ਸਰਕਾਰੀ ਪਹਿਲ : ਜੇਬ 'ਚ ਪੈਸੇ ਨਾ ਵੀ ਹੋਣ ਤਾਂ ਵੀ ਨਹੀਂ ਰੁਕੇਗੀ ਖਰੀਦਦਾਰੀ, UPI ਨਾਲ ਲਿੰਕ ਕਰੋ ਕ੍ਰੈਡਿਟ ਕਾਰਡ; ਜਾਣੋ ਲਾਭ ਲੈਣ ਦਾ ਪੂਰਾ ਤਰੀਕਾ

ਬਿਜ਼ਨੈਸ ਡੈਸਕ, ਨਵੀਂ ਦਿੱਲੀ - ਅੱਜ ਦੇ ਸਮੇਂ ਵਿੱਚ ਸਰਕਾਰ ਵੱਲੋਂ ਕਈ ਯੋਜਨਾਵਾਂ ਚਲਾਈਆਂ ਜਾਂਦੀਆਂ ਹਨ। ਪਰ ਹਰ ਯੋਜਨਾ ਦਾ ਲਾਭ ਹਰ ਵਿਅਕਤੀ ਨਹੀਂ ਲੈ ਸਕਦਾ। ਸਰਕਾਰ ਲੋੜਵੰਦ ਲੋਕਾਂ ਲਈ ਯੋਜਨਾਵਾਂ ਚਲਾਉਂਦੀ ਹੈ, ਤਾਂ ਜੋ ਉਹ ਆਪਣੀਆਂ ਰੋਜ਼ਾਨਾ ਦੀਆਂ ਜ਼ਰੂਰਤਾਂ ਪੂਰੀਆਂ ਕਰ ਸਕਣ। ਇਸੇ ਤਹਿਤ ਕੇਂਦਰ ਸਰਕਾਰ ਵੱਲੋਂ ਛੋਟੇ ਕਾਰੋਬਾਰੀਆਂ ਅਤੇ ਰੇਹੜੀ-ਫੜ੍ਹੀ ਵਾਲਿਆਂ ਨੂੰ ਆਰਥਿਕ ਤੌਰ 'ਤੇ ਮਜ਼ਬੂਤ ਬਣਾਉਣ ਲਈ ਪੀਐੱਮ ਸਵਨਿਧੀ ਯੋਜਨਾ (PM SVANidhi Yojana) ਚਲਾਈ ਜਾ ਰਹੀ ਹੈ।

ਇਸ ਯੋਜਨਾ ਤਹਿਤ ਯੋਗ ਸਟ੍ਰੀਟ ਵੈਂਡਰਾਂ ਨੂੰ ਹੁਣ ₹30,000 ਤੱਕ ਦੀ ਲਿਮਟ ਵਾਲਾ ਰੁਪੇ ਕ੍ਰੈਡਿਟ ਕਾਰਡ ਵੀ ਦਿੱਤਾ ਜਾ ਰਿਹਾ ਹੈ। ਖ਼ਾਸ ਗੱਲ ਇਹ ਹੈ ਕਿ ਇਸ ਕਾਰਡ ਨੂੰ UPI ਨਾਲ ਲਿੰਕ ਕੀਤਾ ਜਾ ਸਕਦਾ ਹੈ। ਯਾਨੀ ਦੁਕਾਨਦਾਰ ਬਿਨਾਂ ਨਕਦੀ ਦੇ ਵੀ ਆਪਣੀ ਕ੍ਰੈਡਿਟ ਲਿਮਟ ਦੀ ਵਰਤੋਂ ਡਿਜੀਟਲ ਭੁਗਤਾਨ ਲਈ ਕਰ ਸਕਣਗੇ। ਕਾਰਡ 'ਤੇ ਬੈਂਕ ਦੀਆਂ ਸ਼ਰਤਾਂ ਮੁਤਾਬਕ 20 ਤੋਂ 50 ਦਿਨਾਂ ਤੱਕ ਵਿਆਜ-ਮੁਕਤ ਕ੍ਰੈਡਿਟ ਦੀ ਸਹੂਲਤ ਵੀ ਮਿਲੇਗੀ।

