ਟੀਮ ਇੰਡੀਆ ਨੂੰ ਮਿਲਣ ਵਾਲਾ ਹੈ ਨਵਾਂ ਚੋਣਕਾਰ? ਸਾਬਕਾ ਦਿੱਗਜ ਵਸੀਮ ਜਾਫਰ ਨੇ ਮੁੱਖ ਅਹੁਦੇ ਲਈ ਠੋਕਿਆ ਦਾਅਵਾ

ਜਾਫਰ ਨੇ ਇਸ ਦੀ ਪੁਸ਼ਟੀ ਕਰਦਿਆਂ ਕਿਹਾ ਕਿ ਹਾਂ, ਮੈਂ ਇਸ ਅਹੁਦੇ ਲਈ ਅਪਲਾਈ ਕੀਤਾ ਹੈ। ਜਾਫਰ (48) ਨੇ ਭਾਰਤ ਲਈ 31 ਟੈਸਟ ਮੈਚ ਖੇਡੇ ਤੇ ਲਗਭਗ 2,000 ਦੌੜਾਂ ਬਣਾਈਆਂ, ਜਿਸ ’ਚ ਪੰਜ ਸੈਂਕੜੇ ਸ਼ਾਮਲ ਹਨ। ਉਸ ਦੇ ਟੈਸਟ ਸੈਂਕੜਿਆਂ ’ਚ ਵੈਸਟਇੰਡੀਜ਼ ਖਿਲਾਫ ਦੋਹਰਾ ਸੈਂਕੜਾ ਤੇ ਦੱਖਣੀ ਅਫਰੀਕਾ ’ਚ ਇੱਕ ਸੈਂਕੜਾ ਸ਼ਾਮਲ ਹੈ। ਉਸ ਨੇ ਕੋਲਕਾਤਾ ’ਚ ਪਾਕਿਸਤਾਨ ਖ਼ਿਲਾਫ਼ ਦੋਹਰਾ ਸੈਂਕੜਾ ਵੀ ਲਾਇਆ ਸੀ। ਅਸ਼ੋਕ ਮਲਹੋਤਰਾ ਤੇ ਜਤਿਨ ਪਰਾਂਜਪੇ ਵਾਲੀ ਕ੍ਰਿਕਟ ਸਲਾਹਕਾਰ ਕਮੇਟੀ (ਸੀਏਸੀ) ਜੇਕਰ ਜਾਫਰ ਨੂੰ ਚੁਣਦੀ ਹੈ ਤਾਂ ਪ੍ਰਧਾਨ ਦੇ ਅਹੁਦੇ ਲਈ ਵਿਚਾਰੇ ਜਾ ਰਹੇ ਉਮੀਦਵਾਰਾਂ ’ਚੋਂ ਸਭ ਤੋਂ ਵੱਧ ਟੈਸਟ ਮੈਚ ਖੇਡਣ ਦਾ ਰਿਕਾਰਡ ਉਨ੍ਹਾਂ ਕੋਲ ਹੋਵੇਗਾ। ਜਾਫਰ ਨੇ 31 ਟੈਸਟ ਖੇਡੇ ਹਨ, ਜੋ ਭਾਰਤ ਲਈ 24 ਟੈਸਟ ਖੇਡਣ ਵਾਲੇ ਪ੍ਰਗਿਆਨ ਓਝਾ ਤੋਂ ਵੱਧ ਹਨ। ਮੌਜੂਦਾ ਚੋਣ ਪ੍ਰਕਿਰਿਆ ਤਹਿਤ ਸਭ ਤੋਂ ਵੱਧ ਟੈਸਟ ਮੈਚ ਖੇਡਣ ਵਾਲੇ ਖੇਤਰ ਦੇ ਪ੍ਰਤੀਨਿਧੀ ਨੂੰ ਚੋਣ ਕਮੇਟੀ ਦਾ ਚੇਅਰਮੈਨ ਬਣਨ ਦਾ ਯੋਗ ਮੰਨਿਆ ਜਾਂਦਾ ਹੈ। ਹਾਲਾਂਕਿ, ਮੰਨਿਆ ਜਾ ਰਿਹਾ ਹੈ ਕਿ ਪ੍ਰਗਿਆਨ ਓਝਾ ਨੂੰ ਪ੍ਰਧਾਨ ਬਣਾਏ ਰੱਖਣ ਲਈ ਬੀਸੀਸੀਆਈ ਦੇ ਅੰਦਰ ਮਜ਼ਬੂਤ ਸਮਰਥਨ ਹੈ।