ਇਤਿਹਾਸਕ ਮੁਕਾਬਲੇ ਲਈ ਤਿਆਰ ਭਾਰਤ ਤੇ ਜਾਪਾਨ, ਏਸ਼ੀਆਈ ਖੇਡਾਂ 'ਚ ਵਿਸ਼ਵ ਚੈਂਪੀਅਨ ਟੀਮ ਇੰਡੀਆ ਦਾ ਸਾਹਮਣਾ ਕਰੇਗੀ ਜਾਪਾਨੀ ਟੀਮ

ਜਾਗਰਣ ਨਿਊਜ਼ ਨੈੱਟਵਰਕ, ਨਵੀਂ ਦਿੱਲੀ : 25 ਜੂਨ ਦੀ ਤਰੀਕ ਭਾਰਤੀ ਕ੍ਰਿਕਟ ’ਚ ਬਹੁਤ ਅਹਿਮ ਹੈ, ਸਾਲ 1983 ’ਚ ਇਸੇ ਦਿਨ ਅਸੀਂ ਪਹਿਲੀ ਵਾਰ ਵਿਸ਼ਵ ਕੱਪ ਜਿੱਤਿਆ ਸੀ। ਘੱਟ ਹੀ ਲੋਕ ਜਾਣਦੇ ਹਨ ਕਿ ਇਸ ਜਿੱਤ ਤੋਂ ਠੀਕ 120 ਸਾਲ ਪਹਿਲਾਂ ਜਾਪਾਨ ’ਚ ਪਹਿਲਾ ਕ੍ਰਿਕਟ ਮੈਚ ਖੇਡਿਆ ਗਿਆ ਸੀ। ਯੋਕੋਹਾਮਾ ਕੰਟਰੀ ਐਂਡ ਐਥਲੈਟਿਕ ਕਲੱਬ ਦੇ ਰਿਕਾਰਡਸ ਅਨੁਸਾਰ, ਸਥਾਨਕ ਵਪਾਰੀਆਂ ਨੇ ਸਮੁਰਾਈ ਦੇ ਹਮਲੇ ਤੋਂ ਬਚਣ ਲਈ ਕ੍ਰਿਕਟ ਮੈਚ ਦੀ ਪਨਾਹ ’ਚ ਬ੍ਰਿਟਿਸ਼ ਵਪਾਰੀਆਂ ਤੇ ਰਾਇਲ ਨੇਵੀ ਦੇ ਮਲਾਹਾਂ ਨੂੰ ਮਦਦ ਲਈ ਬੁਲਾਇਆ ਸੀ। ਹਾਲਾਂਕਿ, ਇਹ ਹਮਲਾ ਨਹੀਂ ਹੋਇਆ ਪਰ ਮੈਚ ਪੂਰਾ ਹੋ ਗਿਆ। ਮੰਗਲਵਾਰ 22 ਸਤੰਬਰ 2026 ਨੂੰ ਜਾਪਾਨ ਦੀ ਟੀਮ ਭਾਰਤੀ ਕ੍ਰਿਕਟ ਟੀਮ ਦੇ ਸਾਹਮਣੇ ਹੋਵੇਗੀ ਤੇ ਟੀਚਾ ਇਕ ਵਾਰ ਫਿਰ ਤੋਂ ਮਦਦ ਹਾਸਲ ਕਰਨਾ ਹੋਵੇਗਾ। ਜਾਪਾਨ ’ਚ ਫੁੱਟਬਾਲ ਤੇ ਬੇਸਬਾਲ ਵਰਗੀਆਂ ਖੇਡਾਂ ਦੇ ਅਣਗਿਣਤ ਪ੍ਰਸ਼ੰਸਕ ਹਨ ਤੇ ਇਨ੍ਹਾਂ ਵਿਚਾਲੇ ਕ੍ਰਿਕਟ ਹਾਲੇ ਆਪਣੀ ਜ਼ਮੀਨ ਭਾਲ ਰਿਹਾ ਹੈ, ਅਜਿਹੇ ’ਚ ਦੁਨੀਆ ਦੀਆਂ ਸਰਬੋਤਮ ਟੀਮਾਂ ’ਚੋਂ ਇਕ ਭਾਰਤੀ ਟੀਮ ਨਾਲ ਖੇਡ ਕੇ ਜਾਪਾਨ ਨਵੇਂ ਦਰਸ਼ਕਾਂ ਨੂੰ ਜੋੜਨਾ ਚਾਹੁੰਦਾ ਹੈ। ਟੋਕੀਓ ਤੋਂ ਸੌ ਕਿਲੋਮੀਟਰ ਦੂਰ ਸਾਨੋ ’ਚ ਹੋਣ ਵਾਲੇ ਇਸ ਮੈਚ ’ਚ ਉਤਰਣ ਵਾਲੀ ਜਾਪਾਨੀ ਟੀਮ ਦੇ ਜ਼ਿਆਦਾਤਰ ਖਿਡਾਰੀ ਦੂਜੀ ਪੀੜ੍ਹੀ ਦੇ ਜਾਪਾਨੀ ਨਾਗਰਿਕ ਹਨ।

ਕਪਤਾਨ ਕੇਂਡਲ ਕਾਡੋਵਾਕੀ ਫਲੈਮਿੰਗ ਤੇ ਉਸਦੇ ਭਰਾ ਐਲੇਸਟਰ ਕਾਡੋਵਾਕੀ ਫਲੈਮਿੰਗ, ਡੈਕਲਾਨ ਸੁਜ਼ੂਕੀ ਮੈਕਾਂਬ ਦੀਆਂ ਜੜ੍ਹਾਂ ਆਸਟ੍ਰੇਲੀਆ ’ਚ ਹਨ, ਜਦਕਿ ਸਪਿਨਰ ਇਬ੍ਰਾਹੀਮ ਤਾਕਾਹਾਸ਼ੀ ਦੇ ਪਿਤਾ ਇਸਲਾਮਾਬਾਦ ਦੇ ਰਹਿਣ ਵਾਲੇ ਸਨ। ਦੋਵਾਂ ਦੇਸ਼ਾਂ ਦੀ ਕ੍ਰਿਕਟ ਦਾ ਅੰਤਰ ਇਸ ਗੱਲ ਨਾਲ ਸਮਝ ਸਕਦੇ ਹਾਂ ਕਿ ਜਾਪਾਨ ਆਪਣੀ ਪੂਰੀ ਕ੍ਰਿਕਟ ’ਤੇ 20 ਲੱਖ ਅਮਰੀਕੀ ਡਾਲਰ (19 ਕਰੋੜ ਭਾਰਤੀ ਰੁਪਏ) ਖ਼ਰਚ ਕਰਦਾ ਹੈ, ਜਦਕਿ ਭਾਰਤੀ ਕਪਤਾਨ ਸ਼੍ਰੇਅਸ ਅਈਅਰ ਨੇ ਸਾਲ 2026 ’ਚ ਸਿਰਫ ਆਈਪੀਐੱਲ ਤੋਂ 31 ਲੱਖ ਅਮਰੀਕੀ ਡਾਲਰ (ਲਗਪਗ 30 ਕਰੋੜ ਭਾਰਤੀ ਰੁਪਏ) ਕਮਾਏ ਸਨ।