ਲੇਟ ਕੇ ਮੋਬਾਈਲ ਚਲਾਉਣ ਨਾਲ ਵਧ ਰਿਹਾ ਹੈ ਸਰਵਾਈਕਲ ਦਾ ਖਤਰਾ, ਹਸਪਤਾਲਾਂ ’ਚ ਵੱਧ ਰਹੇ ਹਨ ਮਰੀਜ਼

ਜਾਗਰਣ ਸੰਵਾਦਦਾਤਾ, ਸਮਸਤੀਪੁਰ : ਬਿਸਤਰੇ ’ਤੇ ਲੇਟ ਕੇ ਮੋਬਾਈਲ ਚਲਾਉਣ ਤੇ ਲੋੜੀਂਦੀ ਰੌਸ਼ਨੀ ਤੋਂ ਬਿਨਾਂ ਕੰਮ ਕਰਨ ਦੀ ਆਦਤ ਲੋਕਾਂ ਲਈ ਖਤਰਨਾਕ ਸਾਬਤ ਹੋ ਰਹੀ ਹੈ। ਇਸ ਗਲਤ ਜੀਵਨਸ਼ੈਲੀ ਕਾਰਨ ਨੌਜਵਾਨਾਂ ਤੇ ਬੱਚਿਆਂ ’ਚ ਸਰਵਾਈਕਲ, ਗਰਦਨ ਤੇ ਪਿੱਠ ਦਰਦ ਦੀ ਸਮੱਸਿਆ ਤੇਜ਼ੀ ਨਾਲ ਵੱਧ ਰਹੀ ਹੈ। ਸਮਸਤੀਪੁਰ ਸਦਰ ਹਸਪਤਾਲ ਦੇ ਫਿਜ਼ਿਓਥੈਰੇਪੀ ਕੇਂਦਰ ’ਚ ਪਹੁੰਚ ਰਹੇ ਮਰੀਜ਼ਾਂ ’ਚ ਇਹ ਬਦਲਾਅ ਸਾਫ਼ ਨਜ਼ਰ ਆ ਰਿਹਾ ਹੈ।

ਨੌਜਵਾਨਾਂ ਦੀ ਗਿਣਤੀ ਜ਼ਿਆਦਾ

ਸਦਰ ਹਸਪਤਾਲ ਦੇ ਅੰਕੜਿਆਂ ਮੁਤਾਬਕ ਪਿਛਲੇ ਅੱਠ ਮਹੀਨਿਆਂ ’ਚ ਕੁੱਲ 3515 ਮਰੀਜ਼ਾਂ ਦਾ ਫਿਜ਼ਿਓਥੈਰੇਪੀ ਇਲਾਜ ਕੀਤਾ ਗਿਆ ਹੈ। ਇਨ੍ਹਾਂ ’ਚ 1560 ਔਰਤਾਂ ਤੇ 1955 ਪੁਰਸ਼ ਸ਼ਾਮਲ ਹਨ। ਇਨ੍ਹਾਂ ’ਚ ਗਰਦਨ, ਪਿੱਠ ਦਰਦ ਤੇ ਸਰਵਾਈਕਲ ਤੋਂ ਪੀੜਤ ਨੌਜਵਾਨਾਂ ਦੀ ਗਿਣਤੀ ਲਗਭਗ 70 ਫੀਸਦੀ ਦਰਜ ਕੀਤੀ ਗਈ ਹੈ।

ਹਸਪਤਾਲ ’ਤੇ ਵਧਿਆ ਭਰੋਸਾ

ਦਰਦ ਦੀ ਇਸ ਸਮੱਸਿਆ ਤੋਂ ਬਾਅਦ ਮਰੀਜ਼ਾਂ ’ਚ ਗਠੀਆ ਤੇ ਮੋਢੇ ਜਾਂ ਬਾਂਹ ’ਚ ਜਕੜਨ ਦੇ ਮਾਮਲੇ ਸਭ ਤੋਂ ਵੱਧ ਸਾਹਮਣੇ ਆ ਰਹੇ ਹਨ। ਸਦਰ ਹਸਪਤਾਲ ’ਚ ਫਿਜ਼ਿਓਥੈਰੇਪੀ ਸਹੂਲਤਾਂ ਦੇ ਵਿਸਥਾਰ ਤੇ ਬਿਹਤਰ ਇਲਾਜ ਕਾਰਨ ਹੁਣ ਮਰੀਜ਼ ਨਿੱਜੀ ਕਲੀਨਿਕਾਂ ਦੀ ਬਜਾਏ ਸਰਕਾਰੀ ਹਸਪਤਾਲ ਦੀਆਂ ਆਧੁਨਿਕ ਸੇਵਾਵਾਂ ’ਤੇ ਭਰੋਸਾ ਜਤਾ ਰਹੇ ਹਨ।

