ਦਿੱਲੀ ’ਚ ਨਹੀਂ ਰੁਕ ਰਹੀ ਗੈਂਗਵਾਰ, ਹੁਣ ਆਇਆ ਨਗਰ ’ਚ ਜਿਮ ਟ੍ਰੇਨਰ ਦੀ 20 ਤੋਂ ਵੱਧ ਗੋਲੀਆਂ ਮਾਰ ਕੇ ਹੱਤਿਆ

ਜਾਗਰਣ ਸੰਵਾਦਦਾਤਾ, ਦੱਖਣੀ ਦਿੱਲੀ : ਰਾਜਧਾਨੀ ਦੇ ਦੱਖਣੀ ਦਿੱਲੀ ਇਲਾਕੇ ’ਚ ਗੈਂਗਵਾਰ ਰੁਕਣ ਦਾ ਨਾਮ ਨਹੀਂ ਲੈ ਰਹੀ। ਹੁਣ ਆਇਆ ਨਗਰ ਦੇ ਹੰਸ ਚੌਕ ’ਤੇ ਸੋਮਵਾਰ ਸਵੇਰੇ ਤਾਬੜਤੋੜ ਗੋਲੀਆਂ ਮਾਰ ਕੇ ਇੱਕ ਜਿਮ ਟ੍ਰੇਨਰ ਦੀ ਹੱਤਿਆ ਕਰ ਦਿੱਤੀ ਗਈ। ਦੱਸਿਆ ਜਾ ਰਿਹਾ ਹੈ ਕਿ ਕਤਲ ਦੇ ਦੋਸ਼ ’ਚ ਜੇਲ੍ਹ ’ਚ ਬੰਦ ਦੀਪਕ ਦੇ ਨਾਲ ਬੰਦ ਯੋਗੇਸ਼ ਦੇ ਵੱਡੇ ਭਰਾ ਵਿਜੇ ਕੁਮਾਰ ਦੀ ਫਤਿਹਪੁਰ ਬੇਰੀ ਥਾਣਾ ਖੇਤਰ ਦੇ ਆਇਆ ਨਗਰ ’ਚ ਪਰਫੈਕਟ ਜਿਮ ਦੇ ਬਾਹਰ ਸਵੇਰੇ 10:30 ਵਜੇ ਹੱਤਿਆ ਕੀਤੀ ਗਈ।

ਮੌਕੇ ਤੋਂ 18 ਖੋਖੇ ਮਿਲੇ

ਪੁਲਿਸ ਨੂੰ ਮੌਕੇ ਤੋਂ 18 ਖੋਖੇ ਤੇ ਇੱਕ ਕਾਰਤੂਸ ਮਿਲਿਆ ਹੈ। ਜ਼ਿਲ੍ਹੇ ਦੇ ਸਾਰੇ ਸੀਨੀਅਰ ਪੁਲਿਸ ਅਧਿਕਾਰੀ ਮੌਕੇ ’ਤੇ ਪਹੁੰਚ ਗਏ ਹਨ। ਇਸ ਗੈਂਗਵਾਰ ਦੀ ਸ਼ੁਰੂਆਤ ਪਿਛਲੇ ਸਾਲ ਨਵੰਬਰ ’ਚ ਹੋਈ ਸੀ, ਜਦੋਂ ਅਰੁਣ ਦੀ ਸੀਡੀਆਰ ਚੌਕ ’ਤੇ ਦੋ ਦਰਜਨ ਤੋਂ ਵੱਧ ਗੋਲੀਆਂ ਮਾਰ ਕੇ ਹੱਤਿਆ ਕਰ ਦਿੱਤੀ ਗਈ ਸੀ। ਪੁਲਿਸ ਨੇ ਹੱਤਿਆ ਦੇ ਦੋਸ਼ ’ਚ ਦੀਪਕ, ਯੋਗੇਸ਼ ਤੇ ਹੋਰ ਲੋਕਾਂ ਨੂੰ ਗ੍ਰਿਫ਼ਤਾਰ ਕਰਕੇ ਜੇਲ੍ਹ ਭੇਜ ਦਿੱਤਾ ਸੀ।

