- ਸ਼ਹਿਰ ਚੁਣੋ
- ਈ-ਪੇਪਰ
- ਵੈੱਬ ਸਟੋਰੀਜ਼
- ਸ਼ਹਿਰ ਚੁਣੋ
- ਈ-ਪੇਪਰ
- ਵੈੱਬ ਸਟੋਰੀਜ਼
ਭੁਵਨੇਸ਼ਵਰ ਕੁਮਾਰ ਦੀ ਫਲਾਪ ਵਾਪਸੀ, ਸੇਫਰਟ ਤੇ ਫਿਲਿਪਸ ਦੇ ਤੂਫ਼ਾਨ ਅੱਗੇ ਬੇਵੱਸ ਨਜ਼ਰ ਆਈ ਭਾਰਤੀ ਗੇਂਦਬਾਜ਼ੀ
ਤੇਜ਼ ਰਫ਼ਤਾਰ ਕ੍ਰਿਕਟ ਟੀ-20 ’ਚ ਮੁਕਾਬਲੇ ਦਾ ਉਤਸ਼ਾਹ ਹਰ ਗੇਂਦ ਦੇ ਨਾਲ ਬਦਲਦਾ ਰਹਿੰਦਾ ਹੈ। ਕਈ ਵਾਰ ਬੱਲੇਬਾਜ਼ ਧਮਾਕੇਦਾਰ ਪਾਰੀਆਂ ਖੇਡ ਕੇ ਮੈਚ ਦਾ ਪਾਸਾ ਪਲਟ ਦਿੰਦੇ ਹਨ, ਜਦਕਿ ਕਈ ਵਾਰ ਗੇਂਦਬਾਜ਼ ਆਪਣੀ ਸਟੀਕ ਤੇ ਖ਼ਤਰਨਾਕ ਗੇਂਦਬਾਜ਼ੀ ਨਾਲ ਵਿਰੋਧੀ ਟੀਮ ਨੂੰ ਦਬਾਅ ’ਚ ਲੈ ਆਉਂਦੇ ਹਨ
Posted By alisha
Publish Date: Mon, 02 Nov 2026 11:02 AM (IST)
Updated Date: Mon, 02 Nov 2026 11:10 AM (IST)
ਜਾਗਰਣ ਨਿਊਜ਼ ਨੈੱਟਵਰਕ, ਨਵੀਂ ਦਿੱਲੀ : ਤੇਜ਼ ਰਫ਼ਤਾਰ ਕ੍ਰਿਕਟ ਟੀ-20 ’ਚ ਮੁਕਾਬਲੇ ਦਾ ਉਤਸ਼ਾਹ ਹਰ ਗੇਂਦ ਦੇ ਨਾਲ ਬਦਲਦਾ ਰਹਿੰਦਾ ਹੈ। ਕਈ ਵਾਰ ਬੱਲੇਬਾਜ਼ ਧਮਾਕੇਦਾਰ ਪਾਰੀਆਂ ਖੇਡ ਕੇ ਮੈਚ ਦਾ ਪਾਸਾ ਪਲਟ ਦਿੰਦੇ ਹਨ, ਜਦਕਿ ਕਈ ਵਾਰ ਗੇਂਦਬਾਜ਼ ਆਪਣੀ ਸਟੀਕ ਤੇ ਖ਼ਤਰਨਾਕ ਗੇਂਦਬਾਜ਼ੀ ਨਾਲ ਵਿਰੋਧੀ ਟੀਮ ਨੂੰ ਦਬਾਅ ’ਚ ਲੈ ਆਉਂਦੇ ਹਨ। ਹਾਲਾਂਕਿ, ਨਿਊਜ਼ੀਲੈਂਡ ਵਿਰੁੱਧ ਪੰਜ ਮੈਚਾਂ ਦੀ ਟੀ20 ਲੜੀ ’ਚ ਭਾਰਤੀ ਗੇਂਦਬਾਜ਼ਾਂ ਦਾ ਪ੍ਰਦਰਸ਼ਨ ਨਿਰਾਸ਼ਾਜਨਕ ਰਿਹਾ। ਪੂਰੀ ਲੜੀ ਦੌਰਾਨ, ਵਿਸ਼ਵ ਚੈਂਪੀਅਨ ਭਾਰਤੀ ਟੀਮ ਦੇ ਗੇਂਦਬਾਜ਼ ਆਪਣੀ ਲੈਅ ਲੱਭਣ ਲਈ ਜੂਝਦੇ ਰਹੇ। ਖਾਸ ਤੌਰ ’ਤੇ ਆਖਰੀ ਮੈਚ ’ਚ ਨਿਊਜ਼ੀਲੈਂਡ ਦੇ ਬੱਲੇਬਾਜ਼ਾਂ ਨੇ ਭਾਰਤੀ ਗੇਂਦਬਾਜ਼ੀ ਦੀਆਂ ਕਮਜ਼ੋਰੀਆਂ ਨੂੰ ਉਜਾਗਰ ਕਰ ਦਿੱਤਾ।
