ਟੀਮ ਤੋਂ ਬਾਹਰ ਹੋਣ ਤੋਂ ਬਾਅਦ ਸ਼ਾਨਦਾਰ ਵਾਪਸੀ : ਦੇਵਦੱਤ ਪਡਿੱਕਲ ਨੇ ਗਾਲੇ ਟੈਸਟ 'ਚ 167 ਦੌੜਾਂ ਬਣਾ ਕੇ ਲਿਖਿਆ ਨਵਾਂ ਇਤਿਹਾਸ

ਸੈਂਕੜਾ ਮਾਰਨ ਤੋਂ ਬਾਅਦ ਦੇਵਦੱਤ ਨੇ ਕਿਹਾ ਕਿ ਮੈਨੂੰ ਪਤਾ ਸੀ ਕਿ ਇੱਥੋਂ ਦੀ ਤੇਜ਼ ਗਰਮੀ ਵਿਚਾਲੇ ਗਾਲੇ ਦੀ ਨਮੀ ਵਾਲੀ ਪਿੱਚ 'ਤੇ ਬੱਲੇਬਾਜ਼ੀ ਕਰਨਾ ਆਸਾਨ ਨਹੀਂ ਹੋਵੇਗਾ। ਵਿਕਟ ਬੱਲੇਬਾਜ਼ੀ ਲਈ ਬਹੁਤ ਆਸਾਨ ਨਹੀਂ ਸੀ। ਮੈਨੂੰ ਇਹ ਵੀ ਪਤਾ ਸੀ ਕਿ ਥਕਾਵਟ ਹੋਵੇਗੀ। ਸਰੀਰ ਤੋਂ ਬਹੁਤ ਸਾਰਾ ਪਾਣੀ ਨਿਕਲੇਗਾ। ਮੈਂ ਇਨ੍ਹਾਂ ਹੀ ਤਰ੍ਹਾਂ ਦੇ ਹਾਲਾਤ ਲਈ ਤਿਆਰੀ ਕੀਤੀ ਸੀ। ਭਾਰਤੀ ਟੀਮ ਮੈਨੇਜਮੈਂਟ ਅਤੇ ਦੁਨੀਆ ਭਾਵੇਂ ਹੁਣ ਦੇਵਦੱਤ ਦਾ ਗੁਣਗਾਨ ਕਰ ਰਹੀ ਹੋਵੇ, ਪਰ ਜੇ ਸਾਈ ਸੁਦਰਸ਼ਨ ਜ਼ਖ਼ਮੀ ਨਾ ਹੁੰਦਾ ਤਾਂ ਉਹ ਇੱਥੇ ਨੰਬਰ ਤਿੰਨ 'ਤੇ ਬੱਲੇਬਾਜ਼ੀ ਕਰਨ ਨਹੀਂ ਉਤਰਦਾ। ਦੇਵਦੱਤ ਨੇ ਮੌਕੇ ਦਾ ਫਾਇਦਾ ਉਠਾਇਆ। ਉਸਦੀ ਪਾਰੀ ਨੇ ਸਾਫ਼ ਦੱਸਿਆ ਕਿ ਉਸਨੇ ਆਪਣਾ ਬੱਲੇਬਾਜ਼ੀ ਸਟਾਂਸ ਬਦਲਿਆ ਹੈ। ਉਸਦਾ ਬੈਕਲਿਫਟ ਵੀ ਬਦਲ ਗਿਆ ਹੈ ਅਤੇ ਉਹ ਮਾਨਸਿਕ ਤੌਰ 'ਤੇ ਹੋਰ ਮਜ਼ਬੂਤ ਹੋ ਗਿਆ ਹੈ। ਪਹਿਲਾਂ ਉਸਦੀ ਬੱਲੇਬਾਜ਼ੀ ਵਿਚ ਖਿੱਚ ਨਾਲ ਡਿਫੈਂਸ ਦਾ ਸੁਮੇਲ ਜ਼ਿਆਦਾ ਨਹੀਂ ਦਿਖਾਈ ਦਿੰਦਾ ਸੀ ਪਰ ਹੁਣ ਉਸਨੇ ਆਪਣੇ ਤਕਨੀਕੀ ਪੱਖਾਂ ਨੂੰ ਸਕਾਰਾਤਮਕ ਤੌਰ 'ਤੇ ਬਦਲ ਦਿੱਤਾ ਹੈ। ਇਸ ਬਾਰੇ ਉਸਨੇ ਬੈਂਗਲੁਰੂ ਵਿਚ ਆਪਣੇ ਬਚਪਨ ਦੇ ਕੋਚ ਮੁਹੰਮਦ ਨਸੀਰੂਦੀਨ ਨਾਲ ਕਾਫੀ ਤਿਆਰੀ ਕੀਤੀ।