- ਸ਼ਹਿਰ ਚੁਣੋ
- ਈ-ਪੇਪਰ
- ਵੈੱਬ ਸਟੋਰੀਜ਼
- ਸ਼ਹਿਰ ਚੁਣੋ
- ਈ-ਪੇਪਰ
- ਵੈੱਬ ਸਟੋਰੀਜ਼
Paytm Stock: 2026 ’ਚ ਹੁਣ ਤੱਕ 32% ਰਿਟਰਨ, ਅੱਗੇ ਵੀ 31% ਤੇਜ਼ੀ ਦੀ ਉਮੀਦ; ਕੀ ਲਿਸਟਿੰਗ ਕੀਮਤ ਤੋਂ ਪਾਰ ਜਾਵੇਗਾ ਸ਼ੇਅਰ?
ਪੇਟੀਐੱਮ ਦੇ ਸ਼ੇਅਰਾਂ ਨੇ ਇਸ ਸਾਲ ਹੁਣ ਤੱਕ 32 ਫ਼ੀਸਦੀ ਤੋਂ ਵੱਧ ਰਿਟਰਨ ਦਿੱਤਾ ਹੈ। ਬ੍ਰੋਕਰੇਜ ਫਰਮ ਨੋਮੁਰਾ ਨੇ ਸ਼ੇਅਰ ’ਚ 31 ਫ਼ੀਸਦੀ ਹੋਰ ਤੇਜ਼ੀ ਦਾ ਅਨੁਮਾਨ ਲਗਾਇਆ ਹੈ ਤੇ ਵੱਡਾ ਟਾਰਗੇਟ ਪ੍ਰਾਈਸ ਦਿੱਤਾ ਹੈ।
Posted By Paramjit Kaur
Publish Date: Thu, 15 Oct 2026 11:58 AM (IST)
Updated Date: Thu, 15 Oct 2026 12:01 PM (IST)
ਨਵੀਂ ਦਿੱਲੀ : ਦੇਸ਼ ਦੀ ਪ੍ਰਮੁੱਖ ਫਿਨਟੈੱਕ ਕੰਪਨੀ ਪੇਟੀਐੱਮ ਦੇ ਸ਼ੇਅਰਾਂ (Paytm Share Price) ਨੇ ਇਸ ਸਾਲ ਹੁਣ ਤੱਕ 32 ਫ਼ੀਸਦੀ ਤੋਂ ਵੱਧ ਰਿਟਰਨ ਦਿੱਤਾ ਹੈ ਤੇ ਅੱਗੇ ਵੀ ਇਨ੍ਹਾਂ ’ਚ ਤੇਜ਼ੀ ਦੀ ਉਮੀਦ ਹੈ। ਪੇਟੀਐੱਮ ਦੀ ਮੂਲ ਕੰਪਨੀ ‘ਵਨ 97 ਕਮਿਊਨੀਕੇਸ਼ਨਜ਼’ ’ਤੇ ਕਵਰੇਜ ਸ਼ੁਰੂ ਕਰਦਿਆਂ ਗਲੋਬਲ ਬ੍ਰੋਕਰੇਜ ਫਰਮ ਨੋਮੁਰਾ ਨੇ ਸ਼ੇਅਰ ਨੂੰ ‘BUY’ ਰੇਟਿੰਗ ਦਿੱਤੀ ਹੈ ਤੇ ਪ੍ਰਤੀ ਸ਼ੇਅਰ 2,250 ਰੁਪਏ ਦਾ ਟਾਰਗੇਟ ਪ੍ਰਾਈਸ ਤੈਅ ਕੀਤਾ ਹੈ। ਇਸ ਦਾ ਮਤਲਬ ਹੈ ਕਿ ਪਿਛਲੇ ਬੰਦ ਭਾਅ ਦੇ ਮੁਕਾਬਲੇ ਪੇਟੀਐੱਮ ਦੇ ਸ਼ੇਅਰ ’ਚ 31 ਫ਼ੀਸਦੀ ਤੱਕ ਹੋਰ ਤੇਜ਼ੀ ਆ ਸਕਦੀ ਹੈ। ਅੱਜ ਪੇਟੀਐੱਮ ਦੇ ਸ਼ੇਅਰ ਗਿਰਾਵਟ ਨਾਲ 1,700 ਰੁਪਏ ਦੇ ਪੱਧਰ ’ਤੇ ਕਾਰੋਬਾਰ ਕਰ ਰਹੇ ਹਨ ਤੇ ਕੰਪਨੀ ਦਾ ਮਾਰਕੀਟ ਕੈਪ ਲਗਭਗ 1.09 ਲੱਖ ਕਰੋੜ ਰੁਪਏ ਹੈ।
