ਕੀ ਐਥਨਾਲ ਕਾਰਨ ਵੱਧ ਰਹੀਆਂ ਹਨ ਖੰਡ ਦੀਆਂ ਕੀਮਤਾਂ? ਕਾਂਗਰਸ ਨੇ E-20 ਨੀਤੀ ’ਤੇ ਚੁੱਕੇ ਸਵਾਲ

ਜਾਗਰਣ ਬਿਊਰੋ, ਨਵੀਂ ਦਿੱਲੀ : ਵਿਦਿਆਰਥੀਆਂ ਖ਼ਿਲਾਫ਼ ਹਿੰਸਾ ਅਤੇ ਰਾਮ ਮੰਦਰ ਦੇ ਚੜ੍ਹਾਵੇ ਦੀ ਚੋਰੀ ਨੂੰ ਲੈ ਕੇ ਹਮਲਾਵਰ ਰੁਖ ਅਪਣਾ ਰਹੀ ਕਾਂਗਰਸ ਹੁਣ ਪੈਟਰੋਲ ਵਿੱਚ 20 ਫੀਸਦੀ ਐਥਨਾਲ ਮਿਲਾਉਣ (E-20 ਨੀਤੀ) ਕਾਰਨ ਵਾਹਨਾਂ ਨੂੰ ਹੋ ਰਹੇ ਕਥਿਤ ਨੁਕਸਾਨ ਨੂੰ ਵੱਡਾ ਮੁੱਦਾ ਬਣਾਉਂਦੀ ਨਜ਼ਰ ਆ ਰਹੀ ਹੈ। ਐਥਨਾਲ ਕਾਰਨ ਖੰਡ ਦੀਆਂ ਕੀਮਤਾਂ ਵਿੱਚ ਵਾਧੇ ਦੇ ਦਾਅਵਿਆਂ ਦੇ ਮੱਦੇਨਜ਼ਰ ਕਾਂਗਰਸ ਨੇ E-20 ਨੀਤੀ ਦੀ ਤੁਰੰਤ ਸਮੀਖਿਆ ਕਰਨ ਦੀ ਮੰਗ ਕੀਤੀ ਹੈ। ਪਾਰਟੀ ਨੇ ਲੋਕਾਂ ਨੂੰ ਬਿਨਾਂ ਐਥਨਾਲ ਵਾਲਾ ਪੈਟਰੋਲ ਚੁਣਨ ਦਾ ਵਿਕਲਪ ਦੇਣ ਦੀ ਵੀ ਮੰਗ ਕੀਤੀ ਹੈ।

ਕਾਂਗਰਸ ਨੇ E-20 ਨੀਤੀ ’ਤੇ ਚੁੱਕੇ ਸਵਾਲ

ਕਾਂਗਰਸ ਦੇ ਜਨਰਲ ਸਕੱਤਰ ਜੈਰਾਮ ਰਮੇਸ਼ ਨੇ ਪਾਰਟੀ ਵੱਲੋਂ ਇਹ ਮੰਗ ਰੱਖਦਿਆਂ ਕਿਹਾ ਕਿ ਜੇ ਵਾਹਨ ਵੀ ਮਹਿੰਗਾ ਪਵੇ ਅਤੇ ਰਸੋਈ ਦਾ ਖਰਚਾ ਵੀ ਵਧੇ ਤਾਂ ਅਜਿਹੀ ਜਨਵਿਰੋਧੀ ਈਂਧਨ ਨੀਤੀ ਦੇਸ਼ ਨੂੰ ਮਨਜ਼ੂਰ ਨਹੀਂ ਹੋ ਸਕਦੀ।

