IPL 2026 ਤੋਂ ਪਹਿਲਾਂ BCCI ਸਖ਼ਤ, ਕੈਚ ਦੇ ਨਿਯਮਾਂ ਨੂੰ ਲੈ ਕੇ ਕਪਤਾਨਾਂ ਨੂੰ ਦਿੱਤੀ ਚਿਤਾਵਨੀ
ਆਈਪੀਐਲ 2026 ਦਾ ਆਗਾਜ਼ 28 ਮਾਰਚ ਤੋਂ ਹੋਣ ਜਾ ਰਿਹਾ ਹੈ। ਇਸ ਟੂਰਨਾਮੈਂਟ ਤੋਂ ਪਹਿਲਾਂ ਬੀਸੀਸੀਆਈ ਨੇ ਸਾਰੀਆਂ ਟੀਮਾਂ ਦੇ ਕਪਤਾਨਾਂ ਨਾਲ ਮੀਟਿੰਗ ਕਰਕੇ ਨਿਯਮਾਂ ਬਾਰੇ ਨਵੇਂ ਨਿਰਦੇਸ਼ ਜਾਰੀ ਕੀਤੇ ਹਨ। ਮੈਚ ਵਾਲੇ ਦਿਨ ਪ੍ਰੈਕਟਿਸ 'ਤੇ ਰੋਕ ਅਤੇ ਪਰਿਵਾਰ ਨਾਲ ਸਫ਼ਰ ਨਾ ਕਰਨ ਦੀਆਂ ਹਦਾਇਤਾਂ ਤੋਂ ਇਲਾਵਾ, ਬੀਸੀਸੀਆਈ ਨੇ ਸਪੱਸ਼ਟ ਕੀਤਾ ਹੈ ਕਿ ਕੈਚ ਤਾਂ ਹੀ ਜਾਇਜ਼ ਮੰਨਿਆ ਜਾਵੇਗਾ, ਜੇਕਰ ਫੀਲਡਰ ਦਾ ਗੇਂਦ ਅਤੇ ਆਪਣੇ ਸਰੀਰ ਦੋਵਾਂ 'ਤੇ ਪੂਰੀ ਤਰ੍ਹਾਂ ਕੰਟਰੋਲ ਹੋਵੇਗਾ ਅਤੇ ਉਸ ਤੋਂ ਬਾਅਦ ਹੀ ਉਹ ਜਸ਼ਨ ਮਨਾ ਸਕੇਗਾ।
Posted By Anuradha Bains
Publish Date: Thu, 26 Mar 2026 03:59 PM (IST)
Updated Date: Thu, 26 Mar 2026 04:03 PM (IST)
ਸਪੋਰਟਸ ਡੈਸਕ, ਨਵੀਂ ਦਿੱਲੀ। ਆਈਪੀਐਲ 2026 ਦਾ ਆਗਾਜ਼ 28 ਮਾਰਚ ਤੋਂ ਹੋਣ ਜਾ ਰਿਹਾ ਹੈ। ਇਸ ਟੂਰਨਾਮੈਂਟ ਤੋਂ ਪਹਿਲਾਂ ਬੀਸੀਸੀਆਈ ਨੇ ਸਾਰੀਆਂ ਟੀਮਾਂ ਦੇ ਕਪਤਾਨਾਂ ਨਾਲ ਮੀਟਿੰਗ ਕਰਕੇ ਨਿਯਮਾਂ ਬਾਰੇ ਨਵੇਂ ਨਿਰਦੇਸ਼ ਜਾਰੀ ਕੀਤੇ ਹਨ। ਮੈਚ ਵਾਲੇ ਦਿਨ ਪ੍ਰੈਕਟਿਸ 'ਤੇ ਰੋਕ ਅਤੇ ਪਰਿਵਾਰ ਨਾਲ ਸਫ਼ਰ ਨਾ ਕਰਨ ਦੀਆਂ ਹਦਾਇਤਾਂ ਤੋਂ ਇਲਾਵਾ, ਬੀਸੀਸੀਆਈ ਨੇ ਸਪੱਸ਼ਟ ਕੀਤਾ ਹੈ ਕਿ ਕੈਚ ਤਾਂ ਹੀ ਜਾਇਜ਼ ਮੰਨਿਆ ਜਾਵੇਗਾ, ਜੇਕਰ ਫੀਲਡਰ ਦਾ ਗੇਂਦ ਅਤੇ ਆਪਣੇ ਸਰੀਰ ਦੋਵਾਂ 'ਤੇ ਪੂਰੀ ਤਰ੍ਹਾਂ ਕੰਟਰੋਲ ਹੋਵੇਗਾ ਅਤੇ ਉਸ ਤੋਂ ਬਾਅਦ ਹੀ ਉਹ ਜਸ਼ਨ ਮਨਾ ਸਕੇਗਾ।
