- ਸ਼ਹਿਰ ਚੁਣੋ
- ਈ-ਪੇਪਰ
- ਵੈੱਬ ਸਟੋਰੀਜ਼
- ਸ਼ਹਿਰ ਚੁਣੋ
- ਈ-ਪੇਪਰ
- ਵੈੱਬ ਸਟੋਰੀਜ਼
On This Day : 5 ਸਾਲ ਦਾ ਲੰਬਾ ਸੋਕਾ ਤੇ 78 ਮੈਚਾਂ ਦਾ ਇੰਤਜ਼ਾਰ; ਜਾਣੋ ਸਚਿਨ ਤੇਂਦੁਲਕਰ ਨੇ ਕਦੋਂ ਲਗਾਇਆ ਸੀ ਪਹਿਲਾ ODI ਸੈਂਕੜਾ
‘ਕ੍ਰਿਕਟ ਦੇ ਭਗਵਾਨ’ ਸਚਿਨ ਤੇਂਦੁਲਕਰ ਦੇ ਨਾਮ ਕ੍ਰਿਕਟ ਜਗਤ ਦੇ ਕਈ ਇਤਿਹਾਸਕ ਰਿਕਾਰਡ ਦਰਜ ਹਨ। ਪਰ ਕੀ ਤੁਸੀਂ ਜਾਣਦੇ ਹੋ ਕਿ ਜਿਸ ‘ਮਾਸਟਰ ਬਲਾਸਟਰ’ ਨੇ ਆਪਣੇ ਵਨਡੇ ਕਰੀਅਰ 'ਚ 49 ਸੈਂਕੜਿਆਂ ਦਾ ਅੰਬਾਰ ਲਗਾਇਆ, ਉਨ੍ਹਾਂ ਨੂੰ ਆਪਣਾ ਪਹਿਲਾ ਵਨਡੇ ਸੈਂਕੜਾ ਲਗਾਉਣ ਲਈ ਲਗਭਗ 5 ਸਾਲ ਅਤੇ 78 ਮੈਚਾਂ ਦਾ ਲੰਮਾ ਇੰਤਜ਼ਾਰ ਕਰਨਾ ਪਿਆ ਸੀ?
Posted By Sunita
Publish Date: Wed, 09 Sep 2026 10:41 AM (IST)
Updated Date: Wed, 09 Sep 2026 10:43 AM (IST)
ਸਪੋਰਟਸ ਡੈਸਕ, ਨਵੀਂ ਦਿੱਲੀ - ‘ਕ੍ਰਿਕਟ ਦੇ ਭਗਵਾਨ’ ਸਚਿਨ ਤੇਂਦੁਲਕਰ ਦੇ ਨਾਮ ਕ੍ਰਿਕਟ ਜਗਤ ਦੇ ਕਈ ਇਤਿਹਾਸਕ ਰਿਕਾਰਡ ਦਰਜ ਹਨ। ਪਰ ਕੀ ਤੁਸੀਂ ਜਾਣਦੇ ਹੋ ਕਿ ਜਿਸ ‘ਮਾਸਟਰ ਬਲਾਸਟਰ’ ਨੇ ਆਪਣੇ ਵਨਡੇ ਕਰੀਅਰ 'ਚ 49 ਸੈਂਕੜਿਆਂ ਦਾ ਅੰਬਾਰ ਲਗਾਇਆ, ਉਨ੍ਹਾਂ ਨੂੰ ਆਪਣਾ ਪਹਿਲਾ ਵਨਡੇ ਸੈਂਕੜਾ ਲਗਾਉਣ ਲਈ ਲਗਭਗ 5 ਸਾਲ ਅਤੇ 78 ਮੈਚਾਂ ਦਾ ਲੰਮਾ ਇੰਤਜ਼ਾਰ ਕਰਨਾ ਪਿਆ ਸੀ?
