ਡਰਾਈਵਰਾਂ ਨੂੰ 'ਜ਼ੀਰੋ ਕਮਿਸ਼ਨ', ਕਿਸਾਨਾਂ ਨੂੰ 6 ਫੀਸਦੀ ਵਿਆਜ ’ਤੇ ਲੋਨ; CM ਯੋਗੀ ਦਾ ਵੱਡਾ ਫੈਸਲਾ

ਜਾਗਰਣ ਸੰਵਾਦਦਾਤਾ, ਲਖਨਊ : ਮੁੱਖ ਮੰਤਰੀ ਯੋਗੀ ਆਦਿਤਿਆਨਾਥ ਨੇ ਬੁੱਧਵਾਰ ਨੂੰ ਭਾਰਤ ਟੈਕਸੀ ਤੇ ਮੁੱਖ ਮੰਤਰੀ ਕ੍ਰਿਸ਼ਕ ਸਮ੍ਰਿੱਧੀ ਯੋਜਨਾ ਦੀ ਸ਼ੁਰੂਆਤ ਕਰਦਿਆਂ ਟੈਕਸੀ ਡਰਾਈਵਰਾਂ ਤੇ ਕਿਸਾਨਾਂ ਲਈ ਦੋ ਵੱਡੇ ਕਦਮ ਚੁੱਕੇ। ਭਾਰਤ ਟੈਕਸੀ ਨਾਲ ਟੈਕਸੀ, ਟੂ-ਵ੍ਹੀਲਰ ਤੇ ਥ੍ਰੀ-ਵ੍ਹੀਲਰ ਡਰਾਈਵਰ ਰਜਿਸਟ੍ਰੇਸ਼ਨ ਕਰਵਾ ਕੇ ਜ਼ੀਰੋ ਕਮਿਸ਼ਨ ’ਤੇ ਜੁੜ ਸਕਣਗੇ। ਉਨ੍ਹਾਂ ਨੂੰ ਪੰਜ ਲੱਖ ਰੁਪਏ ਦੀ ਸਮਾਜਿਕ ਸੁਰੱਖਿਆ ਵੀ ਮਿਲੇਗੀ। ਉੱਥੇ ਹੀ ਮੁੱਖ ਮੰਤਰੀ ਕ੍ਰਿਸ਼ਕ ਸਮ੍ਰਿੱਧੀ ਯੋਜਨਾ ਤਹਿਤ LDB ਵੱਲੋਂ ਕਿਸਾਨਾਂ ਨੂੰ ਮਿਲਣ ਵਾਲੇ ਕਰਜ਼ੇ ਦੀ ਵਿਆਜ ਦਰ 11 ਫੀਸਦੀ ਤੋਂ ਘਟਾ ਕੇ 6 ਫੀਸਦੀ ਕਰ ਦਿੱਤੀ ਗਈ ਹੈ। ਮੁੱਖ ਮੰਤਰੀ ਯੋਗੀ ਨੇ ਕਿਹਾ ਕਿ ਸਹਿਕਾਰਤਾ ਦੀ ਕਮਾਨ ਕਿਸ ਦੇ ਹੱਥਾਂ ’ਚ ਹੈ, ਉਸੇ ’ਤੇ ਇਸ ਦੀ ਸਫਲਤਾ ਨਿਰਭਰ ਕਰਦੀ ਹੈ। ਚੰਗੀ ਅਗਵਾਈ ਸਹਿਕਾਰਤਾ ਨੂੰ ਖੁਸ਼ਹਾਲੀ ਦਾ ਸਾਧਨ ਬਣਾਉਂਦੀ ਹੈ, ਜਦਕਿ ਗਲਤ ਅਗਵਾਈ ਇਸ ਨੂੰ ਅਰਾਜਕਤਾ ਵੱਲ ਲੈ ਜਾ ਸਕਦੀ ਹੈ। ਆਜ਼ਾਦੀ ਤੋਂ ਬਾਅਦ ਪਹਿਲੀ ਵਾਰ ਦੇਸ਼ ’ਚ ਵੱਖਰਾ ਸਹਿਕਾਰਤਾ ਮੰਤਰਾਲਾ ਬਣਾਇਆ ਗਿਆ ਤੇ ਹੁਣ ਇਸ ਦੇ ਨਤੀਜੇ ਸਾਹਮਣੇ ਆ ਰਹੇ ਹਨ।

