ਵਰਲਡ ਕੱਪ 2027 'ਚ ਭਾਰਤ-ਪਾਕਿਸਤਾਨ ਦੀ 3 ਵਾਰ ਹੋ ਸਕਦੀ ਹੈ ਟੱਕਰ? ICC ਦੇ ਨਵੇਂ 'ਪੇਚੀਦਾ' ਫਾਰਮੈਟ ਪਿੱਛੇ ਦੀ ਚਰਚਾ ਤੇਜ਼

ਸਪੋਰਟਸ ਡੈਸਕ, ਨਵੀਂ ਦਿੱਲੀ : ICC ਨੇ ਵਨਡੇ ਵਰਲਡ ਕੱਪ 2027 ਲਈ ਨਵੇਂ ਫਾਰਮੈਟ ਦਾ ਐਲਾਨ ਕਰ ਦਿੱਤਾ ਹੈ। ਦੱਖਣੀ ਅਫ਼ਰੀਕਾ, ਨਾਮੀਬੀਆ ਅਤੇ ਜ਼ਿੰਬਾਬਵੇ ਦੀ ਸਾਂਝੀ ਮੇਜ਼ਬਾਨੀ ਹੇਠ ਖੇਡੇ ਜਾਣ ਵਾਲੇ ਇਸ ਟੂਰਨਾਮੈਂਟ ਵਿੱਚ 14 ਟੀਮਾਂ ਹਿੱਸਾ ਲੈਣਗੀਆਂ। ICC ਦਾ ਕਹਿਣਾ ਹੈ ਕਿ ਟੀਮਾਂ ਦੀ ਗਿਣਤੀ ਵਧਾਉਣ ਨਾਲ ਕ੍ਰਿਕਟ ਦਾ ਦਾਇਰਾ ਹੋਰ ਫੈਲੇਗਾ। ਹਾਲਾਂਕਿ, ਨਵੇਂ ਫਾਰਮੈਟ ਨੂੰ ਲੈ ਕੇ ਕਈ ਸਵਾਲ ਵੀ ਉੱਠ ਰਹੇ ਹਨ।

ICC ਦਾ ਨਵਾਂ ਫਾਰਮੈਟ

ਨਵੇਂ ਫਾਰਮੈਟ ਅਨੁਸਾਰ ਵਰਲਡ ਕੱਪ ਤਿੰਨ ਪੜਾਵਾਂ ਵਿੱਚ ਖੇਡਿਆ ਜਾਵੇਗਾ।ਪਹਿਲੇ ਰਾਊਂਡ ਵਿੱਚ 12ਵੇਂ, 13ਵੇਂ ਅਤੇ 14ਵੇਂ ਸਥਾਨ ਵਾਲੀਆਂ ਟੀਮਾਂ ਆਪਸ ਵਿੱਚ ਸੁਪਰ ਸੀਰੀਜ਼ ਖੇਡਣਗੀਆਂ। ਇਸ ਵਿੱਚ ਸਿਖਰ 'ਤੇ ਰਹਿਣ ਵਾਲੀ ਟੀਮ ਹੀ ਅਗਲੇ ਰਾਊਂਡ ਵਿੱਚ ਜਾਵੇਗੀ, ਜਦਕਿ ਬਾਕੀ ਦੋ ਟੀਮਾਂ ਸਿਰਫ਼ ਦੋ-ਦੋ ਮੈਚ ਖੇਡ ਕੇ ਟੂਰਨਾਮੈਂਟ ਤੋਂ ਬਾਹਰ ਹੋ ਜਾਣਗੀਆਂ।ਇਸ ਤੋਂ ਬਾਅਦ ਸੁਪਰ-12 ਰਾਊਂਡ ਹੋਵੇਗਾ, ਜਿਸ ਵਿੱਚ 12 ਟੀਮਾਂ ਨੂੰ ਦੋ ਗਰੁੱਪਾਂ ਵਿੱਚ ਵੰਡਿਆ ਜਾਵੇਗਾ। ਹਰ ਟੀਮ 5-5 ਮੈਚ ਖੇਡੇਗੀ।ਫਿਰ ਸੁਪਰ-7 ਰਾਊਂਡ ਹੋਵੇਗਾ, ਜਿਸ ਵਿੱਚ ਦੋਵੇਂ ਗਰੁੱਪਾਂ ਦੀਆਂ ਟੌਪ-3 ਟੀਮਾਂ ਅਤੇ ਚੌਥੇ ਸਥਾਨ 'ਤੇ ਰਹੀਆਂ ਟੀਮਾਂ ਵਿੱਚੋਂ ਬਿਹਤਰ ਪ੍ਰਦਰਸ਼ਨ ਕਰਨ ਵਾਲੀ ਇੱਕ ਟੀਮ ਕੁਆਲੀਫਾਈ ਕਰੇਗੀ। ਇਸ ਪੜਾਅ ਵਿੱਚ ਸੱਤ ਟੀਮਾਂ ਰਾਊਂਡ-ਰਾਬਿਨ ਫਾਰਮੈਟ ਅਧੀਨ ਇੱਕ-ਦੂਜੇ ਨਾਲ ਮੁਕਾਬਲਾ ਕਰਨਗੀਆਂ।

