ਤਾਂਬੇ ਦੀਆਂ ਕੀਮਤਾਂ ’ਚ ਲੱਗੀ ਅੱਗ, ਟੁੱਟੇ ਸਾਰੇ ਰਿਕਾਰਡ! ਜਾਣੋ ਭਾਰਤ ’ਤੇ ਕੀ ਹੋਵੇਗਾ ਇਸ ਦਾ ਸਿੱਧਾ ਅਸਰ

ਬਿਜ਼ਨਸ ਡੈਸਕ, ਨਵੀਂ ਦਿੱਲੀ : ਸੋਮਵਾਰ ਨੂੰ ਤਾਂਬੇ ਦੀਆਂ ਕੀਮਤਾਂ ਰਿਕਾਰਡ ਉੱਚਾਈ ’ਤੇ ਪਹੁੰਚ ਗਈਆਂ। ਇਸ ਦੀ ਵਜ੍ਹਾ ਅਮਰੀਕਾ ਤੋਂ ਬਾਹਰ ਸਪਲਾਈ ’ਚ ਕਮੀ ਆਉਣ ਦੀ ਸੰਭਾਵਨਾ ਦੇ ਚੱਲਦਿਆਂ ਖਰੀਦਦਾਰੀ ’ਚ ਵਾਧਾ ਤੇ ਡਾਲਰ ਦੇ ਕਮਜ਼ੋਰ ਹੋਣ ਕਾਰਨ ਬਾਜ਼ਾਰ ’ਚ ਬਣਿਆ ਸਕਾਰਾਤਮਕ ਮਾਹੌਲ ਰਿਹਾ। ਰਿਪੋਰਟਾਂ ਮੁਤਾਬਕ ਟ੍ਰੇਡਰਾਂ ਨੇ ਦੱਸਿਆ ਕਿ ਸੋਮਵਾਰ ਨੂੰ ਅਮਰੀਕਾ ’ਚ ਛੁੱਟੀ ਹੋਣ ਕਾਰਨ ਟ੍ਰੇਡਿੰਗ ਵਾਲਿਊਮ ਘੱਟ ਰਿਹਾ ਤੇ ਬਾਜ਼ਾਰ ਦਾ ਮੁੱਖ ਧਿਆਨ ਤਾਂਬੇ ਤੇ ਜ਼ਿੰਕ ’ਤੇ ਰਿਹਾ।

ਕੀਮਤ ਕਿੰਨੀ ਪਹੁੰਚ ਗਈ?

ਲੰਡਨ ਮੈਟਲ ਐਕਸਚੇਂਜ (LME) ’ਤੇ ਬੈਂਚਮਾਰਕ ਤਾਂਬੇ ਦੀ ਕੀਮਤ 14,533 ਡਾਲਰ ਪ੍ਰਤੀ ਮੈਟ੍ਰਿਕ ਟਨ ਦੇ ਰਿਕਾਰਡ ਪੱਧਰ ’ਤੇ ਪਹੁੰਚ ਗਈ। ਇਸ ਨੇ ਜਨਵਰੀ ’ਚ ਬਣੇ 14,527.50 ਡਾਲਰ ਦੇ ਪਿਛਲੇ ਆਲ-ਟਾਈਮ ਹਾਈ ਨੂੰ ਪਿੱਛੇ ਛੱਡ ਦਿੱਤਾ। ਬਾਅਦ ’ਚ ਇਸ ਦੀ ਤੇਜ਼ੀ ਥੋੜ੍ਹੀ ਘੱਟ ਹੋਈ ਤੇ ਕੀਮਤ 14,518 ਡਾਲਰ ਰਹਿ ਗਈ, ਜੋ ਲਗਭਗ 0.7% ਵੱਧ ਸੀ। ਹਾਲਾਂਕਿ, ਹੁਣ ਸਵੇਰੇ ਅੰਤਰਰਾਸ਼ਟਰੀ ਬਾਜ਼ਾਰ ’ਚ ਤਾਂਬੇ ਦਾ ਰੇਟ 1.17% ਦੀ ਤੇਜ਼ੀ ਨਾਲ 14,539.65 ਡਾਲਰ ਪ੍ਰਤੀ ਟਨ ਦੇ ਪੱਧਰ ’ਤੇ ਦਿਖਾਈ ਦੇ ਰਿਹਾ ਹੈ।