ਨਿਊਜ਼ੀਲੈਂਡ ਵਿਰੁੱਧ ਪੰਜਵੇਂ ਤੇ ਆਖਰੀ T20 ਮੈਚ ’ਚ, ਨਿਤੀਸ਼ ਕੁਮਾਰ ਰੈੱਡੀ ਨੂੰ ਛੱਡ ਕੇ, ਭਾਰਤ ਦੇ ਹਰ ਗੇਂਦਬਾਜ਼ ਨੇ 10 ਜਾਂ ਇਸ ਤੋਂ ਵੱਧ ਦੀ ਇਕਾਨਮੀ ਰੇਟ ਨਾਲ ਦੌੜਾਂ ਦਿੱਤੀਆਂ। ਭੁਵਨੇਸ਼ਵਰ ਕੁਮਾਰ ਨੇ 10.25 ਦੀ ਇਕਾਨਮੀ ਨਾਲ 41 ਦੌੜਾਂ ਦਿੱਤੀਆਂ, ਜਦਕਿ ਅਰਸ਼ਦੀਪ ਸਿੰਘ ਨੇ 10 ਦੀ ਇਕਾਨਮੀ ਰੇਟ ਨਾਲ 40 ਦੌੜਾਂ ਦਿੱਤੀਆਂ। ਭੁਵਨੇਸ਼ਵਰ ਕੋਈ ਵਿਕਟ ਨਹੀਂ ਲੈ ਸਕੇ, ਜਦਕਿ ਅਰਸ਼ਦੀਪ ਇੱਕ ਵਿਕਟ ਲੈਣ ਵਿੱਚ ਕਾਮਯਾਬ ਰਹੇ। ਭਾਰਤੀ ਗੇਂਦਬਾਜ਼ਾਂ ਦੀ ਖਰਾਬ ਲਾਈਨ ਤੇ ਲੈਂਥ ਦਾ ਫਾਇਦਾ ਉਠਾਉਂਦੇ ਹੋਏ, ਟਿਮ ਸੇਫਰਟ ਅਤੇ ਗਲੇਨ ਫਿਲਿਪਸ ਨੇ ਮੈਦਾਨ ਦੇ ਚਾਰੇ ਪਾਸੇ ਸ਼ਾਟ ਲਗਾਏ। ਹੈਮਿਲਟਨ ਦੇ ਸੇਡਨ ਪਾਰਕ ’ਚ ਖੇਡੇ ਗਏ ਇਸ ਮੈਚ ਵਿੱਚ ਨਿਊਜ਼ੀਲੈਂਡ ਨੇ ਭਾਰਤ ਨੂੰ ਸੱਤ ਵਿਕਟਾਂ ਨਾਲ ਹਰਾ ਦਿੱਤਾ। ਫਿਰ ਵੀ, ਇਸ ਹਾਰ ਦੇ ਬਾਵਜੂਦ, ਭਾਰਤੀ ਟੀਮ ਪੰਜ ਮੈਚਾਂ ਦੀ ਲੜੀ 3-2 ਨਾਲ ਜਿੱਤਣ ’ਚ ਸਫਲ ਰਹੀ। ਲੜੀ ਜਿੱਤਣ ਦੇ ਬਾਵਜੂਦ, ਭਾਰਤੀ ਗੇਂਦਬਾਜ਼ੀ ਯੂਨਿਟ ਦਾ ਪ੍ਰਦਰਸ਼ਨ ਟੀਮ ਪ੍ਰਬੰਧਨ ਲਈ ਚਿੰਤਾ ਦਾ ਵਿਸ਼ਾ ਬਣ ਗਿਆ ਹੈ।
ਈਸ਼ਾਨ ਤੇ ਸ਼੍ਰੇਅਸ ਨੇ ਭਾਰਤੀ ਪਾਰੀ ਨੂੰ ਸੰਭਾਲਿਆ
