HDFC ਬੈਂਕ 'ਚ ਸਾਬਕਾ IAS ਤੇ ਮੁੱਖ ਚੋਣ ਆਯੁਕਤ ਦੀ ਐਂਟਰੀ, RBI ਨੇ ਰਾਜੀਵ ਕੁਮਾਰ ਦੀ ਨਿਯੁਕਤੀ 'ਤੇ ਲਾਈ ਅੰਤਿਮ ਮੋਹਰ

ਨਵੀਂ ਦਿੱਲੀ : ਦੇਸ਼ ਦੇ ਸਭ ਤੋਂ ਵੱਡੇ ਨਿੱਜੀ ਖੇਤਰ ਦੇ ਬੈਂਕ HDFC ਬੈਂਕ ਦੇ ਪ੍ਰਬੰਧਨ ਨੂੰ ਲੈ ਕੇ ਇੱਕ ਵੱਡੀ ਖ਼ਬਰ ਸਾਹਮਣੇ ਆਈ ਹੈ। ਭਾਰਤੀ ਰਿਜ਼ਰਵ ਬੈਂਕ (RBI) ਨੇ ਰਾਜੀਵ ਕੁਮਾਰ ਨੂੰ ਬੈਂਕ ਦਾ ਨਵਾਂ ਪਾਰਟ-ਟਾਈਮ ਚੇਅਰਮੈਨ ਨਿਯੁਕਤ ਕਰਨ ਦੇ ਪ੍ਰਸਤਾਵ ਨੂੰ ਮਨਜ਼ੂਰੀ ਦੇ ਦਿੱਤੀ ਹੈ। HDFC ਬੈਂਕ ਵੱਲੋਂ ਸਟਾਕ ਐਕਸਚੇਂਜਾਂ (BSE ਅਤੇ NSE) ਨੂੰ ਦਿੱਤੀ ਗਈ ਅਧਿਕਾਰਤ ਜਾਣਕਾਰੀ ਮੁਤਾਬਕ, RBI ਨੇ 15 ਜੁਲਾਈ 2026 ਨੂੰ ਇਸ ਨਿਯੁਕਤੀ ਲਈ ਮਨਜ਼ੂਰੀ ਦਿੱਤੀ ਹੈ। ਰਾਜੀਵ ਕੁਮਾਰ ਦੀ ਇਹ ਨਿਯੁਕਤੀ ਬੈਂਕਿੰਗ ਰੈਗੂਲੇਸ਼ਨ ਐਕਟ, 1949 ਦੀ ਧਾਰਾ 10B(1A)(i) ਤਹਿਤ ਕੀਤੀ ਗਈ ਹੈ। ਉਨ੍ਹਾਂ ਦਾ ਕਾਰਜਕਾਲ 15 ਜੁਲਾਈ 2026 ਤੋਂ ਪ੍ਰਭਾਵੀ ਹੋ ਕੇ ਅਗਲੇ ਤਿੰਨ ਸਾਲਾਂ ਤੱਕ ਰਹੇਗਾ।

ਕੇਕੀ ਮਿਸਤਰੀ ਦੀ ਥਾਂ ਲੈਣਗੇ ਰਾਜੀਵ ਕੁਮਾਰ

ਇਸ ਤੋਂ ਪਹਿਲਾਂ ਬੈਂਕ ਦੇ ਅੰਤਰਿਮ ਪਾਰਟ-ਟਾਈਮ ਚੇਅਰਮੈਨ ਵਜੋਂ ਕੇਕੀ ਮਿਸਤਰੀ ਆਪਣੀਆਂ ਸੇਵਾਵਾਂ ਦੇ ਰਹੇ ਸਨ। ਬੈਂਕ ਨੇ ਉਨ੍ਹਾਂ ਦੇ ਕਾਰਜਕਾਲ ਦੌਰਾਨ ਦਿੱਤੇ ਗਏ ਮਹੱਤਵਪੂਰਨ ਮਾਰਗਦਰਸ਼ਨ ਅਤੇ ਯੋਗਦਾਨ ਲਈ ਧੰਨਵਾਦ ਪ੍ਰਗਟ ਕੀਤਾ ਹੈ।ਹਾਲਾਂਕਿ, ਕੇਕੀ ਮਿਸਤਰੀ ਬੈਂਕ ਨਾਲ ਜੁੜੇ ਰਹਿਣਗੇ। ਉਹ ਬੈਂਕ ਦੇ ਬੋਰਡ ਵਿੱਚ ਨਾਨ-ਐਗਜ਼ੀਕਿਊਟਿਵ ਨਾਨ-ਇੰਡਿਪੈਂਡੈਂਟ ਡਾਇਰੈਕਟਰ ਵਜੋਂ ਆਪਣੀ ਭੂਮਿਕਾ ਨਿਭਾਉਂਦੇ ਰਹਿਣਗੇ।

