- ਸ਼ਹਿਰ ਚੁਣੋ
- ਈ-ਪੇਪਰ
- ਵੈੱਬ ਸਟੋਰੀਜ਼
- ਸ਼ਹਿਰ ਚੁਣੋ
- ਈ-ਪੇਪਰ
- ਵੈੱਬ ਸਟੋਰੀਜ਼
ਦਿੱਲੀ ’ਚ ਹੋਣ ਜਾ ਰਿਹਾ ਕੌਮਾਂਤਰੀ ਚੌਲ ਸੰਮੇਲਨ, ਤੁਹਾਡੇ ਖੇਤ ਦਾ ਝੋਨਾ ਵੀ ਜਾ ਸਕਦੈ ਵਿਦੇਸ਼! ਜਾਣੋ ਕਿਵੇਂ ਕਰਨਾ ਹੈ ਰਜਿਸਟ੍ਰੇਸ਼ਨ
ਦਿੱਲੀ ’ਚ 23 ਤੋਂ 25 ਅਕਤੂਬਰ 2026 ਤੱਕ ਭਾਰਤ ਕੌਮਾਂਤਰੀ ਚੌਲ ਸੰਮੇਲਨ (BIRC 2026) ਕਰਵਾਇਆ ਜਾਵੇਗਾ। ਇਸ ਦਾ ਉਦੇਸ਼ ਭਾਰਤੀ ਚੌਲਾਂ ਨੂੰ ਵਿਸ਼ਵ ਬਾਜ਼ਾਰ ’ਚ ਉਤਸ਼ਾਹਿਤ ਕਰਨਾ ਹੈ। ਇਸ ਸੰਮੇਲਨ ’ਚ ਦੇਸ਼-ਵਿਦੇਸ਼ ਦੇ ਵਪਾਰੀ, ਵਿਗਿਆਨੀ ਤੇ ਕਿਸਾਨ ਇੱਕ ਮੰਚ ’ਤੇ ਇਕੱਠੇ ਹੋ ਕੇ ਚੌਲ ਉਦਯੋਗ ’ਚ ਨਵੀਂ ਤਕਨੀਕ ਤੇ ਟਿਕਾਊ ਖੇਤੀ ਬਾਰੇ ਚਰਚਾ ਕਰਨਗੇ। ਇਸ ਦੇ ਨਾਲ ਹੀ ਕਿਸਾਨਾਂ ਨੂੰ ਕੌਮਾਂਤਰੀ ਖਰੀਦਦਾਰਾਂ ਨਾਲ ਜੁੜਨ ਦਾ ਮੌਕਾ ਵੀ ਮਿਲੇਗਾ।
Posted By Paramjit Kaur
Publish Date: Sat, 10 Oct 2026 11:58 AM (IST)
Updated Date: Sat, 10 Oct 2026 12:03 PM (IST)
ਬਿਜ਼ਨਸ ਡੈਸਕ, ਨਵੀਂ ਦਿੱਲੀ : ਦਿੱਲੀ ’ਚ ਅਕਤੂਬਰ ਮਹੀਨੇ ਦੌਰਾਨ ਭਾਰਤ ਕੌਮਾਂਤਰੀ ਚੌਲ ਸੰਮੇਲਨ (Bharat International Rice Conference 2026) ਕਰਵਾਇਆ ਜਾ ਰਿਹਾ ਹੈ। ਇਸ ’ਚ ਦੇਸ਼-ਵਿਦੇਸ਼ ਦੇ ਚੌਲ ਨਿਰਯਾਤਕ, ਦਰਾਮਦਕਾਰ, ਵਪਾਰੀ, ਨੀਤੀ ਨਿਰਮਾਤਾ, ਖੋਜਕਰਤਾ ਤੇ ਖੇਤੀਬਾੜੀ ਖੇਤਰ ਨਾਲ ਜੁੜੇ ਵਿਗਿਆਨੀ ਇੱਕ ਮੰਚ ’ਤੇ ਇਕੱਠੇ ਹੋਣਗੇ।
ਇਸ ਸੰਮੇਲਨ ਦਾ ਉਦੇਸ਼ ਭਾਰਤੀ ਚੌਲਾਂ ਨੂੰ ਕੌਮਾਂਤਰੀ ਬਾਜ਼ਾਰ ’ਚ ਉਤਸ਼ਾਹਿਤ ਕਰਨਾ, ਨਵੇਂ ਖਰੀਦਦਾਰਾਂ ਨਾਲ ਸੰਪਰਕ ਵਧਾਉਣਾ ਤੇ ਚੌਲ ਉਦਯੋਗ ’ਚ ਤਕਨੀਕ ਤੇ ਟਿਕਾਊ ਖੇਤੀ ਨੂੰ ਉਤਸ਼ਾਹਿਤ ਕਰਨਾ ਹੈ। ਝੋਨੇ ਦੀ ਖੇਤੀ ਕਰਨ ਵਾਲੇ ਕਿਸਾਨਾਂ, ਕਿਸਾਨ ਉਤਪਾਦਕ ਸੰਗਠਨਾਂ (FPO), ਚੌਲ ਮਿੱਲ ਸੰਚਾਲਕਾਂ ਤੇ ਖੇਤੀਬਾੜੀ ਕਾਰੋਬਾਰ ਨਾਲ ਜੁੜੇ ਉੱਦਮੀਆਂ ਲਈ ਵੀ ਇਹ ਸਮਾਗਮ ਲਾਹੇਵੰਦ ਸਾਬਤ ਹੋ ਸਕਦਾ ਹੈ।
ਕਦੋਂ ਤੇ ਕਿੱਥੇ ਹੋਵੇਗਾ ਸੰਮੇਲਨ?
