ਆਂਧਰਾ ਪ੍ਰਦੇਸ਼: ਸਾਫਟਵੇਅਰ ਇੰਜੀਨੀਅਰ ਨੇ ਕੀਤੀ ਖੁਦਕੁਸ਼ੀ, ਪਰਿਵਾਰ ਨੇ ਪ੍ਰੇਮੀ ਦੇ ਘਰ ਲੈ ਜਾ ਕੇ ਮ੍ਰਿਤਕ ਦੇਹ ਨਾਲ ਵਿਆਹ ਦੀ ਕੀਤੀ ਮੰਗ

ਵਿਜਯਵਾਡਾ: ਆਂਧਰਾ ਪ੍ਰਦੇਸ਼ ਦੀ 24 ਸਾਲਾ ਸਾਫਟਵੇਅਰ ਇੰਜੀਨੀਅਰ ਨੇ ਮੁੰਬਈ ਦੇ ਇੱਕ ਪੀਜੀ ਵਿੱਚ ਫਾਹਾ ਲਗਾ ਕੇ ਖੁਦਕੁਸ਼ੀ ਕਰ ਲਈ। ਮ੍ਰਿਤਕਾ ਦੀ ਪਛਾਣ ਪ੍ਰਕਾਸ਼ਮ ਜ਼ਿਲ੍ਹੇ ਦੇ ਟੰਗੁਟੂਰੂ ਮੰਡਲ ਦੇ ਪੋਂਡੁਰੂ ਪਿੰਡ ਦੀ ਰਹਿਣ ਵਾਲੀ ਅੱਡਾਗੱਲਾ ਕੀਰਤੀ ਵਜੋਂ ਹੋਈ ਹੈ। ਘਟਨਾ ਤੋਂ ਬਾਅਦ ਕੀਰਤੀ ਦੇ ਮਾਪੇ ਅਤੇ ਰਿਸ਼ਤੇਦਾਰ ਉਸ ਦੀ ਮ੍ਰਿਤਕ ਦੇਹ ਲੈ ਕੇ ਉਸ ਦੇ ਪ੍ਰੇਮੀ ਸਾਈ ਸੁਮੰਤ ਦੇ ਘਰ ਪਹੁੰਚ ਗਏ। ਪਰਿਵਾਰ ਦਾ ਦਾਅਵਾ ਹੈ ਕਿ ਵਿਆਹ ਤੋਂ ਇਨਕਾਰ ਹੋਣ ਕਾਰਨ ਕੀਰਤੀ ਨੇ ਇਹ ਕਦਮ ਚੁੱਕਿਆ।

ਪਰਿਵਾਰ ਨੇ ਮੰਗ ਕੀਤੀ ਕਿ ਅੰਤਿਮ ਸੰਸਕਾਰ ਤੋਂ ਪਹਿਲਾਂ ਸਾਈ ਸੁਮੰਤ ਮ੍ਰਿਤਕ ਦੇਹ ਨੂੰ ਮੰਗਲਸੂਤਰ ਪਹਿਨਾ ਕੇ ਵਿਆਹ ਦੀ ਰਸਮ ਪੂਰੀ ਕਰੇ।

ਅੱਠ ਸਾਲਾਂ ਤੋਂ ਸੀ ਰਿਸ਼ਤਾ

ਜਾਣਕਾਰੀ ਮੁਤਾਬਕ, ਕੀਰਤੀ ਅਤੇ ਸਾਈ ਸੁਮੰਤ ਦੀ ਜਾਣ-ਪਛਾਣ ਸੋਸ਼ਲ ਮੀਡੀਆ ਰਾਹੀਂ ਹੋਈ ਸੀ ਅਤੇ ਦੋਵੇਂ ਪਿਛਲੇ ਅੱਠ ਸਾਲਾਂ ਤੋਂ ਰਿਸ਼ਤੇ ਵਿੱਚ ਸਨ।

