FD Rule Change: 1 ਅਕਤੂਬਰ ਤੋਂ ਬਦਲ ਜਾਣਗੀਆਂ FD ਦੀਆਂ ਵਿਆਜ ਦਰਾਂ? RBI ਵੱਲੋਂ ਲਾਗੂ ਕੀਤੇ ਨਵੇਂ ਨਿਯਮ ਸਮਝੋ

ਬਿਜ਼ਨਸ ਨਿਊਜ਼, ਨਵੀਂ ਦਿੱਲੀ : ਹਰ ਮਹੀਨੇ ਦੀ ਤਰ੍ਹਾਂ ਅਕਤੂਬਰ ’ਚ ਵੀ ਕਈ ਵੱਡੇ ਬਦਲਾਅ ਹੋਣ ਵਾਲੇ ਹਨ। ਇਨ੍ਹਾਂ ਵਿੱਚੋਂ ਇੱਕ ਬਦਲਾਅ FD (ਫਿਕਸਡ ਡਿਪਾਜ਼ਿਟ) ਨਾਲ ਸਬੰਧਤ ਹੈ। ਭਾਰਤੀ ਰਿਜ਼ਰਵ ਬੈਂਕ (RBI) ਨੇ FD ਦੇ ਨਿਯਮਾਂ ’ਚ ਵੱਡੇ ਬਦਲਾਅ ਕੀਤੇ ਹਨ, ਜੋ 1 ਅਕਤੂਬਰ 2026 ਤੋਂ ਲਾਗੂ ਹੋਣ ਜਾ ਰਹੇ ਹਨ। ਇਨ੍ਹਾਂ ’ਚ ਵਿਆਜ ਦਰਾਂ ਤੋਂ ਇਲਾਵਾ ਕਈ ਹੋਰ ਜ਼ਰੂਰੀ ਅਪਡੇਟ ਵੀ ਸ਼ਾਮਲ ਹਨ। ਆਓ ਜਾਣਦੇ ਹਾਂ ਪੂਰੀ ਜਾਣਕਾਰੀ।

ਕੀ-ਕੀ ਹੋਏ ਬਦਲਾਅ?

1. ₹3 ਕਰੋੜ ਤੋਂ ਵੱਧ ਦੀ FD ’ਚ ਬਦਲਾਅ

₹3 ਕਰੋੜ ਜਾਂ ਇਸ ਤੋਂ ਵੱਧ ਦੀ FD ਨੂੰ ਬਲਕ ਡਿਪਾਜ਼ਿਟ ਕਿਹਾ ਜਾਂਦਾ ਹੈ। ਨਵੇਂ ਨਿਯਮਾਂ ਮੁਤਾਬਕ ਬੈਂਕ ਹੁਣ LCR (Liquidity Coverage Ratio) ਢਾਂਚੇ ਤਹਿਤ ਬਲਕ ਡਿਪਾਜ਼ਿਟ 'ਤੇ ਵੱਖ-ਵੱਖ ਵਿਆਜ ਦਰਾਂ (Differential Interest Rates) ਤੈਅ ਕਰ ਸਕਣਗੇ।

2. ਹਰ ਰੋਜ਼ ਸਵੇਰੇ ਅਪਡੇਟ ਹੋਣਗੀਆਂ ਵਿਆਜ ਦਰਾਂ

RBI ਵੱਲੋਂ ਕੀਤਾ ਗਿਆ ਇਹ ਬਦਲਾਅ ਬੈਂਕਾਂ ਨੂੰ ਵਿਆਜ ਦਰਾਂ ਤੈਅ ਕਰਨ ’ਚ ਵਧੇਰੇ ਲਚਕਤਾ ਦੇਣ ਲਈ ਹੈ। 1 ਅਕਤੂਬਰ ਤੋਂ ਬੈਂਕਾਂ ਨੂੰ ਆਪਣੀ ਵੈੱਬਸਾਈਟ 'ਤੇ FD ਦੀਆਂ ਵਿਆਜ ਦਰਾਂ ਸਪੱਸ਼ਟ ਤੌਰ 'ਤੇ ਦਿਖਾਉਣੀਆਂ ਹੋਣਗੀਆਂ। ਨਵੇਂ ਨਿਯਮਾਂ ਮੁਤਾਬਕ ਥੋਕ ਜਮ੍ਹਾਂ 'ਤੇ ਮਿਲਣ ਵਾਲੀਆਂ ਵਿਆਜ ਦਰਾਂ ਹਰ ਵਰਕਿੰਗ ਡੇਅ ਸਵੇਰੇ ਬੈਂਕ ਦੀ ਵੈੱਬਸਾਈਟ 'ਤੇ ਅਪਡੇਟ ਕਰਨੀਆਂ ਹੋਣਗੀਆਂ। RBI ਦੇ ਨਿਰਦੇਸ਼ ਅਨੁਸਾਰ ਨਵੀਆਂ ਵਿਆਜ ਦਰਾਂ ਸਵੇਰੇ 10:10 ਵਜੇ ਤੱਕ ਅਪਡੇਟ ਹੋ ਜਾਣੀਆਂ ਚਾਹੀਦੀਆਂ ਹਨ।