ਬੈਂਕ ਨੇ ਦੱਸਿਆ ਕਿ ਇਸ ਨਿਯੁਕਤੀ ਲਈ ਅਰਜ਼ੀ ਪਹਿਲਾਂ ਹੀ ਦਿੱਤੀ ਜਾ ਚੁੱਕੀ ਸੀ, ਜਿਸ ਬਾਰੇ ਬੈਂਕ ਨੇ 29 ਜੂਨ 2026 ਨੂੰ ਵੀ ਜਾਣਕਾਰੀ ਸਾਂਝੀ ਕੀਤੀ ਸੀ। ਹੁਣ RBI ਦੀ ਅੰਤਿਮ ਮਨਜ਼ੂਰੀ ਮਿਲਣ ਤੋਂ ਬਾਅਦ ਰਾਜੀਵ ਕੁਮਾਰ ਅਧਿਕਾਰਕ ਤੌਰ 'ਤੇ ਇਹ ਮਹੱਤਵਪੂਰਨ ਅਹੁਦਾ ਸੰਭਾਲਣਗੇ।

ਅਤਾਨੁ ਚੱਕਰਵਰਤੀ ਨੇ ਦਿੱਤਾ ਸੀ ਅਸਤੀਫਾ

ਇਹ ਨਿਯੁਕਤੀ ਸਾਬਕਾ ਪਾਰਟ-ਟਾਈਮ ਚੇਅਰਮੈਨ ਅਤਾਨੁ ਚੱਕਰਵਰਤੀ ਦੇ ਅਚਾਨਕ ਅਸਤੀਫੇ ਤੋਂ ਬਾਅਦ ਹੋਈ ਹੈ। ਉਨ੍ਹਾਂ ਨੇ 18 ਮਾਰਚ 2026 ਨੂੰ ਅਸਤੀਫਾ ਦਿੰਦਿਆਂ ਕਿਹਾ ਸੀ ਕਿ ਕੁਝ ਪ੍ਰਕਿਰਿਆਵਾਂ ਉਨ੍ਹਾਂ ਦੇ ਨਿੱਜੀ ਮੁੱਲਾਂ ਅਤੇ ਨੈਤਿਕ ਮਾਪਦੰਡਾਂ ਦੇ ਅਨੁਕੂਲ ਨਹੀਂ ਸਨ।

ਬਾਅਦ ਵਿੱਚ ਬੈਂਕ ਨੇ ਉਨ੍ਹਾਂ ਦੇ ਦੋਸ਼ਾਂ ਦੀ ਜਾਂਚ ਲਈ ਕਾਨੂੰਨੀ ਫਰਮਾਂ ਨੂੰ ਨਿਯੁਕਤ ਕੀਤਾ ਸੀ। ਜਾਂਚ ਤੋਂ ਬਾਅਦ ਕਾਨੂੰਨੀ ਫਰਮਾਂ ਨੇ ਅਤਾਨੁ ਚੱਕਰਵਰਤੀ ਵੱਲੋਂ ਲਗਾਏ ਗਏ ਦੋਸ਼ਾਂ ਨੂੰ ਰੱਦ ਕਰ ਦਿੱਤਾ ਸੀ।

ਮਾਰਚ 2026 ਵਿੱਚ ਚੱਕਰਵਰਤੀ ਦੇ ਅਸਤੀਫੇ ਤੋਂ ਬਾਅਦ ਕੇਕੀ ਮਿਸਤਰੀ ਅੰਤਰਿਮ ਤੌਰ 'ਤੇ HDFC ਬੈਂਕ ਦੇ ਪਾਰਟ-ਟਾਈਮ ਚੇਅਰਮੈਨ ਵਜੋਂ ਕੰਮ ਕਰ ਰਹੇ ਸਨ।

ਕੌਣ ਹਨ HDFC ਬੈਂਕ ਦੇ ਨਵੇਂ ਪਾਰਟ-ਟਾਈਮ ਚੇਅਰਮੈਨ ਰਾਜੀਵ ਕੁਮਾਰ?