310 ਰੁਪਏ ਤੋਂ 1,855 ਰੁਪਏ ਤੱਕ ਪਹੁੰਚਿਆ ਸ਼ੇਅਰ
ਇਸ ਸਾਲ ਦੀ ਸ਼ੁਰੂਆਤ ’ਚ ਪੇਟੀਐੱਮ ਦੇ ਸ਼ੇਅਰਾਂ ਦਾ ਸ਼ੁਰੂਆਤੀ ਭਾਅ 1,298 ਰੁਪਏ ਸੀ ਤੇ ਸ਼ੇਅਰ ਨੇ 1,855 ਰੁਪਏ ਦਾ ਉੱਚ ਪੱਧਰ ਛੂਹਿਆ। ਹਾਲਾਂਕਿ, ਸ਼ੇਅਰ ਆਪਣੀ ਲਿਸਟਿੰਗ ਕੀਮਤ ਨੂੰ ਪਾਰ ਨਹੀਂ ਕਰ ਸਕਿਆ। ਪੇਟੀਐੱਮ ਦੇ ਸ਼ੇਅਰਾਂ ਦੀ ਲਿਸਟਿੰਗ 1,950 ਰੁਪਏ ’ਤੇ ਹੋਈ ਸੀ ਤੇ ਲਿਸਟਿੰਗ ਤੋਂ ਬਾਅਦ ਸ਼ੇਅਰ ’ਚ ਲਗਾਤਾਰ ਗਿਰਾਵਟ ਆਈ। ਲਿਸਟਿੰਗ ਤੋਂ ਦੋ ਸਾਲ ਬਾਅਦ, 2024 ’ਚ ਪੇਟੀਐੱਮ ਦੇ ਸ਼ੇਅਰ ਨੇ 310 ਰੁਪਏ ਦਾ ਸਭ ਤੋਂ ਹੇਠਲਾ ਪੱਧਰ ਦਰਜ ਕੀਤਾ ਸੀ।
ਬ੍ਰੋਕਰੇਜ ਫਰਮ ਨੂੰ ਕੀ ਉਮੀਦ ਹੈ?
ਬ੍ਰੋਕਰੇਜ ਫਰਮ ਨੋਮੁਰਾ ਨੂੰ ਉਮੀਦ ਹੈ ਕਿ ਪੇਟੀਐੱਮ ਦੇ ਮੁੱਖ ਪੇਮੈਂਟ ਤੇ ਵਪਾਰੀਆਂ ਨੂੰ ਕਰਜ਼ਾ ਦੇਣ ਵਾਲੇ ਕਾਰੋਬਾਰ ’ਚ ਚੰਗਾ ਵਾਧਾ ਦੇਖਣ ਨੂੰ ਮਿਲੇਗਾ। ਇਸ ਦੇ ਪਿੱਛੇ ਘੱਟ ਲਾਗਤ ਵਾਲਾ ਢਾਂਚਾ ਤੇ ਆਰਟੀਫੀਸ਼ੀਅਲ ਇੰਟੈਲੀਜੈਂਸ (AI) ਦੀ ਮਦਦ ਨਾਲ ਬਿਹਤਰ ਹੋ ਰਹੀ ਕੰਮਕਾਜੀ ਕੁਸ਼ਲਤਾ ਮੁੱਖ ਕਾਰਨ ਹਨ। ਨੋਮੁਰਾ ਦਾ ਇਹ ਵੀ ਮੰਨਣਾ ਹੈ ਕਿ ਚੋਣਵੇਂ UPI ਲੈਣ-ਦੇਣ ’ਤੇ ਮਰਚੈਂਟ ਡਿਸਕਾਊਂਟ ਰੇਟ (MDR) ਲਾਗੂ ਕਰਨ ਦੇ ਪ੍ਰਸਤਾਵ ਤੇ ਕੌਮਾਂਤਰੀ ਪੱਧਰ ’ਤੇ ਕਾਰੋਬਾਰ ਦੇ ਵਿਸਥਾਰ ਨਾਲ ਵਿਕਾਸ ਦੇ ਹੋਰ ਮੌਕੇ ਮਿਲ ਸਕਦੇ ਹਨ।
ਨੋਮੁਰਾ ਦੇ ਅਨੁਮਾਨ ਮੁਤਾਬਕ, ਵਿੱਤੀ ਸਾਲ 2026 ਤੋਂ 2029 ਦੇ ਵਿਚਕਾਰ ਪੇਟੀਐੱਮ ਦੀ ਵਿਆਜ, ਟੈਕਸ, ਘਟਾਓ ਤੇ ਅਮੋਰਟਾਈਜ਼ੇਸ਼ਨ ਤੋਂ ਪਹਿਲਾਂ ਦੀ ਕਮਾਈ (EBITDA) ’ਚ 96 ਫ਼ੀਸਦੀ ਦੀ ਕੰਪਾਊਂਡ ਐਨੂਅਲ ਗ੍ਰੋਥ ਰੇਟ (CAGR) ਨਾਲ ਵਾਧਾ ਹੋ ਸਕਦਾ ਹੈ। ਇਸ ਤੋਂ ਸੰਕੇਤ ਮਿਲਦਾ ਹੈ ਕਿ ਕਾਰੋਬਾਰ ਦੇ ਵਿਸਥਾਰ ਨਾਲ ਕੰਪਨੀ ਨੂੰ ਆਪਣੇ ਮੌਜੂਦਾ ਸਰੋਤਾਂ ਦੀ ਬਿਹਤਰ ਵਰਤੋਂ ਕਰਨ ਤੇ ਮੁਨਾਫ਼ਾ ਵਧਾਉਣ ਦਾ ਲਾਭ ਮਿਲ ਸਕਦਾ ਹੈ।
ਬ੍ਰੋਕਰੇਜ ਫਰਮ ਦਾ ਮੰਨਣਾ ਹੈ ਕਿ ਪੇਟੀਐੱਮ ਦੇ ਮੁੱਖ ਪੇਮੈਂਟ ਤੇ ਵਪਾਰੀਆਂ ਨੂੰ ਕਰਜ਼ਾ ਦੇਣ ਵਾਲੇ ਕਾਰੋਬਾਰ ਆਮਦਨ ’ਚ ਵਾਧੇ ਦੇ ਮੁੱਖ ਕਾਰਕ ਬਣੇ ਰਹਿਣਗੇ। ਇਸ ਦੇ ਨਾਲ ਹੀ, AI ਦੀ ਵਧਦੀ ਵਰਤੋਂ, ਵੱਡੇ ਪੱਧਰ ’ਤੇ ਕਾਰੋਬਾਰ ਚਲਾਉਣ ਦੇ ਫ਼ਾਇਦਿਆਂ ਤੇ ਸੋਚ-ਸਮਝ ਕੇ ਕੀਤੇ ਜਾਣ ਵਾਲੇ ਮਾਰਕੀਟਿੰਗ ਖ਼ਰਚਿਆਂ ਨਾਲ ਲਾਗਤ ਨੂੰ ਕਾਬੂ ’ਚ ਰੱਖਣ ’ਚ ਮਦਦ ਮਿਲਣ ਦੀ ਉਮੀਦ ਹੈ। ਡਿਸਕਲੇਮਰ: ਇੱਥੇ ਸ਼ੇਅਰਾਂ ਬਾਰੇ ਦਿੱਤੀ ਗਈ ਜਾਣਕਾਰੀ ਬ੍ਰੋਕਰੇਜ ਫਰਮ ਦੀ ਰਿਪੋਰਟ ਤੇ ਮਾਹਿਰਾਂ ਦੀ ਰਾਏ ’ਤੇ ਆਧਾਰਿਤ ਹੈ। ਇਹ ਕਿਸੇ ਵੀ ਤਰ੍ਹਾਂ ਦੀ ਨਿਵੇਸ਼ ਸਲਾਹ ਨਹੀਂ ਹੈ। ਸ਼ੇਅਰ ਬਾਜ਼ਾਰ ’ਚ ਨਿਵੇਸ਼ ਜੋਖ਼ਮਾਂ ਦੇ ਅਧੀਨ ਹੈ। ਇਸ ਲਈ ਨਿਵੇਸ਼ ਕਰਨ ਤੋਂ ਪਹਿਲਾਂ ਕਿਸੇ ਪ੍ਰਮਾਣਿਤ ਨਿਵੇਸ਼ ਸਲਾਹਕਾਰ ਨਾਲ ਸਲਾਹ ਜ਼ਰੂਰ ਕਰੋ।