ਨਿਊਜ਼ੀਲੈਂਡ ਨੇ ਟਾਸ ਜਿੱਤ ਕੇ ਪਹਿਲਾਂ ਗੇਂਦਬਾਜ਼ੀ ਕਰਨ ਦਾ ਫੈਸਲਾ ਕੀਤਾ। ਭਾਰਤ ਦੀ ਸ਼ੁਰੂਆਤ ਚੰਗੀ ਨਹੀਂ ਰਹੀ ਤੇ ਟੀਮ ਨੇ ਸ਼ੁਰੂਆਤੀ ਓਵਰਾਂ ’ਚ ਹੀ ਆਪਣੇ ਦੋਵੇਂ ਸਲਾਮੀ ਬੱਲੇਬਾਜ਼ ਗੁਆ ਦਿੱਤੇ। ਸਿਰਫ਼ 20 ਦੌੜਾਂ ’ਤੇ ਦੋ ਵਿਕਟਾਂ ਡਿੱਗਣ ਕਾਰਨ ਭਾਰਤੀ ਟੀਮ ਦਬਾਅ ’ਚ ਆ ਗਈ ਸੀ। ਅਜਿਹੀ ਮੁਸ਼ਕਲ ਸਥਿਤੀ ’ਚ ਈਸ਼ਾਨ ਕਿਸ਼ਨ ਨੇ ਜ਼ਿੰਮੇਵਾਰੀ ਸੰਭਾਲੀ। ਤੀਜੇ ਨੰਬਰ ’ਤੇ ਬੱਲੇਬਾਜ਼ੀ ਕਰਦਿਆਂ, ਈਸ਼ਾਨ ਨੇ ਕਪਤਾਨ ਸ਼੍ਰੇਅਸ ਅਈਅਰ ਦੇ ਨਾਲ ਮਿਲ ਕੇ ਭਾਰਤੀ ਪਾਰੀ ਨੂੰ ਸੰਭਾਲਿਆ। ਇਸ ਜੋੜੀ ਨੇ ਚੌਥੀ ਵਿਕਟ ਲਈ ਸਿਰਫ਼ 43 ਗੇਂਦਾਂ ’ਚ 93 ਦੌੜਾਂ ਦੀ ਅਹਿਮ ਸਾਂਝੇਦਾਰੀ ਨਿਭਾਈ। ਈਸ਼ਾਨ ਨੇ 32 ਗੇਂਦਾਂ ’ਚ 61 ਦੌੜਾਂ ਦੀ ਹਮਲਾਵਰ ਪਾਰੀ ਖੇਡੀ, ਜਦਕਿ ਸ਼੍ਰੇਅਸ ਨੇ 30 ਗੇਂਦਾਂ ’ਚ 50 ਦੌੜਾਂ ਬਣਾਈਆਂ। ਦੋਵਾਂ ਦੇ ਆਊਟ ਹੋਣ ਤੋਂ ਬਾਅਦ, ਭਾਰਤੀ ਪਾਰੀ ਇੱਕ ਵਾਰ ਫਿਰ ਲੜਖੜਾ ਗਈ; ਹਾਲਾਂਕਿ, ਨਿਤੀਸ਼ ਕੁਮਾਰ ਰੈੱਡੀ ਤੇ ਨਮਨ ਧੀਰ ਨੇ ਉਪਯੋਗੀ ਪਾਰੀਆਂ ਖੇਡ ਕੇ ਟੀਮ ਨੂੰ ਇੱਕ ਸਨਮਾਨਜਨਕ ਸਕੋਰ ਤੱਕ ਪਹੁੰਚਾਉਣ ’ਚ ਮਦਦ ਕੀਤੀ। ਇਸ ਜੋੜੀ ਨੇ ਛੇਵੀਂ ਵਿਕਟ ਲਈ 30 ਗੇਂਦਾਂ ’ਚ 46 ਦੌੜਾਂ ਜੋੜੀਆਂ ਜਿਸ ’ਚ ਨਿਤੀਸ਼ ਨੇ 22 ਦੌੜਾਂ ਤੇ ਨਮਨ ਧੀਰ ਨੇ 33 ਦੌੜਾਂ ਦਾ ਯੋਗਦਾਨ ਪਾਇਆ। ਭਾਰਤ ਨੇ ਆਪਣੇ ਨਿਰਧਾਰਤ 20 ਓਵਰਾਂ ਵਿੱਚ 8 ਵਿਕਟਾਂ ਦੇ ਨੁਕਸਾਨ ’ਤੇ 191 ਦੌੜਾਂ ਬਣਾਈਆਂ।
ਸੇਫਰਟ ਤੇ ਫਿਲਿਪਸ ਦਾ ਬੱਲੇ ਨਾਲ ਸ਼ਾਨਦਾਰ ਪ੍ਰਦਰਸ਼ਨ