ਦੱਸਿਆ ਜਾ ਰਿਹਾ ਹੈ ਕਿ 14 ਜੁਲਾਈ ਨੂੰ ਸਾਈ ਨੇ ਕੀਰਤੀ ਨਾਲ ਵਿਆਹ ਕਰਨ ਤੋਂ ਇਨਕਾਰ ਕਰ ਦਿੱਤਾ, ਜਿਸ ਤੋਂ ਬਾਅਦ ਕੀਰਤੀ ਨੇ ਮੁੰਬਈ ਦੇ ਆਪਣੇ ਪੀਜੀ ਕਮਰੇ ਵਿੱਚ ਫਾਹਾ ਲਗਾ ਕੇ ਖੁਦਕੁਸ਼ੀ ਕਰ ਲਈ।

ਆਖਰੀ ਇੱਛਾ ਦਾ ਹਵਾਲਾ

ਟੰਗੁਟੂਰੂ ਪੁਲਿਸ ਮੁਤਾਬਕ, ਕੀਰਤੀ ਦੇ ਪਰਿਵਾਰ ਦਾ ਕਹਿਣਾ ਹੈ ਕਿ ਖੁਦਕੁਸ਼ੀ ਤੋਂ ਪਹਿਲਾਂ ਉਸ ਨੇ ਆਪਣੀ ਆਖਰੀ ਇੱਛਾ ਜਤਾਈ ਸੀ ਕਿ ਉਸ ਦਾ ਅੰਤਿਮ ਸੰਸਕਾਰ ਉਸ ਦੇ ਪ੍ਰੇਮੀ ਦੇ ਪਿੰਡ ਪੋਂਡੁਰੂ ਵਿੱਚ ਕੀਤਾ ਜਾਵੇ।

ਕੀਰਤੀ ਦੇ ਪਰਿਵਾਰਕ ਮੈਂਬਰ ਮੁੰਬਈ ਤੋਂ ਮ੍ਰਿਤਕ ਦੇਹ ਲੈ ਕੇ ਪਿੰਡ ਪਹੁੰਚੇ ਅਤੇ ਸਾਈ ਦੇ ਵਾਪਸ ਆ ਕੇ ਵਿਆਹ ਦੀ ਰਸਮ ਨਿਭਾਉਣ ਦੀ ਮੰਗ ਕਰਦੇ ਹੋਏ ਘਰ ਅੱਗੇ ਧਰਨਾ ਦਿੱਤਾ।

ਪਰਿਵਾਰਾਂ ਵਿੱਚ ਤਣਾਅ

ਪੁਲਿਸ ਅਨੁਸਾਰ, ਉਸ ਸਮੇਂ ਸਾਈ ਸੁਮੰਤ, ਜੋ ਕਤਰ ਵਿੱਚ ਹਾਰਡਵੇਅਰ ਇੰਜੀਨੀਅਰ ਵਜੋਂ ਕੰਮ ਕਰਦਾ ਹੈ, ਆਪਣੇ ਘਰ ਮੌਜੂਦ ਨਹੀਂ ਸੀ। ਇਸ ਦੌਰਾਨ ਦੋਵੇਂ ਪਰਿਵਾਰਾਂ ਵਿਚਾਲੇ ਤਕਰਾਰ ਅਤੇ ਧੱਕਾ-ਮੁੱਕੀ ਵੀ ਹੋਈ।

ਬਾਅਦ ਵਿੱਚ ਸਾਈ ਦੇ ਪਰਿਵਾਰ ਵੱਲੋਂ ਪੋਂਡੁਰੂ ਵਿੱਚ ਅੰਤਿਮ ਸੰਸਕਾਰ ਕਰਨ ਲਈ ਸਹਿਮਤੀ ਦੇਣ ਤੋਂ ਬਾਅਦ ਕੀਰਤੀ ਦਾ ਅੰਤਿਮ ਸੰਸਕਾਰ ਪਿੰਡ ਵਿੱਚ ਕਰ ਦਿੱਤਾ ਗਿਆ।