- ਸ਼ਹਿਰ ਚੁਣੋ
- ਈ-ਪੇਪਰ
- ਵੈੱਬ ਸਟੋਰੀਜ਼
- ਸ਼ਹਿਰ ਚੁਣੋ
- ਈ-ਪੇਪਰ
- ਵੈੱਬ ਸਟੋਰੀਜ਼
ਹਰਿਆਣਾ ਦੇ ਆਲੋਕ ਨੇ Chrome Browser ਤੋਂ ਡਾਟਾ ਚੋਰੀ ਦਾ ਖ਼ਤਰਾ ਰੋਕਿਆ, ਲੱਭਿਆ ਬੱਗ; ਗੂਗਲ ਨੇ ਦਿੱਤਾ 1,000 ਡਾਲਰ ਇਨਾਮ
ਇਸ ਖ਼ਾਮੀ ਨੂੰ ਫੜਨ 'ਤੇ ਗੂਗਲ ਨੇ ਤਿੰਨ ਸਾਲਾਂ 'ਚ ਨਾ ਸਿਰਫ਼ ਇਸ ਖ਼ਾਮੀ ਨੂੰ ਠੀਕ ਕੀਤਾ, ਸਗੋਂ ਇੰਜੀਨੀਅਰ ਆਲੋਕ ਯਾਦਵ ਨੂੰ 1,000 ਅਮਰੀਕੀ ਡਾਲਰ ਦਾ ਇਨਾਮ ਵੀ ਦਿੱਤਾ ਹੈ।
Posted By Anuradha Bains
Publish Date: Tue, 15 Sep 2026 04:33 PM (IST)
Updated Date: Tue, 15 Sep 2026 04:36 PM (IST)
ਜਾਗਰਣ ਸੰਵਾਦਦਾਤਾ, ਨਾਰਨੌਲ। ਨੀਰਪੁਰ ਦੇ ਰਹਿਣ ਵਾਲੇ ਇੰਜੀਨੀਅਰ ਆਲੋਕ ਯਾਦਵ ਨੇ ਇੱਕ ਵਾਰ ਫਿਰ ਕ੍ਰੋਮ ਬ੍ਰਾਊਜ਼ਰ (Chrome Browser) 'ਚ ਬੱਗ ਲੱਭ ਕੇ ਆਪਣੀ ਪ੍ਰਤਿਭਾ ਦਾ ਲੋਹਾ ਮਨਵਾਇਆ ਹੈ ਅਤੇ ਗੂਗਲ ਤੋਂ 1,000 ਅਮਰੀਕੀ ਡਾਲਰ ਦਾ ਇਨਾਮ ਹਾਸਲ ਕੀਤਾ ਹੈ।
ਇਸ ਤੋਂ ਪਹਿਲਾਂ ਵੀ ਆਲੋਕ 2019 'ਚ 5,000 ਅਮਰੀਕੀ ਡਾਲਰ ਦਾ ਇਨਾਮ ਜਿੱਤ ਚੁੱਕੇ ਹਨ। ਕ੍ਰੋਮ ਬ੍ਰਾਊਜ਼ਰ 'ਚ ਇੱਕ ਤੋਂ ਵੱਧ ਸਾਈਟਾਂ ਖੋਲ੍ਹਣ 'ਤੇ ਡਾਟਾ ਚੋਰੀ ਹੋਣ ਦਾ ਖ਼ਤਰਾ ਸੀ।
ਇਸ ਖ਼ਾਮੀ ਨੂੰ ਫੜਨ 'ਤੇ ਗੂਗਲ ਨੇ ਤਿੰਨ ਸਾਲਾਂ 'ਚ ਨਾ ਸਿਰਫ਼ ਇਸ ਖ਼ਾਮੀ ਨੂੰ ਠੀਕ ਕੀਤਾ, ਸਗੋਂ ਇੰਜੀਨੀਅਰ ਆਲੋਕ ਯਾਦਵ ਨੂੰ 1,000 ਅਮਰੀਕੀ ਡਾਲਰ ਦਾ ਇਨਾਮ ਵੀ ਦਿੱਤਾ ਹੈ।
