ਸੋਨਾ ਖਰੀਦਣ ਵਾਲਿਆਂ ਲਈ ਵੱਡਾ ਅਪਡੇਟ ! Gold Hallmarking Fee 'ਚ 66.7% ਦਾ ਵਾਧਾ, ਹੁਣ ਗਹਿਣਿਆਂ 'ਚ ਲੱਗੇਗਾ ਨਵਾਂ ਚਾਰਜ

ਬਿਜ਼ਨਸ ਡੈਸਕ, ਨਵੀਂ ਦਿੱਲੀ: ਤਿਉਹਾਰੀ ਅਤੇ ਵਿਆਹਾਂ ਦੇ ਸੀਜ਼ਨ ਤੋਂ ਐਨ ਪਹਿਲਾਂ ਸੋਨਾ ਖਰੀਦਣ ਵਾਲਿਆਂ ਲਈ ਇੱਕ ਜ਼ਰੂਰੀ ਖ਼ਬਰ ਹੈ। ਭਾਰਤੀ ਮਾਣਕ ਬਿਊਰੋ (BIS) ਨੇ ਸੋਨੇ (Gold) ਦੇ ਗਹਿਣਿਆਂ ਦੀ ਹਾਲਮਾਰਕਿੰਗ ਫੀਸ (Hallmarking fee) 'ਚ ਵੱਡਾ ਵਾਧਾ ਕਰ ਦਿੱਤਾ ਹੈ। ਉਪਭੋਗਤਾ ਮਾਮਲੇ, ਖੁਰਾਕ ਅਤੇ ਜਨਤਕ ਵੰਡ ਮੰਤਰਾਲੇ ਵੱਲੋਂ 'ਭਾਰਤ ਦੇ ਗਜ਼ਟ' 'ਚ ਜਾਰੀ ਕੀਤੇ ਗਏ ਨੋਟੀਫਿਕੇਸ਼ਨ ਅਨੁਸਾਰ, ਇਹ ਨਵੀਂਆਂ ਦਰਾਂ 14 ਸਤੰਬਰ 2026 ਤੋਂ ਪੂਰੇ ਦੇਸ਼ 'ਚ ਲਾਗੂ ਹੋ ਗਈਆਂ ਹਨ।

ਸੋਨੇ ਦੀ ਹਾਲਮਾਰਕਿੰਗ ਹੋਈ ਮਹਿੰਗੀ

ਤਾਜ਼ਾ ਨੋਟੀਫਿਕੇਸ਼ਨ ਮੁਤਾਬਕ, ਗਹਿਣੇ ਵੇਚਣ ਵਾਲਿਆਂ (ਜਵੈਲਰਾਂ) ਵੱਲੋਂ ਮਾਨਤਾ ਪ੍ਰਾਪਤ ਐਸੇਇੰਗ ਅਤੇ ਹਾਲਮਾਰਕਿੰਗ ਕੇਂਦਰਾਂ ਨੂੰ ਦਿੱਤੀ ਜਾਣ ਵਾਲੀ ਸੋਨੇ ਦੀ ਹਾਲਮਾਰਕਿੰਗ ਫੀਸ 'ਚ ਸਿੱਧਾ 66.7% ਦਾ ਵਾਧਾ ਕੀਤਾ ਗਿਆ ਹੈ। ਹੁਣ ਪ੍ਰਤੀ ਸੋਨੇ ਦੀ ਵਸਤੂ (ਆਰਟੀਕਲ) 'ਤੇ ਇਹ ਫੀਸ ₹45 ਤੋਂ ਵਧਾ ਕੇ ₹75 ਕਰ ਦਿੱਤੀ ਗਈ ਹੈ। ਯਾਨੀ ਹੁਣ ਜਵੈਲਰ ਨੂੰ ਹਰ ਇੱਕ ਗਹਿਣੇ ਦੀ ਹਾਲਮਾਰਕਿੰਗ 'ਤੇ ₹30 ਜ਼ਿਆਦਾ ਦੇਣੇ ਪੈਣਗੇ। ਇਸ ਤੋਂ ਇਲਾਵਾ, ਸੋਨੇ ਦੀ ਇੱਕ ਪੂਰੀ ਖੇਪ (Consignment) ਲਈ ਘੱਟੋ-ਘੱਟ ਹਾਲਮਾਰਕਿੰਗ ਫੀਸ ₹200 ਤੈਅ ਕੀਤੀ ਗਈ ਹੈ।