ਭਾਰਤ ਦੀ ਰਫ਼ਤਾਰ ਨੂੰ ਤਰੱਕੀ ’ਚ ਬਦਲੇਗੀ ਭਾਰਤ ਟੈਕਸੀ

ਮੁੱਖ ਮੰਤਰੀ ਯੋਗੀ ਨੇ ਕਿਹਾ ਕਿ ਟੈਕਸੀ, ਟੂ-ਵ੍ਹੀਲਰ ਤੇ ਥ੍ਰੀ-ਵ੍ਹੀਲਰ ਡਰਾਈਵਰਾਂ ਬਾਰੇ ਪਹਿਲਾਂ ਕੋਈ ਨਹੀਂ ਸੋਚਦਾ ਸੀ। ਹੁਣ ਉਹ ਰਜਿਸਟ੍ਰੇਸ਼ਨ ਦੇ ਨਾਲ ਜ਼ੀਰੋ ਕਮਿਸ਼ਨ ’ਤੇ ਭਾਰਤ ਟੈਕਸੀ ਦਾ ਹਿੱਸਾ ਬਣਨਗੇ ਤੇ ਪੰਜ ਲੱਖ ਰੁਪਏ ਦੀ ਸਮਾਜਿਕ ਸੁਰੱਖਿਆ ਪ੍ਰਾਪਤ ਕਰਨਗੇ। ਸਮਾਜਿਕ ਸੁਰੱਖਿਆ ਮਿਲਣ ਨਾਲ ਡਰਾਈਵਰ ਨਿਸ਼ਚਿੰਤ ਹੋ ਕੇ ਜ਼ਿੰਮੇਵਾਰੀ ਨਾਲ ਆਪਣਾ ਕੰਮ ਕਰ ਸਕੇਗਾ। ਉਨ੍ਹਾਂ ਕਿਹਾ ਕਿ ਭਾਰਤ ਟੈਕਸੀ ਸਿਰਫ਼ ਯਾਤਰੀਆਂ ਨੂੰ ਲਿਜਾਣ ਵਾਲੀ ਟੈਕਸੀ ਨਹੀਂ ਹੈ। ਇਹ ਪੂਰੇ ਭਾਰਤ ਦੀ ਟੈਕਸੀ ਹੈ, ਜੋ ਭਾਰਤ ਦੀ ਰਫ਼ਤਾਰ ਨੂੰ ਤਰੱਕੀ ’ਚ ਬਦਲਣ ਦਾ ਕੰਮ ਕਰੇਗੀ। ਲਖਨਊ, ਗੋਰਖਪੁਰ, ਵਾਰਾਣਸੀ ਤੇ ਪ੍ਰਯਾਗਰਾਜ ’ਚ ਇਸ ਦਾ ਸੰਚਾਲਨ ਸ਼ੁਰੂ ਕੀਤਾ ਗਿਆ ਹੈ। ਲਖਨਊ ਏਅਰਪੋਰਟ, ਲਖਨਊ ਮੈਟਰੋ ਤੇ ਲਖਨਊ ਪੁਲਿਸ ਸਮੇਤ ਵੱਖ-ਵੱਖ ਸੰਸਥਾਵਾਂ ਨਾਲ MOU ਵੀ ਕੀਤੇ ਗਏ ਹਨ।

