ਮੌਜੂਦਾ ਹਾਲਾਤ 'ਚ ਬੀਸੀਸੀਆਈ 'ਤੇ ਲਾਗੂ ਨਹੀਂ ਹੁੰਦਾ ਰਾਸ਼ਟਰੀ ਖੇਡ ਪ੍ਰਸ਼ਾਸਨ ਐਕਟ, ਓਡੀਸ਼ਾ ਹਾਈ ਕੋਰਟ 'ਚ ਬੋਰਡ ਦਾ ਜਵਾਬ

ਬੀਸੀਸੀਆਈ ਨੇ ਓਡੀਸ਼ਾ ਹਾਈ ਕੋਰਟ ’ਚ 19 ਅਗਸਤ ਨੂੰ ਹਲਫਨਾਮਾ ਦਾਖਲ ਕਰਦੇ ਹੋਏ ਕਿਹਾ ਸੀ ਕਿ ਓਸੀਏ ਨੂੰ ਤੁਰੰਤ ਆਪਣੇ ਚੋਣ ਕਰਵਾਉਣੀ ਚਾਹੀਦੀ ਹੈ ਤੇ ਅਹੁਦੇਦਾਰਾਂ ਦਾ ਲੰਬੇ ਸਮੇਂ ਤੱਕ ਬਣੇ ਰਹਿਣਾ ਸੁਪਰੀਮ ਕੋਰਟ ਦੇ ਨਿਰਦੇਸ਼ਾਂ ਤੇ ਅਸੋਸੀਏਸ਼ਨ ਦੇ ਆਪਣੇ ਨਿਯਮਾਂ ਦੇ ਖ਼ਿਲਾਫ਼ ਹੋਵੇਗਾ। ਬੀਸੀਸੀਆਈ ਦੀ ਵੱਲੋਂ ਸੀਨੀਅਰ ਮੈਨੇਜਰ (ਲੀਗਲ) ਮੇਲਿੰਡਾ ਕੋਲਾਕੋ ਨੇ ਜਸਟਿਸ ਸਾਵਿਤਰੀ ਰਾਠੋ ਦੀ ਅਦਾਲਤ ’ਚ ਜੋ ਹਲਫਨਾਮਾ ਦਿੱਤਾ, ਉਸ ’ਚ ਨੌਂ ਨੰਬਰ 'ਤੇ ਮਹੱਤਵਪੂਰਨ ਪੁਆਇੰਟ ਹੈ। ਇਸ ’ਚ ਲਿਖਿਆ ਹੈ ਕਿ ਖੇਡ ਪ੍ਰਸ਼ਾਸਨ ਐਕਟ ਦੇ ਸੰਸਦ ਤੋਂ ਪਾਸ ਤੇ ਲਾਗੂ ਹੋ ਜਾਣ ਨਾਲ ਹੀ ਉਸ ਦੇ ਪ੍ਰਬੰਧ ਆਪਣੇ ਆਪ ਕ੍ਰਿਕਟ ਜਾਂ ਬੀਸੀਸੀਆਈ 'ਤੇ ਲਾਗੂ ਨਹੀਂ ਹੁੰਦੇ। ਇਸ ਲਈ ਕ੍ਰਿਕਟ ਨੂੰ ਕਾਨੂੰਨ ਦੇ ਅਧੀਨ 'ਨਿਰਧਾਰਿਤ ਖੇਡ' ਦੇ ਤੌਰ 'ਤੇ ਅਧਿਸੂਚਿਤ ਕੀਤਾ ਜਾਣਾ ਜ਼ਰੂਰੀ ਹੈ। ਜਦੋਂ ਇਸ ਮਾਮਲੇ ’ਚ ਬੀਸੀਸੀਆਈ ਦੇ ਇਕ ਸੂਤਰ ਨਾਲ ਗੱਲ ਕੀਤੀ ਗਈ ਤਾਂ ਉਨ੍ਹਾਂ ਨੇ ਕਿਹਾ ਕਿ ਇਸ ਸਮੇਂ ਬੀਸੀਸੀਆਈ ਤੇ ਉਸ ਦੀਆਂ ਸੂਬਾਈ ਐਸੋਸੀਏਸ਼ਨਾਂ ਲੋਢਾ ਕਮੇਟੀ ਦੀਆਂ ਸਿਫਾਰਸ਼ਾਂ 'ਤੇ ਸੁਪਰੀਮ ਕੋਰਟ ਦੇ ਫੈਸਲੇ 'ਤੇ ਬਣੇ ਸੰਵਿਧਾਨ ਦੇ ਆਧਾਰ 'ਤੇ ਕੰਮ ਕਰ ਰਹੀਆਂ ਹਨ।