ਯੁਜਵੇਂਦਰ ਚਾਹਲ ਨੇ ਪਹਿਲੀ ਸ਼੍ਰੇਣੀ ਕ੍ਰਿਕਟ ਨੂੰ ਕਿਹਾ ਅਲਵਿਦਾ, ਭਾਵੁਕ ਪੋਸਟ ਸਾਂਝੀ ਕਰਦਿਆਂ ਬਿਆਨ ਕੀਤਾ ਆਪਣਾ ਸੁਪਨਾ

ਲੰਡਨ, ਪੀਟੀਆਈ : ਭਾਰਤੀ ਲੈੱਗ ਸਪਿਨਰ ਯੁਜਵੇਂਦਰ ਚਾਹਲ ਨੇ ਪਿਛਲੇ ਮਹੀਨੇ ਲਾਰਡਸ ਮੈਦਾਨ ’ਤੇ ਮਿਡਲਸੈਕਸ ਖਿਲਾਫ ਨੌਰਥੈਂਪਟਨਸ਼ਾਇਰ ਲਈ ਆਪਣਾ ਆਖਰੀ ਇੰਗਲਿਸ਼ ਕਾਊਂਟੀ ਚੈਂਪੀਅਨਸ਼ਿਪ ਮੈਚ ਖੇਡਣ ਤੋਂ ਬਾਅਦ ਪਹਿਲੀ ਸ਼੍ਰੇਣੀ ਕ੍ਰਿਕਟ ਤੋਂ ਸੰਨਿਆਸ ਲੈਣ ਦਾ ਐਲਾਨ ਕਰ ਦਿੱਤਾ ਹੈ।

ਭਾਰਤ ਲਈ 72 ਵਨਡੇ ਤੇ 80 ਟੀ-20 ਅੰਤਰਰਾਸ਼ਟਰੀ ਮੈਚ ਖੇਡ ਚੁੱਕੇ ਚਾਹਲ ਲਾਲ ਗੇਂਦ ਦੀ ਕ੍ਰਿਕਟ ’ਚ ਉਮੀਦ ਮੁਤਾਬਕ ਸਫਲਤਾ ਹਾਸਲ ਨਹੀਂ ਕਰ ਸਕੇ। ਉਸ ਨੇ 49 ਪਹਿਲੇ ਦਰਜੇ ਦੇ ਮੈਚ ਖੇਡੇ ਤੇ 6 ਵਾਰ ਪੰਜ ਜਾਂ ਵੱਧ ਵਿਕਟਾਂ ਲੈਣ ਸਮੇਤ 148 ਵਿਕਟਾਂ ਲਈਆਂ। ਨੌਰਥੈਂਪਟਨਸ਼ਾਇਰ ਲਈ ਆਪਣੇ ਆਖ਼ਰੀ ਪਹਿਲੇ ਦਰਜੇ ਦੇ ਸੀਜ਼ਨ ’ਚ, ਚਾਹਲ ਨੇ ਡਰਹਮ ਖਿਲਾਫ ਇੱਕ ਮੈਚ ’ਚ 9 ਸਮੇਤ 5 ਮੈਚਾਂ ’ਚ 21 ਵਿਕਟਾਂ ਲਈਆਂ। ਚਾਹਲ ਨੇ ਇਕ ਇੰਸਟਾਗ੍ਰਾਮ ਪੋਸਟ 'ਚ ਕਿਹਾ ਕਿ ਮੈਂ ਆਪਣਾ ਆਖਰੀ ਫਰਸਟ ਕਲਾਸ ਮੈਚ ਲਾਰਡਸ ’ਚ ਖੇਡਿਆ ਸੀ। ਮੈਂ ਇਹ ਕਹਿ ਕੇ ਭਾਵੁਕ ਹੋ ਰਿਹਾ ਹਾਂ ਕਿਉਂਕਿ ਟੈਸਟ ਕ੍ਰਿਕਟ ਖੇਡਣਾ ਮੇਰਾ ਸੁਪਨਾ ਸੀ। ਇੱਕ ਸੁਪਨਾ ਜੋ ਮੈਂ ਕਈ ਸਾਲਾਂ ਤੋਂ ਪਾਲਿਆ ਸੀ। ਭਾਵੇਂ ਇਹ ਸੁਪਨਾ ਪੂਰਾ ਨਹੀਂ ਹੋਇਆ ਪਰ ਮੈਂ ਹੁਣ ਤੱਕ ਦੇ ਆਪਣੇ ਸਫ਼ਰ ਤੋਂ ਪੂਰੀ ਤਰ੍ਹਾਂ ਸੰਤੁਸ਼ਟ ਹਾਂ।

ਉਸ ਨੇ ਕਿਹਾ ਕਿ ਮੇਰੇ ਲਈ ਲਾਲ ਗੇਂਦ ਦਾ ਕ੍ਰਿਕਟ ਸਿਰਫ਼ ਇਕ ਹੋਰ ਫਾਰਮੈਟ ਨਹੀਂ ਸੀ। ਇੱਥੇ ਹੀ ਮੈਂ ਧੀਰਜ, ਜਨੂੰਨ, ਦ੍ਰਿੜ ਇਰਾਦੇ ਤੇ ਘੰਟਿਆਂ ਤੱਕ ਮੈਦਾਨ 'ਤੇ ਰਹਿਣ ਤੇ ਹਰ ਦੌੜ ਤੇ ਹਰ ਵਿਕਟ ਲਈ ਲੜਨ ਦੀ ਖੁਸ਼ੀ ਦਾ ਅਰਥ ਸਿੱਖਿਆ। ਚਾਹਲ ਕਦੇ ਵੀ ਭਾਰਤੀ ਟੈਸਟ ਟੀਮ 'ਚ ਜਗ੍ਹਾ ਨਹੀਂ ਬਣਾ ਸਕੇ ਸਨ। ਹਾਲਾਂਕਿ, ਇੱਕ ਵਾਰ ਉਹ ਦੱਖਣੀ ਅਫਰੀਕਾ ਏ ਖਿਲਾਫ ਖੇਡਣ ਲਈ ਭਾਰਤ ਏ ਟੀਮ ’ਚ ਚੁਣਿਆ ਗਿਆ ਸੀ। ਉਸ ਸਮੇਂ, ਉਸ ਸਮੇਂ ਦੇ ਕੋਚ ਰਵੀ ਸ਼ਾਸਤਰੀ ਤੇ ਕਪਤਾਨ ਵਿਰਾਟ ਕੋਹਲੀ ਨੂੰ ਇੱਕ ਕਲਾਈ ਸਪਿਨਰ ਦੀ ਸਖ਼ਤ ਲੋੜ ਸੀ।