3. ਸਾਰੀਆਂ ਬ੍ਰਾਂਚਾਂ 'ਤੇ ਇੱਕੋ ਜਿਹੀਆਂ ਹੋਣਗੀਆਂ ਦਰਾਂ

RBI ਨੇ ਬੈਂਕਾਂ ਨੂੰ ਸਖ਼ਤ ਨਿਰਦੇਸ਼ ਦਿੱਤੇ ਹਨ ਕਿ ਇੱਕੋ ਤਾਰੀਖ ਨੂੰ ਜਮ੍ਹਾਂ ਕੀਤੀ ਗਈ ਫਿਕਸਡ ਡਿਪਾਜ਼ਿਟ ਦੀ ਰਕਮ 'ਤੇ ਵਿਆਜ ਦਰ ਇੱਕੋ ਜਿਹੀ ਹੋਣੀ ਚਾਹੀਦੀ ਹੈ। ਇਸ ਦਾ ਮਤਲਬ ਹੈ ਕਿ ਬੈਂਕ ਦੀ ਕਿਸੇ ਵੀ ਬ੍ਰਾਂਚ ’ਚ ਇੱਕੋ ਦਿਨ ਬੁੱਕ ਕੀਤੀ ਗਈ ਇੱਕੋ ਜਿਹੀ ਰਕਮ ਦੀ FD 'ਤੇ ਵਿਆਜ ਦੇ ਮਾਮਲੇ ’ਚ ਕੋਈ ਭੇਦਭਾਵ ਨਹੀਂ ਕੀਤਾ ਜਾ ਸਕੇਗਾ।

ਨਿਵੇਸ਼ਕਾਂ 'ਤੇ ਕੀ ਹੋਵੇਗਾ ਅਸਰ?

ਕਿਉਂਕਿ RBI ਦੇ ਨਵੇਂ ਨਿਯਮ ਮੁੱਖ ਤੌਰ 'ਤੇ ਬਲਕ ਡਿਪਾਜ਼ਿਟ ਨਾਲ ਜੁੜੇ ਹਨ, ਇਸ ਲਈ ਆਮ ਰਿਟੇਲ ਨਿਵੇਸ਼ਕਾਂ 'ਤੇ ਇਸ ਦਾ ਬਹੁਤ ਜ਼ਿਆਦਾ ਸਿੱਧਾ ਅਸਰ ਨਹੀਂ ਪਵੇਗਾ। ਹਾਲਾਂਕਿ ਇਨ੍ਹਾਂ ਨਿਯਮਾਂ ਨਾਲ ਬੈਂਕਿੰਗ ਸਿਸਟਮ ’ਚ ਪਾਰਦਰਸ਼ਤਾ ਵਧੇਗੀ ਅਤੇ ਨਿਵੇਸ਼ਕਾਂ ਨੂੰ ਹਰ ਰੋਜ਼ FD ਦੀਆਂ ਵਿਆਜ ਦਰਾਂ ਬਾਰੇ ਅਪਡੇਟ ਮਿਲਦੇ ਰਹਿਣਗੇ।

ਕਿੰਨੀ ਸੁਰੱਖਿਅਤ ਹੈ FD?

ਬੈਂਕਾਂ ’ਚ FD ਕਰਵਾਉਣਾ ਕਈ ਹੋਰ ਨਿਵੇਸ਼ ਵਿਕਲਪਾਂ ਦੇ ਮੁਕਾਬਲੇ ਘੱਟ ਜੋਖ਼ਮ ਵਾਲਾ ਮੰਨਿਆ ਜਾਂਦਾ ਹੈ ਅਤੇ ਇਸ ’ਚ ਪਹਿਲਾਂ ਤੋਂ ਤੈਅ ਰਿਟਰਨ ਮਿਲਦਾ ਹੈ। ਪਿਛਲੇ ਕੁਝ ਸਾਲਾਂ ਤੋਂ FD ਸੀਨੀਅਰ ਸਿਟੀਜ਼ਨਾਂ ’ਚ ਕਾਫ਼ੀ ਲੋਕਪ੍ਰਿਯ ਰਹੀ ਹੈ, ਕਿਉਂਕਿ ਉਨ੍ਹਾਂ ਨੂੰ ਆਮ ਨਿਵੇਸ਼ਕਾਂ ਦੇ ਮੁਕਾਬਲੇ ਵੱਧ ਵਿਆਜ ਮਿਲਦਾ ਹੈ। ਹਾਲਾਂਕਿ ਵੱਖ-ਵੱਖ ਬੈਂਕਾਂ ’ਚ FD ਦੀਆਂ ਵਿਆਜ ਦਰਾਂ ਵੱਖਰੀਆਂ ਹੁੰਦੀਆਂ ਹਨ, ਪਰ ਆਮ ਤੌਰ 'ਤੇ FD 'ਤੇ 6-7 ਫੀਸਦੀ ਤੱਕ ਵਿਆਜ ਮਿਲ ਸਕਦਾ ਹੈ।