ (ਐੱਫਐੱਸਐੱਸਏਆਈ) ਦੇ ਦਿਸ਼ਾ-ਨਿਰਦੇਸ਼ਾਂ ਤਹਿਤ ਸੁਰੱਖਿਅਤ ਭੋਜਨ ਤੇ ਖਾਣ-ਪੀਣ ਵਾਲੀਆਂ ਵਸਤਾਂ ਬਾਰੇ ਜਾਗਰੂਕਤਾ ਵਧਾਉਣ ’ਤੇ ਜ਼ੋਰ ਦਿੱਤਾ ਜਾ ਰਿਹਾ ਹੈ। ਖਪਤਕਾਰ ਹੁਣ ਖਾਣੇ ’ਚ ਵਰਤੇ ਜਾਣ ਵਾਲੇ ਤੇਲ, ਸ਼ਾਕਾਹਾਰੀ-ਮਾਸਾਹਾਰੀ ਪਕਵਾਨਾਂ ਦੇ ਨਿਸ਼ਾਨ, ਕੈਲੋਰੀ ਤੇ ਸਮੱਗਰੀ ਦੀ ਜਾਣਕਾਰੀ ਲੈ ਕੇ ਆਪਣੀ ਸਿਹਤ ਦੇ ਅਨੁਕੂਲ ਭੋਜਨ ਦੀ ਚੋਣ ਕਰ ਸਕਦੇ ਹਨ।
ਗੰਗਾ ਦੇ ਕੰਢੇ ਵਸੀ ਧਾਰਮਿਕ ਨਗਰੀ ਕਾਸ਼ੀ ’ਚ ਹਰ ਰੋਜ਼ ਹਜ਼ਾਰਾਂ ਸ਼ਰਧਾਲੂ ਤੇ ਸੈਲਾਨੀ ਹੋਟਲਾਂ, ਰੈਸਟੋਰੈਂਟਾਂ ਤੇ ਢਾਬਿਆਂ ’ਚ ਖਾਣਾ ਖਾਂਦੇ ਹਨ। ਅਜਿਹੇ ’ਚ ਖੁਰਾਕ ਸੁਰੱਖਿਆ ਦਾ ਮੁੱਦਾ ਹੋਰ ਵੀ ਮਹੱਤਵਪੂਰਨ ਹੋ ਜਾਂਦਾ ਹੈ। ਖ਼ਾਸ ਤੌਰ ’ਤੇ ਬਾਹਰ ਖਾਣਾ ਖਾਂਦੇ ਸਮੇਂ ਲੋਕਾਂ ਨੂੰ ਸਿਰਫ਼ ਸਵਾਦ ਤੇ ਪਕਵਾਨਾਂ ਦੀ ਆਕਰਸ਼ਕ ਸਜਾਵਟ ਵੱਲ ਧਿਆਨ ਦੇਣ ਦੀ ਬਜਾਏ ਉਨ੍ਹਾਂ ਦੀ ਗੁਣਵੱਤਾ, ਸਮੱਗਰੀ ਤੇ ਸਫ਼ਾਈ ਬਾਰੇ ਵੀ ਜਾਣਕਾਰੀ ਲੈਣੀ ਚਾਹੀਦੀ ਹੈ।
ਪਾਬੰਦੀਸ਼ੁਦਾ ਰੰਗਾਂ ਤੇ ਰਸਾਇਣਾਂ ਤੋਂ ਰਹੋ ਸਾਵਧਾਨ