ਇੰਟਰਨੈੱਟ ਨੂੰ ਸੁਰੱਖਿਅਤ ਬਣਾਉਣ 'ਚ ਜੁਟੇ
ਆਲੋਕ ਦੀ ਪਤਨੀ ਭਾਵਨਾ ਯਾਦਵ ਨੇ ਦੱਸਿਆ ਕਿ ਉਨ੍ਹਾਂ ਦੇ ਪਤੀ ਪੇਸ਼ੇ ਤੋਂ ਸਾਫ਼ਟਵੇਅਰ ਇੰਜੀਨੀਅਰ (Go-Language Developer) ਹਨ ਅਤੇ ਸ਼ੌਕੀਆ ਤੌਰ 'ਤੇ ਬੱਗ ਸਪੈਸ਼ਲਿਸਟ ਵੀ ਹਨ। ਵਰਤੋਂਕਾਰਾਂ ਲਈ ਇੰਟਰਨੈੱਟ ਨੂੰ ਸੁਰੱਖਿਅਤ ਬਣਾਉਣ ਦੇ ਮਕਸਦ ਨਾਲ ਉਹ B.Tech ਦੇ ਸਮੇਂ ਤੋਂ ਹੀ ਬੱਗ ਲੱਭਦੇ ਆ ਰਹੇ ਹਨ।
ਪਹਿਲਾ ਬੱਗ 2017-18 'ਚ ਗੂਗਲ ਦੇ ਹੀ ਕ੍ਰੋਮ ਬ੍ਰਾਊਜ਼ਰ 'ਚ ਲੱਭਿਆ ਸੀ, ਜੋ ਬਹੁਤ ਗੰਭੀਰ ਪ੍ਰਕਿਰਤੀ ਦਾ ਸੀ ਅਤੇ ਉਸ ਲਈ ਸਾਲ 2019 'ਚ ਗੂਗਲ ਨੇ ਉਨ੍ਹਾਂ ਨੂੰ 5,000 ਅਮਰੀਕੀ ਡਾਲਰ (ਲਗਪਗ ਪੌਣੇ ਚਾਰ ਲੱਖ ਰੁਪਏ) ਦਾ ਇਨਾਮ ਦਿੱਤਾ ਸੀ।
2024 'ਚ ਰਿਪੋਰਟ ਕੀਤੇ 2 ਬੱਗ
ਭਾਵਨਾ ਨੇ ਦੱਸਿਆ ਕਿ ਆਲੋਕ ਯਾਦਵ ਨੇ 2024 'ਚ ਫਿਰ ਦੋ ਬੱਗ ਗੂਗਲ ਨੂੰ ਰਿਪੋਰਟ ਕੀਤੇ ਸਨ, ਜਿਨ੍ਹਾਂ 'ਚੋਂ ਇੱਕ ਨੂੰ ਗੰਭੀਰ ਮੰਨਦਿਆਂ ਗੂਗਲ ਨੇ 14 ਸਤੰਬਰ ਨੂੰ ਉਨ੍ਹਾਂ ਨੂੰ 1,000 ਅਮਰੀਕੀ ਡਾਲਰ (ਲਗਪਗ 1 ਲੱਖ ਰੁਪਏ) ਦਾ ਪੁਰਸਕਾਰ ਦਿੱਤਾ ਹੈ।
ਪੁਰਸਕਾਰ ਰਾਸ਼ੀ ਉਨ੍ਹਾਂ ਦੇ ਖਾਤੇ 'ਚ ਭੇਜ ਦਿੱਤੀ ਗਈ ਹੈ। ਹੁਣ ਤੱਕ ਆਲੋਕ ਗੂਗਲ ਤੋਂ 6,000 ਅਮਰੀਕੀ ਡਾਲਰ (ਲਗਪਗ 5 ਲੱਖ ਰੁਪਏ) ਦੇ ਇਨਾਮ ਜਿੱਤ ਚੁੱਕੇ ਹਨ, ਜਦਕਿ ਹਾਲੇ ਕੁਝ ਹੋਰ ਬੱਗ ਪੈਂਡਿੰਗ ਹਨ, ਜਿਨ੍ਹਾਂ ਦਾ ਫ਼ੈਸਲਾ ਹੋਣਾ ਬਾਕੀ ਹੈ। ਗੂਗਲ ਕ੍ਰੋਮ ਤੋਂ ਇਲਾਵਾ ਉਨ੍ਹਾਂ ਨੇ ਹੋਰ ਐਪਸ ਅਤੇ ਵੈੱਬਸਾਈਟਾਂ 'ਚ ਵੀ ਬੱਗ ਕੱਢ ਕੇ ਠੀਕ ਕਰਵਾਏ ਹਨ।
