ਹਿਮਾਚਲ 'ਚ ਮੀਂਹ ਨਾਲ ਤਬਾਹੀ, ਕਿੰਨੌਰ ਨੇੜੇ ਮਲਬਾ ਇਕੱਟਾ ਹੋਣ ਕਾਰਨ NH-5 ਬੰਦ, ਆਰੈਂਜ ਅਲਰਟ ਜਾਰੀ

ਪੀਟੀਆਈ, ਕਿੰਨੌਰ : ਹਿਮਾਚਲ ਪ੍ਰਦੇਸ਼ ਦੇ ਕਿੰਨੌਰ ਜ਼ਿਲ੍ਹੇ ਵਿੱਚ ਭਾਰੀ ਮੀਂਹ ਕਾਰਨ ਕਈ ਖੇਤਰਾਂ ਵਿੱਚ ਜਨਜੀਵਨ ਪ੍ਰਭਾਵਿਤ ਹੋਇਆ ਹੈ। ਸ਼ੁੱਕਰਵਾਰ ਸਵੇਰੇ ਤੇਜ਼ ਬਾਰਿਸ਼ ਨਾਲ ਚੋਲਿੰਗ ਪਿੰਡ ਨੇੜੇ ਹਿੰਦੁਸਤਾਨ-ਤਿੱਬਤ ਨੈਸ਼ਨਲ ਹਾਈਵੇ-5 (NH-5) ‘ਤੇ ਮਲਬਾ ਇਕੱਠਾ ਹੋ ਗਿਆ, ਜਿਸ ਕਾਰਨ ਵਾਹਨਾਂ ਦੀ ਆਵਾਜਾਈ ਰੁਕ ਗਈ। ਇਸ ਤੋਂ ਇਲਾਵਾ ਮੇਰੁਟ ਨਾਲੇ ਨੇੜੇ ਪਹਾੜਾਂ ਤੋਂ ਵੱਡੀ ਮਾਤਰਾ ਵਿੱਚ ਮਲਬਾ ਡਿੱਗਣ ਕਾਰਨ ਦੋ ਵਾਹਨ ਫਸ ਗਏ। ਰਿੱਬਾ ਨਾਲੇ ਵਿੱਚ ਹੜ੍ਹ ਆਉਣ ਨਾਲ ਰਿੱਬਾ-ਕਾਂਡਾ ਲਿੰਕ ਰੋਡ ਵੀ ਬੰਦ ਹੋ ਗਿਆ ਹੈ। ਡਿਪਟੀ ਕਮਿਸ਼ਨਰ ਅਮਿਤ ਸ਼ਰਮਾ ਨੇ ਦੱਸਿਆ ਕਿ ਕਿਸੇ ਵੀ ਤਰ੍ਹਾਂ ਦਾ ਜਾਨੀ ਨੁਕਸਾਨ ਨਹੀਂ ਹੋਇਆ ਅਤੇ ਸਾਰੇ ਲੋਕ ਸੁਰੱਖਿਅਤ ਹਨ।

ਚੰਬਾ ਦੇ ਮੰਦਰ ਵਿੱਚ ਫਸੇ 24 ਸ਼ਰਧਾਲੂ

ਚੰਬਾ ਜ਼ਿਲ੍ਹੇ ਦੇ ਭਰਮੌਰ ਵਿੱਚ ਤੇਜ਼ ਮੀਂਹ ਕਾਰਨ ਲੱਕੜ ਦਾ ਅਸਥਾਈ ਪੁਲ ਵਹਿ ਗਿਆ। ਇਸ ਨਾਲ ਮੰਦਰ ਜਾਣ ਵਾਲਾ ਰਸਤਾ ਟੁੱਟ ਗਿਆ ਅਤੇ ਮੰਦਰ ਵਿੱਚ ਮੌਜੂਦ 24 ਸ਼ਰਧਾਲੂ ਉੱਥੇ ਹੀ ਫਸ ਗਏ। ਪੂਰੀ ਰਾਤ ਉਹ ਮੰਦਰ ਵਿੱਚ ਹੀ ਰਹੇ। ਸ਼ੁੱਕਰਵਾਰ ਨੂੰ ਐਨਡੀਆਰਐਫ, ਸਥਾਨਕ ਪ੍ਰਸ਼ਾਸਨ, ਪਹਾੜ ਚੜ੍ਹਾਈ ਸੰਸਥਾ ਅਤੇ ਲੋਕ ਨਿਰਮਾਣ ਵਿਭਾਗ ਨੇ ਮਿਲ ਕੇ ਉਨ੍ਹਾਂ ਦਾ ਰੈਸਕਿਊ ਕੀਤਾ।

ਮੌਸਮ ਵਿਭਾਗ ਵੱਲੋਂ ਆਰੈਂਜ ਅਲਰਟ ਜਾਰੀ

ਸ਼ਿਮਲਾ ਮੌਸਮ ਵਿਭਾਗ ਨੇ ਭਾਰੀ ਬਾਰਿਸ਼ ਕਾਰਨ ਆਰੈਂਜ ਅਲਰਟ ਜਾਰੀ ਕੀਤਾ ਹੈ ਅਤੇ ਆਉਣ ਵਾਲੇ ਦਿਨਾਂ ਵਿੱਚ ਕੁਝ ਖੇਤਰਾਂ ਵਿੱਚ ਹੋਰ ਤੇਜ਼ ਬਾਰਿਸ਼ ਦੀ ਚੇਤਾਵਨੀ ਦਿੱਤੀ ਹੈ।