ਕਾਂਗਰਸ 'ਚ ਬਿਆਨਬਾਜ਼ੀ 'ਤੇ ਲੱਗੀ ਹਾਈਕਮਾਨ ਦੀ ਲਗਾਮ ! ਹੁਣ ਹਰ ਆਗੂ ਨਹੀਂ ਖੋਲ੍ਹ ਸਕੇਗਾ ਜ਼ਬਾਨ, ਸਿਰਫ਼ ਇਹ ਨੇਤਾ ਦੇਣਗੇ ਬਿਆਨ

ਰਾਜ ਬਿਊਰੋ, ਜੰਮੂ - ਜੰਮੂ-ਕਸ਼ਮੀਰ ਕਾਂਗਰਸ ਕਮੇਟੀ ਨੇ ਮੰਗਲਵਾਰ ਨੂੰ ਮੀਡੀਆ ਨਾਲ ਗੱਲਬਾਤ ਅਤੇ ਪਾਰਟੀ ਦਾ ਅਧਿਕਾਰਤ ਪੱਖ ਰੱਖਣ ਨੂੰ ਲੈ ਕੇ ਆਪਣੇ ਸਾਰੇ ਆਗੂਆਂ ਅਤੇ ਵਰਕਰਾਂ ਲਈ ਸਖ਼ਤ ਦਿਸ਼ਾ-ਨਿਰਦੇਸ਼ ਜਾਰੀ ਕੀਤੇ ਹਨ। ਕਮੇਟੀ ਨੇ ਕਿਹਾ ਹੈ ਕਿ ਸਿਰਫ਼ ਅਧਿਕਾਰਤ ਬੁਲਾਰੇ ਅਤੇ ਪ੍ਰਮੁੱਖ ਆਗੂ ਹੀ ਨੀਤੀਗਤ ਮਾਮਲਿਆਂ 'ਤੇ ਬਿਆਨ ਦੇ ਸਕਣਗੇ, ਹੋਰ ਕੋਈ ਨਹੀਂ। ਜੇਕਰ ਕੋਈ ਹੋਰ ਆਗੂ, ਵਰਕਰ ਜਾਂ ਅਹੁਦੇਦਾਰ ਅਜਿਹਾ ਕਰਦਾ ਹੈ ਤਾਂ ਉਸ ਖ਼ਿਲਾਫ਼ ਅਨੁਸ਼ਾਸਨੀ ਕਾਰਵਾਈ ਕੀਤੀ ਜਾਵੇਗੀ। ਪ੍ਰਦੇਸ਼ ਕਾਂਗਰਸ ਕਮੇਟੀ ਦੇ ਪ੍ਰਧਾਨ ਤਾਰਿਕ ਹਾਮਿਦ ਕਰਾ ਦੀ ਪ੍ਰਧਾਨਗੀ ਹੇਠ ਕਸ਼ਮੀਰ ਡਿਵੀਜ਼ਨ ਦੇ ਸਾਰੇ ਜ਼ਿਲ੍ਹਾ ਕਾਂਗਰਸ ਪ੍ਰਧਾਨਾਂ ਨਾਲ ਹੋਈ ਮੀਟਿੰਗ ਤੋਂ ਬਾਅਦ ਇਹ ਹੁਕਮ ਜਾਰੀ ਕੀਤੇ ਗਏ ਹਨ।