- ਸ਼ਹਿਰ ਚੁਣੋ
- ਈ-ਪੇਪਰ
- ਵੈੱਬ ਸਟੋਰੀਜ਼
- ਸ਼ਹਿਰ ਚੁਣੋ
- ਈ-ਪੇਪਰ
- ਵੈੱਬ ਸਟੋਰੀਜ਼
ਦਲੀਪ ਟਰਾਫੀ ਤੇ ਭਾਰਤੀ ਕ੍ਰਿਕਟ: ਪੂਰਬੀ ਜ਼ੋਨ ਦੀ ਜਿੱਤ 'ਚ ਛੁਪੀ ਘਰੇਲੂ ਕ੍ਰਿਕਟ ਦੀ ਵੱਡੀ ਸਮੱਸਿਆ
ਪੂਰਬੀ ਜ਼ੋਨ ਦੀ ਟੀਮ ਨੂੰ ਲੰਬੇ ਸਮੇਂ ਬਾਅਦ ਦਲੀਪ ਟਰਾਫੀ ਦਾ ਖਿਤਾਬ ਜਿੱਤਣ ਲਈ ਬਹੁਤ ਬਹੁਤ ਮੁਬਾਰਕਾਂ। ਬੱਲੇਬਾਜ਼ੀ ਤੇ ਗੇਂਦਬਾਜ਼ੀ ’ਚ ਇੱਕ-ਇੱਕ ਵੱਡਾ ਨਾਮ ਹੋਣ ਦੇ ਬਾਵਜੂਦ ਪੂਰਬੀ ਖੇਤਰ ਦੀ ਟਰਾਫੀ ਜਿੱਤਣਾ ਭਾਰਤੀ ਕ੍ਰਿਕਟ ਲਈ ਇੱਕ ਚੰਗਾ ਸੰਕੇਤ ਹੈ
Posted By alisha
Publish Date: Sun, 13 Sep 2026 12:30 PM (IST)
Updated Date: Sun, 13 Sep 2026 12:34 PM (IST)
ਸਪੋਰਟਸ ਡੈਸਕ : ਪੂਰਬੀ ਜ਼ੋਨ ਦੀ ਟੀਮ ਨੂੰ ਲੰਬੇ ਸਮੇਂ ਬਾਅਦ ਦਲੀਪ ਟਰਾਫੀ ਦਾ ਖਿਤਾਬ ਜਿੱਤਣ ਲਈ ਬਹੁਤ ਬਹੁਤ ਮੁਬਾਰਕਾਂ। ਬੱਲੇਬਾਜ਼ੀ ਤੇ ਗੇਂਦਬਾਜ਼ੀ ’ਚ ਇੱਕ-ਇੱਕ ਵੱਡਾ ਨਾਮ ਹੋਣ ਦੇ ਬਾਵਜੂਦ ਪੂਰਬੀ ਖੇਤਰ ਦੀ ਟਰਾਫੀ ਜਿੱਤਣਾ ਭਾਰਤੀ ਕ੍ਰਿਕਟ ਲਈ ਇੱਕ ਚੰਗਾ ਸੰਕੇਤ ਹੈ ਪਰ ਨਿਰਾਸ਼ਾਜਨਕ ਗੱਲ ਇਹ ਹੈ ਕਿ ਪੂਰਬੀ ਜ਼ੋਨ ਨੇ ਬੇਵਜ੍ਹਾ ਦੂਜੀ ਪਾਰੀ ਨੂੰ ਲੰਮਾ ਕਰ ਦਿੱਤਾ ਤੇ ਪੂਰੀ ਤਰ੍ਹਾਂ ਜਿੱਤਣ ਦੀ ਕੋਸ਼ਿਸ਼ ਨਹੀਂ ਕੀਤੀ। ਦੋਵੇਂ ਕਪਤਾਨ ਮੈਚ ਨੂੰ ਖਤਮ ਕਰਨ ਲਈ ਸਹਿਮਤ ਹੋ ਗਏ ਤੇ ਇਹ ਚੰਗਾ ਨਹੀਂ ਹੈ, ਜੇਕਰ ਮੈਚ ਜਲਦੀ ਖਤਮ ਕਰਨਾ ਹੁੰਦਾ ਤਾਂ ਦੁਪਹਿਰ ਦੇ ਖਾਣੇ ’ਤੇ ਕੀਤਾ ਜਾ ਸਕਦਾ ਸੀ ਕਿਉਂਕਿ ਦੱਖਣੀ ਜ਼ੋਨ ਬਾਕੀ ਦੇ ਦੋ ਸੈਸ਼ਨਾਂ ’ਚ ਵੀ 650 ਤੋਂ ਵੱਧ ਦੇ ਟੀਚੇ ਨੂੰ ਹਾਸਲ ਨਹੀਂ ਕਰ ਸਕਦਾ ਸੀ।