ਇੰਪੋਰਟ ਟੈਰਿਫ ਤੋਂ ਬਾਅਦ ਬਦਲੇ ਹਾਲਾਤ

ਪਿਛਲੇ ਸਾਲ ਫਰਵਰੀ ’ਚ ਜਦੋਂ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੇ ਪਹਿਲੀ ਵਾਰ ਇੰਪੋਰਟ ਟੈਰਿਫ ਲਗਾਉਣ ਦੀ ਗੱਲ ਕੀਤੀ ਸੀ, ਉਸ ਸਮੇਂ ਤੋਂ ਟ੍ਰੇਡਰ ਤੇ ਪ੍ਰੋਡਿਊਸਰ ਵੱਡੀ ਮਾਤਰਾ ’ਚ ਤਾਂਬਾ ਅਮਰੀਕਾ ਭੇਜ ਰਹੇ ਹਨ। ਇਸ ਸਮੇਂ COMEX ’ਤੇ ਤਾਂਬੇ ਦਾ ਸਟਾਕ 766,795 ਸ਼ਾਰਟ ਟਨ, ਯਾਨੀ ਲਗਭਗ 695,624 ਮੈਟ੍ਰਿਕ ਟਨ ਦੇ ਰਿਕਾਰਡ ਪੱਧਰ ’ਤੇ ਹੈ।

ਟੈਰਿਫ ਨੂੰ ਲੈ ਕੇ ਅਨਿਸ਼ਚਿਤਤਾ ਬਰਕਰਾਰ

ਮੀਡੀਆ ਰਿਪੋਰਟਾਂ ਮੁਤਾਬਕ ਮਾਹਰਾਂ ਦਾ ਕਹਿਣਾ ਹੈ ਕਿ ਟੈਰਿਫ ਨੂੰ ਲੈ ਕੇ ਅੱਗੇ ਕੀ ਹੋਵੇਗਾ, ਇਹ ਕਹਿਣਾ ਮੁਸ਼ਕਲ ਹੈ। ਪਰ ਜਦੋਂ ਤੱਕ ਇਹ ਅਨਿਸ਼ਚਿਤਤਾ ਬਣੀ ਰਹੇਗੀ, ਉਦੋਂ ਤੱਕ ਤਾਂਬੇ ਦੀਆਂ ਕੀਮਤਾਂ ਉੱਚੀਆਂ ਰਹਿਣ ਦੀ ਸੰਭਾਵਨਾ ਹੈ, ਕਿਉਂਕਿ ਮੈਟਲ ਦੀ ਸਪਲਾਈ ਅਮਰੀਕਾ ਵੱਲ ਜਾਂਦੀ ਰਹੇਗੀ। ਲੰਬੇ ਸਮੇਂ ਦੇ ਕੰਟਰੈਕਟਾਂ ਦੇ ਮੁਕਾਬਲੇ ਸ਼ਾਰਟ-ਟਰਮ ਕੰਟਰੈਕਟਾਂ ਲਈ ਵੱਧ ਪ੍ਰੀਮੀਅਮ (ਜਿਸ ਨੂੰ ਬੈਕਵਰਡੇਸ਼ਨ ਕਿਹਾ ਜਾਂਦਾ ਹੈ) ਹੋਣ ਕਾਰਨ ਕੁਝ ਤਾਂਬਾ ਵਾਪਸ LME ’ਚ ਆ ਰਿਹਾ ਹੈ। ਡਿਲਿਵਰੀ ਲਈ ਤੈਅ ਮੈਟਲ ਨੂੰ ਦਰਸਾਉਣ ਵਾਲੇ ਕੈਂਸਲਡ ਵਾਰੰਟ 51% ’ਤੇ ਰਹੇ। ਇਸ ਤੋਂ ਅੰਦਾਜ਼ਾ ਲਗਾਇਆ ਜਾ ਰਿਹਾ ਹੈ ਕਿ ਆਉਣ ਵਾਲੇ ਕੁਝ ਹਫ਼ਤਿਆਂ ’ਚ 1,21,000 ਟਨ ਤੋਂ ਵੱਧ ਤਾਂਬਾ LME ਸਿਸਟਮ ਤੋਂ ਬਾਹਰ ਜਾ ਸਕਦਾ ਹੈ।