ਐਥਨਾਲ ਕਾਰਨ ਖੰਡ ਦੀਆਂ ਕੀਮਤਾਂ ਵਿੱਚ ਭਾਰੀ ਵਾਧੇ ਦੀਆਂ ਰਿਪੋਰਟਾਂ ਦਾ ਹਵਾਲਾ ਦਿੰਦਿਆਂ ਜੈਰਾਮ ਰਮੇਸ਼ ਨੇ ਕਿਹਾ ਕਿ ਸਰਕਾਰ ਦੀ ਕਥਿਤ ਦੂਰਦਰਸ਼ਤਾ ਤੋਂ ਰਹਿਤ ਅਤੇ ਜਨਵਿਰੋਧੀ E-20 ਨੀਤੀ ਕਾਰਨ ਇੱਕ ਪਾਸੇ ਮਹਿੰਗਾਈ ਵਧ ਰਹੀ ਹੈ, ਜਦਕਿ ਦੂਜੇ ਪਾਸੇ ਵਾਹਨ ਮਾਲਕਾਂ ਨੂੰ ਘੱਟ ਮਾਈਲੇਜ ਅਤੇ ਵਾਹਨਾਂ ਵਿੱਚ ਖਰਾਬੀ ਦੀ ਦੋਹਰੀ ਮਾਰ ਝੱਲਣੀ ਪੈ ਰਹੀ ਹੈ।

ਉਨ੍ਹਾਂ ਕਿਹਾ ਕਿ ਜੇ ਗੰਨੇ ਅਤੇ ਅਨਾਜ ਤੋਂ ਐਥਨਾਲ ਬਣਾ ਕੇ ਪੈਟਰੋਲ ਵਿੱਚ 20 ਫੀਸਦੀ ਮਿਲਾਇਆ ਜਾਵੇਗਾ ਤਾਂ ਇੱਕ ਪਾਸੇ ਗੰਨੇ ਅਤੇ ਅਨਾਜ ਤੋਂ ਬਣਨ ਵਾਲੀਆਂ ਖੁਰਾਕੀ ਵਸਤਾਂ ਦੀ ਉਪਲਬਧਤਾ ਪ੍ਰਭਾਵਿਤ ਹੋ ਸਕਦੀ ਹੈ। ਦੂਜੇ ਪਾਸੇ, ਜਿਹੜੀਆਂ ਗੱਡੀਆਂ 20 ਫੀਸਦੀ ਐਥਨਾਲ ਲਈ ਤਿਆਰ ਨਹੀਂ ਹਨ, ਉਨ੍ਹਾਂ ਵਿੱਚ ਖਰਾਬੀ ਦਾ ਖ਼ਤਰਾ ਰਹੇਗਾ। ਬਿਨਾਂ ਢੁਕਵੇਂ ਟੈਸਟ ਵਾਲੀਆਂ ਗੱਡੀਆਂ ਵਿੱਚ ਮਾਈਲੇਜ ਘਟਣ ਦੀ ਵੀ ਗੱਲ ਕਹੀ ਗਈ ਹੈ।

ਖੰਡ ਦੀ ਕੀਮਤ 48 ਤੋਂ 67 ਰੁਪਏ ਪ੍ਰਤੀ ਕਿਲੋ ਹੋਣ ਦਾ ਦਾਅਵਾ

ਕਾਂਗਰਸ ਮਹਾਸਚਿਵ ਨੇ ਦਾਅਵਾ ਕੀਤਾ ਕਿ 25 ਲੱਖ ਟਨ ਖੰਡ ਬਣਾਉਣ ਯੋਗ ਗੰਨਾ ਐਥਨਾਲ ਉਤਪਾਦਨ ਵਿੱਚ ਚਲਾ ਗਿਆ, ਜਿਸ ਕਾਰਨ ਪਿਛਲੇ ਤਿੰਨ ਮਹੀਨਿਆਂ ਵਿੱਚ ਖੰਡ ਦੀ ਕੀਮਤ 48 ਰੁਪਏ ਤੋਂ ਵਧ ਕੇ 67 ਰੁਪਏ ਪ੍ਰਤੀ ਕਿਲੋ ਅਤੇ ਗੁੜ ਦੀ ਕੀਮਤ 50 ਤੋਂ ਵਧ ਕੇ 65 ਰੁਪਏ ਪ੍ਰਤੀ ਕਿਲੋ ਹੋ ਗਈ ਹੈ।