ਚਾਂਦੀ ਦੇ ਗਾਹਕਾਂ ਲਈ ਰਾਹਤ

ਉੱਥੇ ਹੀ ਚਾਂਦੀ (Silver) ਦੇ ਗਹਿਣਿਆਂ ਲਈ ਹਾਲਮਾਰਕਿੰਗ ਦੀ ਫੀਸ ਪਹਿਲਾਂ ਵਾਂਗ ਹੀ ₹35 ਪ੍ਰਤੀ ਵਸਤੂ ਬਰਕਰਾਰ ਰੱਖੀ ਗਈ ਹੈ। ਚਾਂਦੀ ਦੀ ਇੱਕ ਖੇਪ ਲਈ ਘੱਟੋ-ਘੱਟ ਫੀਸ ₹150 ਤੈਅ ਕੀਤੀ ਗਈ ਹੈ।

ਕੀ ਪਹਿਲਾਂ ਵੀ ਹੋਏ ਹਨ ਬਦਲਾਅ?

ਦੱਸ ਦੇਈਏ ਕਿ BIS ਦੇ ਹਾਲਮਾਰਕਿੰਗ ਨਿਯਮ ਪਹਿਲੀ ਵਾਰ 14 ਜੂਨ 2018 ਨੂੰ ਜਾਰੀ ਕੀਤੇ ਗਏ ਸਨ। ਇਸ ਤੋਂ ਬਾਅਦ ਲੋੜ ਅਨੁਸਾਰ ਇਨ੍ਹਾਂ 'ਚ ਕਈ ਵਾਰ ਬਦਲਾਅ ਵੀ ਕੀਤੇ ਗਏ। ਇਸ ਦੇ ਨਾਲ ਹੀ ਪਹਿਲੀ ਸੋਧ 12 ਅਕਤੂਬਰ 2018 ਨੂੰ ਕੀਤੀ ਗਈ ਸੀ, ਇਸ ਤੋਂ ਬਾਅਦ 27 ਅਕਤੂਬਰ 2021 ਅਤੇ 4 ਮਾਰਚ 2022 ਨੂੰ ਨਿਯਮਾਂ 'ਚ ਬਦਲਾਅ ਹੋਇਆ ਸੀ। ਹੁਣ 14 ਸਤੰਬਰ 2026 ਨੂੰ ਕੀਤਾ ਗਿਆ ਬਦਲਾਅ ਇਸ ਨਿਯਮ 'ਚ ਚੌਥੀ ਸੋਧ ਮੰਨਿਆ ਜਾ ਰਿਹਾ ਹੈ।

ਗਾਹਕਾਂ 'ਤੇ ਕੀ ਪਵੇਗਾ ਅਸਰ?

ਭਾਰਤ 'ਚ ਸੋਨੇ ਦੇ ਗਹਿਣਿਆਂ ਦੀ ਸ਼ੁੱਧਤਾ ਯਕੀਨੀ ਬਣਾਉਣ ਲਈ ਹਾਲਮਾਰਕਿੰਗ ਲਾਜ਼ਮੀ ਹੈ। ਕਿਉਂਕਿ ਹੁਣ ਜਵੈਲਰਜ਼ ਲਈ ਪ੍ਰਤੀ ਗਹਿਣਾ ਹਾਲਮਾਰਕਿੰਗ ਦੀ ਲਾਗਤ ₹30 ਵਧ ਗਈ ਹੈ, ਇਸ ਲਈ ਉਹ ਇਸ ਵਾਧੂ ਖਰਚੇ ਨੂੰ ਗਾਹਕਾਂ ਦੇ ਫਾਈਨਲ ਬਿੱਲ 'ਚ ਜੋੜ ਸਕਦੇ ਹਨ।

ਮੰਨ ਲਵੋ ਕਿਸੇ ਜਵੈਲਰ ਨੇ 50 ਸੋਨੇ ਦੇ ਗਹਿਣਿਆਂ ਦੀ ਹਾਲਮਾਰਕਿੰਗ ਕਰਵਾਉਣੀ ਹੈ। ਜੇਕਰ ਫੀਸ ₹45 ਤੋਂ ਵਧ ਕੇ ₹75 ਹੋ ਜਾਂਦੀ ਹੈ, ਤਾਂ ਪਹਿਲਾਂ ਉਸ ਨੂੰ ₹2,250 ਦੇਣੇ ਪੈਂਦੇ ਸਨ। ਹੁਣ ਇਹੋ ਖਰਚਾ ਵਧ ਕੇ ₹3,750 ਹੋ ਜਾਵੇਗਾ।