ਅਗਸਤ ਦੇ ਮੱਧ ’ਚ ਤਿੰਨ ਮਹੀਨੇ ਦੇ ਫਾਰਵਰਡ ਕੰਟਰੈਕਟ ਦੇ ਮੁਕਾਬਲੇ ਕੈਸ਼ ਕਾਪਰ ਦਾ ਪ੍ਰੀਮੀਅਮ 430 ਡਾਲਰ ਪ੍ਰਤੀ ਟਨ ਤੋਂ ਉੱਪਰ ਚਲਾ ਗਿਆ ਸੀ, ਜੋ 2021 ਤੋਂ ਬਾਅਦ ਸਭ ਤੋਂ ਉੱਚਾ ਪੱਧਰ ਸੀ। ਸ਼ੁੱਕਰਵਾਰ ਨੂੰ ਇਹ ਲਗਭਗ 74 ਡਾਲਰ ’ਤੇ ਬੰਦ ਹੋਇਆ।

ਭਾਰਤ ’ਤੇ ਕੀ ਹੋਵੇਗਾ ਅਸਰ?

ਤਾਂਬੇ ਦੀਆਂ ਵਧਦੀਆਂ ਕੀਮਤਾਂ ਕਾਰਨ ਮੈਨਿਊਫੈਕਚਰਿੰਗ ਦੀ ਲਾਗਤ ਵਧ ਜਾਂਦੀ ਹੈ ਤੇ ਇੰਫ੍ਰਾਸਟ੍ਰਕਚਰ ਪ੍ਰੋਜੈਕਟਾਂ ਦਾ ਬਜਟ ਵੀ ਵਧ ਸਕਦਾ ਹੈ। ਭਾਰਤ ਆਪਣੀ ਰਿਫਾਈਂਡ ਕਾਪਰ ਦੀ ਲੋੜ ਦਾ ਵੱਡਾ ਹਿੱਸਾ ਆਯਾਤ ਰਾਹੀਂ ਪੂਰਾ ਕਰਦਾ ਹੈ। ਇਸ ਦਾ ਮਤਲਬ ਹੈ ਕਿ ਜੇਕਰ ਗਲੋਬਲ ਪੱਧਰ ’ਤੇ ਤਾਂਬੇ ਦੀਆਂ ਕੀਮਤਾਂ ਰਿਕਾਰਡ ਉੱਚਾਈ ’ਤੇ ਪਹੁੰਚਦੀਆਂ ਹਨ, ਤਾਂ ਭਾਰਤ ਨੂੰ ਇਸ ਲਈ ਵੱਧ ਵਿਦੇਸ਼ੀ ਮੁਦਰਾ ਖਰਚ ਕਰਨੀ ਪਵੇਗੀ। ਇਸ ਨਾਲ ਦੇਸ਼ ਦਾ ਵਪਾਰ ਘਾਟਾ ਵਧ ਸਕਦਾ ਹੈ। ਘਰੇਲੂ ਬਾਜ਼ਾਰ ’ਚ ਵੀ ਤਾਂਬੇ ਦੇ ਫਿਊਚਰਜ਼ ਦੀ ਕੀਮਤ 1,379 ਰੁਪਏ ਪ੍ਰਤੀ ਕਿਲੋਗ੍ਰਾਮ ਤੋਂ ਉੱਪਰ ਜਾਣ ਨਾਲ ਇਸ ਦਾ ਸਿੱਧਾ ਅਸਰ ਉਦਯੋਗਾਂ ਤੇ ਖਪਤਕਾਰਾਂ ’ਤੇ ਪੈ ਸਕਦਾ ਹੈ।