NSE IPO ਲਈ 11 ਸਤੰਬਰ ਦਾ ਦਿਨ ਹੋ ਸਕਦਾ ਹੈ ਅਹਿਮ, ਪ੍ਰਾਈਸ ਬੈਂਡ ਦਾ ਐਲਾਨ ਹੋਣ ਦੀ ਉਮੀਦ; ਹੋ ਜਾਓ ਤਿਆਰ

ਬਿਜ਼ਨਸ ਡੈਸਕ, ਨਵੀਂ ਦਿੱਲੀ : ਨੈਸ਼ਨਲ ਸਟਾਕ ਐਕਸਚੇਂਜ (NSE) ਦੇ IPO ਦਾ ਲੰਬੇ ਸਮੇਂ ਤੋਂ ਇੰਤਜ਼ਾਰ ਕੀਤਾ ਜਾ ਰਿਹਾ ਸੀ। ਹੁਣ ਇਹ IPO 16 ਸਤੰਬਰ ਨੂੰ ਖੁੱਲ੍ਹਣ ਜਾ ਰਿਹਾ ਹੈ। ਹਾਲਾਂਕਿ, ਅਜੇ ਤੱਕ IPO ਲਈ ਪ੍ਰਾਈਸ ਬੈਂਡ ਦਾ ਐਲਾਨ ਨਹੀਂ ਕੀਤਾ ਗਿਆ ਹੈ। ਇਸ ਲਈ ਪ੍ਰਾਈਸ ਬੈਂਡ ਦੀ ਅਧਿਕਾਰਤ ਘੋਸ਼ਣਾ ਸ਼ੁੱਕਰਵਾਰ, 11 ਸਤੰਬਰ ਨੂੰ ਕੀਤੀ ਜਾ ਸਕਦੀ ਹੈ। NSE ਵੱਲੋਂ ਸਿਕਿਓਰਿਟੀਜ਼ ਐਂਡ ਐਕਸਚੇਂਜ ਬੋਰਡ ਆਫ ਇੰਡੀਆ (SEBI) ਤੇ ਸਟਾਕ ਐਕਸਚੇਂਜਾਂ ਕੋਲ ਆਪਣਾ ਅਪਡੇਟਿਡ ਡਰਾਫਟ ਰੈੱਡ ਹੈਰਿੰਗ ਪ੍ਰਾਸਪੈਕਟਸ (UDRHP) ਦਾਖਲ ਕਰਨ ਤੋਂ ਬਾਅਦ ਇਹ ਐਲਾਨ ਕੀਤਾ ਜਾ ਸਕਦਾ ਹੈ। ਇਸ ਨਾਲ ਦੇਸ਼ ਦਾ ਸਭ ਤੋਂ ਵੱਡਾ ਐਕਸਚੇਂਜ ਪਬਲਿਕ ਲਿਸਟਿੰਗ ਦੇ ਇੱਕ ਹੋਰ ਕਦਮ ਨੇੜੇ ਪਹੁੰਚ ਗਿਆ ਹੈ।

ਕਿੰਨਾ ਹੋ ਸਕਦਾ ਹੈ IPO ਦਾ ਸਾਈਜ਼?

NSE IPO ਦਾ ਸਾਈਜ਼ ਹੁਣ ਲਗਭਗ 23,000 ਕਰੋੜ ਰੁਪਏ ਹੋਣ ਦੀ ਸੰਭਾਵਨਾ ਹੈ। ਇਹ ਜੂਨ ’ਚ ਐਕਸਚੇਂਜ ਵੱਲੋਂ ਆਪਣਾ ਮੂਲ ਡਰਾਫਟ ਰੈੱਡ ਹੈਰਿੰਗ ਪ੍ਰਾਸਪੈਕਟਸ ਦਾਖਲ ਕਰਨ ਸਮੇਂ ਪ੍ਰਸਤਾਵਿਤ ਲਗਭਗ 30,000 ਕਰੋੜ ਰੁਪਏ ਦੇ ਆਫਰ ਤੋਂ ਘੱਟ ਹੈ। ਇਹ ਕਮੀ ਕੁਝ ਮੌਜੂਦਾ ਸ਼ੇਅਰਹੋਲਡਰਾਂ, ਜਿਨ੍ਹਾਂ ’ਚ ਸਰਕਾਰੀ ਬੀਮਾ ਕੰਪਨੀਆਂ ਤੇ ਮੌਰਗਨ ਸਟੈਨਲੀ ਸ਼ਾਮਲ ਹਨ, ਵੱਲੋਂ IPO ’ਚ ਘੱਟ ਸ਼ੇਅਰ ਵੇਚਣ ਦੇ ਫੈਸਲੇ ਤੋਂ ਬਾਅਦ ਆਈ ਹੈ। IPO ਪੂਰੀ ਤਰ੍ਹਾਂ ‘ਆਫਰ ਫਾਰ ਸੇਲ’ (OFS) ਹੋਵੇਗਾ। ਇਸ ਦਾ ਮਤਲਬ ਹੈ ਕਿ ਇਸ IPO ਰਾਹੀਂ ਇਕੱਠੀ ਹੋਣ ਵਾਲੀ ਰਕਮ NSE ਨੂੰ ਨਹੀਂ, ਸਗੋਂ ਸ਼ੇਅਰ ਵੇਚਣ ਵਾਲੇ ਮੌਜੂਦਾ ਸ਼ੇਅਰਹੋਲਡਰਾਂ ਨੂੰ ਮਿਲੇਗੀ।

ਕੀ ਇਹ ਸਭ ਤੋਂ ਵੱਡਾ IPO ਹੋਵੇਗਾ?