ਰਾਜੀਵ ਕੁਮਾਰ ਫਰਵਰੀ 2020 ਵਿੱਚ ਭਾਰਤ ਦੇ ਵਿੱਤ ਸਕੱਤਰ ਦੇ ਅਹੁਦੇ ਤੋਂ ਰਿਟਾਇਰ ਹੋਏ ਸਨ। ਰਿਟਾਇਰਮੈਂਟ ਤੋਂ ਬਾਅਦ ਉਨ੍ਹਾਂ ਨੇ ਕੁਝ ਸਮੇਂ ਲਈ ਪਬਲਿਕ ਐਂਟਰਪ੍ਰਾਈਜ਼ਿਜ਼ ਸਿਲੈਕਸ਼ਨ ਬੋਰਡ (PESB) ਦੇ ਚੇਅਰਮੈਨ ਵਜੋਂ ਵੀ ਕੰਮ ਕੀਤਾ।

1984 ਬੈਚ ਦੇ ਸਾਬਕਾ IAS ਅਧਿਕਾਰੀ ਰਾਜੀਵ ਕੁਮਾਰ ਨੇ 2019 ਵਿੱਚ 10 ਸਰਕਾਰੀ ਬੈਂਕਾਂ ਨੂੰ ਮਿਲਾ ਕੇ ਚਾਰ ਵੱਡੇ ਬੈਂਕ ਬਣਾਉਣ ਦੀ ਪ੍ਰਕਿਰਿਆ ਵਿੱਚ ਮਹੱਤਵਪੂਰਨ ਭੂਮਿਕਾ ਨਿਭਾਈ ਸੀ।

ਉਨ੍ਹਾਂ ਨੇ ਬੈਂਕਿੰਗ ਸੁਧਾਰਾਂ, ਬੈਂਕਾਂ ਵਿੱਚ ਪੂੰਜੀ ਨਿਵੇਸ਼ (ਰੀਕੈਪੀਟਲਾਈਜ਼ੇਸ਼ਨ) ਅਤੇ ਵਿੱਤੀ ਖੇਤਰ ਵਿੱਚ ਗਵਰਨੈਂਸ ਨਾਲ ਜੁੜੇ ਕਦਮਾਂ ਨੂੰ ਅੱਗੇ ਵਧਾਇਆ।

ਰਾਜੀਵ ਕੁਮਾਰ ਨੇ ਵੱਡੇ ਕਰਜ਼ਿਆਂ ਦੀ ਨਿਗਰਾਨੀ ਲਈ ਵਿਸ਼ੇਸ਼ ਪ੍ਰਣਾਲੀ ਲਾਗੂ ਕਰਨ ਅਤੇ ਤਕਨਾਲੋਜੀ ਅਧਾਰਿਤ ਰਿਸਕ ਅਸੈਸਮੈਂਟ ਸਿਸਟਮ ਸ਼ੁਰੂ ਕਰਨ ਵਿੱਚ ਵੀ ਯੋਗਦਾਨ ਦਿੱਤਾ, ਜਿਸ ਨਾਲ ਬੈਂਕਾਂ ਵਿੱਚ ਗਵਰਨੈਂਸ, ਰਿਸਕ ਮੈਨੇਜਮੈਂਟ ਅਤੇ ਰੈਗੂਲੇਟਰੀ ਨਿਗਰਾਨੀ ਮਜ਼ਬੂਤ ਹੋਈ।

ਰਾਜੀਵ ਕੁਮਾਰ ਭਾਰਤ ਦੇ 25ਵੇਂ ਮੁੱਖ ਚੋਣ ਆਯੁਕਤ ਵਜੋਂ ਵੀ ਸੇਵਾ ਨਿਭਾ ਚੁੱਕੇ ਹਨ। ਉਹ 15 ਮਈ 2022 ਤੋਂ 18 ਫਰਵਰੀ 2025 ਤੱਕ ਇਸ ਅਹੁਦੇ 'ਤੇ ਰਹੇ।