ਤਿੰਨ ਕਿਸ਼ਤਾਂ ਵਿੱਚ ਮਿਲਦਾ ਹੈ ਪੈਸਾ

ਪੀਐੱਮ ਸਵਨਿਧੀ ਯੋਜਨਾ ਦੀ ਸ਼ੁਰੂਆਤ ਕੋਰੋਨਾ ਮਹਾਮਾਰੀ ਦੌਰਾਨ ਰੇਹੜੀ-ਫੜ੍ਹੀ 'ਤੇ ਦੁਕਾਨ ਲਗਾਉਣ ਵਾਲੇ ਛੋਟੇ ਕਾਰੋਬਾਰੀਆਂ ਦੀ ਮਦਦ ਲਈ ਕੀਤੀ ਗਈ ਸੀ। ਇਸ ਯੋਜਨਾ ਤਹਿਤ ਲਾਭਪਾਤਰੀਆਂ ਨੂੰ ਬਿਨਾਂ ਕਿਸੇ ਗਾਰੰਟੀ ਦੇ 3 ਪੜਾਵਾਂ ਵਿੱਚ ਕਰਜ਼ਾ ਦਿੱਤਾ ਜਾਂਦਾ ਹੈ।

• ਪਹਿਲੀ ਕਿਸ਼ਤ ਵਿੱਚ ਵੱਧ ਤੋਂ ਵੱਧ ₹15,000 ਤੱਕ ਦਾ ਕਰਜ਼ਾ ਮਿਲਦਾ ਹੈ।

• ਦੂਜੀ ਕਿਸ਼ਤ ਵਿੱਚ ₹25,000 ਤੱਕ ਦਾ ਕਰਜ਼ਾ ਦਿੱਤਾ ਜਾਂਦਾ ਹੈ।

ਇਸ ਤੋਂ ਇਲਾਵਾ ਯੋਗ ਸਟ੍ਰੀਟ ਵੈਂਡਰਾਂ ਨੂੰ ਪੀਐੱਮ ਸਵਨਿਧੀ ਕ੍ਰੈਡਿਟ ਕਾਰਡ ਦਿੱਤਾ ਜਾਂਦਾ ਹੈ। ਇਸ ਦੀ ਵੱਧ ਤੋਂ ਵੱਧ ਕ੍ਰੈਡਿਟ ਲਿਮਟ ₹30,000 ਹੈ। ਹਾਲਾਂਕਿ, ਸ਼ੁਰੂਆਤ ਵਿੱਚ ਕਾਰਡ ਦੀ ਵਰਤੋਂ ਕਰਨ ਦੀ ਲਿਮਟ ₹10,000 ਰੱਖੀ ਜਾਂਦੀ ਹੈ। ਕਾਰਡ ਦੀ ਸਹੀ ਵਰਤੋਂ ਕਰਨ ਅਤੇ ਸਮੇਂ ਸਿਰ ਭੁਗਤਾਨ ਕਰਨ 'ਤੇ ਇਸ ਨੂੰ ਹੌਲੀ-ਹੌਲੀ ਵਧਾ ਕੇ ₹30,000 ਤੱਕ ਕੀਤਾ ਜਾ ਸਕਦਾ ਹੈ।

