Sher-E-Punjab T20 League : ‘ਮੈਂ ਆਪਣੇ ਨਿੱਜੀ ਸਕੋਰ 'ਤੇ ਜ਼ਿਆਦਾ ਧਿਆਨ ਨਹੀਂ ਦਿੱਤਾ’, 173 ਦੌੜਾਂ ਦੀ ਸ਼ਾਨਦਾਰ ਪਾਰੀ ਖੇਡਣ ਤੋਂ ਬਾਅਦ ਖੁੱਲ੍ਹ ਕੇ ਬੋਲੇ ਅੰਮ੍ਰਿਤਸਰ ਸੂਰਮਾਸ ਦੇ ਨਮਨ ਧੀਰ

ਰਣਜੀਤ ਸਿੰਘ ਰਾਣਾ, ਪੰਜਾਬੀ ਜਾਗਰਣ, ਮੁਹਾਲੀ : ਮੰਗਲਵਾਰ ਨੂੰ ਆਈ.ਐਸ. ਬਿੰਦਰਾ ਸਟੇਡੀਅਮ, ਮੁਹਾਲੀ ਵਿਖੇ ਸ਼ੇਰ-ਏ-ਪੰਜਾਬ ਟੀ-20 ਲੀਗ' ਵਿੱਚ, ਅੰਮ੍ਰਿਤਸਰ ਸੂਰਮਾਸ ਦੇ ਨਮਨ ਧੀਰ ਨੇ ਮੁਹਾਲੀ ਕਿੰਗਜ਼ ਦੇ ਖਿਲਾਫ ਸ਼ਾਨਦਾਰ ਬੱਲੇਬਾਜ਼ੀ ਦਾ ਪ੍ਰਦਰਸ਼ਨ ਕਰਦਿਆਂ 64 ਗੇਂਦਾਂ 'ਤੇ ਰਿਕਾਰਡ ਤੋੜ 173 ਦੌੜਾਂ ਬਣਾਈਆਂ। ਆਪਣੀ ਇਸ ਸ਼ਾਨਦਾਰ ਪਾਰੀ ਬਾਰੇ ਗੱਲ ਕਰਦਿਆਂ ਧੀਰ ਨੇ ਕਿਹਾ, “ਮੈਂ ਪਹਿਲੀ ਗੇਂਦ ਤੋਂ ਹੀ ਇਹ ਸੋਚ ਰਿਹਾ ਸੀ ਕਿ ਮੈਂ ਸਿਰਫ਼ ਗੇਂਦ ਦੀ ਯੋਗਤਾ (ਮੈਰਿਟ) ਦੇ ਅਧਾਰ 'ਤੇ ਖੇਡਣਾ ਹੈ। ਇਸ ਲਈ, ਮੈਂ ਆਪਣੇ ਸਕੋਰ ਵੱਲ ਧਿਆਨ ਨਹੀਂ ਦਿੱਤਾ।

150 ਦੌੜਾਂ ਤੱਕ ਪਹੁੰਚਣ ਤੋਂ ਬਾਅਦ ਵੀ, ਮੈਂ ਇਹੀ ਸੋਚ ਰਿਹਾ ਸੀ ਕਿ ਮੈਨੂੰ ਹਰ ਸ਼ਾਟ ਗੇਂਦ ਦੀ ਯੋਗਤਾ ਅਨੁਸਾਰ ਹੀ ਖੇਡਣਾ ਚਾਹੀਦਾ ਹੈ।” ਅੰਮ੍ਰਿਤਸਰ ਵੱਲੋਂ 20 ਓਵਰਾਂ ਵਿੱਚ 279/7 ਦਾ ਵਿਸ਼ਾਲ ਸਕੋਰ ਖੜ੍ਹਾ ਕਰਨ ਵਿੱਚ ਧੀਰ ਨੇ ਅਹਿਮ ਭੂਮਿਕਾ ਨਿਭਾਈ। ਉਸਨੇ ਆਪਣੀ ਸ਼ਾਨਦਾਰ ਪਾਰੀ ਦੌਰਾਨ 16 ਚੌਕੇ ਅਤੇ 12 ਛੱਕੇ ਲਗਾਏ ਅਤੇ ਸ਼ੁਰੂਆਤ ਤੋਂ ਹੀ ਮੁਹਾਲੀ ਦੇ ਗੇਂਦਬਾਜ਼ਾਂ 'ਤੇ ਹਮਲਾਵਰ ਰੁਖ ਅਪਣਾਇਆ।