ਸਾਰਾਂਸ਼ ਜੈਨ ਨੇ 33 ਸਾਲ ਦੀ ਉਮਰ 'ਚ ਭਾਰਤੀ ਟੈਸਟ ਟੀਮ 'ਚ ਕੀਤਾ ਡੈਬਿਊ, 28 ਸਾਲਾਂ 'ਚ ਇਹ ਰਿਕਾਰਡ ਬਣਾਉਣ ਵਾਲੇ ਸਭ ਤੋਂ ਉਮਰਦਰਾਜ਼ ਖਿਡਾਰੀ ਬਣੇ

ਸਾਰਾਂਸ਼ ਨੇ 33 ਸਾਲ ਤੇ 145 ਦਿਨ ਦੀ ਉਮਰ 'ਚ ਭਾਰਤੀ ਟੈਸਟ ਟੀਮ ’ਚ ਡੈਬਿਊ ਕਰ ਕੇ ਸਾਬਿਤ ਕੀਤਾ ਕਿ ਮਿਹਨਤ ਕਦੇ ਵੀ ਵਿਅਰਥ ਨਹੀਂ ਜਾਂਦੀ। ਉਹ ਭਾਰਤ ਲਈ ਟੈਸਟ ਡੈਬਿਊ ਕਰਨ ਵਾਲਾ 28 ਸਾਲਾਂ ’ਚ ਸਭ ਤੋਂ ਉਮਰਦਰਾਜ਼ ਖਿਡਾਰੀ ਹੈ। ਉਸ ਤੋਂ ਪਹਿਲਾਂ 1998 ’ਚ ਰਾਬਿਨ ਸਿੰਘ ਨੇ 35 ਸਾਲ ਤੇ 23 ਦਿਨ ਦੀ ਉਮਰ 'ਚ ਡੈਬਿਊ ਕੀਤਾ ਸੀ। ਸਾਰਾਂਸ਼ ਤੋਂ ਪਹਿਲਾਂ ਮੱਧ ਪ੍ਰਦੇਸ਼ ਦੇ ਸਪਿਨਰ ਜਲਜ ਸਕਸੈਨਾ ਨੇ ਘਰੇਲੂ ਕ੍ਰਿਕਟ ’ਚ ਬਿਹਤਰੀਨ ਰਿਕਾਰਡ ਹੋਣ ਦੇ ਬਾਵਜੂਦ ਕਦੇ ਭਾਰਤ ਲਈ ਨਹੀਂ ਖੇਡਿਆ। ਜਲਜ ਦੇ ਨਾਂ ’ਤੇ ਪਹਿਲੀ ਸ਼੍ਰੇਣੀ ਕ੍ਰਿਕਟ ਵਿਚ 7224 ਦੌੜਾਂ ਤੇ 512 ਵਿਕਟਾਂ ਦਰਜ ਹਨ। ਸਾਰਾਂਸ਼ ਪਹਿਲੀ ਸ਼੍ਰੇਣੀ ਕ੍ਰਿਕਟ ’ਚ 2223 ਦੌੜਾਂ ਤੇ 188 ਵਿਕਟਾਂ ਲੈ ਚੁੱਕਾ ਹੈ। ਉਹ ਮੁਰਲੀ ਵਿਜੇ (2008) ਤੇ ਮੁਹੰਮਦ ਸ਼ਮੀ (2013) ਦੇ ਬਾਅਦ ਪਹਿਲਾ ਅਜਿਹਾ ਕ੍ਰਿਕਟਰ ਹੈ, ਜਿਸਨੇ ਆਈਪੀਐੱਲ ਦੇ ਕਰਾਰ ਤੋਂ ਪਹਿਲਾਂ ਭਾਰਤ ਲਈ ਡੈਬਿਊ ਕੀਤਾ ਹੈ। ਸਾਰਾਂਸ਼ ਦੇ ਨਾਲ ਹੀ ਕਲੱਬ ਕ੍ਰਿਕਟ ਖੇਡਣ ਵਾਲੇ ਰਜਤ ਪਾਟੀਦਾਰ ਆਈਪੀਐੱਲ ’ਚ ਆਰਸੀਬੀ ਦਾ ਕਪਤਾਨ ਬਣ ਚੁੱਕਾ ਹੈ। ਬਚਪਨ ਦੇ ਦੋਸਤ ਵੈਂਕਟੇਸ਼ ਅਈਅਰ ਤੇ ਆਵੇਸ਼ ਖਾਨ ਆਈਪੀਐੱਲ ਵਿਚ ਨਾਮ ਕਮਾ ਰਹੇ ਸਨ। ਕਈ ਜੂਨੀਅਰ ਵੀ ਆਈਪੀਐੱਲ ਵਿਚ ਸਥਾਪਿਤ ਹੋਣ ਲੱਗੇ ਸਨ ਪਰ ਸਾਰਾਂਸ਼ ਨੇ ਹਿੰਮਤ ਨਹੀਂ ਹਾਰੀ। ਭਾਰਤ-ਏ ਟੀਮ ਨਾਲ ਸ੍ਰੀਲੰਕਾ ਦੌਰੇ 'ਤੇ ਸਾਰਾਂਸ਼ ਨੇ ਅਜੇਤੂ 70 ਦੌੜਾਂ ਤੇ ਛੇ ਵਿਕਟਾਂ ਲੈ ਕੇ ਆਪਣੀ ਸਮਰੱਥਾ ਦਿਖਾਈ ਸੀ। ਉਸ ਸਮੇਂ ਤੋਂ ਭਾਰਤ ਲਈ ਖੇਡਣ ਦੀ ਉਮੀਦ ਵਧ ਗਈ ਸੀ।