ਪਾਣੀ ਦਾ ਪੱਧਰ ਵਧਣ ਨਾਲ ਪਿੰਡਾਂ ’ਚ ਮੰਡਰਾਉਣ ਲੱਗਾ ਹੜ੍ਹ ਦਾ ਖ਼ਤਰਾ, ਚਾਰ ਪਿੰਡ ਪਾਣੀ ’ਚ ਘਿਰੇ; ਰਸਤਿਆਂ ’ਚ ਭਰਿਆ ਪਾਣੀ

ਜਾਗਰਣ ਸੰਵਾਦਦਾਤਾ, ਫਤਿਹਪੁਰ : ਗੰਗਾ ਦਾ ਪਾਣੀ ਦਾ ਪੱਧਰ ਵਧਣ ਕਾਰਨ ਕਟਰੀ ਇਲਾਕੇ ਦੇ ਪਿੰਡਾਂ ’ਚ ਮੁੜ ਹੜ੍ਹ ਦਾ ਖ਼ਤਰਾ ਮੰਡਰਾਉਣ ਲੱਗ ਪਿਆ ਹੈ। ਕਟਰੀ ਦੇ ਚਾਰ ਪਿੰਡ ਹੜ੍ਹ ਦੇ ਪਾਣੀ ਨਾਲ ਪੂਰੀ ਤਰ੍ਹਾਂ ਘਿਰ ਚੁੱਕੇ ਹਨ। ਮੰਗਲਵਾਰ ਸ਼ਾਮ ਨੂੰ ਗੰਗਾ ਦਾ ਜਲ ਪੱਧਰ ਖ਼ਤਰੇ ਦੇ ਨਿਸ਼ਾਨ ਤੋਂ ਸਿਰਫ਼ ਤਿੰਨ ਸੈਂਟੀਮੀਟਰ ਹੇਠਾਂ ਸੀ। ਰਾਤ ਨੂੰ ਜੇ ਗੰਗਾ ਨੇ ਖ਼ਤਰੇ ਦਾ ਨਿਸ਼ਾਨ ਪਾਰ ਕਰ ਲਿਆ ਤਾਂ ਪਿੰਡਾਂ ਦੀਆਂ ਗਲੀਆਂ ’ਚ ਵੀ ਪਾਣੀ ਦਾਖ਼ਲ ਹੋਣਾ ਸ਼ੁਰੂ ਹੋ ਜਾਵੇਗਾ। ਪਿਛਲੇ ਕੁਝ ਦਿਨਾਂ ਤੋਂ ਗੰਗਾ ਦਾ ਪਾਣੀ ਹੌਲੀ-ਹੌਲੀ ਵੱਧ ਰਿਹਾ ਸੀ, ਪਰ ਇਸ ਵਾਰ ਪਾਣੀ ਵਧਣ ਦੀ ਰਫ਼ਤਾਰ ਤੇਜ਼ ਹੈ। ਗੰਗਾ ਕਟਰੀ ਦੇ ਬਿੰਦਕੀ ਫਾਰਮ, ਸਦਨਹਾ, ਬੇਨੀਖੇੜਾ ਤੇ ਬੇਰੀਨਾਰੀ ਪਿੰਡਾਂ ਦੇ ਚਾਰੋਂ ਪਾਸੇ ਮੰਗਲਵਾਰ ਸ਼ਾਮ ਤੱਕ ਪਾਣੀ ਭਰ ਗਿਆ ਸੀ। ਪਿੰਡ ਤੋਂ ਬਾਹਰ ਆਉਣ-ਜਾਣ ਲਈ ਲੋਕਾਂ ਨੂੰ ਪਾਣੀ ਵਿੱਚੋਂ ਲੰਘਣਾ ਪੈ ਰਿਹਾ ਹੈ। ਇਸ ਤੋਂ ਇਲਾਵਾ ਦਰਿਆਪੁਰ ਪੁਲ ਤੋਂ ਬਿੰਦਕੀ ਫਾਰਮ ਤੱਕ ਬਣੀ ਸੜਕ ’ਤੇ ਬਿੰਦਕੀ ਫਾਰਮ ਤੇ ਸਦਨਹਾ ਵਿਚਕਾਰ ਚਾਰ ਥਾਵਾਂ ਤੋਂ ਪਾਣੀ ਸੜਕ ਦੇ ਉੱਪਰੋਂ ਵਗਣ ਲੱਗ ਪਿਆ ਹੈ। ਸੜਕ ’ਤੇ ਵਗ ਰਹੇ ਪਾਣੀ ਦੀ ਉਚਾਈ ਲਗਭਗ ਤਿੰਨ ਫੁੱਟ ਹੈ। ਪਾਣੀ ਦਾ ਵਹਾਅ ਤੇਜ਼ ਹੋਣ ਕਾਰਨ ਹੁਣ ਸੜਕ ਦੇ ਟੁੱਟਣ ਦਾ ਖ਼ਤਰਾ ਵੀ ਬਣ ਗਿਆ ਹੈ।