UPI ਰਾਹੀਂ ਕਰ ਸਕੋਗੇ ਭੁਗਤਾਨ, ਪੰਜ ਸਾਲ ਹੋਵੇਗੀ ਵੈਧਤਾ

ਇਸ ਕ੍ਰੈਡਿਟ ਕਾਰਡ ਦੀ ਸਭ ਤੋਂ ਵੱਡੀ ਖ਼ਾਸੀਅਤ ਇਹ ਹੈ ਕਿ ਇਸ ਨੂੰ ਲਾਭਪਾਤਰੀ ਦੀ UPI ID ਨਾਲ ਜੋੜਿਆ ਜਾ ਸਕਦਾ ਹੈ। ਇਸ ਨਾਲ ਦੁਕਾਨਦਾਰ ਆਪਣੀ ਕ੍ਰੈਡਿਟ ਲਿਮਟ ਰਾਹੀਂ UPI ਭੁਗਤਾਨ ਕਰ ਸਕਣਗੇ। ਕਾਰਡ ਜਾਰੀ ਕਰਨ ਵਾਲੇ ਬੈਂਕ ਦੀ ਨੀਤੀ ਅਨੁਸਾਰ 20 ਤੋਂ 50 ਦਿਨਾਂ ਤੱਕ ਵਿਆਜ-ਮੁਕਤ ਕ੍ਰੈਡਿਟ ਦੀ ਸਹੂਲਤ ਮਿਲੇਗੀ।

ਇਸ ਕਾਰਡ ਲਈ ਜੁਆਇਨਿੰਗ, ਐਨਰੋਲਮੈਂਟ, ਐਕਟੀਵੇਸ਼ਨ ਅਤੇ ਸਾਲਾਨਾ ਰੀਨਿਊਅਲ ਚਾਰਜ ਨਹੀਂ ਦੇਣਾ ਪਵੇਗਾ। ਯਾਨੀ ਇਹ ਲਾਈਫਟਾਈਮ ਮੁਫ਼ਤ ਕ੍ਰੈਡਿਟ ਕਾਰਡ ਹੋਵੇਗਾ। ਕਾਰਡ ਜਾਰੀ ਹੋਣ ਦੀ ਤਾਰੀਖ ਤੋਂ ਪੰਜ ਸਾਲ ਤੱਕ ਵੈਧ ਰਹੇਗਾ। ਹਾਲਾਂਕਿ, ਤੈਅ ਸਮੇਂ 'ਤੇ ਭੁਗਤਾਨ ਨਾ ਕਰਨ 'ਤੇ ਬਕਾਇਆ ਰਕਮ 'ਤੇ ਵਿਆਜ ਅਤੇ ਹੋਰ ਫੀਸਾਂ ਬੈਂਕ ਦੇ ਨਿਯਮਾਂ ਮੁਤਾਬਕ ਲੱਗ ਸਕਦੀਆਂ ਹਨ। ₹500 ਤੱਕ ਦੇ ਬਕਾਏ 'ਤੇ ਲੇਟ ਪੇਮੈਂਟ ਪੈਨਲਟੀ ਨਹੀਂ ਲੱਗੇਗੀ।

ਕੌਣ ਕਰ ਸਕਦਾ ਹੈ ਅਪਲਾਈ?

ਪੀਐੱਮ ਸਵਨਿਧੀ ਕ੍ਰੈਡਿਟ ਕਾਰਡ (PM SVANidhi Credit Card) ਲਈ ਅਪਲਾਈ ਕਰਨ ਵਾਲੇ ਵਿਅਕਤੀ ਦੀ ਉਮਰ 21 ਤੋਂ 65 ਸਾਲ ਦੇ ਵਿਚਕਾਰ ਹੋਣੀ ਚਾਹੀਦੀ ਹੈ। ਇਸ ਤੋਂ ਇਲਾਵਾ ਬਿਨੈਕਾਰ ਦਾ ਕਿਸੇ ਬੈਂਕ ਜਾਂ ਵਿੱਤੀ ਸੰਸਥਾ ਵਿੱਚ ਖਾਤਾ NPA ਜਾਂ ਰਾਈਟ-ਆਫ ਨਹੀਂ ਹੋਣਾ ਚਾਹੀਦਾ।

ਰਾਹਤ ਦੀ ਗੱਲ ਇਹ ਹੈ ਕਿ ਇਸ ਲਈ ਘੱਟੋ-ਘੱਟ ਕ੍ਰੈਡਿਟ ਸਕੋਰ ਦੀ ਕੋਈ ਲਾਜ਼ਮੀ ਸ਼ਰਤ ਨਹੀਂ ਰੱਖੀ ਗਈ ਹੈ।