ਭਾਰਤ-ਨਿਊਜ਼ੀਲੈਂਡ ਵਨਡੇ ਸੀਰੀਜ਼ ਦਾ ਆਗਾਜ਼ ਅੱਜ, ਰੋਹਿਤ-ਕੋਹਲੀ 'ਤੇ ਹੋਵੇਗੀ ਸਾਰਿਆਂ ਦੀ ਨਜ਼ਰ, ਗੇਂਦਬਾਜ਼ੀ ਬਣਿਆ ਚਿੰਤਾ ਦਾ ਵਿਸ਼ਾ

ਜਸਪ੍ਰੀਤ ਬੁਮਰਾਹ ਨੂੰ ਟੈਸਟ ਮੈਚਾਂ ਦੀ ਤਿਆਰੀ ਲਈ ਵਨਡੇ ਲੜੀ ਤੋਂ ਆਰਾਮ ਦਿੱਤਾ ਗਿਆ ਹੈ, ਜਦਕਿ ਪ੍ਰਸਿੱਧ ਕ੍ਰਿਸ਼ਨਾ ਤੇ ਹਰਸ਼ਿਤ ਰਾਣਾ ਨੂੰ ਅੰਤਰਰਾਸ਼ਟਰੀ ਕ੍ਰਿਕਟ ’ਚ ਵਾਪਸੀ ਕਰਨ ’ਚ ਅਜੇ ਕੁਝ ਹਫ਼ਤੇ ਹੋਰ ਲੱਗਣਗੇ। ਨਤੀਜੇ ਵਜੋਂ ਤਜਰਬੇਕਾਰ ਮੁਹੰਮਦ ਸਿਰਾਜ ’ਤੇ ਵਾਧੂ ਜ਼ਿੰਮੇਵਾਰੀ ਹੋਵੇਗੀ। ਹੋਰ ਤੇਜ਼ ਗੇਂਦਬਾਜ਼ੀ ਵਿਕਲਪਾਂ ’ਚ ਅਰਸ਼ਦੀਪ ਸਿੰਘ ਨੇ 18 ਵਨਡੇ, ਗੁਰਨੂਰ ਬਰਾੜ ਨੇ 9 ਵਨਡੇ ਖੇਡੇ ਹਨ ਤੇ ਅੰਸ਼ੁਲ ਕੰਬੋਜ ਤੇ ਆਕਿਬ ਨਬੀ ਨੇ ਇੱਕ-ਇੱਕ ਵਨਡੇ ਖੇਡਿਆ ਹੈ। ਯਾਨੀ ਇਨ੍ਹਾਂ ਚਾਰਾਂ ਤੇਜ਼ ਗੇਂਦਬਾਜ਼ਾਂ ਦਾ ਕੁੱਲ ਤਜਰਬਾ ਸਿਰਫ਼ 29 ਵਨਡੇ ਮੈਚਾਂ ਦਾ ਹੀ ਹੈ। ਈਡਨ ਪਾਰਕ ’ਚ ਸਿੱਧੀਆਂ ਬਾਊਂਡਰੀਆਂ ਸਿਰਫ਼ 55 ਮੀਟਰ ਲੰਬੀਆਂ ਹਨ। ਇਸ ਨੂੰ ਦੇਖਦੇ ਹੋਏ, ਭਾਰਤ ਸਿਰਾਜ, ਅਰਸ਼ਦੀਪ ਤੇ ਲੰਬੇ ਕੱਦ ਵਾਲੇ ਗੁਰਨੂਰ ਬਰਾੜ ਦੀ ਤੇਜ਼ ਗੇਂਦਬਾਜ਼ੀ ਤਿਕੜੀ ਨੂੰ ਮੈਦਾਨ ’ਚ ਉਤਾਰ ਸਕਦਾ ਹੈ। ਇਸ ਦੇ ਨਾਲ ਹੀ ਟੀਮ ’ਚ ਕੁਲਦੀਪ ਯਾਦਵ ਦੀ ਜਗ੍ਹਾ ਨੂੰ ਲੈ ਕੇ ਵੀ ਸਵਾਲ ਹਨ। ਹਾਰਦਿਕ ਪਾਂਡਿਆ ਦੀ ਗੈਰ-ਮੌਜੂਦਗੀ ’ਚ ਟੀਮ ਦੇ ਸੰਤੁਲਨ ਨੂੰ ਬਣਾਈ ਰੱਖਣਾ ਇੱਕ ਚੁਣੌਤੀ ਹੈ, ਪਰ ਕਿਉਂਕਿ 11ਵੇਂ ਤੋਂ 40ਵੇਂ ਓਵਰ ਦੇ ਵਿਚਾਲੇ 30-ਗਜ਼ ਦੇ ਘੇਰੇ ਤੋਂ ਬਾਹਰ ਸਿਰਫ਼ ਚਾਰ ਫੀਲਡਰ ਰੱਖਣ ਦੀ ਇਜਾਜ਼ਤ ਹੁੰਦੀ ਹੈ, ਇਸ ਲਈ ਮੱਧ ਓਵਰਾਂ ’ਚ ਵਿਕਟਾਂ ਲੈਣ ਵਾਲੇ ਗੇਂਦਬਾਜ਼ ਦਾ ਹੋਣਾ ਬਹੁਤ ਜ਼ਰੂਰੀ ਹੋ ਜਾਂਦਾ ਹੈ।