ਭਾਰਤ ਕੌਮਾਂਤਰੀ ਚੌਲ ਸੰਮੇਲਨ (BIRC 2026) 23 ਤੋਂ 25 ਅਕਤੂਬਰ 2026 ਤੱਕ ਨਵੀਂ ਦਿੱਲੀ ਦੇ ਭਾਰਤ ਮੰਡਪਮ ’ਚ ਕਰਵਾਇਆ ਜਾਵੇਗਾ। ਭਾਰਤੀ ਚੌਲ ਨਿਰਯਾਤਕ ਮਹਾਸੰਘ (Indian Rice Exporters' Federation- IREF) ਇਸ ਸਮਾਗਮ ਦਾ ਮੁੱਖ ਪ੍ਰਬੰਧਕ ਹੈ। ਅਧਿਕਾਰਤ ਵੈੱਬਸਾਈਟ ਮੁਤਾਬਕ, ਇਸ ਸੰਮੇਲਨ ’ਚ 120 ਤੋਂ ਵੱਧ ਦੇਸ਼ਾਂ ਦੀ ਭਾਗੀਦਾਰੀ ਤੇ ਲਗਭਗ 30,000 ਲੋਕਾਂ ਦੇ ਸ਼ਾਮਲ ਹੋਣ ਦੀ ਸੰਭਾਵਨਾ ਹੈ। ਇਸ ਦੌਰਾਨ ਚੌਲਾਂ ਦੀਆਂ ਵੱਖ-ਵੱਖ ਕਿਸਮਾਂ, ਕੌਮਾਂਤਰੀ ਵਪਾਰ, ਬਾਜ਼ਾਰ ਦੀ ਮੰਗ ਤੇ ਚੌਲ ਉਦਯੋਗ ਨਾਲ ਸਬੰਧਤ ਤਕਨੀਕਾਂ ਬਾਰੇ ਚਰਚਾ ਕੀਤੀ ਜਾਵੇਗੀ।
ਕਿਸਾਨਾਂ ਨੂੰ ਕੀ ਫ਼ਾਇਦਾ ਹੋ ਸਕਦਾ ਹੈ?
- ਕੌਮਾਂਤਰੀ ਖਰੀਦਦਾਰਾਂ ਤੱਕ ਪਹੁੰਚ: ਕਿਸਾਨਾਂ ਨੂੰ ਵਿਦੇਸ਼ੀ ਖਰੀਦਦਾਰਾਂ ਨਾਲ ਸੰਪਰਕ ਬਣਾਉਣ ਦਾ ਮੌਕਾ ਮਿਲ ਸਕਦਾ ਹੈ।
- ਚੌਲਾਂ ਦੀ ਮੰਗ ਬਾਰੇ ਜਾਣਕਾਰੀ: ਬਾਸਮਤੀ ਤੇ ਗੈਰ-ਬਾਸਮਤੀ ਚੌਲਾਂ ਦੀ ਮੰਗ ਨੂੰ ਸਮਝਣ ’ਚ ਮਦਦ ਮਿਲੇਗੀ।
- ਨਵੀਂ ਤਕਨੀਕ ਦੀ ਜਾਣਕਾਰੀ: ਖੇਤੀਬਾੜੀ, ਪ੍ਰੋਸੈਸਿੰਗ ਤੇ ਪੈਕਿੰਗ ਦੀਆਂ ਨਵੀਆਂ ਤਕਨੀਕਾਂ ਬਾਰੇ ਜਾਣਨ ਦਾ ਮੌਕਾ ਮਿਲੇਗਾ।
- ਕੌਮਾਂਤਰੀ ਬਾਜ਼ਾਰ ਦੀ ਜਾਣਕਾਰੀ: ਚੌਲਾਂ ਦੀਆਂ ਕੀਮਤਾਂ ਤੇ ਵਿਦੇਸ਼ੀ ਬਾਜ਼ਾਰ ਦੇ ਰੁਝਾਨਾਂ ਬਾਰੇ ਜਾਣਕਾਰੀ ਮਿਲ ਸਕੇਗੀ।
ਕਿਵੇਂ ਕਰ ਸਕਦੇ ਹੋ ਰਜਿਸਟ੍ਰੇਸ਼ਨ?
