SIP ਕੈਲਕੁਲੇਸ਼ਨ: ਹਰ ਮਹੀਨੇ ₹1000 ਨਿਵੇਸ਼ ਨਾਲ ਬਣੇਗਾ ₹13 ਲੱਖ ਦਾ ਫੰਡ, ਕੈਲਕੁਲੇਸ਼ਨ ਤੋਂ ਸਮਝੋ ਕਿੰਨੇ ਲੱਗਣਗੇ ਸਾਲ?

ਬਿਜ਼ਨੈੱਸ ਡੈਸਕ, ਨਵੀਂ ਦਿੱਲੀ। ਅੱਜ ਦੇ ਸਮੇਂ ਵਿੱਚ ਨਿਵੇਸ਼ ਸ਼ੁਰੂ ਕਰਨ ਲਈ ਵੱਡੀ ਤਨਖ਼ਾਹ ਜਾਂ ਮੋਟੀ ਰਕਮ ਹੋਣੀ ਜ਼ਰੂਰੀ ਨਹੀਂ ਹੈ। ਜੇਕਰ ਤੁਸੀਂ ਹਰ ਮਹੀਨੇ ਸਿਰਫ਼ ₹1000 ਵੀ ਬਚਾ ਸਕਦੇ ਹੋ ਤਾਂ ਮਿਊਚਲ ਫੰਡ ਦੀ ਸਿਸਟਮੈਟਿਕ ਇਨਵੈਸਟਮੈਂਟ ਪਲਾਨ (SIP) ਰਾਹੀਂ ਲੰਬੇ ਸਮੇਂ ਵਿੱਚ ਵਧੀਆ ਫੰਡ ਤਿਆਰ ਕਰ ਸਕਦੇ ਹੋ। ਅਸਲੀ ਫ਼ਾਇਦਾ ਉਦੋਂ ਮਿਲਦਾ ਹੈ, ਜਦੋਂ ਨਿਵੇਸ਼ ਲੰਬੇ ਸਮੇਂ ਤੱਕ ਜਾਰੀ ਰੱਖਿਆ ਜਾਵੇ ਅਤੇ ਮਿਲਣ ਵਾਲੇ ਰਿਟਰਨ 'ਤੇ ਵੀ ਰਿਟਰਨ ਮਿਲਦਾ ਰਹੇ। ਇਸ ਨੂੰ ਕੰਪਾਊਂਡਿੰਗ (Compounding) ਕਹਿੰਦੇ ਹਨ।

ਪਰ ਸਵਾਲ ਇਹ ਹੈ ਕਿ ਹਰ ਮਹੀਨੇ ₹1,000 ਦੀ SIP ਕਰਨ 'ਤੇ 20 ਸਾਲ ਬਾਅਦ ਕਿੰਨੀ ਰਕਮ ਜਮ੍ਹਾਂ ਹੋ ਸਕਦੀ ਹੈ? ਇਸ ਦਾ ਜਵਾਬ ਇਸ ਗੱਲ 'ਤੇ ਨਿਰਭਰ ਕਰੇਗਾ ਕਿ ਨਿਵੇਸ਼ 'ਤੇ ਸਾਲਾਨਾ ਕਿੰਨਾ ਰਿਟਰਨ ਮਿਲਦਾ ਹੈ।

20 ਸਾਲ ’ਚ ਆਪਣੀ ਜੇਬ੍ਹ 'ਚੋਂ ਕਿੰਨੇ ਪੈਸੇ ਲਗਾਓਗੇ?

