ਭੈਣ ਦੀਆਂ ਅੱਖਾਂ ਦੇ ਇਲਾਜ ਦੇ ਨਾਂ ’ਤੇ X ’ਤੇ ਰਚਿਆ ‘ਹਮਦਰਦੀ ਦਾ ਜਾਲ’! ਜਾਅਲੀ ਕਾਗਜ਼ ਦਿਖਾ ਕੇ ਢਾਈ ਲੱਖ ਬਟੋਰੇ, ਹੁਣ ਪੁਲਿਸ ਨੇ ਦਬੋਚਿਆ

ਸੰਵਾਦ ਸੂਤਰ, ਬਾਹ (ਆਗਰਾ)। 12 ਸਾਲਾ ਭੈਣ ਦੀਆਂ ਅੱਖਾਂ ਦੀ ਸਰਜਰੀ ਦੇ ਨਾਮ ’ਤੇ ਇੰਟਰਨੈੱਟ ’ਤੇ ਭਾਵੁਕ ਅਪੀਲ ਕਰਕੇ ਆਰਥਿਕ ਮਦਦ ਇਕੱਠੀ ਕਰਨ ਵਾਲੇ ਬਾਹ ਵਾਸੀ ਜੈ ਸਿੰਘ ਰਾਠੌੜ ਉਰਫ਼ ਅਜੈਵੀਰ ਸਿੰਘ ’ਤੇ ਦਿੱਲੀ ਦੇ ਸ਼ਰਾਫ਼ ਆਈ ਸੈਂਟਰ ਦੇ ਨਾਮ ’ਤੇ ਕਥਿਤ ਜਾਅਲੀ ਮੈਡੀਕਲ ਦਸਤਾਵੇਜ਼ਾਂ ਦੀ ਵਰਤੋਂ ਕਰਕੇ ਲੋਕਾਂ ਤੋਂ ਪੈਸੇ ਲੈਣ ਦਾ ਦੋਸ਼ ਹੈ। ਇਸ ਮਾਮਲੇ ’ਚ ਇੱਕ ਇੰਫਲੂਐਂਸਰ ਨੇ ਬਾਹ ਥਾਣੇ ’ਚ ਕੇਸ ਦਰਜ ਕਰਵਾਇਆ ਹੈ। ਰਕਾਬਗੰਜ ਦੇ ਈਦਗਾਹ ਵਾਸੀ ਇੰਫਲੂਐਂਸਰ ਮਦਨ ਮੋਹਨ ਸੋਨੀ ਨੇ ਸ਼ਿਕਾਇਤ ਦਰਜ ਕਰਵਾਈ ਹੈ। ਦੋਸ਼ ਹੈ ਕਿ ਜੈ ਸਿੰਘ ਰਾਠੌੜ ਨੇ ਆਪਣੇ X ਅਕਾਊਂਟ ਰਾਹੀਂ ਕੀਤੀ ਅਪੀਲ ’ਚ ਭੈਣ ਨੂੰ ਗਲੂਕੋਮਾ ਤੇ ਵਿਟ੍ਰੀਅਸ ਹੈਮਰੇਜ ਤੋਂ ਪੀੜਤ ਦੱਸਿਆ ਸੀ ਤੇ ਉਸ ਦੀ ਨਜ਼ਰ ਜਾਣ ਦਾ ਖ਼ਤਰਾ ਦੱਸਿਆ ਗਿਆ ਸੀ।

