- ਸ਼ਹਿਰ ਚੁਣੋ
- ਈ-ਪੇਪਰ
- ਵੈੱਬ ਸਟੋਰੀਜ਼
- ਸ਼ਹਿਰ ਚੁਣੋ
- ਈ-ਪੇਪਰ
- ਵੈੱਬ ਸਟੋਰੀਜ਼
ਤਿਉਹਾਰਾਂ ਤੋਂ ਪਹਿਲਾਂ ਮਹਿੰਗਾਈ ਦਾ ਵੱਡਾ ਝਟਕਾ, ਖੰਡ ਦੀਆਂ ਕੀਮਤਾਂ 'ਚ ਭਾਰੀ ਉਛਾਲ; ਜਾਣੋ ਤੁਹਾਡੇ ਸ਼ਹਿਰ 'ਚ ਕੀ ਹੈ ਨਵੇਂ ਭਾਅ
ਸਪਲਾਈ ਦੀ ਕਮੀ, ਗੰਨੇ ਦੀ ਪਿੜਾਈ ਦਾ ਸੀਜ਼ਨ ਅੱਗੇ ਖਿਸਕਣ ਅਤੇ ਤਿਉਹਾਰਾਂ ਦੌਰਾਨ ਖਪਤ ਵਧਣ ਕਾਰਨ ਬਾਜ਼ਾਰ 'ਚ ਖੰਡ ਦੀ ਕਿੱਲਤ ਡੂੰਘੀ ਹੁੰਦੀ ਜਾ ਰਹੀ ਹੈ। ਤਿਉਹਾਰਾਂ ਦੇ ਸੀਜ਼ਨ ਦੌਰਾਨ ਮਿੱਲਾਂ ਤੋਂ ਵਿਕਣ ਵਾਲੀ ਥੋਕ ਖੰਡ ਦੇ ਭਾਅ ਪਿਛਲੇ ਚਾਰ-ਪੰਜ ਦਿਨਾਂ 'ਚ 300 ਤੋਂ 400 ਰੁਪਏ ਪ੍ਰਤੀ ਕੁਇੰਟਲ ਤੱਕ ਵਧ ਗਏ ਹਨ।
Posted By Sunita
Publish Date: Wed, 14 Oct 2026 04:23 PM (IST)
Updated Date: Wed, 14 Oct 2026 04:25 PM (IST)
ਸੁਸ਼ੀਲ ਕੁਮਾਰ ਮਿਸ਼ਰਾ, ਮੇਰਠ : ਸਪਲਾਈ ਦੀ ਕਮੀ, ਗੰਨੇ ਦੀ ਪਿੜਾਈ ਦਾ ਸੀਜ਼ਨ ਅੱਗੇ ਖਿਸਕਣ ਅਤੇ ਤਿਉਹਾਰਾਂ ਦੌਰਾਨ ਖਪਤ ਵਧਣ ਕਾਰਨ ਬਾਜ਼ਾਰ 'ਚ ਖੰਡ ਦੀ ਕਿੱਲਤ ਡੂੰਘੀ ਹੁੰਦੀ ਜਾ ਰਹੀ ਹੈ। ਤਿਉਹਾਰਾਂ ਦੇ ਸੀਜ਼ਨ ਦੌਰਾਨ ਮਿੱਲਾਂ ਤੋਂ ਵਿਕਣ ਵਾਲੀ ਥੋਕ ਖੰਡ ਦੇ ਭਾਅ ਪਿਛਲੇ ਚਾਰ-ਪੰਜ ਦਿਨਾਂ 'ਚ 300 ਤੋਂ 400 ਰੁਪਏ ਪ੍ਰਤੀ ਕੁਇੰਟਲ ਤੱਕ ਵਧ ਗਏ ਹਨ।
ਪ੍ਰਚੂਨ ਬਾਜ਼ਾਰ 'ਚ ਵੀ ਇੱਕ ਹਫ਼ਤੇ ਦੌਰਾਨ ਖੰਡ ਦੇ ਭਾਅ 10 ਤੋਂ 20 ਰੁਪਏ ਪ੍ਰਤੀ ਕਿਲੋ ਤੱਕ ਵਧ ਕੇ 62 ਤੋਂ 70 ਰੁਪਏ ਪ੍ਰਤੀ ਕਿਲੋ ਤੱਕ ਪਹੁੰਚ ਗਏ ਹਨ। ਬਾਜ਼ਾਰ ਦੇ ਮਾਹਿਰਾਂ ਦਾ ਕਹਿਣਾ ਹੈ ਕਿ ਮੰਗ ਅਤੇ ਸਪਲਾਈ ਵਿਚਕਾਰ ਵੱਡਾ ਪਾੜਾ ਹੋਣ ਕਾਰਨ ਕੀਮਤਾਂ 'ਚ ਵਾਧਾ ਹੋ ਰਿਹਾ ਹੈ। ਬਿਜਨੌਰ ਦੀ ਦਵਾਰਿਕੇਸ਼ ਸ਼ੂਗਰ ਇੰਡਸਟਰੀਜ਼ ਲਿਮਟਿਡ ਦੇ ਸੀਨੀਅਰ ਐਗਜ਼ੀਕਿਊਟਿਵ ਵਾਈਸ ਪ੍ਰੈਜ਼ੀਡੈਂਟ (ਕਾਰਪੋਰੇਟ) ਸਲਿਲ ਆਰਿਆ ਦਾ ਕਹਿਣਾ ਹੈ ਕਿ ਆਮ ਘਰਾਂ 'ਚ ਖੰਡ ਦੀ ਖਪਤ ਬਹੁਤ ਜ਼ਿਆਦਾ ਨਹੀਂ ਹੁੰਦੀ। ਇਸ ਲਈ ਕੀਮਤਾਂ 'ਚ ਥੋੜ੍ਹਾ ਵਾਧਾ ਹੋਣ ਨਾਲ ਖਪਤਕਾਰਾਂ ’ਤੇ ਬਹੁਤ ਜ਼ਿਆਦਾ ਅਸਰ ਨਹੀਂ ਪਵੇਗਾ।
ਅਗਸਤ ਦੀ ਸ਼ੁਰੂਆਤ 'ਚ ਮਿੱਲਾਂ ਤੋਂ ਵਿਕਣ ਵਾਲੀ ਖੰਡ ਦੇ ਭਾਅ ਲਗਭਗ 4,400 ਰੁਪਏ ਪ੍ਰਤੀ ਕੁਇੰਟਲ ਸਨ। ਤਿਉਹਾਰਾਂ ਦੌਰਾਨ ਮੰਗ ਵਧਣ ਅਤੇ ਸਪਲਾਈ ਦੀ ਕਮੀ ਕਾਰਨ 31 ਅਗਸਤ ਨੂੰ ਇਹ ਭਾਅ 6,000 ਰੁਪਏ ਪ੍ਰਤੀ ਕੁਇੰਟਲ ਤੱਕ ਪਹੁੰਚ ਗਏ ਸਨ। ਇਸ ਤੋਂ ਬਾਅਦ ਸਰਕਾਰ ਨੇ ਖੰਡ ਦੀ ਖਰੀਦ ਅਤੇ ਭੰਡਾਰ ਨਾਲ ਜੁੜੇ ਨਿਯਮ ਸਖ਼ਤ ਕਰ ਦਿੱਤੇ।
ਇਸ ਦਾ ਅਸਰ ਬਾਜ਼ਾਰ ਦੀਆਂ ਕੀਮਤਾਂ ’ਤੇ ਵੀ ਦੇਖਣ ਨੂੰ ਮਿਲਿਆ ਅਤੇ ਸਤੰਬਰ 'ਚ ਐਕਸ-ਫੈਕਟਰੀ ਭਾਅ ਘਟ ਕੇ 4,350 ਰੁਪਏ ਪ੍ਰਤੀ ਕੁਇੰਟਲ ਤੱਕ ਆ ਗਏ ਸਨ। ਹੁਣ ਇੱਕ ਵਾਰ ਫਿਰ ਕੀਮਤਾਂ 'ਚ ਤੇਜ਼ੀ ਆਈ ਹੈ। ਮਿੱਲਾਂ ਤੋਂ ਖਰੀਦੀ ਜਾਣ ਵਾਲੀ ਖੰਡ ਦਾ ਭਾਅ 4,650 ਰੁਪਏ ਪ੍ਰਤੀ ਕੁਇੰਟਲ ਤੱਕ ਪਹੁੰਚ ਗਿਆ ਹੈ। ਬਾਜ਼ਾਰ 'ਚ ਅਨੁਮਾਨ ਲਗਾਇਆ ਜਾ ਰਿਹਾ ਹੈ ਕਿ ਸਪਲਾਈ 'ਚ ਸੁਧਾਰ ਹੋਣ ਤੋਂ ਪਹਿਲਾਂ ਥੋਕ ਭਾਅ 5,000 ਰੁਪਏ ਪ੍ਰਤੀ ਕੁਇੰਟਲ ਤੋਂ ਪਾਰ ਜਾ ਸਕਦੇ ਹਨ।