ਕੰਪਿਊਟਰ ਸਾਇੰਸ 'ਚ ਕੀਤੀ B.Tech
SVN ਸਕੂਲ, ਨੀਰਪੁਰ ਤੋਂ ਨਾਨ-ਮੈਡੀਕਲ 'ਚ 12ਵੀਂ ਪਾਸ ਕਰਨ ਅਤੇ JEE Mains ਕਲੀਅਰ ਕਰਨ ਤੋਂ ਬਾਅਦ ਆਲੋਕ ਯਾਦਵ ਨੇ ਜਲੰਧਰ ਤੋਂ ਕੰਪਿਊਟਰ ਸਾਇੰਸ ਐਂਡ ਇੰਜੀਨੀਅਰਿੰਗ 'ਚ B.Tech ਕੀਤੀ ਹੈ।
ਉਨ੍ਹਾਂ ਨੇ ਆਪਣੇ ਕਰੀਅਰ ਦੀ ਸ਼ੁਰੂਆਤ TCS ਕੰਪਨੀ 'ਚ ਟ੍ਰੇਨੀ ਇੰਜੀਨੀਅਰ ਵਜੋਂ ਕੀਤੀ ਸੀ। ਦੱਸਣਯੋਗ ਹੈ ਕਿ ਆਲੋਕ, ਪ੍ਰਸਿੱਧ ਦੋਹਾਕਾਰ ਤੇ ਸੀਨੀਅਰ ਸਾਹਿਤਕਾਰ ਰਘੁਵਿੰਦਰ ਯਾਦਵ ਅਤੇ ਸਮਾਜਿਕ ਕਰਮਚਾਰੀ ਸ਼ੀਲ ਯਾਦਵ ਦੇ ਪੁੱਤਰ ਤੇ ਡਾ. ਅਲਕਾ ਯਾਦਵ ਦੇ ਭਰਾ ਹਨ।
ਦੂਜੀ ਸਾਈਟ ਤੋਂ ਡਾਟਾ ਚੋਰੀ ਦਾ ਖ਼ਤਰਾ
ਆਲੋਕ ਯਾਦਵ ਨੇ ਦੱਸਿਆ ਕਿ ਉਦਾਹਰਨ ਦੇ ਤੌਰ 'ਤੇ ਕ੍ਰੋਮ ਬ੍ਰਾਊਜ਼ਰ 'ਚ ਜੇਕਰ ਤੁਸੀਂ ਬੈਂਕ ਦੀ ਸਾਈਟ ਖੋਲ੍ਹ ਲਈ ਅਤੇ ਇਸ ਤੋਂ ਬਾਅਦ ਕੋਈ ਹੋਰ ਸਾਈਟ ਖੋਲ੍ਹ ਲਈ, ਅਜਿਹੇ 'ਚ ਦੋਵੇਂ ਸਾਈਟਾਂ ਖੁੱਲ੍ਹੀਆਂ ਰਹਿ ਜਾਂਦੀਆਂ ਸਨ। ਬਾਅਦ ਵਾਲੀ ਸਾਈਟ ਪਹਿਲਾਂ ਵਾਲੀ ਸਾਈਟ ਦਾ ਡਾਟਾ ਚੋਰੀ ਕਰ ਸਕਦੀ ਸੀ।
ਇਹ ਖ਼ਾਮੀ ਫੜਨ ਤੋਂ ਬਾਅਦ ਗੂਗਲ ਨਾਲ ਪੱਤਰ-ਵਿਹਾਰ ਕੀਤਾ ਗਿਆ ਸੀ। ਗੂਗਲ ਨੇ ਇਸ ਨੂੰ ਲੈ ਕੇ ਪਹਿਲਾਂ ਤਾਂ ਸਵੀਕਾਰ ਨਹੀਂ ਕੀਤਾ, ਪਰ ਤਿੰਨ ਸਾਲ ਬਾਅਦ ਹੁਣ ਇਸ ਖ਼ਾਮੀ ਨੂੰ ਦੁਰੁਸਤ ਕਰ ਦਿੱਤਾ ਹੈ। ਖ਼ਾਮੀ ਦੁਰੁਸਤ ਕਰਨ ਤੋਂ ਬਾਅਦ 1,000 ਡਾਲਰ ਵੀ ਦਿੱਤੇ ਹਨ।