ਮਹਾਕੁੰਭ ’ਚ ਦੇਖਿਆ ਸੀ ਰੈਪਿਡੋ ਦਾ ਸਫਲ ਪ੍ਰਯੋਗ

ਮੁੱਖ ਮੰਤਰੀ ਯੋਗੀ ਨੇ ਪ੍ਰਯਾਗਰਾਜ ਮਹਾਕੁੰਭ 2025 ਦਾ ਜ਼ਿਕਰ ਕਰਦਿਆਂ ਕਿਹਾ ਕਿ ਉੱਥੇ ਲੱਖਾਂ ਨੌਜਵਾਨ ਰੈਪਿਡੋ ਰਾਹੀਂ ਆਪਣੀਆਂ ਬਾਈਕਾਂ ’ਤੇ ਸ਼ਰਧਾਲੂਆਂ ਨੂੰ ਸੁਰੱਖਿਅਤ ਸੰਗਮ ਤੱਕ ਪਹੁੰਚਾ ਰਹੇ ਸਨ। ਸੰਗਮ ਤੋਂ ਰੇਲਵੇ ਸਟੇਸ਼ਨ ਤੇ ਏਅਰਪੋਰਟ ਤੱਕ ਪਹੁੰਚਾਉਣ ’ਚ ਵੀ ਉਨ੍ਹਾਂ ਦਾ ਯੋਗਦਾਨ ਰਿਹਾ। ਇਸ ਨਾਲ ਟ੍ਰੈਫਿਕ ਪ੍ਰਭਾਵਿਤ ਨਹੀਂ ਹੋਇਆ ਤੇ ਲੋਕਾਂ ਨੂੰ ਆਸਾਨੀ ਨਾਲ ਆਉਣ-ਜਾਣ ਦੀ ਸਹੂਲਤ ਮਿਲੀ। ਉਨ੍ਹਾਂ ਨੇ ਟਰਾਂਸਪੋਰਟ ਮੰਤਰੀ ਦਯਾਸ਼ੰਕਰ ਸਿੰਘ ਨੂੰ ਪੇਂਡੂ ਬੱਸ ਸੇਵਾ ਨੂੰ ਵੀ ਭਾਰਤ ਟੈਕਸੀ ਦੀ ਤਰਜ਼ ’ਤੇ ਅੱਗੇ ਵਧਾਉਣ ਲਈ ਕਿਹਾ। ਮੁੱਖ ਮੰਤਰੀ ਨੇ ਕਿਹਾ ਕਿ ਜੇਕਰ ਇਸ ਮਾਡਲ ਨੂੰ ਅੱਗੇ ਵਧਾਇਆ ਗਿਆ ਤਾਂ ਲੱਖਾਂ ਨੌਜਵਾਨਾਂ ਲਈ ਰੁਜ਼ਗਾਰ ਦੇ ਨਵੇਂ ਮੌਕੇ ਪੈਦਾ ਹੋਣਗੇ।

ਪੰਜ ਲੱਖ ਕਿਸਾਨਾਂ ਨੂੰ 6 ਫੀਸਦੀ ’ਤੇ ਕਰਜ਼ਾ

ਮੁੱਖ ਮੰਤਰੀ ਕ੍ਰਿਸ਼ਕ ਸਮ੍ਰਿੱਧੀ ਯੋਜਨਾ ਦੀ ਸ਼ੁਰੂਆਤ ਕਰਦਿਆਂ ਮੁੱਖ ਮੰਤਰੀ ਯੋਗੀ ਨੇ ਕਿਹਾ ਕਿ ਉੱਤਰ ਪ੍ਰਦੇਸ਼ ਸਹਿਕਾਰੀ ਗ੍ਰਾਮੀਣ ਵਿਕਾਸ ਬੈਂਕ ਤੋਂ ਕਿਸਾਨਾਂ ਨੂੰ 11 ਫੀਸਦੀ ਵਿਆਜ ’ਤੇ ਕਰਜ਼ਾ ਮਿਲਦਾ ਸੀ। ਹੁਣ ਇਸ ਨੂੰ ਘਟਾ ਕੇ 6 ਫੀਸਦੀ ਕਰ ਦਿੱਤਾ ਗਿਆ ਹੈ। ਖੇਤੀਬਾੜੀ ਤੇ ਮਸ਼ੀਨਰੀ ਲਈ ਕਿਸਾਨਾਂ ਨੂੰ ਪੈਸਿਆਂ ਦੀ ਕਮੀ ਨਾ ਹੋਵੇ, ਇਸ ਲਈ ਲੰਬੇ ਸਮੇਂ ਦੇ ਕਰਜ਼ੇ ਦੀ ਵਿਵਸਥਾ ਕੀਤੀ ਗਈ ਹੈ। ਆਉਣ ਵਾਲੇ ਕੁਝ ਸਾਲਾਂ ’ਚ ਪੰਜ ਲੱਖ ਛੋਟੇ ਤੇ ਸੀਮਾਂਤ ਕਿਸਾਨਾਂ ਨੂੰ ਇਸ ਦਾ ਲਾਭ ਦੇਣ ਦਾ ਟੀਚਾ ਹੈ। ਮੁੱਖ ਮੰਤਰੀ ਯੋਗੀ ਨੇ ਕਿਹਾ ਕਿ ਅੰਨਦਾਤਾ ਕਿਸਾਨ ਖੁਸ਼ਹਾਲ ਹੋਵੇਗਾ ਤਾਂ ਭਾਰਤ ਖੁਸ਼ਹਾਲ ਹੋਵੇਗਾ। ਅੰਨਦਾਤਾ ਕਿਸਾਨ ਸਮ੍ਰਿੱਧ ਹੋਵੇਗਾ ਤਾਂ ਭਾਰਤ ਸਮ੍ਰਿੱਧ ਹੋਵੇਗਾ। ਸਹਿਕਾਰਤਾ ਖੇਤਰ ਜਿੰਨਾ ਮਜ਼ਬੂਤ ਹੋਵੇਗਾ, ਦੇਸ਼ ਵੀ ਉਨਾ ਹੀ ਮਜ਼ਬੂਤ ਹੋਵੇਗਾ।

