ਧਰੁਵ ਜੁਰੈਲ ਦਾ ਸ਼ਾਨਦਾਰ ਸੈਂਕੜਾ : ਭਾਰਤ ਨੇ 503 ਦੌੜਾਂ 'ਤੇ ਐਲਾਨੀ ਪਾਰੀ, ਸ੍ਰੀਲੰਕਾ ਦੇ 8 ਦੌੜਾਂ 'ਤੇ 2 ਝਟਕੇ

ਅਭਿਸ਼ੇਕ ਤ੍ਰਿਪਾਠੀ, ਜਾਗਰਣ, ਕੋਲੰਬੋ : ਦਾਦਾ ਕਿਸਾਨ ਸੀ, ਪਿਤਾ ਫ਼ੌਜ ’ਚ ਹੌਲਦਾਰ ਸੀ, ਮਾਂ ਚਾਹੁੰਦੀ ਸੀ ਕਿ ਪੁੱਤਰ ਸਰਕਾਰੀ ਨੌਕਰੀ ਕਰੇ ਪਰ ਕਿਸਮਤ ’ਚ ਕੁਝ ਹੋਰ ਹੀ ਲਿਖਿਆ ਸੀ। ਆਗਰਾ ’ਚ ਤੈਰਾਕੀ ਸਿੱਖਣ ਗਏ ਬੱਚੇ ਨੇ ਕ੍ਰਿਕਟ ਅਕਾਦਮੀ ਦਾ ਵੀ ਫਾਰਮ ਭਰ ਦਿੱਤਾ, ਜਿਸ ’ਤੇ ਝਿੜਕਾਂ ਪਈਆਂ ਪਰ ਬਾਅਦ ’ਚ ਪਰਿਵਾਰ ਮੰਨ ਗਿਆ। 800 ਰੁਪਏ ਉਧਾਰ ਲੈ ਕੇ ਪਹਿਲਾ ਬੈਟ ਖਰੀਦਿਆ। ਬੱਚੇ ਦੀ ਜ਼ਿੱਦ ਤੋਂ ਬਾਅਦ ਮਾਂ ਨੇ ਸੋਨੇ ਦੀ ਚੇਨ ਵੇਚ ਕੇ ਕ੍ਰਿਕਟ ਕਿੱਟ ਖਰੀਦੀ ਤੇ ਅੱਜ ਉਹ ਲੜਕਾ ਦੁਨੀਆ ’ਚ ਸੋਨਾ ਵਾਂਗ ਚਮਕ ਰਿਹਾ ਹੈ। ਅਸੀਂ ਗੱਲ ਕਰ ਰਹੇ ਹਾਂ ਭਾਰਤ ਦੇ ਮੱਧਕ੍ਰਮ ਦੇ ਬੱਲੇਬਾਜ਼ੀ ਧਰੁਵ ਜੁਰੈਲ ਦੀ, ਜਿਸਦੇ ਅਜੇਤੂ ਸੈਂਕੜੇ ਦੀ ਬਦੌਲਤ ਭਾਰਤ ਨੇ ਸਿੰਘਲੀਜ਼ ਸਪੋਰਟਸ ਕਲੱਬ ’ਚ ਸ੍ਰੀਲੰਕਾ ਵਿਰੁੱਧ ਦੂਜੇ ਟੈਸਟ ਦੇ ਦੂਜੇ ਦਿਨ ਨੌਂ ਵਿਕਟਾਂ ’ਤੇ 503 ਦੌੜਾਂ ਬਣਾ ਕੇ ਪਹਿਲੀ ਪਾਰੀ ਐਲਾਨੀ। ਦੂਜੇ ਦਿਨ ਦੀ ਖੇਡ ਖ਼ਤਮ ਹੋਣ ਤੱਕ ਸ੍ਰੀਲੰਕਾ ਨੇ ਸਿਰਫ ਅੱਠ ਦੌੜਾਂ ’ਤੇ ਦੋ ਵਿਕਟਾਂ ਗੁਆ ਦਿੱਤੀਆਂ ਸਨ। ਪਹਿਲਾ ਮੈਚ 165 ਦੌੜਾਂ ਨਾਲ ਜਿੱਤਣ ਵਾਲੀ ਭਾਰਤੀ ਟੀਮ ਇਸ ਮੁਕਾਬਲੇ ਨੂੰ ਜਿੱਤ ਕੇ ਸੀਰੀਜ਼ ’ਚ 2-0 ਨਾਲ ਬੜ੍ਹਤ ਲੈਣਾ ਚਾਹੇਗੀ। ਸ੍ਰੀਲੰਕਾ ਦੇ ਤੇਜ਼ ਗੇਂਦਬਾਜ਼ ਅਸੀਥਾ ਫਰਨਾਂਡੋ ਨੇ ਚਾਰ ਵਿਕਟਾਂ ਲਈਆਂ।