ਘਰੇਲੂ ਕ੍ਰਿਕਟ ’ਚ ਪਹਿਲੀ ਪਾਰੀ ਦੀ ਬੜ੍ਹਤ ਨੂੰ ਕਾਫੀ ਮੰਨਣ ਦੀ ਪ੍ਰਵਿਰਤੀ ਭਾਰਤੀ ਕ੍ਰਿਕਟ ਦੀਆਂ ਪ੍ਰਮੁੱਖ ਸਮੱਸਿਆਵਾਂ ’ਚੋਂ ਇੱਕ ਹੈ। ਚੰਗੀਆਂ ਪਿੱਚਾਂ ’ਤੇ 20 ਵਿਕਟਾਂ ਲੈਣ ਦੀ ਆਦਤ ਕਿਵੇਂ ਬਣ ਜਾਵੇਗੀ ਜੇਕਰ ਟੀਮਾਂ ਨੂੰ ਦੂਜੀ ਪਾਰੀ ’ਚ ਗੇਂਦਬਾਜ਼ੀ ਕਰਨ ਦੇ ਮੌਕੇ ਨਹੀਂ ਮਿਲੇ? ਸ਼੍ਰੀਲੰਕਾ ਖਿਲਾਫ ਦੂਜੇ ਟੈਸਟ ਦੇ ਆਖਰੀ ਦਿਨ ਵੀ ਭਾਰਤੀ ਗੇਂਦਬਾਜ਼ਾਂ ਨੂੰ 4 ਵਿਕਟਾਂ ਲੈਣ ’ਚ ਮੁਸ਼ਕਲ ਹੋਈ। ਚਾਰ ਦਿਨਾਂ ਦੀ ਤਣਾਅ ਭਰੀ ਕ੍ਰਿਕਟ ਤੋਂ ਬਾਅਦ ਸਰੀਰਕ ਦੇ ਨਾਲ-ਨਾਲ ਮਾਨਸਿਕ ਥਕਾਵਟ ਵੀ ਹੈ। ਇਸ ਨਾਲ ਨਜਿੱਠਣ ਦੀ ਸਮਰੱਥਾ ਕੇਵਲ ਪਹਿਲੀ ਸ਼੍ਰੇਣੀ ਕ੍ਰਿਕਟ ’ਚ ਹੀ ਵਿਕਸਤ ਹੁੰਦੀ ਹੈ।
ਬੀਸੀਸੀਆਈ ਟੈਕਨੀਕਲ ਕਮੇਟੀ ਦੇ ਚੇਅਰਮੈਨ ਹੁੰਦਿਆਂ ਰਣਜੀ ਟਰਾਫੀ ’ਚ ਜ਼ੋਨਲ ਪ੍ਰਣਾਲੀ ਨੂੰ ਖਤਮ ਕਰਨ ਤੇ ਐਲੀਟ ਤੇ ਪਲੇਟ ਮੁਕਾਬਲੇ ਸ਼ੁਰੂ ਕਰਨ ਵਰਗੇ ਵੱਡੇ ਫੈਸਲੇ ਲਏ ਗਏ। ਪੁਆਇੰਟ ਸਿਸਟਮ ਨੇ ਪਹਿਲੀ ਪਾਰੀ ਦੀ ਬੜ੍ਹਤ ਲਈ ਇੱਕ ਅੰਕ ਤੇ ਪੂਰੀ ਜਿੱਤ ਲਈ ਦੋ ਅੰਕ ਬਰਕਰਾਰ ਰੱਖੇ, ਜਦੋਂ ਕਿ ਬੋਨਸ ਅੰਕ ਹਟਾ ਦਿੱਤੇ ਗਏ। ਇਸ ਪ੍ਰਣਾਲੀ ਨਾਲ ਟੀਮਾਂ ਨੂੰ ਨਾਕਆਊਟ ਤੱਕ ਪਹੁੰਚਣ ਲਈ ਪੂਰੀ ਤਰ੍ਹਾਂ ਜਿੱਤਾਂ ਦੀ ਮੰਗ ਕਰਨੀ ਪੈਂਦੀ ਸੀ। ਬਾਅਦ ’ਚ ਪਹਿਲੀ ਪਾਰੀ ਦੀ ਬੜ੍ਹਤ ਦੀ ਵਾਪਸੀ ਤੇ ਬੋਨਸ ਅੰਕਾਂ ਦੀ ਪ੍ਰਣਾਲੀ ਨੇ ਜਿੱਤਣ ਦੀਆਂ ਟੀਮਾਂ ਦੀਆਂ ਕੋਸ਼ਿਸ਼ਾਂ ਨੂੰ ਸਿੱਧਾ ਪ੍ਰਭਾਵਿਤ ਕੀਤਾ।
