ਇੱਕ ਵਿਦਿਆਰਥਣ ਨੂੰ ਪੜ੍ਹਾਉਣ ਲਈ ਰੋਜ਼ਾਨਾ 5 ਕਿਲੋਮੀਟਰ ਪੈਦਲ ਸਕੂਲ ਜਾਂਦੇ ਹਨ ਅਧਿਆਪਕ, ਪ੍ਰਾਰਥਨਾ-ਰਾਸ਼ਟਰੀ ਗੀਤ ਸਮੇਤ ਰੋਜ਼ ਲੱਗਦੀ ਹੈ ਹਾਜ਼ਰੀ

ਕਰੀਅਰ ਡੈਸਕ, ਨਵੀਂ ਦਿੱਲੀ : ਸਰਕਾਰੀ ਅਧਿਆਪਕਾਂ ਬਾਰੇ ਅਕਸਰ ਇਹ ਸੁਣਨ ਨੂੰ ਮਿਲਦਾ ਹੈ ਕਿ ਉਹ ਸਕੂਲ ’ਚ ਸਹੀ ਢੰਗ ਨਾਲ ਪੜ੍ਹਾਈ ਨਹੀਂ ਕਰਵਾਉਂਦੇ। ਪਰ ਅੱਜ ਅਸੀਂ ਇੱਕ ਅਜਿਹੇ ਅਧਿਆਪਕ ਜੀਵਨ ਮਿਥਾਰੀ ਦੀ ਗੱਲ ਕਰ ਰਹੇ ਹਾਂ, ਜੋ ਸਿਰਫ਼ ਇੱਕ ਵਿਦਿਆਰਥਣ ਨੂੰ ਪੜ੍ਹਾਉਣ ਲਈ ਰੋਜ਼ਾਨਾ 5 ਕਿਲੋਮੀਟਰ ਪੈਦਲ ਚੱਲ ਕੇ ਸਕੂਲ ਜਾਂਦੇ ਹਨ। ਕਿਉਂਕਿ ਸਕੂਲ ਦਾ ਰਸਤਾ ਪਹਾੜਾਂ ਤੇ ਜੰਗਲਾਂ ’ਚੋਂ ਹੋ ਕੇ ਲੰਘਦਾ ਹੈ, ਇਸ ਲਈ ਉਹ ਕਿਸੇ ਵਾਹਨ ਦੀ ਵਰਤੋਂ ਵੀ ਨਹੀਂ ਕਰਦੇ।

ਇੱਕ ਬੱਚੀ ਵਾਲਾ ਪ੍ਰਾਇਮਰੀ ਸਕੂਲ

ਇਸ ਪ੍ਰਾਇਮਰੀ ਸਕੂਲ ਦੀ ਸਭ ਤੋਂ ਖ਼ਾਸ ਤੇ ਵਿਲੱਖਣ ਗੱਲ ਇਹ ਹੈ ਕਿ ਇੱਥੇ ਸਿਰਫ਼ ਇੱਕ ਹੀ ਵਿਦਿਆਰਥਣ ਪੜ੍ਹਦੀ ਹੈ। ਪਿਛਲੇ 13 ਸਾਲਾਂ ਤੋਂ ਇਸ ਸਕੂਲ ’ਚ ਸੇਵਾ ਨਿਭਾਅ ਰਹੇ ਜੀਵਨ ਮਿਥਾਰੀ ਦਾ ਹੌਸਲਾ ਇਸ ਗੱਲ ਤੋਂ ਕਦੇ ਘੱਟ ਨਹੀਂ ਹੋਇਆ ਕਿ ਉਨ੍ਹਾਂ ਦੇ ਸਾਹਮਣੇ ਸਿਰਫ਼ ਇੱਕ ਬੱਚੀ ਬੈਠਦੀ ਹੈ। ਉਹ ਮੰਨਦੇ ਹਨ ਕਿ ਵਿਦਿਆਰਥੀਆਂ ਦੀ ਗਿਣਤੀ ਭਾਵੇਂ ਕਿੰਨੀ ਵੀ ਘੱਟ ਹੋਵੇ, ਪਰ ਸਿੱਖਿਆ ਪ੍ਰਾਪਤ ਕਰਨਾ ਹਰ ਬੱਚੇ ਦਾ ਅਧਿਕਾਰ ਹੈ ਤੇ ਇੱਕ ਅਧਿਆਪਕ ਦੇ ਫਰਜ਼ ’ਤੇ ਇਸ ਦਾ ਕੋਈ ਅਸਰ ਨਹੀਂ ਪੈਣਾ ਚਾਹੀਦਾ।