ਭਾਰਤ-ਪਾਕਿਸਤਾਨ ਵਿਚਾਲੇ ਹੋ ਸਕਦੇ ਹਨ 3 ਮੁਕਾਬਲੇ

ਭਾਰਤ ਅਤੇ ਪਾਕਿਸਤਾਨ ਆਪਸੀ ਦੋ-ਪੱਖੀ ਸੀਰੀਜ਼ ਨਹੀਂ ਖੇਡਦੇ। ਦੋਵੇਂ ਟੀਮਾਂ ਸਿਰਫ਼ ICC ਅਤੇ ACC ਦੇ ਟੂਰਨਾਮੈਂਟਾਂ ਵਿੱਚ ਹੀ ਆਹਮੋ-ਸਾਹਮਣੇ ਹੁੰਦੀਆਂ ਹਨ।ਅਜਿਹੇ ਵਿੱਚ ਆਮ ਤੌਰ 'ਤੇ ਦੋਵੇਂ ਟੀਮਾਂ ਨੂੰ ਇੱਕੋ ਗਰੁੱਪ ਵਿੱਚ ਰੱਖਿਆ ਜਾਂਦਾ ਹੈ, ਜਿਸ ਕਾਰਨ ਗਰੁੱਪ ਪੜਾਅ ਵਿੱਚ ਇੱਕ ਮੁਕਾਬਲਾ ਹੋ ਸਕਦਾ ਹੈ।ਜੇਕਰ ਦੋਵੇਂ ਟੀਮਾਂ ਸੁਪਰ-7 ਲਈ ਕੁਆਲੀਫਾਈ ਕਰਦੀਆਂ ਹਨ ਤਾਂ ਉੱਥੇ ਵੀ ਇੱਕ ਵਾਰ ਫਿਰ ਟੱਕਰ ਹੋ ਸਕਦੀ ਹੈ। ਇਸ ਤਰ੍ਹਾਂ ਦੋਵੇਂ ਟੀਮਾਂ ਵਿਚਾਲੇ ਦੋ ਮੈਚ ਹੋ ਸਕਦੇ ਹਨ।

ਸੈਮੀਫਾਈਨਲ ਜਾਂ ਫਾਈਨਲ ਵਿੱਚ ਵੀ ਹੋ ਸਕਦੀ ਹੈ ਭੇੜ

ਜੇਕਰ ਭਾਰਤ ਅਤੇ ਪਾਕਿਸਤਾਨ ਦੋਵੇਂ ਸੈਮੀਫਾਈਨਲ ਲਈ ਕੁਆਲੀਫਾਈ ਕਰਦੇ ਹਨ ਤਾਂ ਉਨ੍ਹਾਂ ਦਾ ਸਾਹਮਣਾ ਸੈਮੀਫਾਈਨਲ ਵਿੱਚ ਵੀ ਹੋ ਸਕਦਾ ਹੈ।ਜੇ ਸੈਮੀਫਾਈਨਲ ਵਿੱਚ ਮੁਕਾਬਲਾ ਨਹੀਂ ਹੁੰਦਾ, ਤਾਂ ਦੋਵੇਂ ਟੀਮਾਂ ਫਾਈਨਲ ਵਿੱਚ ਵੀ ਆਹਮੋ-ਸਾਹਮਣੇ ਹੋ ਸਕਦੀਆਂ ਹਨ।ਇਸ ਤਰ੍ਹਾਂ, ਟੂਰਨਾਮੈਂਟ ਦੀ ਸਥਿਤੀ ਦੇ ਅਨੁਸਾਰ ਭਾਰਤ ਅਤੇ ਪਾਕਿਸਤਾਨ ਵਿਚਾਲੇ ਵੱਧ ਤੋਂ ਵੱਧ ਤਿੰਨ ਮੈਚ ਹੋਣ ਦੀ ਸੰਭਾਵਨਾ ਬਣ ਸਕਦੀ ਹੈ।