ਇੱਕ ਹੋਰ ਵੱਡੀ ਸਮੱਸਿਆ ਪਿੱਚਾਂ ਦੀ ਸੀ, ਜਦੋਂ ਟੀਮਾਂ ਨੇ ਆਪਣੀ ਤਾਕਤ ਮੁਤਾਬਕ ਪਿੱਚਾਂ ਤਿਆਰ ਕਰਨੀਆਂ ਸ਼ੁਰੂ ਕੀਤੀਆਂ ਤਾਂ ਬੀਸੀਸੀਆਈ ਨੇ ਅੰਪਾਇਰ ਦੀ ਰਿਪੋਰਟ ਦੇ ਆਧਾਰ ’ਤੇ ਕਾਰਵਾਈ ਕਰਨ ਦੀ ਕੋਸ਼ਿਸ਼ ਕੀਤੀ ਪਰ ਅੰਪਾਇਰਾਂ ਨੂੰ ਵੀ ਪਤਾ ਸੀ ਕਿ ਪ੍ਰਭਾਵਸ਼ਾਲੀ ਐਸੋਸੀਏਸ਼ਨਾਂ ਨੂੰ ਅੱਗੇ ਵਧਣ ਲਈ ਪਰੇਸ਼ਾਨ ਕਰਨਾ ਉਨ੍ਹਾਂ ਦੇ ਹਿੱਤ ’ਚ ਨਹੀਂ ਹੋਵੇਗਾ। ਹੁਣ ਬੀਸੀਸੀਆਈ ਦੀ ਕ੍ਰਿਕਟ ਸਲਾਹਕਾਰ ਕਮੇਟੀ (ਸੀਏਸੀ) ਦਾ ਦਾਇਰਾ ਵਧਾਉਣ ਦਾ ਸਮਾਂ ਆ ਗਿਆ ਹੈ। ਚੋਣਕਰਤਾਵਾਂ ਤੇ ਕੋਚਾਂ ਦੀ ਚੋਣ ਤੋਂ ਇਲਾਵਾ ਘਰੇਲੂ ਤੇ ਅੰਤਰਰਾਸ਼ਟਰੀ ਮੁਕਾਬਲਿਆਂ ਤੇ ਭਾਰਤੀ ਕ੍ਰਿਕਟ ਨਾਲ ਜੁੜੇ ਮਹੱਤਵਪੂਰਨ ਮਾਮਲਿਆਂ ’ਤੇ ਤਜਰਬੇਕਾਰ ਸਾਬਕਾ ਕ੍ਰਿਕਟਰਾਂ ਦੀ ਸਲਾਹ ਵੀ ਲਈ ਜਾ ਸਕਦੀ ਹੈ।
ਇਸੇ ਤਰ੍ਹਾਂ ਮਹਿਲਾ ਕ੍ਰਿਕਟ ਲਈ ਵੀ ਤਜਰਬੇਕਾਰ ਕਮੇਟੀ ਬਣਾਈ ਜਾ ਸਕਦੀ ਹੈ, ਜੇਕਰ ਅਜਿਹੀ ਕਮੇਟੀ ਕਪਤਾਨ, ਕੋਚ ਤੇ ਐੱਨਸੀਏ ਮੁਖੀ ਨਾਲ ਮਿਲ ਕੇ ਕੰਮ ਕਰਦੀ ਹੈ ਤਾਂ ਭਾਰਤੀ ਕ੍ਰਿਕਟ ਨੂੰ ਅੱਗੇ ਲਿਜਾਣ ਲਈ ਸਖ਼ਤ ਫੈਸਲੇ ਲਏ ਜਾ ਸਕਦੇ ਹਨ। ਸਵਾਲ ਸਿਰਫ ਇਹ ਹੈ ਕਿ ਕੀ ਭਾਰਤੀ ਕ੍ਰਿਕਟ ਇਸ ਦਿਸ਼ਾ ’ਚ ਕੋਈ ਕਦਮ ਚੁੱਕੇਗੀ ਜਾਂ ਇਹ ਵਿਚਾਰ ਮਹਿਜ਼ ਸੁਪਨਾ ਬਣ ਕੇ ਹੀ ਰਹਿ ਜਾਵੇਗਾ?