86 ਲੱਖ ਕਿਸਾਨਾਂ ਦਾ 36 ਹਜ਼ਾਰ ਕਰੋੜ ਰੁਪਏ ਦਾ ਕਰਜ਼ਾ ਮਾਫ਼ ਕੀਤਾ

ਮੁੱਖ ਮੰਤਰੀ ਯੋਗੀ ਨੇ ਕਿਹਾ ਕਿ 2017 ’ਚ ਸਰਕਾਰ ਬਣਨ ਤੋਂ ਬਾਅਦ 86 ਲੱਖ ਛੋਟੇ ਤੇ ਸੀਮਾਂਤ ਕਿਸਾਨਾਂ ਦਾ 36 ਹਜ਼ਾਰ ਕਰੋੜ ਰੁਪਏ ਤੋਂ ਵੱਧ ਦਾ ਕਰਜ਼ਾ ਮਾਫ਼ ਕੀਤਾ ਗਿਆ। ਦਹਾਕਿਆਂ ਤੋਂ ਲੰਬਿਤ ਸਿੰਚਾਈ ਪ੍ਰਾਜੈਕਟਾਂ ਨੂੰ ਪੂਰਾ ਕੀਤਾ ਗਿਆ। ਸਰਯੂ ਨਹਿਰ ਰਾਸ਼ਟਰੀ ਪ੍ਰਾਜੈਕਟ ਨੂੰ ਪੂਰਾ ਹੋਣ ’ਚ ਕਰੀਬ 50 ਸਾਲ ਲੱਗੇ। ਅਰਜੁਨ ਸਹਾਇਕ, ਬਾਣਸਾਗਰ ਤੇ ਮੱਧ ਗੰਗਾ ਵਰਗੇ ਪ੍ਰਾਜੈਕਟਾਂ ਨੂੰ ਵੀ ਅੱਗੇ ਵਧਾਇਆ ਗਿਆ। ਉਨ੍ਹਾਂ ਕਿਹਾ ਕਿ ਪਿਛਲੇ ਕਰੀਬ ਸਾਢੇ ਨੌਂ ਸਾਲਾਂ ’ਚ ਸੂਬੇ ’ਚ 24 ਲੱਖ ਹੈਕਟੇਅਰ ਜ਼ਮੀਨ ਨੂੰ ਵਾਧੂ ਸਿੰਚਾਈ ਸਹੂਲਤ ਨਾਲ ਜੋੜਿਆ ਗਿਆ ਹੈ। 16 ਲੱਖ ਤੋਂ ਵੱਧ ਨਿੱਜੀ ਟਿਊਬਵੈੱਲ ਵਾਲੇ ਕਿਸਾਨਾਂ ਨੂੰ ਮੁਫ਼ਤ ਬਿਜਲੀ ਦਿੱਤੀ ਜਾ ਰਹੀ ਹੈ। ਨਹਿਰਾਂ ਤੇ ਸਰਕਾਰੀ ਟਿਊਬਵੈੱਲਾਂ ਰਾਹੀਂ ਸਿੰਚਾਈ ਵੀ ਮੁਫ਼ਤ ਹੈ।