1. ਸਭ ਤੋਂ ਪਹਿਲਾਂ ਅਧਿਕਾਰਤ ਵੈੱਬਸਾਈਟ www.birc.in ’ਤੇ ਜਾਓ।
2. ਇੱਥੇ ਵਿਜ਼ਟਰ (Visitor), ਪ੍ਰਦਰਸ਼ਕ (Exhibitor) ਜਾਂ ਖਰੀਦਦਾਰ (Buyer) ਵਿੱਚੋਂ ਢੁੱਕਵਾਂ ਵਿਕਲਪ ਚੁਣੋ।
3. ਆਪਣਾ ਮੋਬਾਈਲ ਨੰਬਰ, ਦੇਸ਼ ਤੇ ਈਮੇਲ ਆਈਡੀ ਵਰਗੀ ਜਾਣਕਾਰੀ ਭਰੋ।
4. ਅਗਲੇ ਪੜਾਅ ’ਚ ਆਪਣੇ ਉਦਯੋਗ ਜਾਂ ਕਾਰੋਬਾਰ ਨਾਲ ਸਬੰਧਤ ਜਾਣਕਾਰੀ ਤੇ ਲੋੜੀਂਦੇ ਐਲਾਨ ਪੂਰੇ ਕਰੋ।
5. ਈਮੇਲ ’ਤੇ ਭੇਜੇ ਗਏ ਵਨ-ਟਾਈਮ ਪਾਸਵਰਡ (OTP) ਰਾਹੀਂ ਤਸਦੀਕ ਕਰਕੇ ਰਜਿਸਟ੍ਰੇਸ਼ਨ ਪੂਰੀ ਕਰੋ।
ਰਜਿਸਟ੍ਰੇਸ਼ਨ ਤੋਂ ਪਹਿਲਾਂ ਕਿਸਾਨ ਕੀ ਤਿਆਰੀ ਕਰਨ?
ਜੇਕਰ ਤੁਸੀਂ ਕਿਸਾਨ ਹੋ ਤੇ BIRC ਸੰਮੇਲਨ ’ਚ ਸ਼ਾਮਲ ਹੋਣ ਦੀ ਯੋਜਨਾ ਬਣਾ ਰਹੇ ਹੋ, ਤਾਂ ਕਿਸਾਨਾਂ ਤੇ FPO ਦੇ ਨੁਮਾਇੰਦਿਆਂ ਨੂੰ ਆਪਣੇ ਨਾਲ ਝੋਨੇ ਜਾਂ ਚੌਲਾਂ ਦੀ ਕਿਸਮ, ਉਤਪਾਦਨ ਦੀ ਮਾਤਰਾ, ਗੁਣਵੱਤਾ, ਉਪਲਬਧ ਸਟਾਕ ਤੇ ਵਿਕਰੀ ਨਾਲ ਸਬੰਧਤ ਜਾਣਕਾਰੀ ਤਿਆਰ ਰੱਖਣੀ ਚਾਹੀਦੀ ਹੈ।
ਜੇਕਰ ਤੁਹਾਡਾ ਉਦੇਸ਼ ਵਪਾਰੀਆਂ ਨਾਲ ਸੰਪਰਕ ਬਣਾਉਣਾ ਹੈ, ਤਾਂ ਆਪਣੇ ਉਤਪਾਦਾਂ ਦੀ ਪੂਰੀ ਜਾਣਕਾਰੀ ਤੇ ਸੰਪਰਕ ਵੇਰਵੇ ਵੀ ਨਾਲ ਰੱਖੋ। ਇਸ ਨਾਲ ਸੰਭਾਵੀ ਖਰੀਦਦਾਰਾਂ ਨਾਲ ਗੱਲਬਾਤ ਕਰਨਾ ਤੇ ਕਾਰੋਬਾਰੀ ਮੌਕਿਆਂ ਦੀ ਪਛਾਣ ਕਰਨਾ ਆਸਾਨ ਹੋ ਸਕਦਾ ਹੈ।