ਖਾਣ-ਪੀਣ ਵਾਲੀਆਂ ਵਸਤਾਂ ਨੂੰ ਆਕਰਸ਼ਕ ਬਣਾਉਣ ਲਈ ਕੁਝ ਥਾਵਾਂ ’ਤੇ ਪਾਬੰਦੀਸ਼ੁਦਾ ਰੰਗਾਂ ਤੇ ਸਸਤੇ ਰਸਾਇਣਾਂ ਦੀ ਵਰਤੋਂ ਕੀਤੇ ਜਾਣ ਦਾ ਖ਼ਦਸ਼ਾ ਬਣਿਆ ਰਹਿੰਦਾ ਹੈ। ਅਜਿਹੇ ’ਚ ਅਸਾਧਾਰਨ ਤੌਰ ’ਤੇ ਚਮਕਦਾਰ ਲਾਲ, ਪੀਲੇ ਜਾਂ ਹਰੇ ਰੰਗ ਵਾਲੇ ਪਕਵਾਨਾਂ ਪ੍ਰਤੀ ਸਾਵਧਾਨ ਰਹਿਣਾ ਜ਼ਰੂਰੀ ਹੈ। ਹਾਲਾਂਕਿ, ਸਿਰਫ਼ ਰੰਗ ਦੇਖ ਕੇ ਕਿਸੇ ਖਾਣ-ਪੀਣ ਵਾਲੀ ਚੀਜ਼ ਨੂੰ ਮਿਲਾਵਟੀ ਨਹੀਂ ਕਿਹਾ ਜਾ ਸਕਦਾ। ਇਸ ਦੀ ਪੁਸ਼ਟੀ ਜਾਂਚ ਤੋਂ ਬਾਅਦ ਹੀ ਹੁੰਦੀ ਹੈ। ਖੁਰਾਕ ਸੁਰੱਖਿਆ ਵਿਭਾਗ ਵੱਲੋਂ ਵੀ ਅਦਾਰਿਆਂ ਦੀ ਨਿਯਮਤ ਜਾਂਚ ਕਰਨਾ ਤੇ ਨਿਯਮਾਂ ਦੀ ਪਾਲਣਾ ਯਕੀਨੀ ਬਣਾਉਣਾ ਜ਼ਰੂਰੀ ਹੈ।
ਐਲਰਜੀ ਵਾਲੇ ਲੋਕ ਸਮੱਗਰੀ ਬਾਰੇ ਜ਼ਰੂਰ ਪੁੱਛਣ
ਦੁੱਧ, ਅੰਡੇ, ਮੇਵੇ, ਗਲੂਟਨ ਜਾਂ ਸਮੁੰਦਰੀ ਭੋਜਨ ਤੋਂ ਐਲਰਜੀ ਵਾਲੇ ਲੋਕਾਂ ਨੂੰ ਖਾਣਾ ਮੰਗਵਾਉਣ ਤੋਂ ਪਹਿਲਾਂ ਵੇਟਰ ਤੋਂ ਪਕਵਾਨ ’ਚ ਵਰਤੀ ਜਾਣ ਵਾਲੀ ਸਮੱਗਰੀ ਬਾਰੇ ਸਪੱਸ਼ਟ ਜਾਣਕਾਰੀ ਲੈਣੀ ਚਾਹੀਦੀ ਹੈ। ਖਾਣਾ ਤਿਆਰ ਕਰਨ ਦੌਰਾਨ ਐਲਰਜੀ ਪੈਦਾ ਕਰਨ ਵਾਲੇ ਤੱਤਾਂ ਦੇ ਹੋਰ ਖਾਣ-ਪੀਣ ਵਾਲੀਆਂ ਚੀਜ਼ਾਂ ਦੇ ਸੰਪਰਕ ’ਚ ਆਉਣ ਦਾ ਖ਼ਤਰਾ ਵੀ ਰਹਿੰਦਾ ਹੈ। ਇਸ ਲਈ ਗੰਭੀਰ ਐਲਰਜੀ ਵਾਲੇ ਲੋਕਾਂ ਨੂੰ ਇਸ ਸਬੰਧੀ ਵਿਸ਼ੇਸ਼ ਸਾਵਧਾਨੀ ਵਰਤਣੀ ਚਾਹੀਦੀ ਹੈ।