ਮੂਲ DRHP ’ਚ 14.89 ਕਰੋੜ ਸ਼ੇਅਰਾਂ ਦੇ OFS ਦਾ ਪ੍ਰਸਤਾਵ ਸੀ, ਜੋ ਐਕਸਚੇਂਜ ਦੀ ਪੇਡ-ਅੱਪ ਇਕਵਿਟੀ ਕੈਪੀਟਲ ਦਾ ਲਗਭਗ 6 ਫੀਸਦੀ ਸੀ। IPO ਦੇ ਸਾਈਜ਼ ’ਚ ਕਮੀ ਦਾ ਇਹ ਵੀ ਮਤਲਬ ਹੋ ਸਕਦਾ ਹੈ ਕਿ NSE ਦਾ IPO ਭਾਰਤ ਦਾ ਹੁਣ ਤੱਕ ਦਾ ਸਭ ਤੋਂ ਵੱਡਾ ਪਬਲਿਕ ਆਫਰਿੰਗ ਬਣਨ ਤੋਂ ਰਹਿ ਜਾਵੇ। ਇਹ ਰਿਕਾਰਡ ਇਸ ਸਮੇਂ 2024 ’ਚ ਹੁੰਡਈ ਮੋਟਰ ਇੰਡੀਆ ਦੇ 27,870 ਕਰੋੜ ਰੁਪਏ ਦੇ IPO ਦੇ ਨਾਮ ਹੈ।

ਅਨੁਮਾਨਿਤ ਪ੍ਰਾਈਸ ਬੈਂਡ ਕਿੰਨਾ ਹੋ ਸਕਦਾ ਹੈ?

ਅਨੁਮਾਨ ਹੈ ਕਿ NSE ਆਪਣੇ ਸ਼ੇਅਰਾਂ ਦੀ ਕੀਮਤ 1,700 ਰੁਪਏ ਤੋਂ 1,785 ਰੁਪਏ ਪ੍ਰਤੀ ਸ਼ੇਅਰ ਦੇ ਵਿਚਕਾਰ ਤੈਅ ਕਰ ਸਕਦਾ ਹੈ। ਇਹ ਪਹਿਲਾਂ ਦੱਸੀ ਗਈ 2,000 ਰੁਪਏ ਤੋਂ 2,100 ਰੁਪਏ ਪ੍ਰਤੀ ਸ਼ੇਅਰ ਦੀ ਸੰਭਾਵਿਤ ਕੀਮਤ ਤੋਂ ਘੱਟ ਹੈ। ਰਿਪੋਰਟ ਮੁਤਾਬਕ, ਐਕਸਚੇਂਜ IPO ਰਾਹੀਂ ਵੇਚੀ ਜਾਣ ਵਾਲੀ ਹਿੱਸੇਦਾਰੀ ਨੂੰ ਵੀ ਆਪਣੇ ਮੂਲ ਡਰਾਫਟ ਪ੍ਰਾਸਪੈਕਟਸ ’ਚ ਪ੍ਰਸਤਾਵਿਤ 6 ਫੀਸਦੀ ਤੋਂ ਘਟਾ ਕੇ ਲਗਭਗ 5.5 ਫੀਸਦੀ ਕਰ ਸਕਦਾ ਹੈ। ਮੂਲ DRHP ’ਚ ਜਨਰਲ ਇੰਸ਼ੋਰੈਂਸ ਕਾਰਪੋਰੇਸ਼ਨ ਆਫ ਇੰਡੀਆ (GIC) ਨੇ 1.066 ਕਰੋੜ ਤੱਕ ਸ਼ੇਅਰ ਵੇਚਣ ਦਾ ਪ੍ਰਸਤਾਵ ਦਿੱਤਾ ਸੀ, ਜਦਕਿ ਨਿਊ ਇੰਡੀਆ ਐਸ਼ੋਰੈਂਸ ਨੇ 1.05 ਕਰੋੜ ਸ਼ੇਅਰ ਵੇਚਣ ਦਾ ਪ੍ਰਸਤਾਵ ਰੱਖਿਆ ਸੀ। ਇਸ ਤੋਂ ਇਲਾਵਾ ਨੈਸ਼ਨਲ ਇੰਸ਼ੋਰੈਂਸ ਕੰਪਨੀ ਤੇ ਯੂਨਾਈਟਿਡ ਇੰਡੀਆ ਇੰਸ਼ੋਰੈਂਸ ਕੰਪਨੀ ਨੇ 60-60 ਲੱਖ ਸ਼ੇਅਰ ਵੇਚਣ ਦਾ ਪ੍ਰਸਤਾਵ ਦਿੱਤਾ ਸੀ। ਇਨ੍ਹਾਂ ਚਾਰਾਂ ਸਰਕਾਰੀ ਖੇਤਰ ਦੀਆਂ ਬੀਮਾ ਕੰਪਨੀਆਂ ਨੇ ਮਿਲ ਕੇ ਸ਼ੁਰੂਆਤ ’ਚ NSE ਦੇ ਲਗਭਗ 3.37 ਕਰੋੜ ਸ਼ੇਅਰ ਵੇਚਣ ਦਾ ਪ੍ਰਸਤਾਵ ਰੱਖਿਆ ਸੀ।