ਸ਼੍ਰੀਲੰਕਾ ਦੌਰੇ ਤੋਂ 48 ਘੰਟਿਆਂ ਬਾਅਦ ਹੀ ਮੈਦਾਨ 'ਚ ਉੱਤਰੇ ਭਾਰਤੀ ਖਿਡਾਰੀ, ਫਿਟਨੈੱਸ ਪਰਖਣ ਲਈ ਲਾਜ਼ਮੀ ਟੈਸਟਾਂ 'ਚ ਹਿੱਸਾ

ਨਵੀਂ ਦਿੱਲੀ, ਪੀਟੀਆਈ : ਸ੍ਰੀਲੰਕਾ ਖਿਲਾਫ 2 ਟੈਸਟ ਮੈਚਾਂ ਦੀ ਸੀਰੀਜ਼ ਖਤਮ ਹੋਣ ਦੇ 48 ਘੰਟਿਆਂ ਦੇ ਅੰਦਰ ਭਾਰਤੀ ਟੀਮ ਦੇ ਚੋਟੀ ਦੇ ਕੇਂਦਰੀ ਕਰਾਰ ਵਾਲੇ ਖਿਡਾਰੀ ਸ਼ਨੀਵਾਰ ਨੂੰ ਨਵੇਂ ਘਰੇਲੂ ਸੈਸ਼ਨ ਤੋਂ ਪਹਿਲਾਂ ਫਿਟਨੈੱਸ ਟੈਸਟ ਲਈ ਬੈਂਗਲੁਰੂ ਦੇ ਸੈਂਟਰ ਆਫ ਐਕਸੀਲੈਂਸ ਪਹੁੰਚੇ। ਲਗਾਤਾਰ 3 ਦਿਨ ਮੈਦਾਨ ’ਤੇ ਸਖ਼ਤ ਮਿਹਨਤ ਕਰਨ ਤੋਂ ਬਾਅਦ ਵੀ ਟੈਸਟ ਟੀਮ ਦੇ ਕਈ ਨਿਯਮਤ ਖਿਡਾਰੀਆਂ ਨੇ ਆਉਣ ਵਾਲੇ 8 ਮਹੀਨਿਆਂ ਦੇ ਰੁਝੇਵੇਂ ਵਾਲੇ ਸੀਜ਼ਨ ਨੂੰ ਧਿਆਨ ’ਚ ਰੱਖਦੇ ਹੋਏ ਫਿਟਨੈੱਸ ਦੇ ਮਾਪਦੰਡਾਂ ਦੀ ਜਾਂਚ 'ਚ ਹਿੱਸਾ ਲਿਆ। ਇਹ ਸੀਜ਼ਨ 2027 ਇੰਡੀਅਨ ਪ੍ਰੀਮੀਅਰ ਲੀਗ ਤੱਕ ਚੱਲੇਗਾ। ਤਜਰਬੇਕਾਰ ਆਲਰਾਊਂਡਰ ਰਵਿੰਦਰ ਜਡੇਜਾ, ਵਿਕਟਕੀਪਰ ਬੱਲੇਬਾਜ਼ ਰਿਸ਼ਭ ਪੰਤ, ਬੱਲੇਬਾਜ਼ ਯਸ਼ਸਵੀ ਜੈਸਵਾਲ ਤੋਂ ਇਲਾਵਾ ਟੀ-20 ਕਪਤਾਨ ਸ਼੍ਰੇਅਸ ਅਈਅਰ, ਰਿੰਕੂ ਸਿੰਘ, ਸੰਜੂ ਸੈਮਸਨ ਤੇ ਚੇਨਈ ਸੁਪਰ ਕਿੰਗਜ਼ ਦੇ ਕਪਤਾਨ ਰੁਤੁਰਾਜ ਗਾਇਕਵਾੜ ਸਮੇਤ ਕਈ ਖਿਡਾਰੀ ਫਿਟਨੈੱਸ ਟੈਸਟ 'ਚ ਪਸੀਨਾ ਵਹਾਉਂਦੇ ਨਜ਼ਰ ਆਏ। ਲਾਜ਼ਮੀ ਫਿਟਨੈੱਸ ਟੈਸਟ ’ਚ ਬ੍ਰੋਂਕੋ ਟੈਸਟ, ਦੋ ਕਿਲੋਮੀਟਰ ਦੌੜ, ਯੋ-ਯੋ ਟੈਸਟ ਤੇ ਵਿਕਟਾਂ ਦੇ ਵਿਚਕਾਰ ਦੌੜਨ ਵਰਗੇ ਕ੍ਰਿਕਟ ਨਾਲ ਸਬੰਧਤ ਅਭਿਆਸ ਸ਼ਾਮਲ ਹਨ।