ਛੋਟੇ ਢਾਬਿਆਂ ’ਚ ਜਾਗਰੂਕਤਾ ਦੀ ਲੋੜ
ਕਈ ਵੱਡੇ ਹੋਟਲ ਤੇ ਰੈਸਟੋਰੈਂਟ ਆਪਣੇ ਮੀਨੂ ’ਚ ਪਕਵਾਨਾਂ ਦੀ ਸਮੱਗਰੀ, ਕੈਲੋਰੀ ਤੇ ਐਲਰਜੀ ਪੈਦਾ ਕਰਨ ਵਾਲੇ ਤੱਤਾਂ ਬਾਰੇ ਜਾਣਕਾਰੀ ਦੇਣ ਲੱਗ ਪਏ ਹਨ, ਪਰ ਛੋਟੇ ਢਾਬਿਆਂ ਤੇ ਖਾਣ-ਪੀਣ ਵਾਲੀਆਂ ਥਾਵਾਂ ’ਤੇ ਅਜੇ ਵੀ ਜਾਗਰੂਕਤਾ ਵਧਾਉਣ ਦੀ ਲੋੜ ਹੈ। ਖਪਤਕਾਰਾਂ ਨੂੰ ਸ਼ਾਕਾਹਾਰੀ ਤੇ ਮਾਸਾਹਾਰੀ ਪਕਵਾਨਾਂ ਲਈ ਨਿਰਧਾਰਤ ਨਿਸ਼ਾਨਾਂ ਵੱਲ ਧਿਆਨ ਦੇਣ ਦੇ ਨਾਲ-ਨਾਲ ਵਰਤੇ ਜਾਣ ਵਾਲੇ ਤੇਲ ਤੇ ਸਮੱਗਰੀ ਬਾਰੇ ਵੀ ਪੁੱਛਣਾ ਚਾਹੀਦਾ ਹੈ।
ਖਾਣ-ਪੀਣ ਵਾਲੀਆਂ ਵਸਤਾਂ ਦੀ ਗੁਣਵੱਤਾ ਜਾਂ ਸਫ਼ਾਈ ਬਾਰੇ ਸ਼ੱਕ ਹੋਣ ’ਤੇ ਗਾਹਕ ਰੈਸਟੋਰੈਂਟ ਪ੍ਰਬੰਧਨ ਤੋਂ ਜਾਣਕਾਰੀ ਮੰਗ ਸਕਦੇ ਹਨ ਤੇ ਲੋੜ ਪੈਣ ’ਤੇ ਖੁਰਾਕ ਸੁਰੱਖਿਆ ਵਿਭਾਗ ਕੋਲ ਸ਼ਿਕਾਇਤ ਕਰ ਸਕਦੇ ਹਨ। ਕਾਸ਼ੀ ਵਰਗੇ ਪ੍ਰਮੁੱਖ ਧਾਰਮਿਕ ਤੇ ਸੈਰ-ਸਪਾਟਾ ਕੇਂਦਰ ’ਚ ਸੁਰੱਖਿਅਤ ਭੋਜਨ ਮੁਹੱਈਆ ਕਰਵਾਉਣਾ ਹੋਟਲਾਂ ਤੇ ਰੈਸਟੋਰੈਂਟਾਂ ਦੇ ਸੰਚਾਲਕਾਂ ਦੀ ਜ਼ਿੰਮੇਵਾਰੀ ਹੈ। ਉੱਥੇ ਹੀ, ਜਾਗਰੂਕ ਖਪਤਕਾਰ ਬਣ ਕੇ ਲੋਕ ਅਸੁਰੱਖਿਅਤ ਭੋਜਨ ਤੇ ਮਿਲਾਵਟ ਨਾਲ ਜੁੜੇ ਖ਼ਤਰਿਆਂ ਨੂੰ ਘਟਾਉਣ ’ਚ ਅਹਿਮ ਭੂਮਿਕਾ ਨਿਭਾ ਸਕਦੇ ਹਨ।