ਏਅਰ ਇੰਡੀਆ ਦੀ ਫਲਾਈਟ 'ਚ 300 ਫੁੱਟ ਦੀ ਅਚਾਨਕ ਗਿਰਾਵਟ, ਪਾਇਲਟ ਦੇ ਡਾਕਟਰੀ ਟੈਸਟ 'ਚ ਗੰਭੀਰ ਖੁਲਾਸਾ; 17 ਯਾਤਰੀ ਤੇ ਕਰੂ ਮੈਂਬਰ ਜ਼ਖ਼ਮੀ

ਰਿਪੋਰਟ ਅਨੁਸਾਰ, ਪਾਇਲਟ-ਇਨ-ਕਮਾਂਡ (PIC) ਦੇ ਕਨਫਰਮੇਟਰੀ ਟੈਸਟ ਵਿੱਚ ਸਾਈਕੋ-ਐਕਟਿਵ ਸਬਸਟੈਂਸ ਲਈ ਨੌਨ-ਨੈਗੇਟਿਵ (ਪਾਜ਼ੇਟਿਵ) ਨਤੀਜਾ ਆਇਆ ਹੈ। AAIB ਨੇ ਇਸ ਨੂੰ ਗੰਭੀਰ ਚਿੰਤਾ ਦਾ ਵਿਚਾਰ ਦੱਸਦਿਆਂ ਡਾਇਰੈਕਟੋਰੇਟ ਜਨਰਲ ਆਫ ਸਿਵਲ ਐਵੀਏਸ਼ਨ (DGCA) ਨੂੰ ਪਹਿਲ ਦੇ ਆਧਾਰ 'ਤੇ ਉੱਚਿਤ ਕਾਰਵਾਈ ਕਰਨ ਦੀ ਸਿਫ਼ਾਰਸ਼ ਕੀਤੀ ਹੈ। ਤਕਨੀਕੀ ਅਤੇ ਹੋਰ ਪਹਿਲੂਆਂ ਦੀ ਵਿਸਤ੍ਰਿਤ ਜਾਂਚ ਅਜੇ ਜਾਰੀ ਹੈ।

Posted By Anuradha Bains

Publish Date: Fri, 04 Sep 2026 12:19 PM (IST)

Updated Date: Fri, 04 Sep 2026 12:23 PM (IST)

ਏਅਰ ਇੰਡੀਆ ਦੀ ਫਲਾਈਟ 'ਚ 300 ਫੁੱਟ ਦੀ ਅਚਾਨਕ ਗਿਰਾਵਟ, ਪਾਇਲਟ ਦੇ ਡਾਕਟਰੀ ਟੈਸਟ 'ਚ ਗੰਭੀਰ ਖੁਲਾਸਾ; 17 ਯਾਤਰੀ ਤੇ ਕਰੂ ਮੈਂਬਰ ਜ਼ਖ਼ਮੀ

ਡਿਜੀਟਲ ਡੈਸਕ, ਨਵੀਂ ਦਿੱਲੀ। ਫੂਕੇਟ ਤੋਂ ਦਿੱਲੀ ਆ ਰਹੀ ਏਅਰ ਇੰਡੀਆ ਦੀ ਫਲਾਈਟ AI-2379 ਵਿੱਚ 4 ਅਗਸਤ ਨੂੰ ਕਰੂਜ਼ ਫੇਜ਼ ਦੌਰਾਨ ਲਗਪਗ 300 ਫੁੱਟ ਦੀ ਅਚਾਨਕ ਉੱਚਾਈ ਘਟਣ ਦੀ ਘਟਨਾ ਤੋਂ ਬਾਅਦ ਏਅਰਕ੍ਰਾਫਟ ਐਕਸੀਡੈਂਟ ਇਨਵੈਸਟੀਗੇਸ਼ਨ ਬਿਊਰੋ (AAIB) ਨੇ ਆਪਣੀ ਸ਼ੁਰੂਆਤੀ ਰਿਪੋਰਟ ਜਾਰੀ ਕਰ ਦਿੱਤੀ ਹੈ।