ਪ੍ਰਾਰਥਨਾ ਤੇ ਰਾਸ਼ਟਰੀ ਗੀਤ ਸਮੇਤ ਰੋਜ਼ ਲੱਗਦੀ ਹੈ ਹਾਜ਼ਰੀ

ਵਿਦਿਆਰਥੀਆਂ ਦੀ ਗਿਣਤੀ ਭਾਵੇਂ ਇੱਕ ਹੀ ਹੈ, ਪਰ ਸਕੂਲ ਦੇ ਨਿਯਮਾਂ ’ਚ ਕੋਈ ਢਿੱਲ ਨਹੀਂ ਦਿੱਤੀ ਜਾਂਦੀ। ਹਰ ਸਵੇਰ ਸਮੇਂ ਸਿਰ ਸਕੂਲ ਪਹੁੰਚ ਕੇ ਅਧਿਆਪਕ ਰਾਸ਼ਟਰੀ ਗੀਤ ਤੇ ਪ੍ਰਾਰਥਨਾ ਨਾਲ ਦਿਨ ਦੀ ਸ਼ੁਰੂਆਤ ਕਰਦੇ ਹਨ। ਇਸ ਤੋਂ ਬਾਅਦ ਹਾਜ਼ਰੀ ਲਗਾਈ ਜਾਂਦੀ ਹੈ ਤੇ ਗਣਿਤ, ਭਾਸ਼ਾ ਤੇ ਵਾਤਾਵਰਣ ਅਧਿਐਨ ਵਰਗੇ ਵਿਸ਼ਿਆਂ ਨੂੰ ਪੂਰੀ ਲਗਨ ਤੇ ਗੰਭੀਰਤਾ ਨਾਲ ਪੜ੍ਹਾਇਆ ਜਾਂਦਾ ਹੈ। ਸ਼ਹਿਰਾਂ ਦੇ ਵੱਡੇ ਨਿੱਜੀ ਸਕੂਲਾਂ ਵਾਂਗ ਹੀ ਇਸ ਵਿਦਿਆਰਥਣ ਨੂੰ ਵੀ ਪੂਰੀ ਲਗਨ ਨਾਲ ਸਿੱਖਿਆ ਤੇ ਸਹੂਲਤਾਂ ਪ੍ਰਦਾਨ ਕਰਨ ਦੀ ਕੋਸ਼ਿਸ਼ ਕੀਤੀ ਜਾਂਦੀ ਹੈ।

ਸਮਰਪਣ ਦੀ ਮਿਸਾਲ ਬਣੇ ਸਕੂਲ ਦੇ ਅਧਿਆਪਕ

ਅੱਜ ਦੇ ਦੌਰ ’ਚ ਜਿੱਥੇ ਥੋੜ੍ਹੀ ਜਿਹੀ ਪਰੇਸ਼ਾਨੀ ਆਉਣ ’ਤੇ ਲੋਕ ਆਪਣੇ ਫਰਜ਼ਾਂ ਤੋਂ ਪਿੱਛੇ ਹਟ ਜਾਂਦੇ ਹਨ, ਉੱਥੇ ਜੀਵਨ ਮਿਥਾਰੀ ਦੀ ਇਹ ਨਿਸ਼ਕਾਮ ਸੇਵਾ ਸਾਰਿਆਂ ਲਈ ਪ੍ਰੇਰਣਾ ਦਾ ਸਰੋਤ ਬਣ ਚੁੱਕੀ ਹੈ। ਉਨ੍ਹਾਂ ਦਾ ਇਹ ਯਤਨ ਸਾਬਤ ਕਰਦਾ ਹੈ ਕਿ ਸੱਚੇ ਇਰਾਦਿਆਂ ਤੇ ਪੱਕੇ ਟੀਚੇ ਦੇ ਸਾਹਮਣੇ ਹਰ ਮੁਸ਼ਕਲ ਛੋਟੀ ਪੈ ਜਾਂਦੀ ਹੈ। ਉਨ੍ਹਾਂ ਦਾ ਇਹ ਸਮਰਪਣ ਨਾ ਸਿਰਫ਼ ਉਸ ਬੱਚੀ ਦਾ ਭਵਿੱਖ ਸੰਵਾਰ ਰਿਹਾ ਹੈ, ਸਗੋਂ ਸਮਾਜ ਨੂੰ ਵੀ ਇੱਕ ਡੂੰਘੀ ਸਿੱਖਿਆ ਦੇ ਰਿਹਾ ਹੈ।