ਇਸ ਪਿੰਡ ’ਚ ਲਵ ਮੈਰਿਜ ’ਤੇ ਲੱਗੀ ਪਾਬੰਦੀ : ਪੰਚਾਇਤ ਦਾ ਫੈਸਲਾ, ਪ੍ਰੇਮ ਵਿਆਹ ਕਰਨ ਵਾਲਿਆਂ ਦਾ ਹੋਵੇਗਾ ਸਮਾਜਿਕ ਬਾਈਕਾਟ

ਜਾਗਰਣ ਸੰਵਾਦਦਾਤਾ, ਹਿਸਾਰ : ਹਿਸਾਰ ਦੇ ਆਰਿਆ ਨਗਰ ਪਿੰਡ ’ਚ ਬੀਤੇ ਐਤਵਾਰ ਨੂੰ ਹੋਈ ਇੱਕ ਸਮਾਜਿਕ ਪੰਚਾਇਤ ’ਚ ਪਿੰਡ ਦੇ ਲੋਕਾਂ ਵਿਚਕਾਰ ਹੋਣ ਵਾਲੇ ਪ੍ਰੇਮ ਵਿਆਹਾਂ ਦੇ ਸਮਾਜਿਕ ਬਾਈਕਾਟ ਦਾ ਪ੍ਰਸਤਾਵ ਪਾਸ ਕੀਤਾ ਗਿਆ। ਪੰਚਾਇਤ ’ਚ ਕਿਹਾ ਗਿਆ ਕਿ ਪਿੰਡ ’ਚ ਅਜਿਹੇ ਵਿਆਹ ਕਰਨ ਵਾਲੇ ਲੋਕਾਂ ਤੇ ਇਸ ਦਾ ਸਮਰਥਨ ਕਰਨ ਵਾਲੇ ਪਰਿਵਾਰਕ ਮੈਂਬਰਾਂ ਦਾ ਵੀ ਸਮਾਜਿਕ ਬਾਈਕਾਟ ਕੀਤਾ ਜਾਵੇਗਾ। ਪਿਛਲੇ ਕੁਝ ਮਹੀਨਿਆਂ ’ਚ ਪਿੰਡ ’ਚ ਅਜਿਹੇ ਤਿੰਨ ਵਿਆਹ ਹੋਣ ਤੋਂ ਬਾਅਦ ਇਹ ਪ੍ਰਸਤਾਵ ਪਾਸ ਕੀਤੇ ਜਾਣ ਦੀ ਗੱਲ ਸਾਹਮਣੇ ਆਈ ਹੈ। ਪਿੰਡ ਦੇ ਬਜ਼ੁਰਗਾਂ ਦੀ ਮੌਜੂਦਗੀ ’ਚ ਹੋਈ ਸਭਾ ’ਚ ਕਰੀਬ ਇੱਕ ਹਜ਼ਾਰ ਪਿੰਡ ਵਾਸੀ ਸ਼ਾਮਲ ਹੋਏ। ਪੰਚਾਇਤ ਦੀ ਪ੍ਰਧਾਨਗੀ ਪਿੰਡ ਦੇ ਬਜ਼ੁਰਗ ਕੁਲਵੰਤ ਗੋਸਲਾ ਨੇ ਕੀਤੀ। ਪ੍ਰਸਤਾਵ ’ਚ ਇਹ ਵੀ ਕਿਹਾ ਗਿਆ ਕਿ ਅਜਿਹੇ ਵਿਆਹ ਦਾ ਸਮਰਥਨ ਕਰਨ ਵਾਲੇ ਪਰਿਵਾਰਕ ਮੈਂਬਰਾਂ ਜਾਂ ਹੋਰ ਲੋਕਾਂ ਖ਼ਿਲਾਫ਼ ਵੀ ਸਮਾਜਿਕ ਬਾਈਕਾਟ ਦੀ ਕਾਰਵਾਈ ਕੀਤੀ ਜਾਵੇਗੀ।