ਇਹ ਸ਼ੁਰੂਆਤੀ ਰਿਪੋਰਟ ਅੰਤਰਰਾਸ਼ਟਰੀ ਨਾਗਰਿਕ ਉੱਡਣ ਸੰਗਠਨ (ICAO) ਦੇ ਦਿਸ਼ਾ-ਨਿਰਦੇਸ਼ਾਂ ਅਨੁਸਾਰ ਜਾਰੀ ਕੀਤੀ ਗਈ ਹੈ। ਜਾਂਚ ਪ੍ਰਕਿਰਿਆ ਚੱਲ ਰਹੀ ਹੈ ਅਤੇ ਅੰਤਿਮ ਰਿਪੋਰਟ ਬਾਅਦ ’ਚ ਪ੍ਰਕਾਸ਼ਿਤ ਕੀਤੀ ਜਾਵੇਗੀ।

ਦੱਸ ਦੇਈਏ ਕਿ 4 ਅਗਸਤ ਨੂੰ ਏਅਰ ਇੰਡੀਆ ਦੀ ਏਅਰਬੱਸ A320 ਉਡਾਣ (ਰਜਿਸਟ੍ਰੇਸ਼ਨ VT-EXO) ਫੂਕੇਟ ਤੋਂ ਦਿੱਲੀ ਜਾ ਰਹੀ ਸੀ। ਉਡਾਣ ਦੌਰਾਨ ਅਚਾਨਕ ਉੱਚਾਈ ਵਿੱਚ ਲਗਪਗ 300 ਫੁੱਟ ਦੀ ਗਿਰਾਵਟ ਆਈ। ਇਸ ਘਟਨਾ ’ਚ ਘੱਟੋ-ਘੱਟ 17 ਯਾਤਰੀਆਂ ਅਤੇ ਕਰੂ ਮੈਂਬਰਾਂ ਨੂੰ ਸੱਟਾਂ ਲੱਗੀਆਂ, ਜਿਨ੍ਹਾਂ ’ਚੋਂ ਕੁਝ ਦੀ ਰੀੜ੍ਹ ਦੀ ਹੱਡੀ ਅਤੇ ਧੌਣ 'ਤੇ ਵੀ ਸੱਟਾਂ ਆਈਆਂ। ਏਅਰਲਾਈਨ ਨੇ ਦੱਸਿਆ ਸੀ ਕਿ ਕੋਈ ਗੰਭੀਰ ਸੱਟ ਨਹੀਂ ਲੱਗੀ ਅਤੇ ਲੋੜਵੰਦਾਂ ਦੀ ਹਵਾਈ ਅੱਡੇ 'ਤੇ ਡਾਕਟਰੀ ਜਾਂਚ ਕਰਵਾਈ ਗਈ ਸੀ। ਜਹਾਜ਼ ਸੁਰੱਖਿਅਤ ਢੰਗ ਨਾਲ ਦਿੱਲੀ ਪਹੁੰਚ ਗਿਆ ਸੀ।

ਇਸ ਘਟਨਾ ਨੂੰ AAIB ਨੇ ਗੰਭੀਰ ਘਟਨਾ (ਸੰਭਾਵੀ ਹਾਦਸਾ) ਵਜੋਂ ਸ਼੍ਰੇਣੀਬੱਧ ਕੀਤਾ ਹੈ। ਪਹਿਲਾਂ ਕੁਝ ਰਿਪੋਰਟਾਂ ਵਿੱਚ ਖ਼ਰਾਬ ਮੌਸਮ/ਝਟਕਿਆਂ (Turbulence) ਦਾ ਜ਼ਿਕਰ ਸੀ ਪਰ ਬਾਅਦ ਦੀ ਜਾਂਚ ਵਿੱਚ ਤਕਨੀਕੀ ਖ਼ਰਾਬੀ ਅਤੇ ਹੁਣ ਪਾਇਲਟ ਦੇ ਟੈਸਟ ਨਤੀਜਿਆਂ 'ਤੇ ਵੀ ਧਿਆਨ ਕੇਂਦਰਿਤ ਕੀਤਾ ਜਾ ਰਿਹਾ ਹੈ। AAIB ਦੀ ਵਿਸਤ੍ਰਿਤ ਜਾਂਚ ਰਿਪੋਰਟ ਆਉਣੀ ਅਜੇ ਬਾਕੀ ਹੈ।