3.30 ਲੱਖ ਕਰੋੜ ਰੁਪਏ ਗੰਨੇ ਦੀ ਕੀਮਤ ਦਾ ਭੁਗਤਾਨ

ਮੁੱਖ ਮੰਤਰੀ ਯੋਗੀ ਨੇ ਕਿਹਾ ਕਿ ਸੂਬੇ ’ਚ ਇਸ ਸਮੇਂ 122 ਚੀਨੀ ਮਿੱਲਾਂ ਚੱਲ ਰਹੀਆਂ ਹਨ। ਇਨ੍ਹਾਂ ਵਿੱਚੋਂ 100 ਤੋਂ ਵੱਧ ਮਿੱਲਾਂ ਚੌਥੇ ਦਿਨ ਗੰਨੇ ਦੀ ਕੀਮਤ ਦਾ ਭੁਗਤਾਨ ਕਰ ਰਹੀਆਂ ਹਨ। ਪਿਛਲੇ ਨੌਂ ਸਾਲਾਂ ’ਚ ਕਿਸਾਨਾਂ ਨੂੰ 3.30 ਲੱਖ ਕਰੋੜ ਰੁਪਏ ਗੰਨੇ ਦੀ ਕੀਮਤ ਵਜੋਂ ਅਦਾ ਕੀਤੇ ਗਏ ਹਨ। ਉਨ੍ਹਾਂ ਦੋਸ਼ ਲਗਾਇਆ ਕਿ ਪਿਛਲੀਆਂ ਸਰਕਾਰਾਂ ਨੇ 29 ਚੀਨੀ ਮਿੱਲਾਂ ਬੰਦ ਕੀਤੀਆਂ ਸਨ ਤੇ ਇਨ੍ਹਾਂ ਵਿੱਚੋਂ 21 ਨੂੰ ਬਹੁਤ ਘੱਟ ਕੀਮਤ ’ਤੇ ਵੇਚ ਦਿੱਤਾ ਸੀ। ਉਨ੍ਹਾਂ ਕਿਹਾ ਕਿ ਕਿਸਾਨਾਂ ਨੂੰ ਬੀਜ ਤੋਂ ਲੈ ਕੇ ਬਾਜ਼ਾਰ ਤੱਕ ਸਹੂਲਤ ਦੇਣ ਲਈ ਕੰਮ ਕੀਤਾ ਗਿਆ ਹੈ। ਪੈਕ ਹਾਊਸ ਬਣਾਏ ਗਏ, ਫੂਡ ਪ੍ਰੋਸੈਸਿੰਗ ਯੂਨਿਟ ਲਗਾਈਆਂ ਗਈਆਂ ਤੇ FPO ਦੇ ਗਠਨ ਦੇ ਨਾਲ ਖੇਤੀਬਾੜੀ ਵਿਗਿਆਨ ਕੇਂਦਰਾਂ ਤੋਂ ਤਕਨੀਕੀ ਸਹਿਯੋਗ ਦਿੱਤਾ ਗਿਆ। ਸਹਿਕਾਰਤਾ ਰਾਹੀਂ ਸੂਬੇ ’ਚ ਵੱਖ-ਵੱਖ ਥਾਵਾਂ ’ਤੇ 50 ਹਜ਼ਾਰ ਮੀਟ੍ਰਿਕ ਟਨ ਸਮਰੱਥਾ ਵਾਲੇ ਵੇਅਰਹਾਊਸ ਵੀ ਤਿਆਰ ਕੀਤੇ ਜਾ ਰਹੇ ਹਨ।

