ਬੰਗਲਾਦੇਸ਼ ਨੇ ਆਸਟ੍ਰੇਲੀਆ ਨੂੰ ਉਸੇ ਦੀ ਧਰਤੀ 'ਤੇ ਟੈਸਟ ਮੈਚ 'ਚ ਹਰਾ ਕੇ ਰਚਿਆ ਇਤਿਹਾਸ

ਜੇਐੱਨਐੱਨ, ਨਵੀਂ ਦਿੱਲੀ : ਫਿਲਮਾਂ ਦੀ ਦੁਨੀਆ ਵਿਚ ਸਭ ਤੋਂ ਖੂਬਸੂਰਤ ਕਹਾਣੀ ਉਹ ਹੁੰਦੀ ਹੈ ਜਿਸਦਾ ਨਾਇਕ ਬਹੁਤ ਹੀ ਵੱਡੀ ਨਾਕਾਮੀ ਦੇ ਬਾਅਦ ਮੁੜ ਖੜ੍ਹਾ ਹੁੰਦਾ ਹੈ ਤੇ ਅੰਤ ’ਚ ਜਿੱਤ ਜਾਂਦਾ ਹੈ। ਹਿੰਦੀ ਫਿਲਮਾਂ ਵਿਚ ਇਸ ਨੂੰ ਚੰਗਾ ਅੰਤ ਕਿਹਾ ਜਾਂਦਾ ਹੈ ਪਰ ਦੁਨੀਆ ਬੰਗਲਾਦੇਸ਼ ਦੇ ਸਬੰਧ ’ਚ ਵੀ ਇਹੀ ਕਹਾਣੀ ਬਿਆਨ ਕਰ ਸਕਦੀ ਹੈ। ਪ੍ਰੈਕਟਿਸ ਮੈਚ ਵਿਚ ਸਿਰਫ 54 ਦੌੜਾਂ 'ਤੇ ਸਿਮਟਣ ਦੇ ਬਾਅਦ ਸਖਤ ਨਿਖੇਧੀ ਦਾ ਸ਼ਿਕਾਰ ਹੋਏ ਬੰਗਲਾਦੇਸ਼ ਨੇ ਆਸਟ੍ਰੇਲੀਆ ਨੂੰ ਉਸ ਦੀ ਧਰਤੀ 'ਤੇ ਪਹਿਲੇ ਟੈਸਟ ਮੈਚ ਵਿਚ ਹਰਾਉਂਦਿਆਂ ਇਤਿਹਾਸ ਰਚ ਦਿੱਤਾ। ਐਤਵਾਰ ਨੂੰ ਖ਼ਤਮ ਹੋਏ ਡਾਰਵਿਨ ਟੈਸਟ ਵਿਚ ਬੇਊ ਵੈਬਸਟਰ ਵੱਲੋਂ ਸੁੱਟੀ ਗਈ ਛੋਟੀ ਅਤੇ ਆਫ ਸਟੰਪ ਦੇ ਬਾਹਰ ਦੀ ਗੇਂਦ 'ਤੇ ਮੋਮਿਨੁਲ ਨੇ ਕੱਟ ਸ਼ਾਟ ਖੇਡਿਆ ਅਤੇ ਗੇਂਦ ਡੀਪ ਬੈਕਵਰਡ ਪੁਆਇੰਟ ਦੀ ਦਿਸ਼ਾ ਤੋਂ ਹੁੰਦੀ ਹੋਈ ਸੀਮਾਰੇਖਾ ਪਾਰ ਕਰ ਗਈ। ਬੰਗਲਾਦੇਸ਼ ਦੇ ਕੋਚ ਫਿਲ ਸਿਮਨਸ ਨੇ ਉੱਠ ਕੇ ਕਪਤਾਨ ਨਜ਼ਮੁਲ ਹਸਨ ਸ਼ਾਂਤੋ ਨੂੰ ਗਲੇ ਲਗਾਇਆ ਅਤੇ ਇਤਿਹਾਸ ਦੇ ਪੰਨਿਆਂ ਵਿਚ ਦਰਜ ਹੋਈ ਆਸਟ੍ਰੇਲੀਆ ਦੇ ਖ਼ਿਲਾਫ਼ ਆਸਟ੍ਰੇਲੀਆ ਵਿਚ ਬੰਗਲਾਦੇਸ਼ ਦੀ ਪਹਿਲੀ ਟੈਸਟ ਜਿੱਤ। ਬੰਗਲਾਦੇਸ਼ ਨੇ ਨੌਂ ਵਿਕਟਾਂ ਨਾਲ ਪਹਿਲਾ ਟੈਸਟ ਮੈਚ ਜਿੱਤ ਕੇ ਦੋ ਮੈਚਾਂ ਦੀ ਸੀਰੀਜ਼ ਵਿਚ 1-0 ਦੀ ਬੜ੍ਹਤ ਹਾਸਲ ਕੀਤੀ ਹੈ। ਭਾਰਤ ਨੂੰ ਆਸਟ੍ਰੇਲੀਆ ਵਿਚ ਪਹਿਲੀ ਟੈਸਟ ਜਿੱਤ ਲਈ 12 ਮੈਚਾਂ ਦਾ ਇੰਤਜ਼ਾਰ ਕਰਨਾ ਪਿਆ ਸੀ, ਜਦਕਿ ਪਾਕਿਸਤਾਨ ਨੂੰ ਸੱਤ ਮੈਚਾਂ ਤੋਂ ਬਾਅਦ ਆਸਟ੍ਰੇਲੀਆ ਵਿਚ ਪਹਿਲੀ ਟੈਸਟ ਜਿੱਤ ਮਿਲੀ ਸੀ। ਇਸੇ ਤਰ੍ਹਾਂ, ਸ੍ਰੀਲੰਕਾ ਨੂੰ 15 ਟੈਸਟ ਮੈਚਾਂ ਤੋਂ ਬਾਅਦ ਜਿੱਤ ਮਿਲੀ ਸੀ ਪਰ ਬੰਗਲਾਦੇਸ਼ ਨੇ ਆਪਣੇ ਤੀਜੇ ਹੀ ਮੈਚ ਵਿਚ ਆਸਟ੍ਰੇਲੀਆ ਨੂੰ ਉਸ ਦੀ ਧਰਤੀ 'ਤੇ ਹਰਾਇਆ।