ਅੱਜ ਹੀ ਦੇ ਦਿਨ ਆਇਆ ਸੀ ਪਹਿਲਾ ਸੈਂਕੜਾ
18 ਦਸੰਬਰ 1989 ਨੂੰ ਵਨਡੇ ਡੈਬਿਊ ਕਰਨ ਵਾਲੇ ਸਚਿਨ ਨੇ ਅੱਜ ਤੋਂ 32 ਸਾਲ ਪਹਿਲਾਂ, ਯਾਨੀ 9 ਸਤੰਬਰ 1994 ਨੂੰ ਸ਼੍ਰੀਲੰਕਾ ਦੇ ਕੋਲੰਬੋ 'ਚ ਇਤਿਹਾਸ ਰਚਿਆ ਸੀ। ਸਿੰਗਰ ਵਰਲਡ ਸੀਰੀਜ਼ ਦੌਰਾਨ ਆਸਟ੍ਰੇਲੀਆ ਵਰਗੀ ਮਜ਼ਬੂਤ ਟੀਮ ਦੇ ਖ਼ਿਲਾਫ਼ ਸਚਿਨ ਨੇ ਇਹ ਜਾਦੂਈ ਅੰਕੜਾ ਹਾਸਲ ਕੀਤਾ ਸੀ। ਇਸ ਸ਼ਾਨਦਾਰ ਮੁਕਾਬਲੇ 'ਚ ਸਚਿਨ ਨੇ 130 ਗੇਂਦਾਂ 'ਤੇ 110 ਦੌੜਾਂ ਦੀ ਬਿਹਤਰੀਨ ਪਾਰੀ ਖੇਡੀ ਸੀ, ਜਿਸ 'ਚ 8 ਸ਼ਾਨਦਾਰ ਚੌਕੇ ਅਤੇ 2 ਗਗਨਚੁੰਬੀ ਛੱਕੇ ਸ਼ਾਮਲ ਸਨ। ਆਸਟ੍ਰੇਲੀਆ ਦੇ ਗੇਂਦਬਾਜ਼ ਕ੍ਰੇਗ ਮੈਕਡਰਮੌਟ ਨੇ ਸਚਿਨ ਨੂੰ ਬੋਲਡ ਕੀਤਾ ਸੀ।
ਓਪਨਿੰਗ ਕਰਨ ਆਏ ਸਨ ਸਚਿਨ
ਮੁਕਾਬਲੇ ਦੀ ਗੱਲ ਕਰੀਏ ਤਾਂ ਸਚਿਨ ਤੇਂਦੁਲਕਰ ਨੇ ਮਨੋਜ ਪ੍ਰਭਾਕਰ ਦੇ ਨਾਲ ਪਾਰੀ ਦੀ ਸ਼ੁਰੂਆਤ ਕੀਤੀ ਸੀ। ਇਸ ਤੋਂ ਬਾਅਦ ਉਨ੍ਹਾਂ ਨੇ ਨਵਜੋਤ ਸਿੰਘ ਸਿੱਧੂ ਅਤੇ ਕਪਤਾਨ ਮੁਹੰਮਦ ਅਜ਼ਹਰੁੱਦੀਨ ਦੇ ਨਾਲ ਅਹਿਮ ਸਾਂਝੇਦਾਰੀਆਂ ਕੀਤੀਆਂ। ਸਚਿਨ ਦੀ ਇਸ ਸੈਂਕੜੇ ਵਾਲੀ ਪਾਰੀ ਦੀ ਬਦੌਲਤ ਟੀਮ ਇੰਡੀਆ ਨੇ 8 ਵਿਕਟਾਂ ਦੇ ਨੁਕਸਾਨ 'ਤੇ 246 ਦੌੜਾਂ ਦਾ ਸਕੋਰ ਖੜ੍ਹਾ ਕੀਤਾ।