ਜੇਕਰ ਤੁਸੀਂ ਹਰ ਮਹੀਨੇ ₹1,000 ਦੀ SIP ਸ਼ੁਰੂ ਕਰਦੇ ਹੋ ਤਾਂ ਇੱਕ ਸਾਲ ਵਿੱਚ ਤੁਹਾਡਾ ਨਿਵੇਸ਼ ₹12,000 ਹੋਵੇਗਾ। ਇਸੇ ਤਰ੍ਹਾਂ 20 ਸਾਲ ਤੱਕ ਨਿਵੇਸ਼ ਜਾਰੀ ਰੱਖਣ 'ਤੇ ਤੁਹਾਡੀ ਜੇਬ੍ਹ 'ਚੋਂ ਕੁੱਲ ₹2.40 ਲੱਖ ਲਗਾਏ ਜਾਣਗੇ।

ਹੁਣ ਇਸ ਰਕਮ 'ਤੇ ਮਿਲਣ ਵਾਲਾ ਰਿਟਰਨ ਜੁੜਦਾ ਜਾਵੇਗਾ। ਲੰਬੇ ਸਮੇਂ ਵਿੱਚ ਇਹੋ ਰਿਟਰਨ ਤੁਹਾਡੇ ਕੁੱਲ ਫੰਡ ਨੂੰ ਕਈ ਗੁਣਾ ਵਧਾ ਸਕਦਾ ਹੈ।

10% ਰਿਟਰਨ ਮਿਲਿਆ ਤਾਂ ਕਿੰਨਾ ਬਣੇਗਾ ਫੰਡ?

ਮੰਨ ਲਓ ਕਿ ਤੁਹਾਡੀ SIP 'ਤੇ ਸਾਲਾਨਾ ਔਸਤਨ 10% ਰਿਟਰਨ ਮਿਲਦਾ ਹੈ। ਇਸ ਸਥਿਤੀ ’ਚ 20 ਸਾਲ ਬਾਅਦ ਤੁਹਾਡਾ ਕੁੱਲ ਫੰਡ ਲਗਭਗ ₹7.18 ਲੱਖ ਹੋ ਸਕਦਾ ਹੈ।

ਕੁੱਲ ਨਿਵੇਸ਼: ₹2,40,000

ਅਨੁਮਾਨਿਤ ਰਿਟਰਨ: ₹4,78,000

20 ਸਾਲ ਬਾਅਦ ਕੁੱਲ ਫੰਡ: ₹7,18,000

ਯਾਨੀ ਤੁਸੀਂ ਆਪਣੀ ਜੇਬ੍ਹ 'ਚੋਂ ₹2.40 ਲੱਖ ਲਗਾਏ, ਜਦੋਂ ਕਿ ਕੰਪਾਊਂਡਿੰਗ ਦੇ ਕਾਰਨ ਲਗਭਗ ₹4.78 ਲੱਖ ਵਾਧੂ ਜੁੜ ਸਕਦੇ ਹਨ।

12% ਰਿਟਰਨ 'ਤੇ ਕਿੰਨਾ ਮਿਲੇਗਾ?

ਜੇਕਰ ਸਾਲਾਨਾ ਔਸਤ ਰਿਟਰਨ 12% ਰਹਿੰਦਾ ਹੈ ਤਾਂ 20 ਸਾਲ ਬਾਅਦ ਤੁਹਾਡਾ ਫੰਡ ਲਗਭਗ ₹9.11 ਲੱਖ ਹੋ ਸਕਦਾ ਹੈ।

ਕੁੱਲ ਨਿਵੇਸ਼: ₹2,40,000

ਅਨੁਮਾਨਿਤ ਰਿਟਰਨ: ₹6,71,000

20 ਸਾਲ ਬਾਅਦ ਕੁੱਲ ਫੰਡ: ₹9,11,000

ਧਿਆਨ ਦੇਣ ਵਾਲੀ ਗੱਲ ਇਹ ਹੈ ਕਿ 10% ਦੀ ਥਾਂ 12% ਰਿਟਰਨ ਮਿਲਣ 'ਤੇ ਅੰਤਿਮ ਫੰਡ ਲਗਭਗ ₹1.93 ਲੱਖ ਜ਼ਿਆਦਾ ਹੋ ਸਕਦਾ ਹੈ। ਇਸ ਤੋਂ ਪਤਾ ਲੱਗਦਾ ਹੈ ਕਿ ਲੰਬੇ ਸਮੇਂ ਵਿੱਚ ਰਿਟਰਨ ਦਾ ਛੋਟਾ ਜਿਹਾ ਅੰਤਰ ਵੀ ਵੱਡੀ ਰਕਮ ਦਾ ਫ਼ਰਕ ਪੈਦਾ ਕਰ ਸਕਦਾ ਹੈ।