ਕੈਚ ਨਿਯਮ ਨੂੰ ਲੈ ਕੇ BCCI ਦੀ ਚਿਤਾਵਨੀ
ਦਰਅਸਲ, ਅਕਸਰ ਦੇਖਿਆ ਗਿਆ ਹੈ ਕਿ ਜਦੋਂ ਖਿਡਾਰੀ ਕੈਚ ਲੈਂਦੇ ਹਨ, ਤਾਂ ਉਹ ਤੁਰੰਤ ਜਸ਼ਨ ਮਨਾਉਣਾ ਸ਼ੁਰੂ ਕਰ ਦਿੰਦੇ ਹਨ, ਜਦੋਂ ਕਿ ਉਨ੍ਹਾਂ ਦਾ ਸੰਤੁਲਨ ਅਜੇ ਪੂਰੀ ਤਰ੍ਹਾਂ ਨਹੀਂ ਬਣਿਆ ਹੁੰਦਾ। ਕਈ ਵਾਰ ਇਸ ਕਾਰਨ ਵਿਵਾਦ ਵੀ ਪੈਦਾ ਹੋ ਜਾਂਦੇ ਹਨ। ਇਸ ਵਾਰ ਆਈਪੀਐਲ 2026 ਲਈ ਬੀਸੀਸੀਆਈ ਨੇ ਅਜਿਹੀਆਂ ਹਰਕਤਾਂ 'ਤੇ ਰੋਕ ਲਗਾ ਦਿੱਤੀ ਹੈ।
ਕੈਚ ਲੈਣ ਦੇ ਨਿਯਮਾਂ ਵਿੱਚ ਸਖ਼ਤੀ
BCCI ਦੇ ਮੁਤਾਬਕ, ਫੀਲਡਰ ਨੂੰ ਕੈਚ ਲੈਂਦੇ ਸਮੇਂ, ਗੇਂਦ ਹੱਥ ਵਿੱਚ ਆਉਣ ਤੋਂ ਬਾਅਦ ਪੂਰਾ ਕੰਟਰੋਲ ਸਾਬਤ ਕਰਨਾ ਹੋਵੇਗਾ। ਫੀਲਡਰ ਦਾ ਸਰੀਰ ਅਤੇ ਸੰਤੁਲਨ ਪੂਰੀ ਤਰ੍ਹਾਂ ਸਥਿਰ ਹੋਣਾ ਚਾਹੀਦਾ ਹੈ। ਕੈਚ ਦੇ ਦੌਰਾਨ ਜੇਕਰ ਕੋਈ ਵੀ ਅਸੰਤੁਲਨ ਜਾਂ ਜ਼ਮੀਨ ਨਾਲ ਸੰਪਰਕ ਦੀ ਗੜਬੜ ਹੋਈ, ਤਾਂ ਕੈਚ ਰੱਦ ਕੀਤਾ ਜਾ ਸਕਦਾ ਹੈ। ਭਾਵ ਸਾਫ਼ ਹੈ ਕਿ ਪਹਿਲਾਂ ਕੈਚ ਪੂਰਾ ਕਰੋ, ਫਿਰ ਜਸ਼ਨ ਮਨਾਓ।
ਖੇਡ ਦੀਆਂ ਸ਼ਰਤਾਂ ਦੇ ਕਲਾਜ਼ 33.3 ਅਨੁਸਾਰ, ਕੈਚ ਲੈਣ ਦੀ ਪ੍ਰਕਿਰਿਆ ਉਦੋਂ ਸ਼ੁਰੂ ਮੰਨੀ ਜਾਵੇਗੀ ਜਦੋਂ ਗੇਂਦ ਪਹਿਲੀ ਵਾਰ ਫੀਲਡਰ ਦੇ ਸਰੀਰ ਦੇ ਸੰਪਰਕ ਵਿੱਚ ਆਉਂਦੀ ਹੈ ਅਤੇ ਇਹ ਉਦੋਂ ਖ਼ਤਮ ਮੰਨੀ ਜਾਵੇਗੀ ਜਦੋਂ ਫੀਲਡਰ ਦਾ ਗੇਂਦ ਅਤੇ ਆਪਣੀ ਹਰਕਤ ਦੋਵਾਂ 'ਤੇ ਪੂਰੀ ਤਰ੍ਹਾਂ ਕੰਟਰੋਲ ਹੋ ਜਾਵੇਗਾ।
