ਮਰੇ ਹੋਏ ਖਾਤਾਧਾਰਕ ਦੇ ਖਾਤੇ ’ਚੋਂ ਕਢਵਾਏ 40 ਲੱਖ ਰੁਪਏ, ਅੰਦਰੂਨੀ ਖਾਤੇ ’ਚੋਂ ਵੀ ਉਡਾਏ ₹21 ਲੱਖ; ਸਾਬਕਾ SBI ਮੈਨੇਜਰ ਨੂੰ ਜੇਲ੍ਹ

ਡਿਜੀਟਲ ਡੈਸਕ, ਮੈਸੂਰ : ਮੈਸੂਰ ਦੀ ਇੱਕ ਅਦਾਲਤ ਨੇ ਸਟੇਟ ਬੈਂਕ ਆਫ਼ ਇੰਡੀਆ (SBI) ਦੇ ਇੱਕ ਸਾਬਕਾ ਚੀਫ਼ ਮੈਨੇਜਰ ਨੂੰ ਦੋਸ਼ੀ ਕਰਾਰ ਦਿੱਤਾ ਹੈ। ਉਨ੍ਹਾਂ ’ਤੇ 2005 ’ਚ ਮੌਤ ਹੋ ਚੁੱਕੇ ਇੱਕ ਖਾਤਾਧਾਰਕ ਦੇ ਖਾਤੇ ’ਚੋਂ ਧੋਖਾਧੜੀ ਕਰਕੇ 40.53 ਲੱਖ ਰੁਪਏ ਤੇ ਬੈਂਕ ਦੇ ਇੱਕ ਅੰਦਰੂਨੀ ਖਾਤੇ ’ਚੋਂ 21.04 ਲੱਖ ਰੁਪਏ ਟਰਾਂਸਫਰ ਕਰਨ ਦਾ ਦੋਸ਼ ਸੀ। ਅਦਾਲਤ ਨੇ ਉਨ੍ਹਾਂ ਨੂੰ ਇੱਕ ਸਾਲ ਦੀ ਸਖ਼ਤ ਕੈਦ ਦੀ ਸਜ਼ਾ ਸੁਣਾਈ ਹੈ ਤੇ 50,000 ਰੁਪਏ ਦਾ ਜੁਰਮਾਨਾ ਵੀ ਲਗਾਇਆ ਹੈ। ਦੋਸ਼ੀ ਏ.ਵੀ. ਕੁਲਕਰਨੀ ਘਟਨਾ ਦੇ ਸਮੇਂ, ਯਾਨੀ 13 ਮਈ 2009 ਤੋਂ 23 ਦਸੰਬਰ 2011 ਦਰਮਿਆਨ, ਮੈਸੂਰ ਦੀ ਐਸਬੀਆਈ ਚਾਮੁੰਡੀਪੁਰਮ ਸ਼ਾਖਾ ’ਚ ਚੀਫ਼ ਮੈਨੇਜਰ ਵਜੋਂ ਤਾਇਨਾਤ ਸਨ।

ਅੰਦਰੂਨੀ ਬੈਂਕ ਖਾਤੇ ’ਚੋਂ ਵੀ ਟਰਾਂਸਫਰ ਕੀਤੇ ਲੱਖਾਂ ਰੁਪਏ

ਇਸਤਗਾਸਾ ਪੱਖ ਦੇ ਅਨੁਸਾਰ, ਕੁਲਕਰਨੀ ਨੇ ਮ੍ਰਿਤਕ ਕ੍ਰਿਸ਼ਨਾ ਅਈਅਰ ਦੇ ਖਾਤੇ ’ਚੋਂ 40.53 ਲੱਖ ਰੁਪਏ ਟਰਾਂਸਫਰ ਕੀਤੇ ਸਨ। ਕ੍ਰਿਸ਼ਨਾ ਅਈਅਰ ਦੀ ਅਪ੍ਰੈਲ 2005 ’ਚ ਮੌਤ ਹੋ ਚੁੱਕੀ ਸੀ। ਇਸ ਤੋਂ ਇਲਾਵਾ ਉਨ੍ਹਾਂ ਨੇ ਬੈਂਕ ਦੇ ਇੱਕ ਅੰਦਰੂਨੀ ਖਾਤੇ ’ਚੋਂ ਵੀ 21.04 ਲੱਖ ਰੁਪਏ ਟਰਾਂਸਫਰ ਕੀਤੇ, ਜਿਸ ਨਾਲ ਕੁੱਲ ਰਕਮ 61.57 ਲੱਖ ਰੁਪਏ ਹੋ ਗਈ। ਇਸਤਗਾਸਾ ਪੱਖ ਦਾ ਦੋਸ਼ ਸੀ ਕਿ ਇਹ ਰਕਮ ਕੁਲਕਰਨੀ ਤੇ ਉਨ੍ਹਾਂ ਦੇ ਪੁੱਤਰ ਦੇ ਬੈਂਕ ਖਾਤਿਆਂ ’ਚ ਟਰਾਂਸਫਰ ਕੀਤੀ ਗਈ ਤੇ ਬਾਅਦ ’ਚ ਕਢਵਾ ਲਈ ਗਈ।

