AC ਕੋਚ ’ਚ ਕਾਕਰੋਚਾਂ ਦੀ ਭਰਮਾਰ: ਯਾਤਰੀਆਂ ਨੇ ਚੇਨ ਖਿੱਚ ਕੇ ਰੋਕੀ ਸਹਰਸਾ-ਅਹਿਮਦਾਬਾਦ ਐਕਸਪ੍ਰੈੱਸ; ਅੱਧੇ ਘੰਟੇ ਦੀ ਸਫਾਈ ਤੋਂ ਬਾਅਦ ਟ੍ਰੇਨ ਹੋਈ ਰਵਾਨਾ

ਡਿਜੀਟਲ ਡੈਸਕ, ਇਟਾਰਸੀ : AC ਕੋਚ ’ਚ ਆਰਾਮਦਾਇਕ ਸਫਰ ਦੀ ਉਮੀਦ ਨਾਲ ਯਾਤਰਾ ਕਰ ਰਹੇ ਯਾਤਰੀਆਂ ਨੂੰ ਉਸ ਸਮੇਂ ਪਰੇਸ਼ਾਨੀ ਦਾ ਸਾਹਮਣਾ ਕਰਨਾ ਪਿਆ, ਜਦੋਂ ਕੋਚ ’ਚ ਵੱਡੀ ਗਿਣਤੀ ’ਚ ਕਾਕਰੋਚ ਘੁੰਮਦੇ ਨਜ਼ਰ ਆਏ। ਇਸ ਤੋਂ ਗੁੱਸੇ ’ਚ ਆਏ ਯਾਤਰੀਆਂ ਨੇ ਚੇਨ ਪੁਲਿੰਗ ਕਰਕੇ ਸਹਰਸਾ-ਅਹਿਮਦਾਬਾਦ ਐਕਸਪ੍ਰੈੱਸ ਨੂੰ ਇਟਾਰਸੀ ਸਟੇਸ਼ਨ ’ਤੇ ਹੀ ਰੋਕ ਦਿੱਤਾ। ਸ਼ਿਕਾਇਤ ਮਿਲਣ ਤੋਂ ਬਾਅਦ ਰੇਲਵੇ ਤੇ RPF ਦਾ ਅਮਲਾ ਮੌਕੇ ’ਤੇ ਪਹੁੰਚਿਆ ਤੇ ਕੋਚ ਦੀ ਸਫਾਈ ਕਰਵਾਉਣ ਦੇ ਨਾਲ ਦਵਾਈ ਦਾ ਛਿੜਕਾਅ ਵੀ ਕਰਵਾਇਆ ਗਿਆ। ਇਹ ਮਾਮਲਾ ਵੀਰਵਾਰ ਰਾਤ ਦਾ ਹੈ।

19484 ਸਹਰਸਾ-ਅਹਿਮਦਾਬਾਦ ਐਕਸਪ੍ਰੈੱਸ ਰਾਤ ਕਰੀਬ 10 ਵਜੇ ਇਟਾਰਸੀ ਰੇਲਵੇ ਸਟੇਸ਼ਨ ਦੇ ਪਲੇਟਫਾਰਮ ਨੰਬਰ ਦੋ ’ਤੇ ਪਹੁੰਚੀ ਸੀ। ਟ੍ਰੇਨ ਨੂੰ ਅੱਗੇ ਵਧਣ ਦਾ ਸਿਗਨਲ ਮਿਲ ਗਿਆ ਸੀ ਤੇ ਜਿਵੇਂ ਹੀ ਇਹ ਰਵਾਨਾ ਹੋਣ ਲੱਗੀ, B-1 AC ਕੋਚ ਦੇ ਯਾਤਰੀਆਂ ਨੇ ਚੇਨ ਖਿੱਚ ਕੇ ਟ੍ਰੇਨ ਰੋਕ ਦਿੱਤੀ।

ਵਾਧੂ ਕਿਰਾਇਆ, ਫਿਰ ਵੀ ਕਾਕਰੋਚਾਂ ਨਾਲ ਜੰਗ

B-1 ਕੋਚ ਦੇ ਯਾਤਰੀਆਂ ਨੇ ਰੇਲਵੇ ਦੀ ਸਫਾਈ ਵਿਵਸਥਾ ’ਤੇ ਗੰਭੀਰ ਸਵਾਲ ਖੜ੍ਹੇ ਕੀਤੇ। ਉਨ੍ਹਾਂ ਦਾ ਕਹਿਣਾ ਸੀ ਕਿ AC ਕੋਚ ’ਚ ਸਫਰ ਕਰਨ ਲਈ ਵਾਧੂ ਕਿਰਾਇਆ ਦੇਣ ਦੇ ਬਾਵਜੂਦ ਕੋਚ ਦੀ ਇਹ ਹਾਲਤ ਯਾਤਰੀਆਂ ਲਈ ਪਰੇਸ਼ਾਨੀ ਦਾ ਕਾਰਨ ਬਣ ਰਹੀ ਹੈ। ਯਾਤਰੀਆਂ ਮੁਤਾਬਕ ਕੋਚ ’ਚ ਵੱਡੀ ਗਿਣਤੀ ’ਚ ਕਾਕਰੋਚ ਘੁੰਮ ਰਹੇ ਸਨ, ਜਿਸ ਕਾਰਨ ਸਫਰ ਕਰਨਾ ਮੁਸ਼ਕਲ ਹੋ ਗਿਆ ਸੀ।

