ਸ਼ੇਰ-ਏ-ਪੰਜਾਬ T20 ਲੀਗ ਨਾਲ ਵਧੇਗੀ ਤਾਕਤ: Punjab Kings ਨਾਲ ਮਿਲ ਕੇ ਨਵੇਂ ਕ੍ਰਿਕਟਰਾਂ ਦੇ ਹੁਨਰ ਨੂੰ ਮਿਲੇਗੀ ਨਵੀਂ ਉਡਾਰੀ

ਪੰਜਾਬ ਕਿੰਗਜ਼ ਤੇ ਸ਼ੇਰ-ਏ-ਪੰਜਾਬ ਟੀ-20 ਲੀਗ ਦਾ ਇਹ ਜੁੜਾਅ ਭਾਰਤੀ ਕ੍ਰਿਕਟ ਲਈ ਇਕ ਨਵਾਂ ਰੋਲ ਮਾਡਲ ਪੇਸ਼ ਕਰਦਾ ਹੈ। ਬਾਕੀ ਸੂਬਿਆਂ ’ਚ ਵੀ ਸੂਬਾਈ ਲੀਗ ਹੋ ਰਹੀਆਂ ਹਨ ਪਰ ਹੁਣ ਤੱਕ ਉਨ੍ਹਾਂ ਲੀਗਾਂ ’ਚ ਉਸ ਸੂਬੇ ਦੀ ਆਈਪੀਐੱਲ ਫ੍ਰੈਂਚਾਇਜ਼ੀ ਦਾ ਕੋਈ ਸੰਪਰਕ ਸਾਹਮਣੇ ਨਹੀਂ ਆਇਆ ਹੈ। ਸ਼ੇਰ-ਏ-ਪੰਜਾਬ ਲੀਗ ਦੇ ਐਤਵਾਰ ਨੂੰ ਹੋਏ ਫਾਈਨਲ ’ਚ ਅੰਮ੍ਰਿਤਸਰ ਸੂਰਮਾਜ਼ ਚੈਂਪੀਅਨ ਬਣੀ। ਮਯੰਕ ਮਾਰਕੰਡੇ (3/17) ਦੀ ਸ਼ਾਨਦਾਰ ਗੇਂਦਬਾਜ਼ੀ ਤੋਂ ਬਾਅਦ ਸਹਿਜ ਧਵਨ ਦੇ ਅਜੇਤੂ ਅਰਧ ਸੈਂਕੜੇ ਦੀ ਬਦੌਲਤ ਅੰਮ੍ਰਿਤਸਰ ਨੇ ਮੋਹਾਲੀ ’ਚ ਲੁਧਿਆਣਾ ਲਾਇਨਜ਼ ਨੂੰ ਆਸਾਨੀ ਨਾਲ ਮਾਤ ਦੇ ਕੇ ਟਰਾਫੀ ਜਿੱਤੀ। ਇਸ ਲੀਗ ’ਚ ਕਈ ਖਿਡਾਰੀਆਂ ਨੇ ਸ਼ਾਨਦਾਰ ਪ੍ਰਦਰਸ਼ਨ ਕਰ ਕੇ ਪੰਜਾਬ ਕਿੰਗਜ਼ ਦਾ ਧਿਆਨ ਆਪਣੇ ਵੱਲ ਖਿੱਚਿਆ ਹੈ। ਸ਼ੇਰ-ਏ-ਪੰਜਾਬ ਲੀਗ ਦੇ ਪ੍ਰਦਰਸ਼ਨ ਨਾਲ ਉਥੋਂ ਦੇ ਨੌਜਵਾਨ ਖਿਡਾਰੀਆਂ ਨੂੰ ਆਪਣੇ ਸੂਬੇ ਦੀ ਟੀਮ ਦੇ ਸਕਾਊਟਸ ਤੇ ਮੈਨੇਜਮੈਂਟ ਸਾਹਮਣੇ ਪ੍ਰਦਰਸ਼ਨ ਕਰਨ ਦਾ ਮੌਕਾ ਮਿਲਿਆ।