192 ਦੌੜਾਂ ਦੇ ਟੀਚੇ ਦਾ ਪਿੱਛਾ ਕਰਦਿਆਂ ਨਿਊਜ਼ੀਲੈਂਡ ਦੀ ਸ਼ੁਰੂਆਤ ਵੀ ਖਰਾਬ ਰਹੀ ਤੇ ਉਨ੍ਹਾਂ ਨੇ ਦੂਜੇ ਓਵਰ ’ਚ ਹੀ ਫਿਨ ਐਲਨ ਦੀ ਵਿਕਟ ਗੁਆ ਦਿੱਤੀ। ਹਾਲਾਂਕਿ ਇਸ ਤੋਂ ਬਾਅਦ ਟਿਮ ਸੇਫਰਟ ਤੇ ਗਲੇਨ ਫਿਲਿਪਸ ਨੇ ਭਾਰਤੀ ਗੇਂਦਬਾਜ਼ਾਂ ਨੂੰ ਸੰਭਲਣ ਦਾ ਕੋਈ ਮੌਕਾ ਨਹੀਂ ਦਿੱਤਾ। ਉਨ੍ਹਾਂ ਦੀ ਹਮਲਾਵਰ ਬੱਲੇਬਾਜ਼ੀ ਨੇ ਭਾਰਤੀ ਟੀਮ ਨੂੰ ਮੁਕਾਬਲੇ ਤੋਂ ਬਾਹਰ ਕਰ ਦਿੱਤਾ। ਸੇਫਰਟ, ਜੋ ਪੂਰੀ ਲੜੀ ਦੌਰਾਨ ਇੱਕ ਵੱਡੀ ਪਾਰੀ ਖੇਡਣ ਲਈ ਸੰਘਰਸ਼ ਕਰ ਰਿਹਾ ਸੀ, ਨੇ ਆਖਰੀ ਮੈਚ ’ਚ ਆਪਣਾ ਸਰਵੋਤਮ ਪ੍ਰਦਰਸ਼ਨ ਕੀਤਾ। ਉਸ ਨੇ 50 ਗੇਂਦਾਂ ’ਚ 93 ਦੌੜਾਂ ਬਣਾਈਆਂ ਜਿਸ ’ਚ 11 ਚੌਕੇ ਤੇ ਪੰਜ ਛੱਕੇ ਸ਼ਾਮਲ ਸਨ। ਦੂਜੇ ਪਾਸੇ, ਸ਼ਾਨਦਾਰ ਫਾਰਮ ’ਚ ਚੱਲ ਰਹੇ ਗਲੇਨ ਫਿਲਿਪਸ ਨੇ ਵੀ ਆਪਣੀ ਕਾਬਲੀਅਤ ਦਿਖਾਈ। ਉਹ 38 ਗੇਂਦਾਂ ’ਚ 65 ਦੌੜਾਂ ਬਣਾ ਕੇ ਅਜੇਤੂ ਰਿਹਾ ਉਸ ਦੀ ਪਾਰੀ ’ਚ ਅੱਠ ਚੌਕੇ ਤੇ ਤਿੰਨ ਛੱਕੇ ਸ਼ਾਮਲ ਸਨ। ਇਨ੍ਹਾਂ ਦੋਵਾਂ ਬੱਲੇਬਾਜ਼ਾਂ ਵਿਚਕਾਰ ਹੋਈ ਸ਼ਾਨਦਾਰ ਭਾਈਵਾਲੀ ਨੇ ਨਿਊਜ਼ੀਲੈਂਡ ਲਈ ਟੀਚੇ ਦਾ ਪਿੱਛਾ ਕਰਨਾ ਆਸਾਨ ਬਣਾ ਦਿੱਤਾ। ਮੇਜ਼ਬਾਨ ਟੀਮ ਨੇ ਸਿਰਫ਼ 18 ਓਵਰਾਂ ’ਚ ਹੀ ਟੀਚਾ ਹਾਸਲ ਕਰ ਲਿਆ ਤੇ ਇਸ ਦੌਰਾਨ ਉਨ੍ਹਾਂ ਦੀਆਂ ਸਿਰਫ਼ ਤਿੰਨ ਵਿਕਟਾਂ ਡਿੱਗੀਆਂ। ਫਿਲਿਪਸ ਨੇ ਇਸ ਪੂਰੀ ਲੜੀ ਦੌਰਾਨ ਬੇਹੱਦ ਸ਼ਾਨਦਾਰ ਬੱਲੇਬਾਜ਼ੀ ਕੀਤੀ ਹੈ, ਜਿਸ ’ਚ ਉਸ ਨੇ ਇੱਕ ਸੈਂਕੜਾ ਤੇ ਤਿੰਨ ਅਰਧ-ਸੈਂਕੜੇ ਲਗਾਏ ਹਨ।