ਟੀਚੇ ਦਾ ਪਿੱਛਾ ਕਰਨ ਉਤਰੀ ਆਸਟ੍ਰੇਲੀਆਈ ਟੀਮ 215 ਦੌੜਾਂ 'ਤੇ ਸਿਮਟ ਗਈ ਅਤੇ 31 ਦੌੜਾਂ ਨਾਲ ਇਹ ਮੁਕਾਬਲਾ ਹਾਰ ਗਈ। ਕੰਗਾਰੂ ਟੀਮ ਵੱਲੋਂ ਮਾਰਕ ਵਾਅ ਨੇ 61 ਦੌੜਾਂ ਦੀ ਜੂਝਾਰੂ ਪਾਰੀ ਖੇਡੀ। ਉੱਥੇ ਹੀ ਡੇਵਿਡ ਬੂਨ ਨੇ 40 ਦੌੜਾਂ ਬਣਾਈਆਂ, ਪਰ ਉਹ ਆਪਣੀ ਟੀਮ ਨੂੰ ਜਿੱਤ ਦੀ ਦਹਿਲੀਜ਼ ਤੱਕ ਨਹੀਂ ਪਹੁੰਚਾ ਸਕੇ।
ਕੋਲੰਬੋ 'ਚ ਬਣਾਈਆਂ 110 ਦੌੜਾਂ
ਕੋਲੰਬੋ 'ਚ ਖੇਡੀ ਗਈ 110 ਦੌੜਾਂ ਦੀ ਇਹ ਪਾਰੀ ਸਚਿਨ ਦੇ ਕਰੀਅਰ ਦਾ ਸਭ ਤੋਂ ਵੱਡਾ ਟਰਨਿੰਗ ਪੁਆਇੰਟ ਸਾਬਤ ਹੋਈ। ਇਸ ਪਹਿਲੇ ਸੈਂਕੜੇ ਤੋਂ ਪਹਿਲਾਂ ਖੇਡੇ ਗਏ 78 ਵਨਡੇ ਮੈਚਾਂ 'ਚ ਸਚਿਨ ਦੇ ਨਾਮ 32.70 ਦੀ ਔਸਤ ਨਾਲ 2,126 ਦੌੜਾਂ ਸਨ, ਜਿਨ੍ਹਾਂ 'ਚ 17 ਅਰਧ ਸੈਂਕੜੇ ਸ਼ਾਮਲ ਸਨ ਪਰ ਇਸ ਸੈਂਕੜੇ ਤੋਂ ਬਾਅਦ ਜਿਵੇਂ ਸਚਿਨ ਨੇ ਪਿੱਛੇ ਮੁੜ ਕੇ ਨਹੀਂ ਦੇਖਿਆ। ਉਨ੍ਹਾਂ ਨੇ ਇਸ ਤੋਂ ਬਾਅਦ ਵਨਡੇ ਕ੍ਰਿਕਟ 'ਚ 48 ਹੋਰ ਸੈਂਕੜੇ ਲਗਾਏ ਅਤੇ 16,300 ਦੌੜਾਂ ਬਣਾਈਆਂ। ਇਸ ਦੌਰਾਨ ਉਨ੍ਹਾਂ ਦੀ ਬੱਲੇਬਾਜ਼ੀ ਔਸਤ ਵੀ ਵਧ ਕੇ 47.10 ਤੱਕ ਪਹੁੰਚ ਗਈ।
ਪਹਿਲਾ ਟੈਸਟ ਸੈਂਕੜਾ
ਸਚਿਨ ਤੇਂਦੁਲਕਰ ਦੇ ਅੰਤਰਰਾਸ਼ਟਰੀ ਸਫ਼ਰ ਦੀ ਸ਼ੁਰੂਆਤ 15 ਨਵੰਬਰ 1989 ਨੂੰ ਕਰਾਚੀ 'ਚ ਪਾਕਿਸਤਾਨ ਦੇ ਖ਼ਿਲਾਫ਼ ਹੋਈ ਸੀ। ਉਸ ਸਮੇਂ ਉਨ੍ਹਾਂ ਦੀ ਉਮਰ ਮਹਿਜ਼ 16 ਸਾਲ 205 ਦਿਨ ਸੀ। ਤਦ ਉਹ ਅੰਤਰਰਾਸ਼ਟਰੀ ਡੈਬਿਊ ਕਰਨ ਵਾਲੇ ਸਭ ਤੋਂ ਘੱਟ ਉਮਰ ਦੇ ਭਾਰਤੀ ਸਨ। ਹਾਲਾਂਕਿ, ਇਸੇ ਸਾਲ 4 ਜੁਲਾਈ ਨੂੰ ਵੈਭਵ ਸੂਰਯਵੰਸ਼ੀ ਨੇ ਉਨ੍ਹਾਂ ਦਾ ਇਹ ਰਿਕਾਰਡ ਤੋੜ ਦਿੱਤਾ।
ਸਚਿਨ ਦਾ ਟੈਸਟ ਡੈਬਿਊ
ਆਪਣੇ ਡੈਬਿਊ ਟੈਸਟ ਮੈਚ 'ਚ ਸਚਿਨ ਨੇ 24 ਗੇਂਦਾਂ 'ਤੇ 15 ਦੌੜਾਂ ਬਣਾਈਆਂ ਸਨ। ਹਾਲਾਂਕਿ, ਇਸ ਦੌਰੇ 'ਤੇ ਉਨ੍ਹਾਂ ਨੇ ਦੋ ਸ਼ਾਨਦਾਰ ਅਰਧ ਸੈਂਕੜੇ ਵੀ ਲਗਾਏ ਸਨ। ਉੱਥੇ ਹੀ ਸਚਿਨ ਦੇ ਬੱਲੇ ਤੋਂ ਪਹਿਲਾ ਟੈਸਟ ਸੈਂਕੜਾ 1990 'ਚ ਇੰਗਲੈਂਡ ਦੇ ਖ਼ਿਲਾਫ਼ ਮੈਨਚੈਸਟਰ (ਓਲਡ ਟ੍ਰੈਫਰਡ) 'ਚ ਉਨ੍ਹਾਂ ਦੇ 9ਵੇਂ ਟੈਸਟ ਮੈਚ ਦੌਰਾਨ ਆਇਆ ਸੀ। ਇਸ ਪਾਰੀ 'ਚ ਉਨ੍ਹਾਂ ਨੇ 189 ਗੇਂਦਾਂ 'ਤੇ ਨਾਬਾਦ 119 ਦੌੜਾਂ ਬਣਾਈਆਂ ਸਨ।
ਆਪਣੇ 24 ਸਾਲ ਦੇ ਬੇਮਿਸਾਲ ਅਤੇ ਇਤਿਹਾਸਕ ਕ੍ਰਿਕਟ ਕਰੀਅਰ 'ਚ ਮਾਸਟਰ ਬਲਾਸਟਰ ਨੇ ਕੁੱਲ 664 ਅੰਤਰਰਾਸ਼ਟਰੀ ਮੈਚ ਖੇਡੇ, ਜਿਨ੍ਹਾਂ 'ਚ ਉਨ੍ਹਾਂ ਦੇ ਬੱਲੇ ਤੋਂ 34,357 ਦੌੜਾਂ ਨਿਕਲੀਆਂ। ਉਨ੍ਹਾਂ ਨੇ 200 ਟੈਸਟ ਮੈਚਾਂ 'ਚ 15,921 ਦੌੜਾਂ, 463 ਵਨਡੇ ਮੈਚਾਂ 'ਚ 18,426 ਦੌੜਾਂ ਅਤੇ ਇਕਲੌਤੇ ਟੀ-20 ਅੰਤਰਰਾਸ਼ਟਰੀ ਮੈਚ 'ਚ 10 ਦੌੜਾਂ ਬਣਾਈਆਂ। ਇੰਨਾ ਹੀ ਨਹੀਂ, ਅੰਤਰਰਾਸ਼ਟਰੀ ਕ੍ਰਿਕਟ 'ਚ ਸਚਿਨ ਦੇ ਨਾਮ 201 ਵਿਕਟਾਂ ਵੀ ਦਰਜ ਹਨ।