ਹੰਗਾਮੇ ਤੋਂ ਬਾਅਦ ਹਰਕਤ ’ਚ ਆਇਆ ਰੇਲਵੇ ਅਮਲਾ

ਚੇਨ ਪੁਲਿੰਗ ਤੇ ਯਾਤਰੀਆਂ ਦੇ ਹੰਗਾਮੇ ਦੀ ਸੂਚਨਾ ਮਿਲਦੇ ਹੀ ਰੇਲਵੇ ਤੇ RPF ਦੇ ਕਰਮਚਾਰੀ ਮੌਕੇ ’ਤੇ ਪਹੁੰਚ ਗਏ। ਸ਼ਿਕਾਇਤ ਦੀ ਜਾਂਚ ਤੋਂ ਬਾਅਦ ਡਿਊਟੀ ’ਤੇ ਮੌਜੂਦ ਸਫਾਈ ਕਰਮਚਾਰੀਆਂ ਨੂੰ B-1 ਕੋਚ ’ਚ ਭੇਜਿਆ ਗਿਆ। ਕਰਮਚਾਰੀਆਂ ਨੇ ਕੋਚ ਦੀ ਸਫਾਈ ਕੀਤੀ ਤੇ ਕਾਕਰੋਚਾਂ ਨੂੰ ਕਾਬੂ ਕਰਨ ਲਈ ਦਵਾਈ ਦਾ ਛਿੜਕਾਅ ਕੀਤਾ। ਇਸ ਦੌਰਾਨ ਟ੍ਰੇਨ ਕਰੀਬ ਅੱਧੇ ਘੰਟੇ ਤੱਕ ਪਲੇਟਫਾਰਮ ’ਤੇ ਖੜ੍ਹੀ ਰਹੀ।

ਯਾਤਰੀਆਂ ਦੇ ਸੰਤੁਸ਼ਟ ਹੋਣ ਤੋਂ ਬਾਅਦ ਰਵਾਨਾ ਹੋਈ ਟ੍ਰੇਨ

ਸਫਾਈ ਤੇ ਦਵਾਈ ਦੇ ਛਿੜਕਾਅ ਤੋਂ ਬਾਅਦ ਯਾਤਰੀਆਂ ਨੂੰ ਸੰਤੁਸ਼ਟ ਕੀਤਾ ਗਿਆ, ਜਿਸ ਤੋਂ ਬਾਅਦ ਟ੍ਰੇਨ ਨੂੰ ਅੱਗੇ ਲਈ ਰਵਾਨਾ ਕਰ ਦਿੱਤਾ ਗਿਆ। ਯਾਤਰੀਆਂ ਨੇ ਰੇਲਵੇ ਤੋਂ AC ਕੋਚਾਂ ’ਚ ਨਿਯਮਿਤ ਤੇ ਬਿਹਤਰ ਸਫਾਈ ਵਿਵਸਥਾ ਯਕੀਨੀ ਬਣਾਉਣ ਦੀ ਮੰਗ ਵੀ ਕੀਤੀ।

ਉਪ ਸਟੇਸ਼ਨ ਮੈਨੇਜਰ ਨੇ ਦੱਸਿਆ ਕਿ ਟ੍ਰੇਨ ਪਲੇਟਫਾਰਮ ਨੰਬਰ ਦੋ ’ਤੇ ਪਹੁੰਚੀ ਸੀ। B-1 ਕੋਚ ’ਚ ਕਾਕਰੋਚ ਹੋਣ ਦੀ ਸ਼ਿਕਾਇਤ ਮਿਲਣ ਤੋਂ ਬਾਅਦ ਤੁਰੰਤ ਸਫਾਈ ਕਰਵਾਈ ਗਈ ਤੇ ਦਵਾਈ ਦਾ ਛਿੜਕਾਅ ਕੀਤਾ ਗਿਆ। ਇਸ ਤੋਂ ਬਾਅਦ ਟ੍ਰੇਨ ਨੂੰ ਅੱਗੇ ਰਵਾਨਾ ਕਰ ਦਿੱਤਾ ਗਿਆ।