ਲਗਾਤਾਰ ਮੀਂਹ ਪੈਣ ਕਾਰਨ ਗੰਨੇ 'ਚ ਖੰਡ ਦੀ ਮਾਤਰਾ ਯਾਨੀ ਰਿਕਵਰੀ ਪ੍ਰਭਾਵਿਤ ਹੋਈ ਹੈ। ਇਸ ਕਾਰਨ 15 ਅਕਤੂਬਰ ਤੋਂ ਸ਼ੁਰੂ ਹੋਣ ਵਾਲਾ ਗੰਨੇ ਦੀ ਪਿੜਾਈ ਦਾ ਸੀਜ਼ਨ ਹੁਣ ਨਵੰਬਰ ਤੱਕ ਟਲ ਗਿਆ ਹੈ। ਪੁਰਾਣਾ ਸਟਾਕ ਵੀ ਤੇਜ਼ੀ ਨਾਲ ਖ਼ਤਮ ਹੋ ਰਿਹਾ ਹੈ। ਬਿਜਨੌਰ ਦੀਆਂ ਬਰਕਾਤਪੁਰ ਅਤੇ ਬਿਜਨੌਰ ਖੰਡ ਮਿੱਲਾਂ ਦੇ ਗੋਦਾਮ ਪੂਰੀ ਤਰ੍ਹਾਂ ਖਾਲੀ ਹੋ ਚੁੱਕੇ ਹਨ। ਪੱਛਮੀ ਉੱਤਰ ਪ੍ਰਦੇਸ਼ ਦੀਆਂ ਹੋਰ ਮਿੱਲਾਂ 'ਚ ਵੀ ਅਜਿਹੀ ਹੀ ਸਥਿਤੀ ਹੈ, ਜਿੱਥੇ ਸਟਾਕ ਜਾਂ ਤਾਂ ਖ਼ਤਮ ਹੋ ਗਿਆ ਹੈ ਜਾਂ ਖ਼ਤਮ ਹੋਣ ਦੀ ਕਗਾਰ ’ਤੇ ਹੈ।
ਬਾਜ਼ਾਰ ਦੇ ਮਾਹਿਰਾਂ ਮੁਤਾਬਕ, ਕੀਮਤਾਂ ਹੋਰ ਵਧਣ ਦੀ ਉਮੀਦ 'ਚ ਕੁਝ ਕਾਰੋਬਾਰੀਆਂ ਨੇ ਵੀ ਖੰਡ ਦੀ ਵਿਕਰੀ ਰੋਕ ਦਿੱਤੀ ਹੈ। ਇਸ ਕਾਰਨ ਬਾਜ਼ਾਰ 'ਚ ਉਪਲਬਧ ਖੰਡ ਦੀ ਮਾਤਰਾ ਹੋਰ ਸੀਮਤ ਹੋ ਗਈ ਹੈ।
ਉਤਪਾਦਨ 'ਚ ਕਮੀ ਆਉਣ ਦਾ ਖ਼ਦਸ਼ਾ
ਮਹਾਰਾਸ਼ਟਰ 'ਚ ਗੰਨੇ ਦੀ ਪੈਦਾਵਾਰ 20 ਫ਼ੀਸਦੀ ਅਤੇ ਕਰਨਾਟਕ 'ਚ 30 ਫ਼ੀਸਦੀ ਤੱਕ ਘਟਣ ਦਾ ਅਨੁਮਾਨ ਹੈ। ਇਨ੍ਹਾਂ ਦੋਵਾਂ ਸੂਬਿਆਂ 'ਚ ਖੰਡ ਦਾ ਉਤਪਾਦਨ ਵੀ ਇਸੇ ਅਨੁਪਾਤ 'ਚ ਘਟ ਸਕਦਾ ਹੈ। ਉੱਤਰ ਪ੍ਰਦੇਸ਼ 'ਚ ਮੀਂਹ ਕਾਰਨ ਗੰਨੇ ਦੀ ਰਿਕਵਰੀ ਪ੍ਰਭਾਵਿਤ ਹੋਣ ਦਾ ਖ਼ਦਸ਼ਾ ਹੈ।
ਸ਼ੁਰੂਆਤੀ ਗੰਨੇ 'ਚ ਉਮੀਦ ਮੁਤਾਬਕ ਮਿਠਾਸ ਨਾ ਆਉਣ ਕਾਰਨ ਮਿੱਲਾਂ ਪਿੜਾਈ ਸ਼ੁਰੂ ਕਰਨ ਤੋਂ ਝਿਜਕ ਰਹੀਆਂ ਹਨ। ਇਸ ਨਾਲ ਨਵੀਂ ਖੰਡ ਦੇ ਬਾਜ਼ਾਰ 'ਚ ਆਉਣ 'ਚ ਦੇਰੀ ਹੋਵੇਗੀ ਅਤੇ ਪੁਰਾਣੇ ਸਟਾਕ ’ਤੇ ਦਬਾਅ ਹੋਰ ਵਧੇਗਾ।
ਬਰਕਾਤਪੁਰ ਖੰਡ ਮਿੱਲ ਦੇ ਸੰਯੁਕਤ ਪ੍ਰਧਾਨ ਨਰਪਤ ਸਿੰਘ ਦਾ ਕਹਿਣਾ ਹੈ ਕਿ ਬਰਸਾਤ ਕਾਰਨ ਗੰਨੇ ਦੀ ਫ਼ਸਲ ਨੂੰ ਕਾਫ਼ੀ ਨੁਕਸਾਨ ਪਹੁੰਚਿਆ ਹੈ। ਗੰਨੇ ਦੀ ਰਿਕਵਰੀ ਵੀ ਘੱਟ ਆ ਰਹੀ ਹੈ। ਇਸ ਸਮੇਂ ਪਿੜਾਈ ਸ਼ੁਰੂ ਕਰਨਾ ਸੰਭਵ ਨਹੀਂ ਹੈ।