ਭਾਰਤ-ਵੈਸਟਇੰਡੀਜ਼ ਤੀਜਾ ਟੀ-20 : ਇੰਦੌਰ ਦੀ ਸਪਾਟ ਪਿੱਚ ’ਤੇ ਹੋਵੇਗਾ ਚੌਕਿਆਂ-ਛੱਕਿਆਂ ਦਾ ਮੀਂਹ, ਛੋਟੀਆਂ ਬਾਊਂਡਰੀਆਂ ਕਾਰਨ ਬਣੇਗਾ ਵੱਡਾ ਸਕੋਰ

ਕਪੀਸ਼ ਦੁਬੇ, ਨਈਦੁਨੀਆ,ਇੰਦੌਰ : ਭਾਰਤ ਤੇ ਵੈਸਟਇੰਡੀਜ਼ ਦੇ ਵਿਚਾਲੇ ਟੀ-20 ਲੜੀ ’ਚ ਕ੍ਰਿਕਟ ਦਾ ਆਨੰਦ ਲੈਣ ਦੀ ਆਸ ਰੱਖਣ ਵਾਲੇ ਪ੍ਰਸੰਸਕਾ ਨੂੰ ਸਿਰਫ਼ ਬੱਲੇਬਾਜ਼ੀ ਦੇਖਣ ਤੱਕ ਸੀਮਤ ਕਰ ਦਿੱਤਾ ਗਿਆ ਹੈ। ਲੜੀ ਦਾ ਸਫ਼ਰ ਤੀਜੇ ਮੁਕਾਬਲੇ ਤੱਕ ਪਹੁੰਚ ਚੁੱਕਿਆ ਹੈ, ਪ੍ਰੰਤੂ ਕਹਾਣੀ ਇੱਥੇ ਵੀ ਉਹ ਹੀ ਹੋਣ ਵਾਲੀ ਹੈ ਜੋ ਪਹਿਲੇ ਦੋ ਮੈਚਾਂ ’ਚ ਦਿਖੀ। ਇੰਦੌਰ ਦੇ ਹੋਲਕਰ ਸਟੇਡੀਅਮ ’ਚ ਬੱਲੇਬਾਜ਼ਾਂ ਦੇ ਅਨੁਕੂਲ ਸਪਾਟ ਪਿੱਚ ਟੀਮਾਂ ਨੂੰ ਮਿਲੇਗੀ। ਬੱਲੇਬਾਜ਼ਾਂ ਲਈ ਇਹ ਜਾਣਨਾ ਵੀ ਖੁਸ਼ੀ ਦੀ ਗੱਲ ਹੋਵੇਗੀ ਕਿ ਪਿਛਲੇ ਦੋ ਮੈਦਾਨਾਂ ਦੇ ਮੁਕਾਬਲੇ ਇੱਥੇ ਬਾਊਂਡਰੀਆਂ ਥੋੜ੍ਹੀਆਂ ਛੋਟੀਆਂ ਹਨ, ਜਿਸ ਨਾਲ ਵੱਡੀ ਗਿਣਤੀ ਵਿੱਚ ਦੌੜਾਂ ਬਣਨ ਦੀ ਪੂਰੀ ਸੰਭਾਵਨਾ ਹੈ। ਲੜੀ ਦੇ ਪਹਿਲੇ ਮੈਚ ’ਚ ਕੁੱਲ 343 ਦੌੜਾਂ ਬਣੀਆਂ ਸਨ, ਜਿਸ ਨੂੰ ਭਾਰਤ ਨੇ 32 ਗੇਂਦਾਂ ਬਾਕੀ ਰਹਿੰਦਿਆਂ ਜਿੱਤ ਲਿਆ ਸੀ, ਜੇਕਰ ਉਨ੍ਹਾਂ ਨੇ ਪੂਰੇ 20 ਓਵਰ ਬੱਲੇਬਾਜ਼ੀ ਕੀਤੀ ਹੁੰਦੀ ਤਾਂ ਇਹ ਅੰਕੜਾ ਹੋਰ ਵੀ ਵੱਧ ਹੋਣਾ ਸੀ। ਦੂਜੇ ਮੈਚ ’ਚ ਕੁੱਲ 501 ਦੌੜਾਂ ਬਣੀਆਂ, ਜਿੱਥੇ ਕੈਰੇਬੀਅਨ ਟੀਮ ਲਈ 249 ਦੌੜਾਂ ਦਾ ਟੀਚਾ ਵੀ ਨਾਕਾਫ਼ੀ ਸਾਬਤ ਹੋਇਆ। ਦੋਵਾਂ ਮੈਚਾਂ ਨੇ ਦੋਵਾਂ ਟੀਮਾਂ ਦਾ ਆਤਮ-ਵਿਸ਼ਵਾਸ ਵਧਾਇਆ ਹੈ। ਪ੍ਰਸੰਸਕਾਂ ਲਈ ਚੰਗੀ ਗੱਲ ਇਹ ਹੈ ਕਿ ਦੋਵੇਂ ਟੀਮਾਂ ਸ਼ਾਨਦਾਰ ਫਾਰਮ ’ਚ ਹਨ। ਮੁਕਾਬਲਾ ਮੁੱਖ ਤੌਰ ’ਤੇ ਬੱਲੇਬਾਜ਼ਾਂ ਵਿਚਕਾਰ ਹੋਵੇਗਾ ਕਿਉਂਕਿ ਗੇਂਦਬਾਜ਼ਾਂ ਕੋਲ ਬਹੁਤ ਘੱਟ ਵਿਕਲਪ ਮੌਜੂਦ ਹਨ। ਬੱਲੇਬਾਜ਼ਾਂ ਦੇ ਅਨੁਕੂਲ ਪਿੱਚ ਦੇ ਨਾਲ-ਨਾਲ, ਆਊਟਫੀਲਡ ਵੀ ਬਹੁਤ ਤੇਜ਼ ਨਜ਼ਰ ਆ ਰਹੀ ਹੈ। ਮੌਸਮ ਵਿਭਾਗ ਅਨੁਸਾਰ, ਐਤਵਾਰ ਨੂੰ ਇੰਦੌਰ ’ਚ ਹਲਕੀ ਗਰਮੀ ਤੇ ਸਾਫ਼ ਅਸਮਾਨ ਰਹੇਗਾ ਤੇ ਸ਼ਾਮ ਨੂੰ ਤ੍ਰੇਲ ਪੈਣ ਦੀ ਕੋਈ ਖਾਸ ਸੰਭਾਵਨਾ ਨਹੀਂ ਹੈ। ਨਤੀਜੇ ਵਜੋਂ, ਇਹ ਅੰਦਾਜ਼ਾ ਲਗਾਉਣਾ ਅਸੰਭਵ ਹੈ ਕਿ ਕਿਹੜਾ ਸਕੋਰ ‘ਸੁਰੱਖਿਅਤ’ ਹੋਵੇਗਾ। ਦੋਵੇਂ ਟੀਮਾਂ ਸ਼ਨੀਵਾਰ ਦੁਪਹਿਰ ਨੂੰ ਇੰਦੌਰ ਪਹੁੰਚੀਆਂ, ਉਨ੍ਹਾਂ ਨੇ ਅਭਿਆਸ ਸੈਸ਼ਨ ਕਰਨ ਦੀ ਬਜਾਏ ਆਪਣੇ ਹੋਟਲ ਵਿੱਚ ਆਰਾਮ ਕਰਨ ਨੂੰ ਤਰਜੀਹ ਦਿੱਤੀ।