54 ਲੱਖ ਨਵੇਂ ਮੈਂਬਰ, 15 ਸਹਿਕਾਰੀ ਬੈਂਕ ਮੁਨਾਫ਼ੇ ’ਚ

ਮੁੱਖ ਮੰਤਰੀ ਯੋਗੀ ਨੇ ਕਿਹਾ ਕਿ 2017 ਤੋਂ ਪਹਿਲਾਂ ਸੂਬੇ ਦੇ 16 ਸਹਿਕਾਰੀ ਬੈਂਕ ਨਿਸ਼ਕਿਰਿਆ ਹੋ ਚੁੱਕੇ ਸਨ ਤੇ ਉਨ੍ਹਾਂ ਦੇ ਲਾਇਸੈਂਸ ਜ਼ਬਤ ਹੋ ਗਏ ਸਨ। ਇਨ੍ਹਾਂ ’ਚ ਕਿਸਾਨਾਂ ਦੇ ਹਜ਼ਾਰਾਂ ਕਰੋੜ ਰੁਪਏ ਜਮ੍ਹਾਂ ਸਨ। ਹੁਣ 16 ਵਿੱਚੋਂ 15 ਬੈਂਕ ਮੁੜ ਮੁਨਾਫ਼ੇ ’ਚ ਆ ਗਏ ਹਨ। ਇੱਕ ਹੋਰ ਬੈਂਕ ਨੂੰ ਵੀ ਬਿਹਤਰ ਬਣਾਉਣ ਲਈ ਕੰਮ ਚੱਲ ਰਿਹਾ ਹੈ। ਉਨ੍ਹਾਂ ਦੱਸਿਆ ਕਿ ਪੈਕਸ ਨੂੰ ਪਹਿਲਾਂ 10 ਲੱਖ ਰੁਪਏ ਤੱਕ ਬਿਨਾਂ ਵਿਆਜ ਵਾਲੀ ਕੈਸ਼ ਕ੍ਰੈਡਿਟ ਸਹੂਲਤ ਦਿੱਤੀ ਗਈ ਸੀ, ਜਿਸ ਨੂੰ ਵਧਾ ਕੇ 15 ਲੱਖ ਰੁਪਏ ਕਰ ਦਿੱਤਾ ਗਿਆ ਹੈ। ਸਹਿਕਾਰਤਾ ਨਾਲ 54 ਲੱਖ ਨਵੇਂ ਮੈਂਬਰ ਜੁੜੇ ਹਨ। ਕਿਸਾਨਾਂ ਨੂੰ ਸਮੇਂ ਸਿਰ ਖਾਦ, ਕੀਟਨਾਸ਼ਕ ਤੇ ਹੋਰ ਸਹੂਲਤਾਂ ਮੁਹੱਈਆ ਕਰਵਾਉਣ ਲਈ ਡਿਜੀਟਲ ਪ੍ਰਬੰਧ ਨੂੰ ਵੀ ਮਜ਼ਬੂਤ ਕੀਤਾ ਜਾ ਰਿਹਾ ਹੈ।