ਡਾਕਟਰਾਂ ਦੀ ਅਹਿਮ ਸਲਾਹ

ਸਦਰ ਹਸਪਤਾਲ ਦੇ ਡਿਪਟੀ ਸੁਪਰਡੈਂਟ ਡਾ. ਗਿਰੀਸ਼ ਕੁਮਾਰ ਨੇ ਕਿਹਾ ਕਿ ਫਿਜ਼ੀਓਥੈਰੇਪੀ ਸਰੀਰ ਦੇ ਦਰਦ ਤੇ ਜਕੜਨ ਨੂੰ ਪ੍ਰਭਾਵਸ਼ਾਲੀ ਢੰਗ ਨਾਲ ਘਟਾ ਸਕਦੀ ਹੈ। ਇਹ ਥੈਰੇਪੀ ਨਾ ਸਿਰਫ਼ ਸੱਟਾਂ ਤੇ ਬਿਮਾਰੀਆਂ ਤੋਂ ਉਭਰਨ ’ਚ ਮਦਦ ਕਰਦੀ ਹੈ, ਸਗੋਂ ਲੋਕਾਂ ਦੀ ਸਰੀਰਕ ਗਤੀਸ਼ੀਲਤਾ ਤੇ ਤੰਦਰੁਸਤੀ ’ਚ ਵੀ ਸੁਧਾਰ ਕਰਦੀ ਹੈ।

ਬਦਲਦੀ ਜੀਵਨਸ਼ੈਲੀ ਜ਼ਿੰਮੇਵਾਰ

ਫਿਜ਼ਿਓਥੈਰੇਪਿਸਟ ਡਾ. ਗੌਰਵ ਕੁਮਾਰ ਦੇ ਅਨੁਸਾਰ, ਘੰਟਿਆਂ ਤੱਕ ਮੋਬਾਈਲ ਤੇ ਲੈਪਟਾਪ ਦੇ ਸਾਹਮਣੇ ਝੁਕ ਕੇ ਬੈਠਣ ਨਾਲ ਗਰਦਨ ਤੇ ਕਮਰ ਦੀ ਰੀੜ੍ਹ ਦੀ ਹੱਡੀ ’ਤੇ ਭਾਰੀ ਦਬਾਅ ਪੈਂਦਾ ਹੈ।

ਸ਼ੁਰੂ ’ਚ ਹਲਕਾ ਦਿਖਾਈ ਦੇਣ ਵਾਲਾ ਇਹ ਦਰਦ ਹੌਲੀ-ਹੌਲੀ ਸਰਵਾਈਕਲ ਵਰਗੀ ਗੰਭੀਰ ਤੇ ਲੰਬੇ ਸਮੇਂ ਦੀ ਸਮੱਸਿਆ ਦਾ ਰੂਪ ਧਾਰ ਸਕਦਾ ਹੈ।

ਘੱਟ ਉਮਰ ’ਚ ਸਮੱਸਿਆ

ਡਾਕਟਰਾਂ ਨੇ ਚਿੰਤਾ ਜ਼ਾਹਰ ਕਰਦਿਆਂ ਕਿਹਾ ਕਿ ਪਹਿਲਾਂ ਇਹ ਬਿਮਾਰੀ 60 ਸਾਲ ਦੀ ਉਮਰ ਤੋਂ ਬਾਅਦ ਜ਼ਿਆਦਾ ਦੇਖਣ ਨੂੰ ਮਿਲਦੀ ਸੀ, ਪਰ ਹੁਣ 20 ਤੋਂ 35 ਸਾਲ ਦੇ ਨੌਜਵਾਨ ਵੀ ਇਸ ਦਾ ਸ਼ਿਕਾਰ ਹੋ ਰਹੇ ਹਨ। ਅਜਿਹੇ ’ਚ ਨੌਜਵਾਨਾਂ ਨੂੰ ਬੈਠਣ ਦਾ ਸਹੀ ਤਰੀਕਾ (ਪੋਸਚਰ) ਸੁਧਾਰਨ ਤੇ ਰੋਜ਼ਾਨਾ ਨਿਯਮਿਤ ਕਸਰਤ ਕਰਨ ਦੀ ਸਖ਼ਤ ਲੋੜ ਹੈ।

ਆਧੁਨਿਕ ਤਕਨੀਕ ਨਾਲ ਇਲਾਜ

ਹਸਪਤਾਲ ’ਚ ਮਰੀਜ਼ ਦੀ ਸਥਿਤੀ ਦੇ ਅਨੁਸਾਰ ਕਸਰਤਾਂ, ਇਲੈਕਟ੍ਰੋਥੈਰੇਪੀ, ਮਾਸਪੇਸ਼ੀਆਂ ਦੀ ਸਟ੍ਰੈਚਿੰਗ ਤੇ ਆਧੁਨਿਕ ਤਕਨੀਕਾਂ ਦੀ ਵਰਤੋਂ ਕੀਤੀ ਜਾ ਰਹੀ ਹੈ। ਹਰੇਕ ਮਰੀਜ਼ ਦੀ ਥੈਰੇਪੀ ’ਚ 30 ਤੋਂ 40 ਮਿੰਟ ਦਾ ਸਮਾਂ ਲੱਗਦਾ ਹੈ, ਜਿਸ ਨਾਲ ਲੰਬੇ ਸਮੇਂ ਤੋਂ ਦਰਦ ਨਾਲ ਪੀੜਤ ਮਰੀਜ਼ਾਂ ਨੂੰ ਰਾਹਤ ਮਿਲ ਰਹੀ ਹੈ।