ਭਾਵੁਕ ਅਪੀਲ ਦੇਖ ਕੇ ਲੋਕਾਂ ਨੇ ਕੀਤੀ ਆਰਥਿਕ ਮਦਦ

ਦਿੱਲੀ ’ਚ ਇਲਾਜ ਤੇ ਅੱਖਾਂ ਦੀ ਸਰਜਰੀ ਲਈ ਪੈਸਿਆਂ ਦੀ ਕਮੀ ਦਾ ਹਵਾਲਾ ਦਿੰਦਿਆਂ ਲੋਕਾਂ ਤੋਂ ਆਰਥਿਕ ਸਹਾਇਤਾ ਮੰਗੀ ਗਈ। ਭਾਵੁਕ ਅਪੀਲ ਤੋਂ ਬਾਅਦ ਕਈ ਲੋਕਾਂ ਨੇ ਮਦਦ ਲਈ ਪੈਸੇ ਦਿੱਤੇ। ਇੱਕ ਰਿਪੋਰਟ ਮੁਤਾਬਕ ਕਰੀਬ ਢਾਈ ਲੱਖ ਰੁਪਏ ਇਕੱਠੇ ਹੋਣ ਦਾ ਦਾਅਵਾ ਸਾਹਮਣੇ ਆਇਆ। ਬਾਅਦ ’ਚ ਭੁਗਤਾਨ ਨਾਲ ਸਬੰਧਤ ਜਾਣਕਾਰੀ ਹਟਾ ਕੇ ਕਾਫ਼ੀ ਰਕਮ ਮਿਲ ਜਾਣ ਦੀ ਗੱਲ ਕਹੀ ਗਈ।

ਸ਼ੱਕ ਹੋਣ ’ਤੇ ਇੰਝ ਖੁੱਲ੍ਹੀ ਪੂਰੀ ਕਰਤੂਤ

ਇੰਫਲੂਐਂਸਰ ਮਦਨ ਮੋਹਨ ਸੋਨੀ ਨੇ ਦੱਸਿਆ ਕਿ ਸ਼ੱਕ ਹੋਣ ’ਤੇ ਉਨ੍ਹਾਂ ਨੇ ਸ਼ਰਾਫ਼ ਆਈ ਸੈਂਟਰ ਨਾਲ ਸੰਪਰਕ ਕੀਤਾ। ਹਸਪਤਾਲ ਨੇ ਸਬੰਧਤ ਮਰੀਜ਼ ਦੇ ਉੱਥੇ ਰਜਿਸਟਰਡ ਹੋਣ ਤੋਂ ਇਨਕਾਰ ਕਰ ਦਿੱਤਾ। ਨਾਲ ਹੀ ਹਸਪਤਾਲ ਨੇ ਆਪਣੇ ਨਾਮ ਤੇ ਲੈਟਰਹੈੱਡ ’ਤੇ ਮਰੀਜ਼ ਦੇ ਰਿਕਾਰਡ, ਮੈਡੀਕਲ ਪਰਚੀਆਂ, ਸਲਾਹ ਤੇ ਅੰਦਾਜ਼ਨ ਇਲਾਜ ਖ਼ਰਚ ਨਾਲ ਸਬੰਧਤ ਕਥਿਤ ਜਾਅਲੀ ਦਸਤਾਵੇਜ਼ ਜਾਰੀ ਕੀਤੇ ਜਾਣ ਬਾਰੇ ਚੇਤਾਵਨੀ ਦਿੱਤੀ। ਇਸ ਤੋਂ ਬਾਅਦ ਇੰਫਲੂਐਂਸਰ ਨੇ X ’ਤੇ ਅਪੀਲ ਕਰਨ ਵਾਲੇ ਜੈ ਸਿੰਘ ਰਾਠੌੜ ਨੂੰ ਕਥਿਤ ਤੌਰ ’ਤੇ ਜਾਅਲੀ ਤਰੀਕੇ ਨਾਲ ਇਕੱਠੀ ਕੀਤੀ ਰਕਮ ਸਬੰਧਤ ਲੋਕਾਂ ਨੂੰ ਵਾਪਸ ਕਰਨ ਲਈ ਕਿਹਾ। ਦੋਸ਼ ਹੈ ਕਿ ਇਸ ਤੋਂ ਬਾਅਦ ਮੁਲਜ਼ਮ ਵੱਲੋਂ ਤਰ੍ਹਾਂ-ਤਰ੍ਹਾਂ ਦੇ ਬਹਾਨੇ ਬਣਾਏ ਜਾਣ ਲੱਗੇ। ਬਾਹ ਥਾਣੇ ਦੇ ਇੰਸਪੈਕਟਰ ਡੀਪੀ ਤਿਵਾਰੀ ਨੇ ਦੱਸਿਆ ਕਿ ਮਾਮਲਾ ਦਰਜ ਕਰਕੇ ਮੁਲਜ਼ਮ ਨੂੰ ਗ੍ਰਿਫ਼ਤਾਰ ਕਰ ਲਿਆ ਗਿਆ ਹੈ। ਸਬੂਤ ਇਕੱਠੇ ਕੀਤੇ ਜਾ ਰਹੇ ਹਨ।