ਭੁਵਨੇਸ਼ਵਰ ਪ੍ਰਭਾਵ ਛੱਡਣ ’ਚ ਰਿਹਾ ਅਸਫਲ
ਭਾਰਤੀ ਗੇਂਦਬਾਜ਼ੀ ਹਮਲੇ ’ਚ ਸਭ ਤੋਂ ਨਿਰਾਸ਼ਾਜਨਕ ਪ੍ਰਦਰਸ਼ਨ ਤਜਰਬੇਕਾਰ ਤੇਜ਼ ਗੇਂਦਬਾਜ਼ ਭੁਵਨੇਸ਼ਵਰ ਕੁਮਾਰ ਵੱਲੋਂ ਦੇਖਣ ਨੂੰ ਮਿਲਿਆ। 36 ਸਾਲਾ ਇਹ ਖਿਡਾਰੀ ਲੰਬੇ ਅਰਸੇ ਬਾਅਦ ਭਾਰਤੀ ਟੀਮ ’ਚ ਵਾਪਸੀ ਕਰ ਰਿਹਾ ਸੀ। ਪਿਛਲੇ ਦੋ ਆਈ.ਪੀ.ਐੱਲ. ਸੀਜ਼ਨਾਂ ’ਚ ਉਨ੍ਹਾਂ ਦੇ ਸ਼ਾਨਦਾਰ ਗੇਂਦਬਾਜ਼ੀ ਪ੍ਰਦਰਸ਼ਨ ਨੂੰ ਦੇਖਦੇ ਹੋਏ, ਉਨ੍ਹਾਂ ਤੋਂ ਕਾਫ਼ੀ ਉਮੀਦਾਂ ਸਨ। ਆਈਪੀਐੱਲ 2025 ’ਚ ਆਰ.ਸੀ.ਬੀ. ਲਈ ਖੇਡਦਿਆਂ, ਭੁਵਨੇਸ਼ਵਰ ਨੇ 14 ਮੈਚਾਂ ’ਚ 9.28 ਦੀ ਇਕਾਨਮੀ ਰੇਟ ਨਾਲ 17 ਵਿਕਟਾਂ ਲਈਆਂ ਸਨ ਤੇ ਆਈ.ਪੀ.ਐੱਲ. 2026 ਵਿੱਚ ਤਾਂ ਉਨ੍ਹਾਂ ਨੇ ਹੋਰ ਵੀ ਬਿਹਤਰ ਪ੍ਰਦਰਸ਼ਨ ਕਰਦੇ ਹੋਏ 16 ਮੈਚਾਂ ’ਚ 7.95 ਦੀ ਇਕਾਨਮੀ ਰੇਟ ਨਾਲ 28 ਵਿਕਟਾਂ ਹਾਸਲ ਕੀਤੀਆਂ ਸਨ। ਹਾਲਾਂਕਿ, ਨਿਊਜ਼ੀਲੈਂਡ ਵਿਰੁੱਧ ਟੀ-20 ਸੀਰੀਜ਼ ਦੌਰਾਨ ਉਹ ਆਈਪੀਐੱਲ ਵਾਲਾ ਆਪਣਾ ਉਹ ਫਾਰਮ ਦੁਹਰਾਉਣ ’ਚ ਅਸਫਲ ਰਹੇ। ਉਨ੍ਹਾਂ ਨੂੰ ਪੰਜ ਮੈਚਾਂ ਦੀ ਇਸ ਲੜੀ ’ਚ ਚਾਰ ਮੈਚ ਖੇਡਣ ਦਾ ਮੌਕਾ ਮਿਲਿਆ; ਇਸ ਦੌਰਾਨ ਉਨ੍ਹਾਂ ਨੇ 11.25 ਦੀ ਇਕਾਨਮੀ ਰੇਟ ਨਾਲ 180 ਦੌੜਾਂ ਦਿੱਤੀਆਂ ਤੇ ਸਿਰਫ਼ ਇੱਕ ਵਿਕਟ ਹੀ ਲੈ ਸਕੇ। ਇੱਥੋਂ ਤੱਕ ਕਿ ਆਖਰੀ ਮੈਚ ’ਚ ਵੀ ਉਨ੍ਹਾਂ ਦੀ ਗੇਂਦਬਾਜ਼ੀ ਵਿੱਚ ਉਹ ਤੇਜ਼ੀ ਅਤੇ ਧਾਰ ਨਹੀਂ ਦਿਸੀ, ਜਿਸ ਲਈ ਉਹ ਜਾਣੇ ਜਾਂਦੇ ਹਨ।