70 ਗੋਲੀਆਂ ਮਾਰ ਕੇ ਕੀਤੀ ਸੀ ਹੱਤਿਆ

ਇਸ ਤੋਂ ਬਾਅਦ ਅਰੁਣ ਦੇ ਫਰੀਦਾਬਾਦ ਵਾਸੀ ਮਾਮੇ ਨੇ 30 ਨਵੰਬਰ 2025 ਦੀ ਸਵੇਰ ਆਇਆ ਨਗਰ ’ਚ ਦੀਪਕ ਦੇ ਪਿਤਾ ਰਤਨਲਾਲ ਦੀ 70 ਗੋਲੀਆਂ ਮਾਰ ਕੇ ਹੱਤਿਆ ਕਰ ਦਿੱਤੀ ਸੀ। ਹੁਣ ਇਸੇ ਮਾਮਲੇ ’ਚ ਯੋਗੇਸ਼ ਦੇ ਭਰਾ ਦੀ ਵੀ ਗੋਲੀ ਮਾਰ ਕੇ ਹੱਤਿਆ ਕਰ ਦਿੱਤੀ ਗਈ ਹੈ। ਦੱਖਣੀ ਦਿੱਲੀ ’ਚ ਹੋਈ ਇਸ ਗੈਂਗਵਾਰ ਕਾਰਨ ਦਿੱਲੀ ਪੁਲਿਸ ’ਚ ਹੜਕੰਪ ਮਚ ਗਿਆ ਹੈ।

ਇੰਝ ਹੋਈ ਸੀ ਗੈਂਗਵਾਰ ਦੀ ਸ਼ੁਰੂਆਤ

ਦੀਪਕ ਤੇ ਅਰੁਣ ਇੱਕੋ ਪਿੰਡ ਦੇ ਰਹਿਣ ਵਾਲੇ ਸਨ। ਅਰੁਣ ਨੇ ਇੱਕ ਵਾਰ ਪਿੰਡ ’ਚ ਹੀ ਦੀਪਕ ’ਤੇ ਜਾਨਲੇਵਾ ਹਮਲਾ ਕੀਤਾ ਸੀ, ਜਿਸ ’ਚ ਉਹ ਬਚ ਗਿਆ ਸੀ। ਅਰੁਣ ਖ਼ਿਲਾਫ਼ ਕਤਲ ਦੀ ਕੋਸ਼ਿਸ਼ ਦਾ ਮਾਮਲਾ ਦਰਜ ਹੋਇਆ ਸੀ। ਇਹ ਮਾਮਲਾ ਸਾਕੇਤ ਕੋਰਟ ’ਚ ਚੱਲ ਰਿਹਾ ਸੀ। ਕੋਰਟ ’ਚ ਸੁਣਵਾਈ ਤੋਂ ਬਾਅਦ ਵਾਪਸ ਆ ਰਹੇ ਅਰੁਣ ਦੀ ਅੰਧੇਰੀਆ ਮੋੜ ਦੇ ਸੀਡੀਆਰ ਚੌਕ ’ਤੇ ਗੋਲੀ ਮਾਰ ਕੇ ਹੱਤਿਆ ਕਰ ਦਿੱਤੀ ਗਈ ਸੀ। ਇਸ ਹੱਤਿਆ ਦਾ ਦੋਸ਼ ਦੀਪਕ ਤੇ ਉਸ ਦੇ ਸਾਥੀਆਂ ’ਤੇ ਲੱਗਿਆ ਸੀ। ਉਸ ਸਮੇਂ ਤੋਂ ਹੀ ਉਹ ਜੇਲ੍ਹ ’ਚ ਬੰਦ ਹਨ।