ਹਾਲਾਂਕਿ, ਇਹ ਨਿਯਮ ਕੋਈ ਨਵਾਂ ਨਹੀਂ ਹੈ, ਪਰ BCCI ਨੇ 25 ਮਾਰਚ ਨੂੰ ਕਪਤਾਨਾਂ ਨਾਲ ਹੋਈ ਮੀਟਿੰਗ ਵਿੱਚ ਇਸ ਦੀ ਮਹੱਤਤਾ 'ਤੇ ਜ਼ੋਰ ਦਿੱਤਾ। ਅਧਿਕਾਰੀਆਂ ਨੇ ਕਈ ਵੀਡੀਓ ਕਲਿੱਪਾਂ ਦਿਖਾਈਆਂ, ਜਿਨ੍ਹਾਂ ਵਿੱਚ ਹਾਲ ਹੀ ਵਿੱਚ ਹੋਏ ਟੀ-20 ਵਿਸ਼ਵ ਕੱਪ ਦੀਆਂ ਉਦਾਹਰਣਾਂ ਵੀ ਸ਼ਾਮਲ ਸਨ, ਜਿੱਥੇ ਪੂਰੀ ਤਰ੍ਹਾਂ ਕੰਟਰੋਲ ਨਾ ਹੋਣ ਕਾਰਨ ਕੈਚ ਨੂੰ ਅਵੈਧ ਘੋਸ਼ਿਤ ਕਰ ਦਿੱਤਾ ਗਿਆ ਸੀ। ਭਾਰਤ ਦੇ ਸਾਬਕਾ ਤੇਜ਼ ਗੇਂਦਬਾਜ਼ ਜਵਗਲ ਸ਼੍ਰੀਨਾਥ ਅਤੇ ਐਲੀਟ ਅੰਪਾਇਰ ਨਿਤਿਨ ਮੇਨਨ ਨੇ 90 ਮਿੰਟ ਦੇ ਇਸ ਸੈਸ਼ਨ ਦੌਰਾਨ ਇਸ ਵਿਸ਼ੇ 'ਤੇ ਚਰਚਾ ਕੀਤੀ।
ਜਾਰੀ ਰਹੇਗਾ ਇਮਪੈਕਟ ਪਲੇਅਰ ਨਿਯਮ
ਪਿਛਲੇ ਕੁਝ ਸਮੇਂ ਤੋਂ 'ਇਮਪੈਕਟ ਪਲੇਅਰ' ਨਿਯਮ ਚਰਚਾ ਅਤੇ ਬਹਿਸ ਦਾ ਕੇਂਦਰ ਬਣਿਆ ਹੋਇਆ ਹੈ। ਕੁਝ ਟੀਮਾਂ ਨੇ ਇਸ ਨੂੰ ਗੇਮ-ਚੇਂਜਰ ਦੱਸਿਆ, ਜਦਕਿ ਕੁਝ ਖਿਡਾਰੀਆਂ ਨੇ ਇਸ ਨੂੰ ਕ੍ਰਿਕਟ ਦੀ ਰਵਾਇਤੀ ਭੂਮਿਕਾ ਦੇ ਖਿਲਾਫ ਮੰਨਿਆ।
ਪਰ BCCI ਨੇ ਇੱਥੇ ਵੀ ਸਪੱਸ਼ਟ ਕਰ ਦਿੱਤਾ ਹੈ ਕਿ ਇਹ ਨਿਯਮ ਅਜੇ ਹਟਣ ਵਾਲਾ ਨਹੀਂ ਹੈ। ਕੁਝ ਖਿਡਾਰੀਆਂ ਵੱਲੋਂ ਚਿੰਤਾ ਜ਼ਾਹਰ ਕੀਤੇ ਜਾਣ ਦੇ ਬਾਵਜੂਦ, BCCI ਅਤੇ IPL ਅਧਿਕਾਰੀਆਂ ਨੇ ਸਾਫ਼ ਕੀਤਾ ਕਿ ਇਹ ਨਿਯਮ ਘੱਟੋ-ਘੱਟ 2027 ਸੀਜ਼ਨ ਤੱਕ ਜਾਰੀ ਰਹੇਗਾ।
ਅਕਸ਼ਰ ਪਟੇਲ ਨੇ ਕੀਤੀ ਆਲੋਚਨਾ
ਦਿੱਲੀ ਕੈਪੀਟਲਜ਼ ਦੇ ਕਪਤਾਨ ਅਕਸ਼ਰ ਪਟੇਲ ਨੇ ਇਮਪੈਕਟ ਪਲੇਅਰ ਨਿਯਮ ਦੀ ਆਲੋਚਨਾ ਕੀਤੀ ਸੀ। ਉਨ੍ਹਾਂ ਕਿਹਾ ਸੀ, "ਮੈਨੂੰ ਇਹ ਨਿਯਮ ਪਸੰਦ ਨਹੀਂ ਹੈ ਕਿਉਂਕਿ ਮੈਂ ਇੱਕ ਆਲਰਾਊਂਡਰ ਹਾਂ। ਪਹਿਲਾਂ, ਤੁਸੀਂ ਬੈਟਿੰਗ ਅਤੇ ਬੌਲਿੰਗ ਦੋਵਾਂ ਲਈ ਇੱਕ ਆਲਰਾਊਂਡਰ ਨੂੰ ਚੁਣਦੇ ਸੀ, ਪਰ ਇਸ ਨਿਯਮ ਕਾਰਨ ਹੁਣ ਟੀਮਾਂ ਸਪੈਸ਼ਲਿਸਟ ਖਿਡਾਰੀਆਂ ਨੂੰ ਜ਼ਿਆਦਾ ਪਸੰਦ ਕਰਦੀਆਂ ਹਨ।"