ਬਿੰਦਕੀ ਫਾਰਮ ਪਿੰਡ ਦੇ ਯੋਗੇਂਦਰ ਪਾਲ ਨੇ ਦੱਸਿਆ ਕਿ ਪਿਛਲੇ ਹਫ਼ਤੇ ਗੰਗਾ ਦਾ ਪਾਣੀ ਹੌਲੀ-ਹੌਲੀ ਵੱਧ ਰਿਹਾ ਸੀ, ਪਰ ਇਸ ਵਾਰ ਸੋਮਵਾਰ ਤੇ ਮੰਗਲਵਾਰ ਨੂੰ ਪਾਣੀ ਦਾ ਪੱਧਰ ਤੇਜ਼ੀ ਨਾਲ ਵਧਿਆ ਹੈ। ਜੇ ਪਾਣੀ ਇਸੇ ਰਫ਼ਤਾਰ ਨਾਲ ਵਧਦਾ ਰਿਹਾ ਤਾਂ ਰਾਤ ਭਰ ’ਚ ਪਿੰਡ ਦੀਆਂ ਗਲੀਆਂ ’ਚ ਪਾਣੀ ਭਰ ਜਾਵੇਗਾ। ਜੇ ਗੰਗਾ ਦੇ ਪਾਣੀ ਦਾ ਪੱਧਰ ਵਧਣ ਦੀ ਰਫ਼ਤਾਰ ਘੱਟ ਨਾ ਹੋਈ ਤਾਂ ਬੁੱਧਵਾਰ ਸ਼ਾਮ ਜਾਂ ਵੀਰਵਾਰ ਸਵੇਰ ਤੱਕ ਪਿੰਡ ਛੱਡਣ ਦੀ ਸਥਿਤੀ ਬਣ ਸਕਦੀ ਹੈ। ਉੱਧਰ ਏਡੀਐਮ ਵਿਨਯ ਪਾਂਡੇ ਨੇ ਹੜ੍ਹ ਪ੍ਰਭਾਵਿਤ ਇਲਾਕੇ ਦਾ ਦੌਰਾ ਕਰਕੇ ਹਾਲਾਤ ਦਾ ਜਾਇਜ਼ਾ ਲਿਆ। ਉਹ ਹੜ੍ਹ ਚੌਕੀ ਮਹੂਆ ਘਾਟ ਵੀ ਗਏ।

ਪਸ਼ੂਆਂ ਨੂੰ ਬੰਨ੍ਹਣ ਤੇ ਚਾਰੇ ਦਾ ਸੰਕਟ

ਸਦਨਹਾ ਪਿੰਡ ਦੇ ਮਨੋਜ ਕੁਮਾਰ ਨੇ ਦੱਸਿਆ ਕਿ ਪਿੰਡ ਦੇ ਚਾਰੋਂ ਪਾਸੇ ਪਾਣੀ ਭਰ ਜਾਣ ਕਾਰਨ ਹੁਣ ਪਸ਼ੂਆਂ ਨੂੰ ਬੰਨ੍ਹਣ ਲਈ ਕੋਈ ਸੁੱਕੀ ਥਾਂ ਨਹੀਂ ਬਚੀ। ਮੀਂਹ ਨਾ ਪੈਣ ਕਾਰਨ ਕੁਝ ਰਾਹਤ ਹੈ। ਜੇ ਮੀਂਹ ਪੈਣਾ ਸ਼ੁਰੂ ਹੋ ਜਾਂਦਾ ਤਾਂ ਸਮੱਸਿਆ ਹੋਰ ਵਧ ਜਾਂਦੀ। ਪਸ਼ੂਆਂ ਲਈ ਚਾਰੇ ਦਾ ਸੰਕਟ ਵੀ ਲਗਾਤਾਰ ਵਧਦਾ ਜਾ ਰਿਹਾ ਹੈ।

“ਗੰਗਾ ਦਾ ਜਲ ਪੱਧਰ ਵਧ ਰਿਹਾ ਹੈ। ਇਸ ’ਤੇ ਲਗਾਤਾਰ ਨਜ਼ਰ ਰੱਖੀ ਜਾ ਰਹੀ ਹੈ। ਹੜ੍ਹ ਚੌਕੀਆਂ ਨੂੰ ਸਚੇਤ ਕਰ ਦਿੱਤਾ ਗਿਆ ਹੈ। ਪਿੰਡ ਦੇ ਲੋਕਾਂ ਨਾਲ ਵੀ ਗੱਲਬਾਤ ਕੀਤੀ ਗਈ ਹੈ।”

— ਨਿਸ਼ਾਂਤ, ਐਸਡੀਐਮ ਬਿੰਦਕੀ