T20 'ਚ ਸਿਰਫ਼ ਸਲਾਮੀ ਬੱਲੇਬਾਜ਼ਾਂ ਦਾ ਸਥਾਨ ਹੁੰਦਾ ਹੈ ਪੱਕਾ, ਸ਼ਿਵਮ ਦੂਬੇ ਨੂੰ ਉੱਪਰ ਭੇਜਣ 'ਤੇ ਬੋਲੇ ਗੌਤਮ ਗੰਭੀਰ

ਉਨ੍ਹਾਂ ਕਿਹਾ ਇਹ ਅੰਤਰਰਾਸ਼ਟਰੀ ਕ੍ਰਿਕਟ ਹੈ। ਕਈ ਵਾਰ ਚੀਜ਼ਾਂ ਤੁਹਾਡੇ ਹੱਕ ’ਚ ਹੁੰਦੀਆਂ ਹਨ ਅਤੇ ਕਈ ਵਾਰ ਨਹੀਂ। ਉਸ ਨੇ ਪਹਿਲਾਂ ਵੀ ਚੌਥੇ ਨੰਬਰ ’ਤੇ ਵਧੀਆ ਬੱਲੇਬਾਜ਼ੀ ਕੀਤੀ ਹੈ। ਗੰਭੀਰ ਨੇ ਅੱਗੇ ਕਿਹਾ ਬੱਲੇਬਾਜ਼ੀ ਕ੍ਰਮ ਬਾਰੇ ਸਾਡੀ ਪਹੁੰਚ ਲਚਕਦਾਰ ਰਹੀ ਹੈ ਅਤੇ ਅਸੀਂ ਇਸ ਨੂੰ ਜਾਰੀ ਰੱਖਾਂਗੇ। ਕੋਚ ਬਣਨ ਤੋਂ ਬਾਅਦ ਮੈਂ ਹਮੇਸ਼ਾ ਇਹ ਮੰਨਿਆ ਹੈ ਕਿ ਟੀ20 ਕ੍ਰਿਕਟ ’ਚ ਸਿਰਫ਼ ਸਲਾਮੀ ਬੱਲੇਬਾਜ਼ਾਂ ਦੇ ਸਥਾਨ ਪੱਕੇ ਹੁੰਦੇ ਹਨ, ਬਾਕੀ ਬੱਲੇਬਾਜ਼ੀ ਕ੍ਰਮ ਲਚਕਦਾਰ ਰਹਿਣਾ ਚਾਹੀਦਾ ਹੈ। ਗੰਭੀਰ ਨੇ ਅੱਗੇ ਕਿਹਾ ਕਿ ਟੀਮ ਨੂੰ ਤ੍ਰੇਲ ਨਾਲ ਪ੍ਰਭਾਵਿਤ ਸਪਾਟ ਪਿੱਚਾਂ ’ਤੇ ਵੱਡੇ ਸਕੋਰ ਦਾ ਬਚਾਅ ਕਰਨ ਦੇ ਤਰੀਕੇ ਲੱਭਣ ਦੀ ਲੋੜ ਹੈ। ਭਾਰਤੀ ਕੋਚ ਨੇ ਜ਼ੋਰ ਦਿੱਤਾ ਕਿ ’ਤੁਸੀਂ ਕਿਸੇ ਵੀ ਹਾਰ ਨੂੰ ਹਲਕੇ ’ਚ ਨਹੀਂ ਲੈ ਸਕਦੇ। ਜੇਕਰ ਤੁਸੀਂ ਲਗਾਤਾਰ ਸੁਧਾਰ ਕਰਨਾ ਚਾਹੁੰਦੇ ਹੋ, ਤਾਂ ਤੁਸੀਂ ਕਿਸੇ ਵੀ ਚੀਜ਼ ਨੂੰ ਅਣਗੌਲਿਆ ਨਹੀਂ ਕਰਨਾ ਚਾਹੋਗੇ। ਅਸੀਂ ਵਿਸ਼ਵ ਚੈਂਪੀਅਨ ਹਾਂ ਤੇ ਇਸੇ ਲਈ ਅਸੀਂ ਲਗਾਤਾਰ ਸੁਧਾਰ ਕਰਨ ਦਾ ਟੀਚਾ ਰੱਖਦੇ ਹਾਂ। ਉਨ੍ਹਾਂ ਕਿਹਾ ਕਿ ਗੇਂਦਬਾਜ਼ਾਂ ਲਈ ਹਾਲਾਤ ਮੁਸ਼ਕਲ ਸਨ। ਅਸੀਂ ਜਾਣਦੇ ਹਾਂ ਕਿ ਤ੍ਰੇਲ ਨਾਲ ਗਿੱਲੀਆਂ ਹੋਈਆਂ ਸਪਾਟ ਪਿੱਚਾਂ ’ਤੇ ਗੇਂਦਬਾਜ਼ੀ ਕਰਨਾ ਮੁਸ਼ਕਲ ਹੁੰਦਾ ਹੈ, ਪਰ ਸਾਨੂੰ ਵਿਰੋਧੀ ਟੀਮ ਨੂੰ ਰੋਕਣ ਦਾ ਕੋਈ ਤਰੀਕਾ ਲੱਭਣਾ ਪਵੇਗਾ ਖਾਸ ਕਰਕੇ ਉਦੋਂ ਜਦੋਂ ਉਨ੍ਹਾਂ ਨੇ ਪਾਵਰਪਲੇ ’ਚ ਤਿੰਨ ਵਿਕਟਾਂ ਗੁਆ ਦਿੱਤੀਆਂ ਹੋਣ।