ਦਾਲ, ਚੌਲ ਅਤੇ ਆਟੇ ਦੀਆਂ ਕੀਮਤਾਂ ’ਤੇ ਵੀ ਸਵਾਲ

ਕਾਂਗਰਸ ਦੇ ਦਾਅਵੇ ਮੁਤਾਬਕ ਚੌਲ ਅਤੇ ਮੱਕੀ ਦਾ ਆਟਾ ਵੀ ਕ੍ਰਮਵਾਰ 16 ਅਤੇ 11 ਫੀਸਦੀ ਮਹਿੰਗਾ ਹੋਇਆ ਹੈ। ਇਸ ਦੇ ਨਾਲ ਹੀ ਪਸ਼ੂਆਂ ਦੀ ਖੁਰਾਕ ਦੀਆਂ ਕੀਮਤਾਂ ਵਿੱਚ 10.34 ਫੀਸਦੀ ਦਾ ਵਾਧਾ ਹੋਇਆ ਹੈ।

ਜੈਰਾਮ ਰਮੇਸ਼ ਨੇ ਸਰਕਾਰ ’ਤੇ ਨਿਸ਼ਾਨਾ ਲਗਾਉਂਦਿਆਂ ਦੋਸ਼ ਲਾਇਆ ਕਿ ਬਿਨਾਂ ਪੂਰੀ ਸੋਚ-ਵਿਚਾਰ ਦੇ ਐਥਨਾਲ ਬਣਾਉਣ ਵਾਲਿਆਂ ਨੂੰ ਵੱਧ ਤੋਂ ਵੱਧ ਲਾਭ ਪਹੁੰਚਾਉਣ ਲਈ ਵਾਹਨ ਮਾਲਕਾਂ ਕੋਲ ਪੈਟਰੋਲ ਦੇ ਵਿਕਲਪ ਵੀ ਸੀਮਤ ਕਰ ਦਿੱਤੇ ਗਏ ਹਨ।

ਕੱਚੇ ਤੇਲ ਦੀਆਂ ਕੀਮਤਾਂ ਘਟੀਆਂ, ਫਿਰ ਵੀ ਪੈਟਰੋਲ ਸਸਤਾ ਨਹੀਂ ਹੋਇਆ

ਉਨ੍ਹਾਂ ਕਿਹਾ ਕਿ ਹੈਰਾਨੀ ਦੀ ਗੱਲ ਹੈ ਕਿ ਅੰਤਰਰਾਸ਼ਟਰੀ ਕੱਚੇ ਤੇਲ ਦੀਆਂ ਕੀਮਤਾਂ ਵਿੱਚ ਕਮੀ ਅਤੇ 20 ਫੀਸਦੀ ਐਥਨਾਲ ਮਿਲਾਉਣ ਨਾਲ ਲਾਗਤ ਵਿੱਚ ਆਈ ਕਮੀ ਦੇ ਬਾਵਜੂਦ ਪੈਟਰੋਲ ਦੀਆਂ ਕੀਮਤਾਂ ਵਿੱਚ ਕੋਈ ਕਮੀ ਨਹੀਂ ਕੀਤੀ ਗਈ।

ਜੈਰਾਮ ਰਮੇਸ਼ ਨੇ ਕਿਹਾ ਕਿ ਲੋਕ ਸਭਾ ਵਿੱਚ ਵਿਰੋਧੀ ਧਿਰ ਦੇ ਨੇਤਾ ਰਾਹੁਲ ਗਾਂਧੀ E-20 ਦੇ ਨਾਮ ’ਤੇ ਕਥਿਤ ਭ੍ਰਿਸ਼ਟਾਚਾਰ ਦਾ ਮੁੱਦਾ ਪ੍ਰਮੁੱਖਤਾ ਨਾਲ ਉਠਾ ਰਹੇ ਹਨ। ਉਨ੍ਹਾਂ ਮੁਤਾਬਕ ਕਾਂਗਰਸ ਵਰਕਿੰਗ ਕਮੇਟੀ ਦੀ ਬੁੱਧਵਾਰ ਨੂੰ ਹੋਈ ਬੈਠਕ ਵਿੱਚ ਵੀ ਘੱਟ ਮਾਈਲੇਜ, ਵਾਹਨਾਂ ਦੀ ਅਨੁਕੂਲਤਾ ਨਾਲ ਜੁੜੇ ਖ਼ਤਰੇ, ਖਪਤਕਾਰਾਂ ਦੇ ਸੀਮਤ ਵਿਕਲਪਾਂ ਅਤੇ ਵਾਤਾਵਰਣੀ ਨੁਕਸਾਨ ਬਾਰੇ ਚਿੰਤਾ ਜਤਾਈ ਗਈ।