ਹੈਰਾਨੀਜਨਕ ! 150 ਕਰੋੜ ਦੀ ਜਾਇਦਾਦ ਲਈ ਕਲਯੁੱਗੀ ਪੁੱਤ ਨੇ ਪਿਤਾ 'ਤੇ ਚਲਾਈਆਂ ਅੰਨੇਵਾਹ ਗੋਲੀਆਂ, ਪਹਿਲਾਂ ਭਰਾ 'ਤੇ ਵੀ ਕਰ ਚੁੱਕਾ ਸੀ ਹਮਲਾ

ਮੁਲਜ਼ਮ ਨੇ ਸਾਲ 2018 'ਚ ਆਪਣੇ ਛੋਟੇ ਭਰਾ ਨੀਸ਼ੂ ਨੇਹਰਾ ਦੀ ਵੀ ਜਾਨ ਲੈਣ ਦੀ ਕੋਸ਼ਿਸ਼ ਕੀਤੀ ਸੀ। ਉਸ ਨੇ ਨੀਸ਼ੂ ਨੂੰ ਗੋਲੀ ਮਾਰੀ ਸੀ, ਜੋ ਕਿ ਉਸ ਦੇ ਪੇਟ 'ਚ ਲੱਗੀ ਸੀ। ਹਾਲਾਂਕਿ, ਨੀਸ਼ੂ ਦੀ ਜਾਨ ਬਚ ਗਈ ਸੀ। ਉਸ ਸਮੇਂ ਕੋਈ ਪੁਲਿਸ ਕੇਸ ਦਰਜ ਨਹੀਂ ਕਰਵਾਇਆ ਗਿਆ ਸੀ। ਉੱਥੇ ਹੀ, ਬੁੱਧਵਾਰ ਰਾਤ ਕਰੀਬ 10 ਵਜੇ ਨਿਖਿਲ ਨਸ਼ੇ 'ਚ ਧੁੱਤ ਹੋ ਕੇ ਘਰ ਪਹੁੰਚਿਆ। ਪਿਤਾ ਹਰੀਓਮ ਗੇਟ 'ਤੇ ਹੀ ਖੜ੍ਹੇ ਸਨ। ਜਦੋਂ ਉਨ੍ਹਾਂ ਨੇ ਨਿਖਿਲ ਨੂੰ ਟੋਕਿਆ ਤਾਂ ਦੋਵਾਂ ਵਿਚਾਲੇ ਜਾਇਦਾਦ ਨਾਮ ਕਰਵਾਉਣ ਨੂੰ ਲੈ ਕੇ ਫਿਰ ਝਗੜਾ ਹੋ ਗਿਆ। ਰੌਲਾ ਸੁਣ ਕੇ ਹਰੀਓਮ ਦੀ ਪਤਨੀ ਮੀਨਾਕਸ਼ੀ ਅਤੇ ਪੁੱਤਰ ਨੀਸ਼ੂ ਬਾਹਰ ਆਏ ਅਤੇ ਉਨ੍ਹਾਂ ਨੂੰ ਸਮਝਾਉਣ ਲੱਗੇ, ਪਰ ਨਿਖਿਲ ਬਹੁਤ ਗੁੱਸੇ 'ਚ ਸੀ। ਉਸ ਨੇ ਪਿਸਤੌਲ ਨਾਲ ਹਰੀਓਮ 'ਤੇ ਤਾਬੜਤੋੜ ਸੱਤ ਰਾਊਂਡ ਫਾਇਰ ਕੀਤੇ ਅਤੇ ਫ਼ਰਾਰ ਹੋ ਗਿਆ। ਹਰੀਓਮ ਨੂੰ ਚਾਰ ਗੋਲੀਆਂ ਸਿਰ, ਛਾਤੀ ਅਤੇ ਗਲੇ 'ਚ ਲੱਗੀਆਂ। ਛੋਟਾ ਪੁੱਤਰ ਅਤੇ ਪਤਨੀ ਉਨ੍ਹਾਂ ਨੂੰ ਹਸਪਤਾਲ ਲੈ ਕੇ ਪਹੁੰਚੇ, ਜਿੱਥੇ ਡਾਕਟਰਾਂ ਨੇ ਹਰੀਓਮ ਨੂੰ ਮ੍ਰਿਤਕ ਐਲਾਨ ਦਿੱਤਾ। ਪੁਲਿਸ ਦੇ ਉੱਚ ਅਧਿਕਾਰੀਆਂ ਨੇ ਪਰਿਵਾਰਕ ਮੈਂਬਰਾਂ ਤੋਂ ਜਾਣਕਾਰੀ ਇਕੱਠੀ ਕੀਤੀ ਹੈ। ਮੀਨਾਕਸ਼ੀ ਦੀ ਸ਼ਿਕਾਇਤ 'ਤੇ ਮਾਮਲਾ ਦਰਜ ਕਰ ਲਿਆ ਗਿਆ ਹੈ। ਮੁਲਜ਼ਮ ਨਿਖਿਲ ਫ਼ਰਾਰ ਹੈ।