ਕੁਲਕਰਨੀ ਨੇ ਪੈਸੇ ਕਢਵਾਉਣ ਦੀ ਗੱਲ ਮੰਨੀ

ਬੈਂਕ ਦੇ ਸੀਨੀਅਰ ਅਧਿਕਾਰੀਆਂ ਵੱਲੋਂ ਕੀਤੀ ਗਈ ਅੰਦਰੂਨੀ ਜਾਂਚ ਦੌਰਾਨ ਗੜਬੜੀ ਦਾ ਪਤਾ ਲੱਗਾ। ਜਾਂਚ ਦੌਰਾਨ ਕੁਲਕਰਨੀ ਨੇ ਕਥਿਤ ਤੌਰ ’ਤੇ ਪੈਸੇ ਕਢਵਾਉਣ ਦੀ ਗੱਲ ਮੰਨ ਲਈ ਤੇ ਬਾਅਦ ’ਚ ਬੈਂਕ ਨੂੰ ਲਗਭਗ 62 ਲੱਖ ਰੁਪਏ ਵਾਪਸ ਕਰ ਦਿੱਤੇ। ਜਾਂਚ ਤੋਂ ਬਾਅਦ ਮੈਸੂਰ ਪੁਲਿਸ ਥਾਣੇ ’ਚ ਮਾਮਲਾ ਦਰਜ ਕੀਤਾ ਗਿਆ। ਜਾਂਚ ਪੂਰੀ ਹੋਣ ਉਪਰੰਤ ਪੁਲਿਸ ਨੇ ਅਦਾਲਤ ’ਚ ਚਾਰਜਸ਼ੀਟ ਦਾਖ਼ਲ ਕੀਤੀ।

ਅਦਾਲਤ ਨੇ ਕੀ ਕਿਹਾ?

ਦੋਵੇਂ ਪੱਖਾਂ ਦੀਆਂ ਦਲੀਲਾਂ ਸੁਣਨ ਤੇ ਰਿਕਾਰਡ ’ਤੇ ਮੌਜੂਦ ਸਬੂਤਾਂ ਦੀ ਜਾਂਚ ਕਰਨ ਤੋਂ ਬਾਅਦ ਮੈਸੂਰ ਦੀ ਪਹਿਲੀ ਵਧੀਕ ਸੀਜੇਐਮ ਅਦਾਲਤ ਦੇ ਜੱਜ ਪ੍ਰਕਾਸ਼ ਵੀ ਨੇ 25 ਸਤੰਬਰ ਨੂੰ ਫੈਸਲਾ ਸੁਣਾਇਆ। ਅਦਾਲਤ ਨੇ ਕੁਲਕਰਨੀ ਨੂੰ ਭਾਰਤੀ ਦੰਡ ਸੰਹਿਤਾ (IPC) ਦੀ ਧਾਰਾ 409 ਤਹਿਤ ਦੋਸ਼ੀ ਪਾਇਆ ਤੇ ਉਨ੍ਹਾਂ ਨੂੰ ਇੱਕ ਸਾਲ ਦੀ ਸਖ਼ਤ ਕੈਦ ਦੀ ਸਜ਼ਾ ਸੁਣਾਈ। ਇਸ ਦੇ ਨਾਲ ਹੀ ਅਦਾਲਤ ਨੇ ਉਨ੍ਹਾਂ ’ਤੇ 50,000 ਰੁਪਏ ਦਾ ਜੁਰਮਾਨਾ ਵੀ ਲਗਾਇਆ। ਅਦਾਲਤ ਨੇ ਹੁਕਮ ਦਿੱਤਾ ਕਿ ਜੁਰਮਾਨੇ ਦੀ ਰਕਮ ’ਚੋਂ 40,000 ਰੁਪਏ ਬੈਂਕ ਨੂੰ ਮੁਆਵਜ਼ੇ ਵਜੋਂ ਦਿੱਤੇ ਜਾਣ।