15% ਰਿਟਰਨ 'ਤੇ ₹13 ਲੱਖ ਤੋਂ ਜ਼ਿਆਦਾ ਦਾ ਫੰਡ

ਜੇਕਰ ਨਿਵੇਸ਼ 'ਤੇ ਸਾਲਾਨਾ ਔਸਤਨ 15% ਰਿਟਰਨ ਮਿਲਦਾ ਹੈ, ਤਾਂ 20 ਸਾਲ ਬਾਅਦ ਫੰਡ ਲਗਭਗ ₹13.12 ਲੱਖ ਤੱਕ ਪਹੁੰਚ ਸਕਦਾ ਹੈ।

ਕੁੱਲ ਨਿਵੇਸ਼: ₹2,40,000

ਅਨੁਮਾਨਿਤ ਰਿਟਰਨ: ₹10,72,000

20 ਸਾਲ ਬਾਅਦ ਕੁੱਲ ਫੰਡ: ₹13,12,000

ਇਸ ਸਥਿਤੀ ਵਿੱਚ ਕੁੱਲ ਫੰਡ ਦਾ ਵੱਡਾ ਹਿੱਸਾ ਨਿਵੇਸ਼ ਤੋਂ ਮਿਲਣ ਵਾਲੇ ਰਿਟਰਨ ਤੋਂ ਤਿਆਰ ਹੋਵੇਗਾ। ਹਾਲਾਂਕਿ, 15% ਰਿਟਰਨ ਦੀ ਉਮੀਦ ਨੂੰ ਨਿਸ਼ਚਿਤ ਨਹੀਂ ਮੰਨਣਾ ਚਾਹੀਦਾ। ਇਸ ਦੇ ਲਈ ਬਾਜ਼ਾਰ ਵਿੱਚ ਜੋਖਮ ਵੀ ਚੁੱਕਣਾ ਪੈ ਸਕਦਾ ਹੈ।

SIP ਸ਼ੁਰੂ ਕਰਦੇ ਸਮੇਂ ਇਨ੍ਹਾਂ ਗੱਲਾਂ ਦਾ ਰੱਖੋ ਧਿਆਨ

SIP ਵਿੱਚ ਨਿਵੇਸ਼ ਦੀ ਸਭ ਤੋਂ ਵੱਡੀ ਖ਼ਾਸੀਅਤ ਨਿਯਮਿਤ ਨਿਵੇਸ਼ ਅਤੇ ਲੰਬੇ ਸਮੇਂ ਦਾ ਫ਼ਾਇਦਾ ਹੈ। ਛੋਟੀ ਰਕਮ ਤੋਂ ਸ਼ੁਰੂਆਤ ਕਰਨ ਤੋਂ ਬਾਅਦ ਆਮਦਨ ਵਧਣ 'ਤੇ ਨਿਵੇਸ਼ ਵੀ ਵਧਾਇਆ ਜਾ ਸਕਦਾ ਹੈ।

Disclaimer: ਮਿਊਚਲ ਫੰਡ ਬਾਜ਼ਾਰ ਦੇ ਜ਼ੋਖ਼ਮਾਂ ਦੇ ਅਧੀਨ ਹਨ। ਇਹ ਖ਼ਬਰ ਸਿਰਫ਼ ਆਮ ਜਾਣਕਾਰੀ ਲਈ ਹੈ। ਕਿਸੇ ਵੀ ਨਿਵੇਸ਼ ਤੋਂ ਪਹਿਲਾਂ ਮਾਹਰ (Expert) ਦੀ ਸਲਾਹ ਜ਼ਰੂਰ ਲਵੋ।

🏷️ Ta