ਭਾਰਤ-ਨਿਊਜ਼ੀਲੈਂਡ ਵਨਡੇ ਤੋਂ ਪਹਿਲਾਂ ਨੈੱਟ ਪ੍ਰੈਕਟਿਸ 'ਚ ਗਰਮਾਇਆ ਮਾਹੌਲ, ਆਕਿਬ ਨਬੀ ਦੀ ਘਾਤਕ ਸਵਿੰਗ ਅੱਗੇ ਜੂਝਦੇ ਨਜ਼ਰ ਆਏ ਰੋਹਿਤ-ਕੋਹਲੀ

ਅਭਿਆਸ ਸੈਸ਼ਨ ਦੀ ਸ਼ੁਰੂਆਤ ‘ਰੈਜ਼ਿਸਟੈਂਸ ਬੈਂਡ’ ਦੀ ਵਰਤੋਂ ਕਰਕੇ ਹਲਕੀ ਸਟ੍ਰੈਚਿੰਗ ਕਸਰਤਾਂ ਨਾਲ ਹੋਈ। ਇਸ ਤੋਂ ਬਾਅਦ ਵਿਰਾਟ ਕੋਹਲੀ ਸੈਂਟਰ ਵਿਕਟ ’ਤੇ ਪਹੁੰਚੇ। ਭਾਰਤੀ ਟੀਮ ਦੇ ਨੰਬਰ ਤਿੰਨ ਬੱਲੇਬਾਜ਼ ਨੇ ਪਹਿਲਾਂ ‘ਥ੍ਰੋ-ਡਾਊਨ’ ਦਾ ਸਾਹਮਣਾ ਕੀਤਾ ਤੇ ਫਿਰ ਆਕਿਬ ਨਬੀ, ਗੁਰਨੂਰ ਬਰਾੜ ਤੇ ਅੰਸ਼ੁਲ ਕੰਬੋਜ ਦੀਆਂ ਗੇਂਦਾਂ ਦਾ ਸਾਹਮਣਾ ਕੀਤਾ। ਹਾਲਾਂਕਿ ਸਵੇਰ ਦਾ ਮੌਸਮ ਅਭਿਆਸ ਲਈ ਬਹੁਤ ਵਧੀਆ ਸੀ ਪਰ ਗੇਂਦਬਾਜ਼ਾਂ ਨੇ ਸਟੀਕ ਲਾਈਨ ਤੇ ਲੈਂਥ ਬਣਾਈ ਰੱਖਦੇ ਹੋਏ ਬੱਲੇਬਾਜ਼ਾਂ ਨੂੰ ਖੁੱਲ੍ਹ ਕੇ ਖੇਡਣ ਦਾ ਕੋਈ ਮੌਕਾ ਨਹੀਂ ਦਿੱਤਾ। ਆਕਿਬ ਨਬੀ ਨੇ ਮੌਸਮੀ ਹਾਲਾਤਾਂ ਦਾ ਸ਼ਾਨਦਾਰ ਫਾਇਦਾ ਉਠਾਇਆ ਤੇ ਲਗਾਤਾਰ ਗੇਂਦ ਨੂੰ ਦੋਵਾਂ ਸੱਜੇ ਹੱਥ ਦੇ ਬੱਲੇਬਾਜ਼ਾਂ ਤੋਂ ਦੂਰ ਸਵਿੰਗ ਕੀਤਾ। ਕਈ ਮੌਕਿਆਂ 'ਤੇ ਉਸ ਦੀਆਂ ਗੇਂਦਾਂ ਰੋਹਿਤ ਅਤੇ ਕੋਹਲੀ ਦੇ ਬੱਲਿਆਂ ਦੇ ਬਾਹਰੀ ਕਿਨਾਰੇ ਨੂੰ ਲੱਗਣ ਦੇ ਬਿਲਕੁਲ ਨੇੜੇ ਪਹੁੰਚ ਗਈਆਂ ਸਨ। ਇਸ ਦੌਰਾਨ ਗੁਰਨੂਰ ਬਰਾੜ ਨੇ ਲਗਾਤਾਰ ਇੱਕੋ ਜਿਹੀ ਲੈਂਥ 'ਤੇ ਗੇਂਦਬਾਜ਼ੀ ਕੀਤੀ ਅਤੇ ਅੰਸ਼ੁਲ ਕੰਬੋਜ ਨੇ ਗੇਂਦ ਨੂੰ ਦੋਵਾਂ ਦਿਸ਼ਾਵਾਂ ਵਿੱਚ ਸਵਿੰਗ ਕਰਕੇ ਬੱਲੇਬਾਜ਼ਾਂ ਦੀਆਂ ਮੁਸ਼ਕਲਾਂ ਹੋਰ ਵਧਾ ਦਿੱਤੀਆਂ। ਕੋਹਲੀ ਨੇ ਕੁਝ ਸ਼ਾਨਦਾਰ ‘ਕਵਰ ਡਰਾਈਵ’ ਖੇਡ ਦੋਵੇਂ ਬੱਲੇਬਾਜ਼ਾਂ ਨੇ ਆਪਣੇ ਪੈਡਾਂ ਵੱਲ ਸੇਧਿਤ ਗੇਂਦਾਂ ਨੂੰ ਆਸਾਨੀ ਨਾਲ ਸੰਭਾਲਿਆ ਪਰ ਉਨ੍ਹਾਂ ਨੂੰ ਨਬੀ ਦੀਆਂ ਗੇਂਦਾਂ ਦੇ ਵਿਰੁੱਧ ਵਾਧੂ ਸਾਵਧਾਨੀ ਵਰਤਣੀ ਪਈ ਜੋ ਵਾਪਸ ਅੰਦਰ ਆ ਗਈਆਂ। ਅਕੀਬ ਨੇ ਲਗਪਗ ਇੱਕ ਘੰਟੇ ਤੱਕ ਸ਼ਾਨਦਾਰ ਲੈਅ ’ਚ ਗੇਂਦਬਾਜ਼ੀ ਕੀਤੀ।