ਭੈਣ ਨੇ ਉਧਾਰ ਪੈਸੇ ਲੈ ਕੇ ਖਰੀਦਿਆ ਸੀ ਪਹਿਲਾ ਬੱਲਾ, ਭਾਰਤ ਖ਼ਿਲਾਫ਼ 3 ਸੈਂਕੜੇ ਤੇ 420 ਦੌੜਾਂ ਠੋਕ ਕੇ ਸੋਨਲ ਦਿਨੁਸ਼ਾ ਨੇ ਰਚਿਆ ਇਤਿਹਾਸ

ਦਿਨੁਸ਼ਾ ਦੇ ਭਰੋਸੇਮੰਦ ਕੋਚ ਅਸ਼ਾਨ ਪ੍ਰਿਅੰਜਨ ਨੇ ਕਿਹਾ ਕਿ ਉਸ ਦੀ ਬਾਸਕਿਟਬਾਲ ’ਚ ਦਿਲਚਸਪੀ ਸੀ। ਉਹ ਬੜੀ ਲਗਨ ਨਾਲ ਅਭਿਆਸ ਕਰਦਾ ਸੀ ਪਰ ਉਸ ਦੇ ਸਕੂਲ ਦੀ ਕੋਚ ਸੁਸਾਂਥਾ ਫੇਲਿਕਸ ਡਾਇਸ ਨੇ ਉਸ ਨੂੰ ਕ੍ਰਿਕਟ ਖੇਡਦੇ ਦੇਖਿਆ ਤੇ ਉਸ ਨੂੰ ਕ੍ਰਿਕਟ ਟੀਮ ’ਚ ਸ਼ਾਮਲ ਕੀਤਾ। ਉਸ ਕੋਲ ਬੱਲਾ ਜਾਂ ਕੋਈ ਹੋਰ ਸਾਮਾਨ ਨਹੀਂ ਸੀ। ਉਸ ਨੇ ਦੱਸਿਆ ਕਿ ਉਸ ਦੀ ਭੈਣ ਨੇ ਕੁਝ ਪੈਸੇ ਉਧਾਰ ਲੈ ਕੇ ਉਸ ਲਈ ਬੱਲਾ ਖਰੀਦਿਆ ਸੀ। ਇਹ ਉਸ ਦਾ ਪਹਿਲਾ ਕ੍ਰਿਕਟ ਬੱਲਾ ਸੀ। ਉਸ ਦੇ ਪਰਿਵਾਰ ਦੀ ਆਰਥਿਕ ਹਾਲਤ ਚੰਗੀ ਨਹੀਂ ਸੀ। ਉਹ ਆਪਣੇ ਪਿਤਾ, ਮਾਤਾ ਤੇ ਭੈਣ-ਭਰਾ ਨਾਲ ਬਹੁਤ ਲਗਾਅ ਰੱਖਦਾ ਹੈ। ਮੈਨੂੰ ਲੱਗਦਾ ਹੈ ਕਿ ਉਹ ਕ੍ਰਿਕਟ ਨਾਲ ਵੀ ਇਸੇ ਤਰ੍ਹਾਂ ਜੁੜਿਆ ਹੋਇਆ ਹੈ। ਭਾਰਤ ਖਿਲਾਫ ਟੈਸਟ ਮੈਚ ਸ਼ੁਰੂ ਹੋਣ ਤੋਂ ਕੁਝ ਦਿਨ ਪਹਿਲਾਂ ਦਿਨੁਸ਼ਾ ਨੇ ਪ੍ਰਿਅੰਜਨ ਨੂੰ ਫੋਨ ਕੀਤਾ ਸੀ। ਉਸ ਨੇ ਪ੍ਰਿਅੰਜਨ ਨੂੰ ਕਿਹਾ ਕਿ ਸਰ ਇੰਡੀਆ ਕੋਲ ਹਰ ਤਰ੍ਹਾਂ ਦੇ ਸਪਿਨਰ ਹਨ। ਸਾਨੂੰ ਚੰਗੀ ਤਿਆਰੀ ਕਰਨੀ ਪਵੇਗੀ। ਇਹ ਸਾਡੀ ਚਰਚਾ ਦਾ ਮੁੱਖ ਨੁਕਤਾ ਸੀ। ਉਹ ਹਰ ਮੈਚ ਤੋਂ ਪਹਿਲਾਂ ਮੈਨੂੰ ਫ਼ੋਨ ਕਰਦਾ ਹੈ। ਦਿਨੁਸ਼ਾ ਦੀ ਮਿਹਨਤ ਦਾ ਅੰਤ ’ਚ ਫਲ ਮਿਲਿਆ ਤੇ ਉਸ ਨੇ ਸਵੀਪ ਸ਼ਾਟਾਂ ਦੇ ਸ਼ਾਨਦਾਰ ਪ੍ਰਦਰਸ਼ਨ ਨਾਲ ਭਾਰਤ ਦੇ ਸਪਿਨਰਾਂ ਰਵਿੰਦਰ ਜਡੇਜਾ, ਕੁਲਦੀਪ ਯਾਦਵ, ਮਾਨਵ ਸੁਥਾਰ (ਸਾਰੇ ਖੱਬੇ ਹੱਥ ਦੇ ਸਪਿਨਰ) ਤੇ ਸਾਰਾਂਸ਼ ਜੈਨ (ਆਫ-ਸਪਿਨਰ) ਨੂੰ ਖੋਖਲਾ ਕਰਨ ਵਿੱਚ ਕੋਈ ਕਸਰ ਬਾਕੀ ਨਹੀਂ ਛੱਡੀ। ਦਿਨੁਸ਼ਾ ਨੇ ਗਾਲ ਤੇ ਕੋਲੰਬੋ ਟੈਸਟ ਮੈਚਾਂ ’ਚ ਕੁੱਲ 420 ਦੌੜਾਂ ਬਣਾਈਆਂ, ਜਿਨ੍ਹਾਂ 'ਚੋਂ 173 ਦੌੜਾਂ ਸਵੀਪ ਸ਼ਾਟ ਨਾਲ ਬਣੀਆਂ। ਇਸ ਤਰ੍ਹਾਂ ਉਸ ਨੇ ਇੱਕ ਟੈਸਟ ਲੜੀ ’ਚ ਸਪਿਨ ਖਿਲਾਫ ਸਵੀਪ ਸ਼ਾਟ ਖੇਡਦੇ ਹੋਏ ਸਭ ਤੋਂ ਵੱਧ ਦੌੜਾਂ ਬਣਾਉਣ ਦੇ ਮਾਮਲੇ ’ਚ ਜੋ ਰੂਟ (160 ਦੌੜਾਂ) ਨੂੰ ਪਿੱਛੇ ਛੱਡ ਦਿੱਤਾ।