ਕ੍ਰਿਸ਼ਕ ਸਮ੍ਰਿੱਧੀ ਪੋਰਟਲ ਲਾਂਚ, ਭਾਰਤ ਟੈਕਸੀ ਨੂੰ ਕੀਤਾ ਰਵਾਨਾ

ਪ੍ਰੋਗਰਾਮ ’ਚ ਮੁੱਖ ਮੰਤਰੀ ਯੋਗੀ ਆਦਿਤਿਆਨਾਥ ਨੇ ਬਟਨ ਦਬਾ ਕੇ ਮੁੱਖ ਮੰਤਰੀ ਕ੍ਰਿਸ਼ਕ ਸਮ੍ਰਿੱਧੀ ਪੋਰਟਲ ਐਪ UPCDC ਲਾਂਚ ਕੀਤਾ। ਖਾਦ ਲਈ ਮੋਬਾਈਲ ਐਪ ਤੇ ਸਹਿਕਾਰਤਾ ਦੀਆਂ ਸੇਵਾਵਾਂ ਆਸਾਨੀ ਨਾਲ ਉਪਲਬਧ ਕਰਵਾਉਣ ਲਈ ਕੋਆਪਰੇਟਿਵ ਡਾਟਾ ਸੈਂਟਰ ਤੇ ਮੋਬਾਈਲ ਐਪ ਦੀ ਵੀ ਸ਼ੁਰੂਆਤ ਕੀਤੀ ਗਈ। ਮੁੱਖ ਮੰਤਰੀ ਨੇ ਪੰਜ ਸਾਰਥੀਆਂ ਨੂੰ ਭਾਰਤ ਟੈਕਸੀ ਦੇ ਸ਼ੇਅਰ ਸਰਟੀਫਿਕੇਟ ਤੇ ਮੁੱਖ ਮੰਤਰੀ ਕ੍ਰਿਸ਼ਕ ਸਮ੍ਰਿੱਧੀ ਯੋਜਨਾ ਦੇ ਪੰਜ ਲਾਭਪਾਤਰੀਆਂ ਨੂੰ ਕਰਜ਼ਾ ਮਨਜ਼ੂਰੀ ਪੱਤਰ ਸੌਂਪੇ। ਭਾਰਤ ਟੈਕਸੀ ਦੇ CEO ਕਰਨਲ ਹਿਮਾਂਸ਼ੂ ਤੇ ਅਡਾਨੀ ਏਅਰਪੋਰਟ ਲਖਨਊ ਦੇ ਚੀਫ਼ ਕਮਰਸ਼ੀਅਲ ਅਫ਼ਸਰ ਸ਼ਿਵ ਮੋਹਨ ਨੇ ਵੱਖ-ਵੱਖ ਸੰਸਥਾਵਾਂ ਨਾਲ ਹੋਏ MOU ਦਾ ਆਦਾਨ-ਪ੍ਰਦਾਨ ਕੀਤਾ। ਇਸ ਤੋਂ ਬਾਅਦ ਮੁੱਖ ਮੰਤਰੀ ਯੋਗੀ ਆਦਿਤਿਆਨਾਥ, ਕੇਂਦਰੀ ਸਹਿਕਾਰਤਾ ਤੇ ਨਾਗਰ ਹਵਾਬਾਜ਼ੀ ਰਾਜ ਮੰਤਰੀ ਮੁਰਲੀਧਰ ਮੋਹੋਲ ਸਮੇਤ ਮਹਿਮਾਨਾਂ ਨੇ ਫਲੈਗ ਆਫ ਕਰਕੇ ਭਾਰਤ ਟੈਕਸੀ ਨੂੰ ਰਵਾਨਾ ਕੀਤਾ।

ਪ੍ਰੋਗਰਾਮ ’ਚ ਇਹ ਰਹੇ ਮੌਜੂਦ

ਪ੍ਰੋਗਰਾਮ ’ਚ ਕੇਂਦਰੀ ਸਹਿਕਾਰਤਾ ਰਾਜ ਮੰਤਰੀ ਮੁਰਲੀਧਰ ਮੋਹੋਲ, ਉਪ ਮੁੱਖ ਮੰਤਰੀ ਬ੍ਰਜੇਸ਼ ਪਾਠਕ, ਖੇਤੀਬਾੜੀ, ਖੇਤੀਬਾੜੀ ਸਿੱਖਿਆ ਤੇ ਖੇਤੀਬਾੜੀ ਖੋਜ ਮੰਤਰੀ ਸੂਰਿਆ ਪ੍ਰਤਾਪ ਸ਼ਾਹੀ, ਸਹਿਕਾਰਤਾ ਰਾਜ ਮੰਤਰੀ (ਸੁਤੰਤਰ ਚਾਰਜ) ਜੇਪੀਐਸ ਰਾਠੌਰ, ਟਰਾਂਸਪੋਰਟ ਰਾਜ ਮੰਤਰੀ (ਸੁਤੰਤਰ ਚਾਰਜ) ਦਯਾਸ਼ੰਕਰ ਸਿੰਘ, ਉੱਤਰ ਪ੍ਰਦੇਸ਼ ਸਹਿਕਾਰੀ ਗ੍ਰਾਮ ਵਿਕਾਸ ਬੈਂਕ ਦੇ ਚੇਅਰਮੈਨ ਡਾ. ਵਿਵੇਕ ਕੁਮਾਰ ਸਿੰਘ ਤੋਮਰ, ਸਹਿਕਾਰਤਾ ਮੰਤਰਾਲੇ ਦੇ ਵਧੀਕ ਸਕੱਤਰ ਪੰਕਜ ਕੁਮਾਰ ਬੰਸਲ ਤੇ ਭਾਰਤ ਟੈਕਸੀ ਦੇ ਉਪ ਪ੍ਰਧਾਨ ਰੋਹਿਤ ਗੁਪਤਾ ਮੌਜੂਦ ਰਹੇ।